Ix vabꞌan yoch jun jaj, ix yalan dꞌayin icha tic: Ach anima, qꞌuean̈ vaan, yujto ay tas ol val dꞌayach, xchi.^* 2 Yacbꞌan van slolon chiꞌ, ix och Yespíritu Dios dꞌayin, ix in yicꞌanqꞌue lin̈an. Ichato chiꞌ ix vabꞌan yoch sjaj jun slolon chiꞌ dꞌayin. 3 Ix yalann̈ej icha tic: Ach anima, ol ach in checbꞌat dꞌa scal ebꞌ etchon̈abꞌ israel, aton ebꞌ ix ste pitej sbꞌa dꞌayin, ix och ebꞌ ajcꞌolal dꞌayin icha scꞌulejnac ebꞌ e mam eyicham dꞌa pecaꞌ, icha pax chiꞌ ebꞌ masanto ticnaic. 4 A ticnaic tzach in checbꞌat dꞌa juntzan̈ anima te ov sat yuj spital, man̈ jabꞌoc scha yabꞌ ebꞌ, palta tzal dꞌa ebꞌ icha tic: Icha tic yalan Jehová Cajalil, xa chi dꞌa ebꞌ. 5 Vachꞌchom ol scha yabꞌ ebꞌ, mato maay, yujto te pit ebꞌ, palta ol nachajel yuj ebꞌ to in checabꞌ aj dꞌa scal ebꞌ. 6 Ach anima, man̈ ach xiv dꞌa ebꞌ, man̈ ach xivpax yuj tas ol yal ebꞌ dꞌayach. Vachꞌchom icha dꞌa scal teꞌ qꞌuiix, ma dꞌa scal nocꞌ sinaan ayach eqꞌui, palta man̈ ach xivoc, man̈ ach xiv yuj tas syal ebꞌ dꞌayach, man̈ ach xivpax tas tzꞌaj sat ebꞌ ste cot yoval dꞌayach yujto te pit ebꞌ. 7 A ach yovalil ol al in lolonel dꞌa ebꞌ, taxon̈ej ol scha yabꞌ ebꞌ mato maay, yujto te pit ebꞌ. 8 Scham val a chaan abꞌ tas svalaꞌ, man̈ a pitej a bꞌa icha ebꞌ chiꞌ. Jac a tiꞌ ol a vaan tas ol vacꞌ dꞌayach, xchi dꞌayin.