Jisas yawale nu 72 uma painri
10
Se,
Manawamoa yuꞌpu nu 72 uma kore ka wu yawale nu plainre plainre risi painri taun ka mokoi empo wu wola yire paiye.
2 Wu yirengkle nu nanrona,
“Ommo mingklari empo nengklele namo puno pu,
ka uma empo fai naulerene,
sa fei mingklari.
Nanrona fane pone paline Manawamo empo ommo nengkle namo sa wu ese yawale nu uma ese painri naulere ommo namo woneni.
3 Pone paipi!
Pupu,
ki kawale pone paipi yukaine sipsip aure paipi koii empo ampala fai neline.
4 Pone ese fei pungkam ompla fai paile romaula poneni,
pone fai pungkam ompoi ka pungkam sandel poneni.
Ka pone re ese fei pakle uma poplole mi empo pone paipipe rokoi.
5 “Empo pone paipi papli mow wongke,
emen plau pone ese pire nanrona,
‘Nu uma empo mow mee ese waiye plau woluporo!’
6 La woluporo empo yeye mana empo mow namo,
sa wu ese yem mi empo pone pirenipe wu namo.
La onne,
sa mi empo pone pirenipe wu namo ese yolowi kore pone.
7 Pone ese paipe mow namo nro po ka paikolpo ommo fika empo nu nape pone,
empo fika,
mana empo yangke ommo namo sa ese yem ommo yukaine wone fai yangkeye.
Pone fai paipi mowmow,
pone ese paipe mow namo nro.
8 “La pone paipi taun wongke ka nu woluporo pone,
sa pone as po ompla empo nu nape pone.
9 Pone ese pemplekuru nu uma empo nenrinine naine mokoi namo nemei uporo,
ka pone ese pirengkle nu nanrona,
‘Kingdom empo God sa yolowi ekleneye pone.’
10 La pone paipi taun wongke ka nu fei woluporo pone,
sa pone ese paipi rokoi empo nu ka pire nanrona,
11 ‘Pike roli empo taun poneni yangkana rew munini,
fane mu ese muflorai rew ese muku pone empo pone fei wolyapaye mi empo God.
Ka pone samo wolrufu ompla mee,
kingdom empo God sa yolowi ekleneye.’
12 Ki kire mi alwone pone nanrona,
kingke God yale eni paiyi nu uma empo taun Sodom,b
ese fei yemei wamo yukaine eni empo nu uma empo taun namo ese nem empo nu fei wolnane mi empo God.
Nu pinuma fei nenmaire wolpuna namo ese wolnaule wamo
(Matyu 11.20-24)
13 “Pone pinuma empo taun Korasin.
Ka pone pinuma empo taun Betsaidac re eni sa poneni.
Empo fika,
mirakol isi ki kangkeke namo,
la mana wongke isi paiyi yangke mirakol taun Tair ka Saidon,d
sa nu uma ese nensona wolpuna ka naflam ampoli ka panro naine nipi kuse.
14 God ese kotim nu uma mingklari yukaine eni empo nu uma empo taun Tair ka Saidon sa fei wamo yukaine eni pone ese pem.
15 Ka pone uma empo taun Kaperneam,
pone pire nu ese nereri pone papli heven,
wee?
Ese onne!
Pone ese paplo koii empo nu uma fai rili panrone.
16 “Mana empo yupu mi poneni,
sa yupu mi kinini,
la mana empo kuma yape pone,
sa kuma yake ki.
Ka mana empo kuma yake ki,
sa kuma yane God,
mana empo yawane ki koloki.”
Nu 72 uma mana noloni kore
17 Se nu 72 uma fai noloni kore ka nu woluporo wamo ka nireni Jisas nanrona,
“Manwamo,
nu opola fafaile re nupu mi munini empo mu mouw noula yeneni.”
18 Ka Jisas yirengkle nu nanrona,
“Ki kulu Satan firyolo yukaine nemi empo rariye yolo nemi riri.
19 Ki kape pone kelo fai pone ese punralo umele ka elmane,e
ka pone ese pumalo kelo empo mana yire yangke fafaile pone,
ka ompla wongke ese fei yangke fafaile pone.
20 Ka pone ese fei woluporo nu opola fafaile fai nupu mi poneni,
pone ese samo woluporo God empo yeꞌre noula poneni waiye heven.”
Jisas aiyem ka yire tenkyu God
(Matyu 11.25-27; 13.16-17)
21 Empo Holi Spirit yangke Jisas woluporo ka wu yire nanrona,
“Ki kereri noula yeneni Aina,
Manawamo empo heven ka pike,
empo fika yene pekyenru ommo mingklari empo nu uma ikaklo uporo ka yene yukule nu uma fai naine yukaine kongkom aure.
Yei!
Aina yene yire yangke ommo yukaine empo yene wolaye,
sa yene yangke kei.”
22 Ka Jisas yirengkle nu 72 disaipol nanrona,
“Ommo mingklari Aina mew yimane noloni ki pu.
Auna namo,
mana wongke fei namale wu,
Aina nro.
Aina wu re,
mana wongke fei namale wu,
Auna nro ka nu uma empo Auna yuꞌpuye,
sa wu fai yoplo yukule nu sa nu namale Aina.”
23 Ka wu yenmaire yulu nu disaipol woneni nro ka wu yirengkle nu mi nanrona,
“Nu uma nulu ommo yukaine pone fai pulupe,
nu ese woluporo wamo.
24 Ki kirepi pone nanrona,
empo fika,
nu profet ka nu king mingklari nire fai nulu ommo yukaine empo pone pulupe,
ka nu fei nulu.
Ka nu nire nupu mi yukaine pone fai pupupe ka nu fei nupu.”
Mi riri empo mana uporo empo distrik Samaria
25 Se,
mana wongke empo nu uma namale lo yemei ka ifle yali Jisas mi wongke yire yengkali wu.
Ka wu yaline Jisas nanrona,
“Tikse,
ki ese kangke ompla fika ka kem laip ese ki kaike uporo nanrona nanrona?”
The Good Samaritan (Luk 10:25-37)
26 Ka Jisas fai yireni wu kore nanrona,
“Nu neꞌre mi fika wiye lo?
Yene fai yuluye ka yem mi nomu rongkele?”
27 Ka mana namo yireni Jisas nanrona,
“ ‘Manawamo wu God yeneni,
yene ese samo wolyane wu wamo empo wolpuna yeneni ka spirit yeneni ka kelo yeneni ka wola yeneni.’
Ka,
‘Yene samo wolyane uma empo naine eklenene yene yukaine yene fai wolaye yene kore.’ ”f
28 Ka Jisas yireni wu kore nanrona,
“Mi empo yene yireye namo sa won alwone.
Nanrona fane,
yene ese yangke nanrona sa yene ese waiye nanrona nanrona.”
29 Ka mana empo namale lo yangke nanrona sa nu uma ese nulu wu sa uporo wamo,
ka wu yaline Jisas kore nanrona,
“Ka fopi sa naine eklene ki?”
30 Ka Jisas yireni wu kore nanrona,
“Mana wongke empo waiye Jerusalem ka wu palo paiyi taun Jeriko.
Ka wu wale nu uma plai fafaile ka nu pekinuꞌpu ommo wunini.
Nu ningko ommo papli wunini ka samo nufu wu fafaile wamo yire yangke ese ri,
wola nu nupone wu waiye ka nu painri kei.
31 Pris wongke palo paiyiye rokoi namo,
ka wu yolowi koii empo mana waiyeye namo,
wu nama piyowa nro yulu wu ka wu paiyi rokoi repo ka paiyi kei.
32 “Ka Livai wongke re waraiye yolowi rokoi namo wu yolowi plele koii empo mana waiyeye namo,
wu nama piyowa nro yulu wu ka wu paiyi rokoi repo ka paiyi kei.
33 Ka mana wongke empo Samariag wu re yoku rokoi namo,
palo plele koii empo mana yire yangke ri waiyeye namo.
Ka empo wu yulu wu,
wu wolyaule wamo mana namo.
34 Wu paiyi mana namo yaisilo oli wunini,
ka yaiku wel ka wain palo koii empo muꞌku namo,
ka wu yukalo.
Ka wu yereri mana namo paiyi yina waiye riri empo donkih woneni ka yulune wu paiyi mow hotel wongke ka samo yopane wu.
35 Empo ningkinama wu yem romaula silva plainrane ka yane hotel ripile ka wu yireni wu nanrona,
‘Yene ese yopane wu.
La empo yene yem romaula yeneni ka yopane mana namo,
ka empo ki koloki kore,
ki ese kawe yene romaula empo yene yopaneye mana namo.’ ”
36 Ka Jisas fai yaline mana empo namale lo nanrona,
“Mana plainrikera namo,
fina empo nu sa yolowi eklene ka yangke uporo mana empo uma nufune namo?”
37 Ka mana empo namale lo yireni Jisas nanrona,
“Mana empo wolyaule wu ka mewmew wu.”
Ka Jisas yireni wu kore nanrona,
“Nanrona fane yene re paiyi yangke yukaine nale nanrona.”
Jisas waiye mow empo Marta yane Maria
38 Empo Jisas yakle nu disaipol woneni painrine,
nu painri mokoi wongke.
Empo mokoi namo pin wongke noula wunini Marta woluporo Jisas empo paiyi pari mow wunini.
39 Marta yane pinmela woneni noula Maria.
Maria yolowi waiye eklene rew empo Jisas ka yupu mi empo wu yoploye.
40 Ka Marta sa na wolaye ommo mingklari empo wone yangkeye,
nanrona fane wu yolowi plele Jisas ka yireni wu nanrona,
“Manawamo,
yene fei wolpalo ki wee?
Rino kinini empo yupone ki kangkeke ommo.
Ka ki konekere nro empo kangke ommo wamo empo fai nonene,
fane yene yireni Maria yolowi mewmew plau ki.”