Yalnac vin̈aj Ezequiel yuj oval dꞌa Jerusalén
4
Ix yalanxi Jehová dꞌayin icha tic: A ticnaic ach anima, icꞌcot junoc lum xan, tzacꞌanem lum dꞌa ichan̈, tza tzꞌibꞌanem yechel chon̈abꞌ Jerusalén dꞌa luum. 2 Slajvi chiꞌ, tzacꞌanoch oyan yechel yamcꞌabꞌ yic oval, campamento yedꞌ tecꞌnubꞌ dꞌa spatic smuroal, 3 tzacꞌanoch junoc qꞌuen icha qꞌuen saꞌam dꞌa a cal yedꞌ jun chon̈abꞌ chiꞌ. A jun chiꞌ, lajan icha junoc muro, tzach och dꞌa yichan̈ jun chon̈abꞌ chiꞌ, ichato van acꞌan oval yedꞌoc. Icha chiꞌ ol aj yoch chꞌoxnabꞌiloc dꞌa ebꞌ etchon̈abꞌ.4 Slajvi chiꞌ, tzach ecꞌ jichan dꞌa a qꞌuexan̈, icha chiꞌ ol aj a chꞌoxanel yaelal ol javoc dꞌa yibꞌan̈ ebꞌ etchon̈abꞌ yuj smul. An̈ej dꞌa a qꞌuexan̈ chiꞌ ol ach ecꞌn̈ej jichan yacbꞌan van a chꞌoxanel yaelal ol javoc dꞌa yibꞌan̈ ebꞌ yuj smul chiꞌ. 5 Ay 390 cꞌual ol a cꞌulej jun chiꞌ, syalelcꞌochi junjun abꞌil schꞌox junjun cꞌual, icha chiꞌ ol aj yabꞌan syail ebꞌ israel yuj smul chiꞌ. 6 Ayic ol lajvoc juntzan̈ cꞌual chiꞌ, axo dꞌa a vachꞌ tzach ecꞌ jichan. Icha chiꞌ ol aj a chꞌoxanel yaelal ol ja dꞌa yibꞌan̈ ebꞌ aj Judá yuj smul. 40 cꞌual ol ach ecꞌ jichan dꞌa a vachꞌ chiꞌ, syalelcꞌochi junjun abꞌil schꞌox junjun cꞌual, icha chiꞌ ol aj yabꞌan syail ebꞌ yuj smul chiꞌ. 7 Tzach bꞌat qꞌuelan dꞌa jun yechel Jerusalén bꞌaj oyanoch ebꞌ ajcꞌool, tza pilanqꞌue scꞌabꞌ a pichul, tzicꞌanchaan̈ a cꞌabꞌ chiꞌ, tzach lolon dꞌa ebꞌ etchon̈abꞌ chiꞌ dꞌa in bꞌi. 8 Ichato ol ach in tzecꞌ yedꞌ chꞌan̈ lasu yic vachꞌ max yal ecꞌ bꞌalbꞌonoc masanto ol tzꞌacvoc scꞌual a chꞌoxanel syaelal ebꞌ chiꞌ.
9 Ayic manto ach tzecꞌchaj chiꞌ, tzicꞌcot jabꞌoc ixim trigo, ixim cebada, ixim mijo, ixim avena, an̈ avastut, an̈ lenteja yedꞌ ixim centeno, calan tzꞌaj yem dꞌa yol junoc lum chen. A yedꞌ juntzan̈ chiꞌ tza bꞌo a vael, ol a vaan dꞌa 390 cꞌual bꞌaj ol ach ecꞌ jichan dꞌa a qꞌuexan̈ chiꞌ. 10 Tzechtej nan̈al libra tza va dꞌa junjun cꞌu, chequeln̈ej yorail tzach vaꞌi. 11 Chequel pax yorail yic tzucꞌan nan̈aloc litro a aꞌ dꞌa junjun cꞌu. 12 A jun vael tza bꞌo chiꞌ, icha tzꞌaj sbꞌo ixim pan cebada tzutej. Dꞌa yichan̈ ebꞌ anima chiꞌ tzacꞌ tajoc ixim dꞌa cal cꞌacꞌ, a stzaꞌ ebꞌ anima chiꞌ tza cꞌan a cꞌatzitzoc, xchi Jehová.
13 Ix lajvi chiꞌ, ix yalanpax Jehová icha tic: Ol a va juntzan̈ vael man̈ vachꞌoc chiꞌ icha yalan ley, yuj a chꞌoxaneli to icha chiꞌ ol aj svaan ebꞌ etisraelal vael man̈ vachꞌoc icha yalan ley dꞌa juntzan̈xo nación bꞌaj ol in saclemejbꞌat ebꞌ, xchi Jehová.
14 Ix in tacꞌvi dꞌay icha tic: Maay Mamin Jehová, malaj bꞌaj tzin yam junoc tas man̈ vachꞌoc icha yalan ley. Malaj bꞌaj tzin chiꞌ schibꞌejal nocꞌ nocꞌ to ton̈ej syacꞌcham sbꞌa, ma nocꞌ smiljicham yuj nocꞌ chium nocꞌ dꞌa caltac teꞌ, ma junoc macan̈ nocꞌ chibꞌej to man̈ vachꞌoc icha yalan ley, xin chi.
15 Ix yalanxi Jehová dꞌayin icha tic: Syal a stzaꞌ nocꞌ vacax tza cꞌan dꞌa cꞌatzitzal sqꞌuexuloc stzaꞌ ebꞌ anima chiꞌ, yic tza bꞌoan a vael chiꞌ, xchi.
16 Ix yalanxi dꞌayin icha tic: Ol in satel vael dꞌa Jerusalén. Echtabꞌilxon̈ej ol aj svael ebꞌ yedꞌ tas syuqꞌuej ebꞌ, yuj chiꞌ dꞌa scal ilcꞌolal yedꞌ dꞌa scal xivcꞌolal ol va ebꞌ, ol yucꞌan aꞌ ebꞌ. 17 Man̈xa a aꞌ yedꞌ svael ebꞌ, toxon̈ej ol xivqꞌue ebꞌ yil-lanoch sbꞌa junjun. Yuj val smul ebꞌ chiꞌ cꞌojancꞌolal ol aj satel ebꞌ, xchi Jehová.