2 Ix in jacan in tiꞌ, ix yacꞌan in cꞌuxbꞌat jun bꞌaj tzꞌibꞌabꞌil chiꞌ. 3 Elan̈chamel ix yal dꞌayin: Bꞌuqꞌuem jun tzꞌibꞌabꞌil ix vacꞌ tic dꞌayach, sbꞌudꞌjicanel a cꞌol yuuj, xchi dꞌayin.

Yuj chiꞌ ix in bꞌuqꞌuemi, te chiꞌ ix vabꞌ icha nocꞌ yalchabꞌ. 4 Ix yalan dꞌayin icha tic: Ixic, tzalan dꞌa ebꞌ etisraelal jantac tas ol val dꞌayach. 5 Man̈ vanoc ach in checanbꞌat dꞌa scal ebꞌ anima max yal alan stiꞌ, mato max nachaj uuj, palta a dꞌa ebꞌ etchon̈abꞌ tzach in checbꞌati. 6 Man̈ vanoc ach in checanbꞌat dꞌa juntzan̈ nación bꞌaj tzijtum tiꞌ tzꞌalchaji to ajaltac snachajel uuj. Tato a dꞌa juntzan̈ chon̈abꞌ chiꞌ tzach in checbꞌati, tzam scha yabꞌ ebꞌ tas tzalaꞌ. 7 Palta a ebꞌ etchon̈abꞌ chiꞌ jun, man̈ ol schalaj yabꞌ ebꞌ dꞌayach, yujto malaj sgana ebꞌ schaan yabꞌ tas svalaꞌ, yujto te pit syutej spensar ebꞌ. 8 Palta a in ol vacꞌ a tecꞌanil dꞌa yichan̈ ebꞌ, yic ol a tecꞌbꞌan a bꞌa alan juntzan̈ lolonel tic dꞌa ebꞌ. 9 Icha val stzatzil qꞌuen diamante, ma icha qꞌuen yaxqꞌueen ol ach vutoc dꞌa yichan̈ ebꞌ. Man̈ jabꞌoc ol ach xiv dꞌa ebꞌ vachꞌchom scot val yoval sat ebꞌ yuj spital, xchi dꞌayin.

10 Ix yalanxi dꞌayin icha tic: Ach anima, maclej val abꞌ tas ol val dꞌayach, tza sicꞌancan dꞌa a pensar. 11 Ixic, tzach bꞌat bꞌaj ayecꞌ ebꞌ etchon̈abꞌ icꞌbꞌilcot preso, tzalan dꞌa ebꞌ, taxon̈ej scha yabꞌ ebꞌ tas ol alaꞌ, mato maay, palta tzal dꞌa ebꞌ icha tic: Icha tic yalan Jehová Cajalil, xa chi dꞌa ebꞌ, xchi dꞌayin.

12 Ix lajvi chiꞌ, ix in yicꞌanchaan̈ Yespíritu Dios, axo dꞌa in patic ix vabꞌ yoch jun av icha scꞌan̈ yecꞌ quixcabꞌ, ix yalani: Alchajocabꞌ vachꞌil dꞌa stziquiquial Jehová bꞌaj ayeqꞌui, xchi. 13 Ix vabꞌanpax scꞌan̈ scꞌaxil ebꞌ querubín ayic syil-lan sbꞌa. A juntzan̈ xocanxocan junn̈ej yaj yedꞌ ebꞌ, scꞌan̈paxi, xivubꞌtac scꞌan̈i. 14 Axo Yespíritu Dios ix in icꞌanqꞌue vaan, ix in yicꞌanbꞌati. Te cuscꞌolal ix in aji, ix cot voval, ix in bꞌati. Axo spoder Jehová ayoch dꞌayin. 15 Ayic ix in cꞌoch dꞌa chon̈abꞌ Tel-abib dꞌa stiꞌ a nivan Quebar, aton bꞌaj cajan on̈ ecꞌ mach on̈ icꞌbꞌil on̈ cot icha preso tic, uqueꞌ cꞌual majxo in lolonlaj, yujto ix sat in cꞌol yuj tas ix vilaꞌ yedꞌ tas ix vabꞌ chiꞌ.

16 Ayic ix lajvi uqueꞌ cꞌual chiꞌ, ix lolon Jehová dꞌayin, ix yalan icha tic: 17 Ach anima, a in ix ach vacꞌoch stan̈vumaloc ebꞌ etchon̈abꞌ israel. Ayic ol valan in lolonel dꞌayach, a achxo ol al dꞌa ebꞌ in qꞌuexuloc yic ol yojtaquejel ebꞌ. 18 Ayic ol valan dꞌa junoc mach to ol cham yuj smul, tato a ach tic man̈ ol al dꞌay, man̈ ol a cachaꞌ yic syactejcan chucal scꞌulej chiꞌ, yic max chami, ayic scham jun anima yuj smul chiꞌ, a dꞌa ibꞌan̈ scan schamel chiꞌ vuuj. 19 Palta tato tzal dꞌay jun, tza cachanpax dꞌa schucal chiꞌ, palta max yactejcan schucal bꞌeybꞌal chiꞌ, ol cham yuj smul chiꞌ, a schamel chiꞌ max canlaj dꞌa ibꞌan̈. 20 An̈ejtonaꞌ, tato ay junoc mach vachꞌ sbꞌeybꞌal, palta syactejcan svachꞌ bꞌeybꞌal chiꞌ, scꞌulan chucal, a in ol in cha svachꞌ cꞌulej chucal chiꞌ masanto schami. Tato a ach tic max a cachaꞌ, tato schami, a tas vachꞌ scꞌulejnac dꞌa yalan̈tax chiꞌ man̈xalaj yelcꞌoch dꞌa vichan̈, ol cham yuj smul chiꞌ, palta axo dꞌa ibꞌan̈ scan schamel chiꞌ vuuj. 21 Palta tato tza cach jun anima chiꞌ jun yic max scꞌulej chucal chiꞌ, schaan yabꞌi, maxtzac scꞌulej chucal chiꞌ. A jun anima chiꞌ olto pitzvoc eqꞌui, yujto ix scꞌanabꞌajej bꞌaj ix a cach chiꞌ. A achxo tic tzach colchajcani, xchi Jehová dꞌayin.

22 Ix yacꞌanqꞌue scꞌabꞌ Jehová dꞌa vibꞌan̈, ix yalan dꞌayin icha tic: Qꞌuean̈ vaan, ixic dꞌa jun acꞌlic chiꞌ. Ataꞌ ol in lolon dꞌayach, xchi. 23 Ix in qꞌue vaan bꞌian, ix in bꞌat dꞌa jun acꞌlic chiꞌ. Ataꞌ ix vil stziquiquial Jehová, icha ix aj vilan dꞌa stiꞌ aꞌ nivan Quebar. Ix in julanem lachnaj in bꞌa dꞌa sat luum. 24 Ix och Yespíritu Dios chiꞌ dꞌayin, ix in yicꞌanqꞌue lin̈an, ix yalan dꞌayin icha tic: Ixic, tza macanoch a bꞌa dꞌa yol a pat. 25 Ach anima, ol ach tzecꞌchajcan dꞌa yol a pat, yic vachꞌ maxtzac ach elta dꞌa scal ebꞌ etchon̈abꞌ. 26 Ichato ol vacꞌcanqꞌue lotzan acꞌ dꞌa a joom, yic vachꞌ man̈xo ol yal a loloni, man̈xo ol yal a cachan ebꞌ, yujto te pit ebꞌ. 27 Ayic ay tas snibꞌej in cꞌol ol alaꞌ, ol ach vacꞌ lolonoc, ol alani: Icha tic yalan Jehová Cajalil, xa chi. A mach sgana schaan yabꞌi, yabꞌocabꞌi. A pax mach malaj sgana schaan yabꞌ jun, schumxo, yujto a jun chon̈abꞌ tic te pit, xchi Jehová.