A tas yovalil scꞌulej ebꞌ stan̈vumal chon̈abꞌ
33
Ix yalanxi Jehová dꞌayin icha tic: 2 Ach anima, al dꞌa ebꞌ etisraelal to a in sval icha tic: Ayic svacꞌancot oval dꞌa junoc nación, a ebꞌ anima taꞌ, say ebꞌ mach junoc tzꞌoch yilumaloc ebꞌ. 3 Ayic syilan vin̈ yilumal chiꞌ to van sjavi ebꞌ soldado ajcꞌool, spuꞌan strompeta vin̈ yic scol sbꞌa ebꞌ anima chiꞌ. 4 Tato ay mach max scol sbꞌa ayic tzꞌocꞌ qꞌuen trompeta chiꞌ, axo tzꞌaji smiljicham yuj ebꞌ ajcꞌool chiꞌ, munil aꞌ tzꞌicꞌancot chamel chiꞌ dꞌa yibꞌan̈. 5 Yujto syabꞌ yocꞌ qꞌuen trompeta chiꞌ, palta max scꞌanabꞌajej scolan sbꞌa. Yuj chiꞌ munil aꞌ tzꞌicꞌancot chamel chiꞌ dꞌa yibꞌan̈. Qꞌuinaloc scol sbꞌa jun, max am chamlaj. 6 Palta tato a vin̈ yilumal chon̈abꞌ chiꞌ, syil vin̈ scot ebꞌ ajcꞌool chiꞌ, max spulaj qꞌuen strompeta vin̈ chiꞌ, axo ebꞌ anima max scol sbꞌa ebꞌ, axo sjavi ebꞌ ajcꞌol chiꞌ smilancham ebꞌ anima ebꞌ, a ebꞌ scham chiꞌ, scham ebꞌ yuj smul, palta a schamel ebꞌ chiꞌ scan dꞌa yibꞌan̈ vin̈ stan̈van chiꞌ, xchi Jehová, xa chi.7 Ach anima, a ach ix ach vacꞌoch stan̈vumaloc ebꞌ etchon̈abꞌ Israel. Ayic ol vacꞌan in cachnabꞌil dꞌayach, a achxo ol a cach ebꞌ anima tic in qꞌuexuloc. 8 Tato ol val dꞌayach yuj ebꞌ chuc sbꞌeybꞌal to ol cham ebꞌ yuj smul, palta tato a ach tic man̈ ol al dꞌa ebꞌ, man̈ ol a cach ebꞌ yic syactejcan chucal scꞌulej ebꞌ chiꞌ, yic max cham ebꞌ, qꞌuinaloc scham ebꞌ yuj smul chiꞌ, a dꞌa ibꞌan̈ scan schamel ebꞌ chiꞌ vuuj. 9 Palta tato tzal dꞌa ebꞌ jun, yic sna sbꞌa ebꞌ syactancan schucal ebꞌ chiꞌ, palta max yactejcan ebꞌ sbꞌeybꞌalan chucal chiꞌ, scham ebꞌ yuj smul chiꞌ, a schamel ebꞌ chiꞌ max canlaj dꞌa ibꞌan̈, xchi Jehová dꞌayin.
A Jehová tojol syutej schꞌolbꞌitan anima
10 Ix yalanxi Jehová dꞌayin icha tic: Ach anima, al dꞌa ebꞌ etisraelal chiꞌ icha tic: A ex tic tzeyal icha tic: A val co pitalil yedꞌ co chucal tzꞌecꞌxo val yibꞌan̈, ijan val tzon̈ lajviel yuuj scabꞌi. ¿Tom olto yal co colchaji? xe chi. 11 Palta al dꞌa ebꞌ to a in Dios Yajal in svalaꞌ to malaj in gana scham ebꞌ chuc sbꞌeybꞌal. Palta in gana sqꞌuex sbꞌeybꞌal ebꞌ yic snajatbꞌi sqꞌuinal ebꞌ. Ex israel, actejeccan e chuc bꞌeybꞌal chiꞌ, ¿tas yuj ol ex chamoc? xchi Jehová, xa chi dꞌa ebꞌ.
12 Ach anima, al dꞌa ebꞌ etchon̈abꞌ chiꞌ icha tic: Tato ay ebꞌ vachꞌtaxon sbꞌeybꞌal, axo tzꞌaji scꞌulan chucal ebꞌ, man̈ ol colchajlaj ebꞌ yuj sbꞌeybꞌal vachꞌtaxon chiꞌ. Tato ay ebꞌ te chuctaxon sbꞌeybꞌal, snaan sbꞌa ebꞌ, axo vachꞌil sbꞌeybꞌalej ebꞌ, man̈ ol chamlaj ebꞌ yuj schucal dꞌa yalan̈tax chiꞌ. A pax ebꞌ sbꞌeybꞌalan tojolal, axo tzꞌaji axo man̈ tojoloc sbꞌeybꞌalej ebꞌ, man̈ ol colchajlaj ebꞌ yuj stojolal dꞌa yalan̈tax chiꞌ. 13 Vachꞌchom ix vacꞌ in tiꞌ vacꞌan sqꞌuinal ebꞌ tojol sbꞌeybꞌal chiꞌ, a stojol bꞌeybꞌal ebꞌ chiꞌ syacꞌoch yipoc scꞌool, axo tzꞌaji scꞌulanxi chucal ebꞌ, man̈xalaj yelcꞌoch bꞌaj tojol yutejnac sbꞌeybꞌal ebꞌ chiꞌ, ol chamn̈ej ebꞌ yuj smul chiꞌ. 14 Vachꞌchom ayoch chamel dꞌa yibꞌan̈ ebꞌ chuc scꞌulej vuuj, palta tato sna sbꞌa scꞌol ebꞌ, syactan ebꞌ scꞌulan masanil chucal scꞌulej chiꞌ: 15 Syacꞌan meltzaj ebꞌ tas aycan dꞌay yuj qꞌuen majan tumin, syacꞌanxi meltzaj tastac yelqꞌuejnac ebꞌ, scꞌanabꞌajan in cꞌaybꞌubꞌal ebꞌ, aton yuj vachꞌ tzꞌecꞌ ebꞌ anima, val yel a ebꞌ chiꞌ ol scha sqꞌuinal ebꞌ, man̈ ol chamlaj ebꞌ. 16 Yujto vachꞌxo tas scꞌulej ebꞌ, ayxo sqꞌuinal ebꞌ, man̈xo ol in nacot schucal ebꞌ scꞌulejnac dꞌa yalan̈tax chiꞌ. 17 A ebꞌ etchon̈abꞌ chiꞌ syal ebꞌ to man̈ tojoloc svutej in chꞌolbꞌitan ebꞌ, palta val yel a ebꞌ man̈ tojoloc syutej sbꞌa. 18 Tato ay ebꞌ syactejcan scꞌulan vachꞌil, axo chucal scꞌulej ebꞌ, ol cham ebꞌ yuj tas scꞌulej chiꞌ. 19 Tato a ebꞌ chuc sbꞌeybꞌal sna sbꞌa scꞌool, syactancan schucal ebꞌ chiꞌ, axo vachꞌil scꞌulej ebꞌ yedꞌ tojolal, ol scha sqꞌuinal ebꞌ yuj vachꞌil scꞌulej chiꞌ. 20 Tzeyalanxi icha tic: A Jehová man̈ tojoloc syutej schꞌolbꞌitani, xe chi. Palta a in tic, junjunal tzex in chꞌolbꞌitej, ato syal tas tze cꞌulej, xchi Jehová, xa chi dꞌa ebꞌ.
Ix acꞌji ganar Jerusalén
21 Ayic oyeꞌ cꞌual yoch slajun̈il uj, ayic slajchavil abꞌilxo quicꞌjicot dꞌa Babilonia tic, ay jun vin̈ vinac ix el elelal dꞌa Jerusalén, ix javi vin̈ dꞌayin, ix ul yalan vin̈ to toxo ix acꞌji ganar chon̈abꞌ chiꞌ yuj ebꞌ ajcꞌool. 22 A dꞌa qꞌuicꞌbꞌalil yic manto ja vin̈ chiꞌ, ix yacꞌanem spoder Jehová dꞌa vibꞌan̈. Axo dꞌa qꞌuin̈ibꞌalil ayic ix javi jun vin̈ chiꞌ, ix yalxi in loloni.
A smul ebꞌ anima
23 Ix yalanxi Jehová dꞌayin icha tic: 24 Ach anima, a ebꞌ anima cajan dꞌa juntzan̈ chon̈abꞌ macꞌbꞌilem lan̈naj dꞌa yol yic ebꞌ etisraelal, syal ebꞌ icha tic: A vin̈aj Abraham junn̈ej patil vin̈, palta schanac jun luum tic vin̈ smacbꞌenoc. A on̈xo pax tic jun, tzijtum co bꞌeyi, smoj quicꞌan luum, xchi ebꞌ. 25 Yuj chiꞌ al dꞌa ebꞌ to a in Dios Yajal in sval dꞌa ebꞌ icha tic: A ex tic tze chi nocꞌ chibꞌej yedꞌ schiqꞌuil. Tzex och ejmelal dꞌa yechel comon dios, tze milancham anima, tze comon nibꞌan eyicꞌan jun luum tic. 26 Tzeyixtan ebꞌ eyetanimail yedꞌ eyespada. Tze cꞌulan tas yajbꞌentac, tzex mulan yedꞌ ebꞌ ix ix ay yetbꞌeyum. Slajvi chiꞌ tze comon nibꞌan eyiquej jun lum luum chiꞌ, xchi Jehová, xa chi dꞌa ebꞌ.
27 Tzalanpax dꞌa ebꞌ to a in Jehová Yajal in sval icha tic dꞌa yibꞌan̈ ebꞌ: A ebꞌ cajan dꞌa juntzan̈ chon̈abꞌ macꞌbꞌilem lan̈najoc, ol miljocpaxcham ebꞌ. Axo ebꞌ cajan bꞌaj man̈xalaj teꞌ pat, a nocꞌ caltacteꞌal nocꞌ ol chianbꞌat ebꞌ. Axo ebꞌ cajan dꞌa yoltac qꞌuen n̈aqꞌueen, a ilya ol icꞌan scham ebꞌ. 28 Ol cann̈ej tzꞌinan lum luum chiꞌ, cuseltac ol ajcan luum. Ol vacꞌan lajvoc yacꞌumtaquil ebꞌ. Cuseltac ol ajcan lum tzalquixtac yic chon̈abꞌ Israel. Man̈xa junoc anima ol ecꞌ taꞌ. 29 Ayic ol vacꞌancan tzꞌinan jun lum chiꞌ yuj smul ebꞌ yajbꞌentac scꞌulej, ichato chiꞌ ol yojtacanel ebꞌ to a in Jehová in svutej icha chiꞌ, xchi Jehová, xa chi dꞌa ebꞌ.
30 Ix yalanxi icha tic: Ach anima, a ebꞌ etchon̈abꞌ chiꞌ, ayic schalan sbꞌa ebꞌ bꞌaj ay smuroal chon̈abꞌ chiꞌ yedꞌ dꞌa stitac spat ebꞌ, tzach sbꞌuchan ebꞌ, stzꞌacan yal ebꞌ dꞌay junjun icha tic: Coyec, bꞌat cabꞌec slolonel Jehová, xchi ebꞌ. 31 Icha chiꞌ tzꞌaj yicꞌlancot sbꞌa ebꞌ in chon̈abꞌ chiꞌ, ol javoc ebꞌ, ol em cꞌojan ebꞌ dꞌa ichan̈ yabꞌan tas ol alaꞌ. Palta max sbꞌeybꞌalej ebꞌ tas tzal chiꞌ. Ton̈ej stzꞌac yal ebꞌ, axo spensar ebꞌ, an̈ej chucal ayecꞌ dꞌay. 32 A ach tic lajan ach dꞌa ebꞌ icha junoc mach te vachꞌ sbꞌitani, te vachꞌ yoch sjaj, te vachꞌ schalan teꞌ arpa. Scha yabꞌ ebꞌ tas tzalaꞌ, palta max sbꞌeybꞌalej ebꞌ tas tzal chiꞌ. 33 Palta ayic ol elcꞌoch masanil tas tzal chiꞌ, ichato chiꞌ ol snaancot ebꞌ to in checabꞌ aj dꞌa scal ebꞌ, xchi Jehová.