Jisas yali ommo nu 4,000 uma
(Matyu 15.32-39)
8
Empo taim namo,
uma pinuma mingklari wamo noloni ka nemnoku kore naine.
Ka ommo ploli fai nu nonene sa onne.
Nanrona fane Jisas youw disaipol woneni noloni wu ka wu yirengkle nu nanrona,
2 “Ki sam wolkaule nu pinuma.
Ki kakle nu maime kaire plainrikera ka mee nu fei nungkam ompla wongke fai nu ese no.
3 La empo ki fei kali nu ommo fai none ka ki kawale nu painri sa plai empo nu ese nama auraure ka firipanro rokoi.
Plai empo nu namo,
mokoi nunini sa amon feifei.”
4 Ka nu disaipol woneni naline wu kore nanrona,
“Koii mee uma fei naine!
Ka mu ese mapu ommo pei ka male uma mingklari naimele?”
5 Ka Jisas yalile nu kore nanrona,
“Pone puna bret ploli rongkele nainene?”
Ka nu nireni wu kore nanrona,
“Mu muna 7pla bret ploli nro nainene.”
6 Wu yirengkle uma pinuma mingklari ese naine pike namo ka wu yuꞌpu 7pla bret ploli namo ka yire tenkyu God ka wu yekli bret.
Se sema,
wu yepiyaliye nu disaipol ese nepi nali nu pinuma mingklari namo.
Ka nu disaipol nupene mi wunini.
7 Nu re nuna firela pitiri plainrane nro.
Ka Jisas yire tenkyu God firela namo,
ka yirengkle nu disaipol woneni ese nepi nali nu pinuma.
8 Nu pinuma none paiyi ka nu rengki wamo ka ommo ploli nanaine.
Nu disaipol nemnokune ommo plol ploli namo ka naile panro 7pla nekela imeli.
9 Ka namba empo nu uma fopi empo naine ka nonene namo resuklu 4,000pla pinuma.
Ka kingke,
Jisas yawale nu painri.
10 Ka wampane nro,
Jisas yakle disaipol woneni namo,
nulpanri bot ka painri mokoi wongke nu nouw nanrona Dalmanuta.
Nu uma nire nulu mirakol
(Matyu 16.1-12)
11 Plai empo nu Farisi noloni plele Jisas ka nu nire nane wu nopu mi.
Nanrona fane nu kalnanili ese naline wu yangke mirakol wongke yolo heven empo fika nu wola nanrona nu ese resuklu nanili wu ka yuku alele nanrona wu fei yolowi God.
12 Jisas anine ka wu yire nanrona,
“Empo fikami ka nu uma pinuma empo pike mee noplo mi kelo nu nire nulu mirakol?
Ki kire mi alwone pone nanrona,
ese onne.
Ki ese fei kangke ommo namo nanrona empo pone uma empo pike naimele ese pulu.
Ese onne!”
13 Ka wu yupone nu ka paiyi yulpari kore bot fai wu ese yakle disaipol woneni ese painri kore mokoi repo empo fun Galili.
Yis empo nu Farisi ka empo Herot
14 Nu disaipol empo Jisas samo wolnumalo fei nuꞌpu bret plai kore fai ese resuklu nu none.
Nu nuna bret wokera nro waiye bot noneni.
15 Ka Jisas yirengkle nu mi alele nanrona,
“Pone poo.
Pone ese samo pulupe yis empo nu Farisi ka yis empo Herot.”
16 Ka nu noplo mi iplele none kore ka nire nanrona,
“Mone bret onnele,
nanrona fane wu yire mi namo.”
17 Jisas namale mi nunini ka wu yirengkle nu nanrona,
“Empo fikami ka pone ke piflipaplo poplo mi pone kore ka pire pone bret onne?
Pone fei namale ka pone re fei namale wee?
Puna ka wola poneni sa ro kelo wamo fane?
18 Pone empo nama plau,
ka pone fei samo pulu ompla wee?
Pone empo ripi plau ka pone fei samo pupu mi wee?
Anro pone wolpumalo pu wee?
19 Empo ki kekli 5pla bret ploli ka pone pepi nu 5,000pla uma none namo,
nekela rongkele sa pone paile ommo plol ploli empo naine namo?”
Ka nu nimpone mi wunini nanrona,
“12pla nekela imeli.”
20 Ka Jisas yalile kore nu nanrona,
“Empo ki kekli 7pla bret ploli ka pone pepipali 4,000pla uma namo ka nu rengki ka bret plai nanaine,
pone panpalo nekela rongkele empo imeli?”
Ka nu nimpone mi wunini nanrona,
“7pla nekela imeli.”
21 Ka wu yalile nu nanrona,
“Ka pone wone fei samo namale ompla namo wee?”
Jisas yemplekuru mana nama yufona empo Betsaida uporo kore
22 Jisas yakle disaipol woneni namo noloni plele taun Betsaida ka nu uma plai nem mana wongke nama wowo noloni plele wu ka nu naline plau wolnaule Jisas ese mew yaune wu.
23 Jisas yuna mew wunini ka yumane wu yane painri naine as amone mokoi namo,
ka wu rofoyefu nama wowo empo mana namo ka yina mew riri wu ka yaline wu nanrona,
“Yene resuklu yulu ommo wee onnele?”
24 Ka mana nama wowo namo yinra pari riri ka yireni Jisas nanrona,
“Yei,
ki kulu uma.
Ka nu sa yukaile ilo rona naraine poinpanrene.”
25 Ka Jisas mew raune nama wunini kore.
Ka empo taim namo nama wunini feingkyane kei ka wu samo yulu ommo uporo.
26 Ka Jisas yireni wu ese paiyi mow wunini ka re wu yire mi kelo wu nanrona,
“Ese mee,
yene faa paiyi kore mokoi Betsaida ka yulu nu uma mingklari namo.”
Pita yire mi alwone nanrona Jisas wu sa Krais
(Matyu 16.13-16; Luk 9.18-20)
27 Jisas yakle nu disaipol woneni nemei ka painri mokoi mokoi empo naine eklene taun Sisaria Filipai.
Ka empo nu painrine rokoi namo,
Jisas yalile nu disaipol woneni namo nanrona,
“Pone pire ki,
nu uma fai nire ki sa fina?”
28 Ka nu disaipol nimpone mi wunini nanrona,
“Plai fai nire nanrona yene Jon Empo Baptais.
Ka nu uma plai fai nire yene profet Elaija.
Ka uma plai fai nire nanrona yene sa profet wongke empo isi.”
29 Ka Jisas yalile nu disaipol woneni kore nanrona,
“Ka pone won pire ki sa fina?”
Ka Pita yimpone mi wunini kore nanrona,
“Yene sa Krais.”
30 Ka Jisas yali mi kelo nu nanrona,
“Pone ese fei samo pireni mana wongke empo mi namo.”
Jisas yoplo mi empo wu ese ri ka yemei kore
(Matyu 16.21-28; Luk 9.22-27)
31 Ka empo kaire namo,
Jisas won yukule nu disaipol woneni eni mingklari kingke ese nemei wu.
Wu yoplongkle nu nanrona,
“Auna empo Mana ese yungkam eni mingklari ka nu ilamana,
ka nu bikpris empo tempol,
ka nu tikse empo lo ese samo kuma nane wu.
Ka uma plai ese nufu wu ri ka kaire plainrikera se,
wu ese yemei kore.”
32 Wu samo yoplo mi alele namo nu.
Ka Pita yumane wu yane painri repo ka wu yenre Jisas.
33 Ka Jisas yensona ka nama paiyi nu disaipol plai namo ka yenre Pita ka yireni wu nanrona,
“Satan,
yene yimane ki!
Wolpuna empo yene yunaye namo seke God ni,
sa wolpuna empo nu uma.”
34 Ka Jisas youw nu disaipol nakle nu uma mingklari namo noloni wu ka wu yirengkle nu nanrona,
“Uma nire nupene ki,
ese wolyuma wone kore ka yongkole kruse woneni ka yupene ki.
35 La empo mana mew yukairi laip woneni,
sa laip woneni ese fafaile.
La empo mana fei yukairi laip woneni ka wu ese yupene ki ka wu ese wolrufu miuporo,
laip wunini ese samo uporo ka ese fei fafaile.
36 La empo mana yuna ommo mingklari empo pike mee,
ka kingke ommo namo ese nangke wu pekini,
ommo mingklari empo pike mee ese nangke ommo fika uporo wunini?
37 Empo fika,
mana ese fei resuklu yuꞌpu ompla wongke ka yane God ese yuꞌpu laip ese samo naine nanrona nanrona.
38 Empo pike ewele mee,
uma mingklari fai kuma nane God ka nangkana ommo plai yukaine nale nanrona fei uporo nama empo God,
ka nale fafaile nu won nangkene namo sa yisyoli nu ka yangke nu nemei fafaile yukaine nu uma empo pamok.
La empo mana wongke flemulu ki ka mi kinini,
Auna empo Mana re ese flemulu mana namo empo kaire empo nu holi ensel nane wu noloni plau glori empo Aina woneni.”