5 Ix yalanxi Jehová icha tic: A in Jehová in tic svalaꞌ: Van scꞌoch jun nivan yaelal dꞌa eyibꞌan̈. 6 Ilecnabꞌi vanxo sjavi slajvubꞌ, toxo ix javi e lajvubꞌal. 7 Tic val sjavi scꞌual yic tzex lajviel e masanil ex cajan ex dꞌa jun nación chiꞌ. Toxo val sjavi scꞌual, axon̈ej xivcꞌolal ay, toxo val slajvi tzalajcꞌolal dꞌa jolomtac vitz. 8-9 A ticnaic, tzꞌacan ol vacꞌbꞌat yoval in cꞌol dꞌa eyibꞌan̈, masanto ol yal sicbꞌi in cꞌool. Ol ex in chꞌolbꞌitej yuj chucal tze cꞌulej, ol vacꞌoch eyaelal yuj e bꞌeybꞌal yelxo val te chuc tze cꞌulej. Man̈xo ol valaꞌ to ay voqꞌuelcꞌolal dꞌayex. Icha val chiꞌ ol aj snachajel eyuuj to a in Jehová in svacꞌoch eyaelal.

10 Ilecnabꞌi, toxo ix javi scꞌual yaelal ayxo smay yic slajviel jun chon̈abꞌ chiꞌ. Toxo ix qꞌuechaan̈ chucal dꞌa yol smacbꞌen, tzijtum icꞌojchan̈bꞌail. 11 Sqꞌue val chaan̈ ebꞌ yixtan yetanimail. A juntzan̈ anima chiꞌ, man̈xa junoc ebꞌ ol canoc. Man̈xa jabꞌoc sbꞌeyumal ebꞌ ol canoc, man̈xo ol bꞌinaj snivanil yelcꞌoch ebꞌ. 12 Toxo val sjavi scꞌual jun yaelal chiꞌ. Mocabꞌ tzalaj scꞌol ebꞌ smanvaji, mocabꞌ cus scꞌol ebꞌ schon̈vaji, yujto ol vacꞌbꞌat yoval in cꞌol dꞌa yibꞌan̈ ebꞌ smasanil. 13 A mach toxo ix schon̈ sluum, man̈xo ol yal yicꞌanxi luum yacbꞌan pitzanto yedꞌ mach ix manan chiꞌ, yujto man̈xo ol yal scachjioch vaan jun yaelal van sjavi chiꞌ. A ebꞌ chuc, malaj junoc ebꞌ ol yal scolan sbꞌa.

14 Vachꞌchom ol pujoc qꞌuen trompeta yic syacꞌan lista sbꞌa ebꞌ sbꞌat dꞌa oval, palta malaj mach ol bꞌat dꞌa oval chiꞌ, yujto a yoval in cꞌool ayoch dꞌa yibꞌan̈ ebꞌ smasanil. 15 Dꞌa spatiquel chon̈abꞌ ay oval, axo dꞌa yool ay ilya yedꞌ vejel. A ebꞌ ayecꞌ dꞌa smunlajel, ol miljoccham ebꞌ, axo ebꞌ ayecꞌ dꞌa yol chon̈abꞌ, ol cham ebꞌ yuj vejel chiꞌ yedꞌ ilya. 16 A ebꞌ olto yal yeli, ol bꞌat scol sbꞌa ebꞌ dꞌa caltac yaxluum, ataꞌ ol ocꞌ ebꞌ yuj smul icha yoc nocꞌ muuc dꞌa yoltac chꞌolan. 17 Masanil ebꞌ ol el yip scꞌabꞌ, ol luclon yoc ebꞌ yuj xivelal. 18 Ol yacꞌoch pichul ebꞌ ya svaꞌi yuj schꞌoxanel syaelal chiꞌ. Ol luclon masanil snivanil ebꞌ. Chacxon̈ej ol aj yilji sat ebꞌ yuj qꞌuixvelal, josbꞌilel xil sjolom ol ecꞌ ebꞌ. 19 Toxon̈ej ol syumel qꞌuen plata ebꞌ yedꞌ qꞌuen oro dꞌa yoltac calle, icha tzꞌaj syumchajel cꞌalem, yujto man̈ ol yal scolchajel ebꞌ dꞌa scꞌual yoval in cꞌol a in Jehová in tic yuj qꞌueen. Tocval ol yal yacꞌan bꞌudꞌjoc scꞌol ebꞌ yedꞌ qꞌuen oro chiꞌ, yujto a yuj qꞌueen ix bꞌat ebꞌ dꞌa chucal. 20 Yujto ay qꞌuen qꞌueen te vachꞌ yilji chiꞌ dꞌa ebꞌ, yuj chiꞌ ix yicꞌ val chaan̈ sbꞌa ebꞌ, a qꞌuen chiꞌ ix sbꞌo ebꞌ scomon diosej yajbꞌentac. Yuj chiꞌ a juntzan̈ qꞌuen vachꞌ yilji ay dꞌa ebꞌ chiꞌ, icha cꞌalem ol vutejcan qꞌueen yil ebꞌ. 21 Ol vicꞌcot ebꞌ chꞌoc chon̈abꞌil te chuc yelqꞌuejbꞌat sbꞌeyumal ebꞌ, yic tzul yicꞌanecꞌ sdiosal ebꞌ chiꞌ ebꞌ, syixtanbꞌat ebꞌ. 22 Ol viqꞌuel in bꞌa dꞌa jun nación chiꞌ, axo ebꞌ elcꞌum chiꞌ ol ixtanbꞌat in templo vicn̈ej yaji. Man̈xa ol ajcan yelcꞌoch yuj ebꞌ.

23 Acꞌ bꞌo juntzan̈oc qꞌuen cadena, yujto a dꞌa jun nación chiꞌ man̈ jantacoc ebꞌ macꞌumcham anima ol tzecꞌchaj dꞌa qꞌueen. A dꞌa yol jun chon̈abꞌ chiꞌ, axon̈ej chucal scꞌulaji. 24 A in ol vicꞌcot juntzan̈ anima te chuc dꞌa juntzan̈ nación, axo ebꞌ ol icancan pat dꞌa jun nación chiꞌ. Yujto ol in satel yacꞌumtaquil ebꞌ nivac vinac, ol ixtaxbꞌat juntzan̈ lugar bꞌaj tzꞌoch ebꞌ ejmelal. 25 Ayic ol javoc nivac xivcꞌolal dꞌa ebꞌ, ol yacꞌ yip ebꞌ sayan juncꞌolal, palta man̈xo ol ilchajlaj yuj ebꞌ. 26 Cotac scal ol javoc syaelal ebꞌ, icha pax chiꞌ ol javoc yabꞌixal xivcꞌolal dꞌa ebꞌ. Nabꞌan̈ej ol say junoc in checabꞌ ebꞌ to syal yalan tas ol ujoc. Man̈xa ebꞌ sacerdote ol cꞌaybꞌan ebꞌ, ma ebꞌ ichamtac vinac ol acꞌan srazón ebꞌ. 27 A ebꞌ sreyal ebꞌ yedꞌ ebꞌ yajalil ebꞌ, ol yacꞌoch pichul ebꞌ ya svaꞌi yuj schꞌoxanel cuscꞌolal ol javoc dꞌa yibꞌan̈ ebꞌ. Axo masanil anima, toxon̈ej ol ibꞌxocqꞌue ebꞌ yuj xivelal. Ato syal sbꞌeybꞌal ebꞌ, icha chiꞌ ol vutej ebꞌ. Ol in chꞌolbꞌitej ebꞌ icha ix yutej ebꞌ yixtan ebꞌ yetanimail. Icha chiꞌ ol aj yojtacanel ebꞌ to a in ton Jehová sDiosal in ebꞌ, xchi Jehová dꞌayin.