A yoval scꞌol Jehová dꞌa comon dios
6
Ix yalanxi Jehová dꞌayin icha tic: 2 Ach anima, ixic qꞌuelan dꞌa stojolal jolomtac vitz yic Israel, tzalan dꞌa yibꞌan̈ ebꞌ cajan taꞌ 3 icha tic: Abꞌec val tas syal Jehová dꞌa yibꞌan̈ ebꞌ syaqꞌuem sbꞌa dꞌa comon dios dꞌa jolomtac vitz yic Israel, dꞌa tzalquixtac, dꞌa pacꞌquiltac yedꞌ dꞌa chꞌolquixtac: Ol vacꞌbꞌat oval dꞌa ebꞌ. Ol in satpaxel juntzan̈ lugar chaan̈ bꞌaj tzꞌoch ejmelal. 4 Ol in macꞌpoj juntzan̈ altar bꞌaj syacꞌ silabꞌ ebꞌ yedꞌ bꞌaj sn̈us incienso ebꞌ. Ol in milancham ebꞌ vinac dꞌa yichan̈ juntzan̈ yechel chiꞌ. 5 Ol vacꞌcan teljabꞌ snivanil ebꞌ dꞌa yichan̈ juntzan̈ comon dios chiꞌ. Axo dꞌa spatictac juntzan̈ yechel chiꞌ ol in saclemejecꞌ sbꞌaquil ebꞌ. 6 Ol can tzꞌinan masanil schon̈abꞌ ebꞌ bꞌajtac cajan yedꞌ masanil lugar chaan̈ bꞌaj tzꞌoch ejmelal. Masanil yaltar ebꞌ chiꞌ ol pojcanbꞌatoc yedꞌ masanil juntzan̈ yechel chiꞌ chocꞌ ol ajcanoc yedꞌ altar bꞌaj sn̈us incienso ebꞌ, ol em lan̈najoc. Masanil tas bꞌobꞌil yuj ebꞌ anima chiꞌ ol sateloc. 7 A ebꞌ olto canoc, ayic ol yilan snivanil ebꞌ ix cham dꞌa scal ebꞌ, ichato chiꞌ ol nachajel yuj ebꞌ to a in ton Jehová sDiosal in ebꞌ.8 Palta a dꞌa scal ebꞌ ol in saclemejcanbꞌat dꞌa juntzan̈xo nación chiꞌ, ay ebꞌ bꞌaj ol ocꞌ in cꞌool, ol in colcanel ebꞌ dꞌa yol scꞌabꞌ chamel. 9 A ebꞌ man̈ ol cham chiꞌ, ol in snacot ebꞌ dꞌa juntzan̈ nación bꞌaj ayecꞌ chiꞌ. Ol snacot ebꞌ tas ix aj vabꞌan syail yuj bꞌaj in spatiquejel ebꞌ ayic yochnac ebꞌ ejmelal dꞌa juntzan̈ comon dios. Toxon̈ej ol syajlaj sbꞌa ebꞌ yuj jantac chucal scꞌulejnac yuj sbꞌeybꞌal ebꞌ te yajbꞌentac, 10 yuj chiꞌ ol nachajel yuj ebꞌ to a in Jehová in, a inn̈ej Dios in, man̈ ton̈ejoc ix valaꞌ to ix vacꞌbꞌat juntzan̈ yaelal tic dꞌa yibꞌan̈ ebꞌ, xchi Jehová.
11 Ix yalanxi Jehová Cajalil icha tic dꞌayin: Pocꞌubꞌtan̈ej a cꞌabꞌ, tecꞌubꞌtan̈ejem oc, elocabꞌ av yic tzꞌel a cꞌol yuj jantac tas ix javi dꞌa yibꞌan̈ ebꞌ etisraelal yuj jantac tas yajbꞌentac scꞌulej ebꞌ. Yuj chiꞌ ix cham ebꞌ yuj oval, yuj vejel yedꞌ yuj ilya. 12 A ebꞌ najat aycanbꞌati, ol cham ebꞌ yuj ilya, axo ebꞌ lacꞌan ayeqꞌui, ol cham ebꞌ yuj oval. Axo ebꞌ man̈ ol cham yuj oval chiꞌ, a vejel ol icꞌan scham ebꞌ. Icha chiꞌ ol aj slajvi vicꞌanel yoval in cꞌol dꞌa ebꞌ. 13 Ayic ol yilan snivanil ebꞌ milbꞌilcham dꞌa spatictac juntzan̈ yechel chiꞌ ebꞌ, dꞌa spatictac juntzan̈ altar, dꞌa tzalquixtac, dꞌa jolomtac vitz, dꞌa yichtac te teꞌ cꞌayum xiil yedꞌ dꞌa yichtac teꞌ ji cꞌayum xiil, aton dꞌa juntzan̈ lugar bꞌaj sn̈ustzꞌa incienso ebꞌ silabꞌil dꞌa juntzan̈ comon dios chiꞌ, icha chiꞌ ol aj snachajel yuj ebꞌ to a in ton Jehová sDiosal in ebꞌ. 14 Ol vicꞌchaan̈ in cꞌabꞌ vacꞌan syaelal ebꞌ yaln̈ej bꞌaj cajan. Masanil juntzan̈ lugar bꞌaj ecꞌnac cajan ebꞌ, toxon̈ej ol can tzꞌinan icha lum tzꞌinan luum yic sur, masanto scꞌoch dꞌa Diblat dꞌa norte. Icha chiꞌ ol aj snachajel yuj ebꞌ to a in ton Jehová sDiosal in ebꞌ, xchi Jehová.