Lo empo God yumalo ila empo mana
(Matyu 15.1-20)
7
Plai empo nu Farisi nakle nu tikse empo lo nupone taunwamo Jerusalem ka noloni nane Jisas nemnoku.
2 Ka nu nulu plai empo nu disaipol woneni won none plau mew kiina nama empo God.
Namo empo fika,
nu fei nupene nale fai naklelene mew noneni sa ese no ommo
3 Empo fika,
nu Farisi ka nu Juda namo fai nupene nale empo flili noneni ese nupene,
nu ese fei no ommo empo nu fei naklele mew noneni.
4 Empo nu painri maket ka noloni kore,
nu ese fei no ommo paiyila nu naklele mew noneni.
Nu fai nupenene lo mingklari kore re empo nu isi nemne nu flili noneni,
yukaine nanrona,
nu ese naklelene kap ka mangkam,
dis ka koii nu fai naine ka none ommo.
5 Nanrona fane nu Farisi ka nu tikse empo lo namo naline Jisas nanrona,
“Empo fikami ka nu disaipol yeneni fei nupene nale moneni empo mem nu flili moneni?
Mew nunini kiina nama empo God ka nu nonene ommo.”
6 Ka Jisas yire mi kore nu nanrona,
“Profet Aisaia yire mi alwone pone uma namo.
Pone uma ila wongkwongkeni,
yukaine wu yeꞌre mi nanrona,
‘God yire nanrona,
“Uma namo fai kalnosinane ki reꞌfa nro,
ka wolpuna nunini waiye amone ki.
7 Nanrona fane empo fikami nu fai nosinane ki?
Nu fai nukule nu uma lo empo nu uma nro.” ’ ”
8 “Pone pupone lo empo God ka pone puna kelo nale empo mana nro.”
9 Ka Jisas yirengkle nu kore nanrona,
“Pone samo namale nale fai pumpe lo empo God ka pupene rokoi poneni.
10 Moses yire nanrona,
‘Yene ese yangke nale uporo yene aina ka ama yeneni.’
Ka ‘fina fai yire mi fafaile nangka ka moka woneni,
pone ese pufu wu ri.’
11 Ka,
pone fai pire nanrona,
‘La empo mana wongke yum fei yopane nangka ka moka woneni,
sa wu ese yireni wuyane nanrona,
“Ommo mingklari kinini namo,
ki kina pu kire kane paiyi God.a” ’
12 Nanrona fane empo taim namo ka paiyi,
pone mi paule mana namo ese fei mewmew nangka ka moka woneni.
13 Ka nale namo empo pone pupenepe nale empo pone pem nu flili empo isi oiya,
fai nangke pone pangkome mi empo God paiyi amone kei.
Ka pone fai pangke nale plai kore fai samo yukaine namo.”
Ommo fai yangke nu uma fei namkile nama empo God
14 Jisas youw pinuma mingklari fopi empo nemnoku nainene namo ese nale noloni eklene wu ka wu yirengkle nu nanrona,
“Pone mingklari ese samo pupu mi mee ki ese koplo namo ka pem nomu empo mi mee.
15-16 Ompla fika empo naine moile ka mana yem pouw palo wolpuna,
ompla namo ese fei yangke mana wolpuna kiina nama empo God,
onne.
Ka,
ommo empo naine mana wolpuna ka nolo moile,
plai empo ommo namo ese yangke mana fei namkile wamo nama empo God.b”c
17 Ka empo wu yoplongkle nu pinuma pekimo,
wu yupole nu ka paipali mow monre.
Ka empo taim namo,
disaipol woneni naline wu ese yirengkle nu nomu empo mi riri namo.
18 Ka wu yirengkle nu nanrona,
“Pone re fei pem nomu empo mi kinini namo wee?
Ommo fika wongkwongkeni naine moile ka yene wo wee yaikowo,
ommo namo fei resuklu yangke yene kiina nama empo God.
19 Ompla namo fei palo wiye wola empo mana,
onnele.
Ompla namo fai waiye puna ka fai yolo moile kore empo wu waile pon.”
Ka empo mi plola namo Jisas yoplo alele mone nanrona ommo wongkwongkeni mingkla fai none namo,
God yulu ompla nanrona sa namkile nama empo wu.
20 Ka Jisas yirengkle nu kore nanrona,
“Ommo fika empo naine mana ka nolo moile namo,
fai nangke mana kiina nama empo God.
21 Ommo fika naine wolpuna empo mana namo,
ommo namo fai yereryane wu ese yangke nale namo yukaine,
nale pamok,
peki nuꞌpu ommo,
nufu mana ri,
wola fafaile,
22 nale empo fai pamok plau nu uma empo nemnuꞌpu pu namo,
nampalo,
nangke nale fafaile wongkwongkeni,
nale fai kalnire,
wewela ka fongklole kei,
wolpuna fafaile,
yoko mi uma plai,
nereri noula noneni,
nale fai naraine ririyen nro.
23 Nale fafaile wongkwongkeni namo fai naine mana ka nolo moile ka nangke mana kiina nama empo God.”
Pin empo distrik Fonisia empo provins Siria empo bilipim Jisas
(Matyu 15.21-28)
24 Jisas yemei ka paiyi mokoi wongke eklene empo taunwamo nu nouw Tair.
Wu paiyi waiye mow wongke ka wu yumplewa fai nu uma ese fei namale nanrona wu waiye mow namo.
Ka wu fei resuklu peki waiye,
samo onne.
25 Pin wongke yem mi nanrona Jisas sa waiye mow namo.
Ka pin namo fai samo wolyane mela pin wunini namo,
opola fafaile empo yangkana wu.
Nanrona fane wu wampane yolowi ka yekli fufula eklene rew empo Jisas.
26 Pin namo seke uma Juda pin.
Uma mingklari woneni namo,
fei namale mi empo God.
Nu nem wu distrik Fonisia empo provins Siria.
Ka wu fai yoplo mi “Grik.”
Wu yire plau wolyaule wamo Jisas ese yuꞌpole opola fafaile fai konraloye mela pin woneni namo.
27 Ka Jisas yimpone mi wunini nanrona,
“Mu ese mane ommo fai none paiyi kongkom se.
Fei uporo empo mone mem ommo empo nu kongkom ka mingkirpanro pala.d”
28 Ka pin namo yimpone mi wunini nanrona,
“Manawamo,
pala naine angklomoile empo tebol re nonene ommo rola empo kongkom aure nangke ka firipanro angklomoile empo tebol.”
29 Ka Jisas yimpone mi wunini nanrona,
“Mi yeneni sa won alwone.
Nanrona fane naimele yene ese paiyi kore mow yeneni.
Opola fafaile namo fai konraloye mela pin yeneni,
sa yupone wu ka paiyile pu.”
30 Pin namo,
paiyi kore mow ka yulu mela pin woneni namo,
samo wile koii woneni ka opola fafaile namo yupone wu ka paiyi pu.
Jisas yemplekuru mana empo refa ka ripi uku
(Matyu 15.29-31)
31 Jisas yemei kore ka yupone koii plola empo taun Tair,
ka paiyi distrik empo taun Saidon.
Ka wu asa paiyi mokoi plola empo Dekapolis,
ka paiyi plele fun wamo Galili.
32 Uma plai nongkole mana wongke ripi uku ka fei samo yoplo mi namo noloni Jisas.
Ka nu nire plau wolnaule wamo Jisas ese mew yaune mana namo ka wu ese uporo kore.
33 Ka Jisas yumane wu ka yane painri naine amone uma plai namo,
ka wuyane nro nainene.
Ka wu yina mewmempi plainrane wunini paiyi ripi pulale plainrane empo mana namo.
Se sema wu mew yem rofo woneni namo ka paiyi yoku nongkola empo mana namo.
34 Ka Jisas yinra pari heven ka yiyene wiin kelo ka yire mana namo nanrona,
“Efata.”
Nomu empo mi namo “Efata” sa nanrona,
“Ripi ka reꞌfa yeneni sa ikoiyi.”
35 Ka wampane nro,
mana namo ripi ka reꞌfa wunini ikoiyi ka wu samo yoplo mi.
36 Ka Jisas mi yaule uma mingklari nulu ommo namo ese fei noplo mi uma plai empo ompla wu yangke namo.
Wu yoplo mi mingklari kore fai mi yaule nu ese fei noplo mi empo ompla namo.
Ka nu neingklonane mi ka uma mingklari nupu.
37 Empo uma mingklari nupu mi empo ompla wu yangke namo,
nu mi onnele.
Kingke se,
nu nire mi nanrona,
“Ommo mingklari wongkwongkeni wu yangke namo,
wu fai samo yangke uporo.
Wu fai yemplekuru nu uma ripi uku fai nupu mi ka uma reꞌfa kungku fai noplone mi.”