A Slolonel Dios Dꞌa Vin̈aj
EZEQUIEL
Ix yil stziquiquial Dios vin̈aj Ezequiel
1
1-3 A in sacerdote Ezequiel in tic, yuninal in vin̈aj Buzi. A junel ayinecꞌ dꞌa stiꞌ jun a aꞌ scuch Quebar dꞌa Babilonia, ayinecꞌ dꞌa scal ebꞌ vetchon̈abꞌ aj Judá icꞌbꞌilcot preso. Ayic oyeꞌ cꞌualxo yoch schan̈il uj yic abꞌil 30, ayic toxo ix ecꞌbꞌat oyeꞌ abꞌil yicꞌjicot vin̈aj rey Joaquín preso, ataꞌ ix jacchaj satchaan̈, ix vilan stziquiquial Jehová, ix lolon dꞌayin, ix yacꞌanem spoder dꞌa vibꞌan̈. 4 Ix vilani to a dꞌa stojolal norte ix cot jun nivan oval icꞌ yedꞌ jun nivan qꞌuicꞌal asun. A dꞌa scal asun chiꞌ ix elta cꞌacꞌ yedꞌ lebꞌlon, axo dꞌa spatic yichan̈ toxon̈ej scopopi. A dꞌa scal cꞌacꞌ chiꞌ ay jun tas toxon̈ej sveei, icha val sveeial yilji qꞌuen bronce. 5 Axo dꞌa snan̈al ayelta chan̈van̈ ángel querubín sbꞌi icha yilji anima. 6 Chan̈eꞌ sat yedꞌ chan̈eꞌ scꞌaxil junjun ebꞌ. 7 A xubꞌ ebꞌ masanto dꞌa yoc tojoln̈ej yajemi, axo samil yoc ebꞌ icha yech nocꞌ vacax, sveei icha qꞌuen bronce n̈icbꞌilel smical. 8 A juntzan̈ ebꞌ chiꞌ, chan̈eꞌ sat yedꞌ chan̈eꞌ scꞌaxil junjun ebꞌ. Ay pax chan̈eꞌ scꞌabꞌ ebꞌ icha yic anima dꞌa schan̈il pacꞌan̈ scostil dꞌa yalan̈ scꞌaxil chiꞌ. 9 Syil-laj sbꞌa scꞌaxil ebꞌ chiꞌ ayic sbꞌey ebꞌ, sbꞌatn̈ej ebꞌ bꞌaj qꞌuelanbꞌati, max sutmaj snivanil ebꞌ bꞌaj sbꞌati. 10 Icha val tic yilji sat junjun ebꞌ: A dꞌa yichan̈ ebꞌ lajan yilji icha sat anima. Axo dꞌa svachꞌ ebꞌ lajan yilji icha sat nocꞌ choj. Axo dꞌa sqꞌuexan̈ ebꞌ, lajan yilji icha sat nocꞌ vacax. Axo dꞌa spatic ebꞌ, lajan yilji icha sat nocꞌ nivac chꞌacbꞌa. Ichaton chiꞌ yilji sat ebꞌ. 11 Ayic syacꞌanel lian chabꞌ scꞌaxil junjun ebꞌ, schalaj sbꞌa yedꞌ yic ebꞌ ay dꞌa junjun schiquin, axo yedꞌ chabꞌxo jun, smusej snivanil ebꞌ. 12 Junlajann̈ej tzꞌaj sbꞌat ebꞌ dꞌa yichan̈, man̈ jabꞌoc sutmaj ebꞌ ayic sbꞌat ebꞌ, ato aꞌ bꞌaj scuchbꞌajbꞌat ebꞌ yuj spoder Dios. 13 A dꞌa scal ebꞌ, ay jun tas sbꞌeyeqꞌui, lajan yilji icha tzacꞌacꞌ chacxilinac, ma icha yilji junoc tas ayoch scꞌacꞌal. Toxon̈ej sveei yilji, axo dꞌa scal tzꞌelta copoljoc cꞌacꞌ. 14 A juntzan̈ ebꞌ chiꞌ sbꞌat xumnaj ebꞌ, elan̈chamel sjax xumnaj ebꞌ, icha yecꞌ copoljoc lebꞌlon.15 Ayic ix vilan juntzan̈ ebꞌ chiꞌ, ix vilan pax dꞌa sat luum, dꞌa stzꞌey junjun ebꞌ ay junjun xocanxocan yilji. 16 A chan̈eꞌ xocanxocan chiꞌ, lajann̈ej yilji schan̈il, sveei yilji icha qꞌuen topacio, axo dꞌa yool junjun, ay junxo xocanxocan ayochi, chꞌocchꞌoc bꞌaj qꞌuelanbꞌat junjun. 17 Syaln̈ej sbꞌat dꞌa schan̈il pacꞌan̈, man̈ yovaliloc sutmaji. 18 Ix vilani to a junjun juntzan̈ xocanxocan chiꞌ chaan̈ yajqꞌuei, satubꞌtac yilji, ayn̈ej yol sat dꞌa spatic yichan̈. 19 Ayic sbꞌeybꞌat ebꞌ querubín chiꞌ, sbꞌeypaxbꞌat juntzan̈ xocanxocan chiꞌ. Tato sqꞌue vaan ebꞌ dꞌa sat luum, sqꞌuepax vaan juntzan̈ chiꞌ yedꞌ ebꞌ. 20 A ebꞌ querubín chiꞌ, sbꞌatn̈ej ebꞌ bꞌaj tzꞌicꞌjibꞌat yuj spoder Dios, sbꞌatn̈ejpax juntzan̈ xocanxocan chiꞌ yedꞌ ebꞌ, yujto a dꞌay ayoch spixan ebꞌ. 21 Ayic sbꞌey ebꞌ querubín chiꞌ, sbꞌeypax juntzan̈ xocanxocan chiꞌ, tato tzꞌoch vaan ebꞌ, tzꞌochpax vaan. Tato sqꞌue vaan ebꞌ dꞌa sat lum tic, sqꞌuepax vaan juntzan̈ chiꞌ, yujto a dꞌa juntzan̈ chiꞌ ayoch spixan ebꞌ.
22 A dꞌa yibꞌan̈ ebꞌ querubín chiꞌ, ay jun tas bꞌachanbꞌati, toxon̈ej copopi icha yilji qꞌuen cheev, satubꞌtac yilji. 23 A dꞌa yalan̈ jun bꞌachanbꞌat chiꞌ, ataꞌ tojol tzꞌaj yel lian chabꞌ scꞌaxil junjun ebꞌ, schalan sbꞌa sn̈iꞌ scꞌaxil ebꞌ chiꞌ. Axo chabꞌxo smusan snivanil ebꞌ. 24-25 Ix vabꞌanpax scꞌan̈ scꞌaxil ebꞌ chiꞌ ayic sbꞌat jen̈en̈oc ebꞌ. Icha val scꞌan̈ yem aꞌ nivac pajav, ma icha scꞌan̈ cꞌu, ma icha scꞌan̈ yecꞌ junoc nivan n̈ilan̈ ebꞌ soldado ma icha val to a Dios Syal yuj Smasanil van sloloni. Ayic tzꞌoch vaan ebꞌ querubín chiꞌ sjen̈vi, syicꞌanem scꞌaxil ebꞌ chiꞌ, scꞌan̈n̈ej jun scꞌan̈ chiꞌ dꞌa yibꞌan̈ jun bꞌachanbꞌat dꞌa yibꞌan̈ ebꞌ chiꞌ. 26 A dꞌa yibꞌan̈ jun bꞌachanbꞌat chiꞌ, ix vil jun trono icha val svachꞌil yilji qꞌuen zafiro. A dꞌa yol jun trono chiꞌ, ataꞌ cꞌojanem jun icha yilji anima. 27 Ix vilanpaxi to a jun cꞌojanem chiꞌ, a dꞌa snan̈al sqꞌuen̈ejcot dꞌa yibꞌan̈, lajan yilji icha qꞌuen bronce copopi, sqꞌue scꞌacꞌal. Axo dꞌa snan̈al chiꞌ tzꞌemn̈ej dꞌa yalan̈, lajan yilji icha teꞌ cꞌacꞌ, axo spatictac, toxon̈ej sveei, 28 icha yilji chacpan scheclaj dꞌa scal asun ayic syacꞌan n̈abꞌ, icha chiꞌ yajoch oyan dꞌa spatictac.