Ix sjoxel xil sjolom vin̈aj Ezequiel
5
Ix yalanpax Jehová dꞌayin icha tic: A ticnaic ach anima, icꞌcot junoc qꞌuen cuchilubꞌ te jay ye, icha val junoc qꞌuen navaja scꞌan ebꞌ joxvajum, tza josanel xil a jolom yedꞌ xil a tiꞌ dꞌa qꞌueen. Slajvi chiꞌ, tzicꞌanpaxcot junoc echlabꞌ, ox macan̈ tzꞌaj echtan a xil chiꞌ. 2 Ayic ol lajvoc a chꞌoxan yechel syaelal chon̈abꞌ chiꞌ, a junoc macan̈ a xil chiꞌ, tza n̈ustzꞌa dꞌa snan̈al yol yechel chon̈abꞌ chiꞌ. Slajvi chiꞌ, tzicꞌanxicot qꞌuen cuchilubꞌ chiꞌ, tza chocꞌ cupan junoc macan̈ a xil chiꞌ dꞌa spatictac yechel chon̈abꞌ chiꞌ, axo junocxo yoxil macan̈, tza tzipancanbꞌat dꞌa cal icꞌ. Chꞌoxnabꞌil jun chiꞌ to a in ol vacꞌcot ebꞌ ajcꞌool, ol och ebꞌ dꞌa spatic ebꞌ etchon̈abꞌ chiꞌ yedꞌ qꞌuen yespada. 3 Tzicꞌancanel jayeoc a xil chiꞌ tza pichancanoch dꞌa stiꞌ a pichul. 4 A dꞌa juntzan̈ chiꞌ tziqꞌuel jayeoc, tza n̈usantzꞌa dꞌa cal cꞌacꞌ. Icha jun cꞌacꞌ chiꞌ, icha chiꞌ ol aj sjavi yaelal dꞌa scal masanil ebꞌ etchon̈abꞌ.5 A in val Jehová in svalaꞌ: Aton Jerusalén schꞌox jun yechel tic, a in vacꞌnaquem dꞌa scal juntzan̈xo nación. 6 Palta a ebꞌ aj Jerusalén chiꞌ, yelxo val ix spatiquejel in cꞌaybꞌubꞌal ebꞌ yedꞌ in checnabꞌil, yelxo val chuc ebꞌ dꞌa yichan̈ ebꞌ anima dꞌa juntzan̈ nación ay dꞌa slacꞌanil ebꞌ chiꞌ, yujto maj scꞌanabꞌajej in cꞌaybꞌubꞌal chiꞌ ebꞌ, maj sbꞌeybꞌalej pax in checnabꞌil ebꞌ.
7 Yuj chiꞌ a in Jehová in svalaꞌ: Yujto ecꞌal te pit ebꞌ dꞌa yichan̈ juntzan̈xo nación ay dꞌa spatictac chiꞌ, man̈ val jabꞌoc scꞌanabꞌajej in checnabꞌil ebꞌ, ecꞌbꞌal te chuc sbꞌeybꞌal ebꞌ dꞌa yichan̈ sbꞌeybꞌal ebꞌ anima ay dꞌa slacꞌanil ebꞌ chiꞌ. 8 Yuj chiꞌ a in Jehová in svalaꞌ: Ol in och pax ajcꞌolal dꞌa ebꞌ aj Jerusalén chiꞌ. Dꞌa yichan̈ juntzan̈ nación chiꞌ ol vacꞌoch syaelal ebꞌ. 9 Ix och ebꞌ ejmelal dꞌa juntzan̈ comon dios yajbꞌentac, yuj chiꞌ ol in cꞌulej tas to manta bꞌaj tzin cꞌulej juneloc, malaj pax bꞌaj ol in cꞌulej junelocxo. 10 A ol aj dꞌa scal ebꞌ chiꞌ, a ebꞌ mamabꞌil ol schibꞌat yalyuninal ebꞌ yuj vejel. A ebꞌ uninabꞌil ol schipaxbꞌat smam snun ebꞌ. Ol vacꞌ val och yaelal dꞌa yibꞌan̈ ebꞌ. Axo mach man̈ ol chamoc, ol in saclemejcanbꞌat dꞌa masanil yolyibꞌan̈qꞌuinal tic. 11 A in Jehová in svalaꞌ. Yujto a ebꞌ chiꞌ yelxo val ix yixtejbꞌat in templo ebꞌ yuj sdiosal te yajbꞌentac yedꞌ yuj juntzan̈ sbꞌeybꞌal ebꞌ te chuc, yuj chiꞌ ol in satel ebꞌ, man̈xo ol vacꞌ nivancꞌolal ebꞌ. Man̈xo ol ocꞌ in cꞌol dꞌa ebꞌ. 12 A junoc macan̈ ebꞌ, ol cham ebꞌ dꞌa yol chon̈abꞌ chiꞌ yuj ilya yedꞌ vejel. Axo junocxo macan̈ ebꞌ, ol miljoccham ebꞌ dꞌa spatictac chon̈abꞌ chiꞌ. Axo junxo yoxil macan̈ ebꞌ, ol in saclemejcanbꞌat ebꞌ dꞌa masanil yolyibꞌan̈qꞌuinal tic, a in val ol vacꞌoch ebꞌ ajcꞌol dꞌa spatic ebꞌ yedꞌ qꞌuen yespada. 13 Icha val chiꞌ ol aj sicbꞌi yoval in cꞌool, vachꞌ ol aj in cꞌol ol vabꞌi. Ayic toxo ix viqꞌuel yoval in cꞌol chiꞌ dꞌa ebꞌ, ichato chiꞌ ol nachajel yuj ebꞌ to a in ton Jehová in ix in chec cꞌulaj juntzan̈ tic yuj yoval in cꞌool. 14 A in Jehová in svalaꞌ to man̈xa mach ol vacꞌcan dꞌa Jerusalén, masanil anima ay dꞌa slacꞌanil yedꞌ ebꞌ ol ecꞌ taꞌ ol bꞌuchvaj ebꞌ dꞌay. 15 A val yic ol vacꞌanoch yaelal dꞌa yibꞌan̈ ebꞌ yedꞌ yoval in cꞌool, masanil ebꞌ ay dꞌa slacꞌanil ebꞌ ol yajanoc yedꞌ sbꞌuchvaj ebꞌ dꞌa chon̈abꞌ Jerusalén chiꞌ. Schꞌoxnabꞌil yoval in cꞌol ol ajoc. 16 Icha val tzꞌaj sjulvaj junoc mach yedꞌ sjul-labꞌ yic smilvaji, icha chiꞌ ol aj in satanel ebꞌ yuj vejel. A in val ol vacꞌbꞌat nivan vejel dꞌa yibꞌan̈ ebꞌ, man̈xalaj svael ebꞌ, icha chiꞌ ol aj satel ebꞌ. 17 A in Jehová in svalaꞌ to a in ol vacꞌbꞌat jun nivan vejel, ilya yedꞌ chamel dꞌa yibꞌan̈ ebꞌ yedꞌ nocꞌ chium nocꞌ, pilan ol chijocbꞌat yuninal ebꞌ yuj nocꞌ. Tzijtum ebꞌ ol champax dꞌa scal oval, xchi Jehová.