A tas ix chꞌoxji yil vin̈aj Ezequiel yuj Jerusalén
8
Ayic yoil cꞌual yoch svaquil uj yic svaquil abꞌil, cꞌojan in em dꞌa in pat yedꞌ ebꞌ yichamtac vinaquil chon̈abꞌ Judá, axo ix aji, ix yacꞌanem spoder Jehová Cajalil dꞌa vibꞌan̈. 2 Axo ix vilani ay jun icha yilji anima lin̈anecꞌ dꞌa in tzꞌey. A dꞌa snan̈al tzꞌemn̈ejcoti, icha val cꞌacꞌ yilji, axo pax yibꞌan̈ snan̈al sqꞌuen̈ej, veei yilji icha qꞌuen bronce ayoch dꞌa cal cꞌacꞌ. 3 A jun icha anima chiꞌ, ix yacꞌcot jun scꞌabꞌ dꞌa vibꞌan̈, ix syaman xil in jolom. Axo Yespíritu Dios ix in icꞌanqꞌue dꞌa cal icꞌ, icha vayich ix aj in yicꞌanbꞌat dꞌa Jerusalén, yic schꞌoxan vilaꞌ tas ay taꞌ. Ix in yacꞌanoch dꞌa jun puerta ay dꞌa yol yamaqꞌuil templo, aton jun ay dꞌa stojolal norte. Ataꞌ ay yedꞌtal jun comon dios, aton jun stzuntzancot yoval scꞌol Jehová. 4 A val taꞌ ayecꞌ stziquiquial co Diosal a on̈ israel on̈ tic, icha val ix aj schꞌoxji vilaꞌ ayic ayinecꞌ dꞌa jun acꞌlic. 5 Ix lajvi chiꞌ, ix yalan dꞌayin icha tic: Ach anima, bꞌatan̈ qꞌuelan dꞌa stojolal norte, xchi dꞌayin.Ix in bꞌat qꞌuelan, ix vilan dꞌa stzꞌey spuertail dꞌa snorteal altar. Ataꞌ ix vil jun yechel stzuntzancot yoval scꞌol Jehová.
6 Ix lajvi chiꞌ ix yalan dꞌayin icha tic: Ach anima, ¿tzam val il tas te yajbꞌentac scꞌulej ebꞌ etisraelal tic? Yuj val juntzan̈ tic najat tzin el dꞌa in templo tic. Palta ayto val juntzan̈xo yelxo te chuc ol ilaꞌ, xchi dꞌayin.
7 Ix lajvi chiꞌ ix in yicꞌanelta bꞌaj tzon̈ och dꞌa yamaqꞌuil templo chiꞌ, ix vilani ay jun olan dꞌa yich templo chiꞌ. 8 Ix yalan Jehová chiꞌ dꞌayin icha tic: Levbꞌitej jun olan dꞌa yich templo chiꞌ, xchi dꞌayin.
Yuj chiꞌ ix in levbꞌitan jun olan chiꞌ, ix chax jun puerta vuuj. 9 Ix yalan dꞌayin: Ochan̈ dꞌa yool, ol ilan val tas yajbꞌentac scꞌulej ebꞌ taꞌ, xchi dꞌayin. 10 Ix in och bꞌian, ix vilani to a dꞌa sattac yich pat chiꞌ, ataꞌ tzꞌibꞌabꞌiloch masanil yechel nocꞌ nocꞌ sn̈ervi dꞌa sat luum tic yedꞌ yechel masanil nocꞌ nocꞌ man̈ vachꞌoc icha yalan ley yedꞌ masanil macan̈il tas syaloch ebꞌ vetisraelal sdiosaloc. 11 A dꞌa yichan̈ juntzan̈ yechel chiꞌ ayoch 70 ebꞌ yichamtac vinaquil chon̈abꞌ Israel, aypaxoch vin̈aj Jaazanías yuninal vin̈aj Safán dꞌa scal ebꞌ, ayoch ebꞌ ejmelal dꞌa juntzan̈ yechel chiꞌ. Junjun ebꞌ yedꞌnacqꞌue junjun chaynubꞌ ebꞌ yic incienso, a dꞌa yol juntzan̈ chiꞌ bꞌacaqui sqꞌue stabꞌil incienso chiꞌ.
12 Ix yalanxi Jehová dꞌayin icha tic: Ina val tas scꞌulej juntzan̈ yichamtac vinaquil chon̈abꞌ Israel tic dꞌa elcꞌaltac. Junjun ebꞌ ayecꞌ dꞌa yichan̈ sbꞌachnubꞌ sdiosal. A juntzan̈ ebꞌ tic a snaan ebꞌ to max vil ebꞌ, actabꞌilxocan jun chon̈abꞌ tic vuuj snaan ebꞌ, xchi dꞌayin. 13 Ix yalanpax dꞌayin icha tic: Ayto val juntzan̈xo te yajbꞌentac ol ilaꞌ, xchi.
14 Ix in yicꞌanpaxbꞌat dꞌa spuertail stemplo chiꞌ, aton jun scan dꞌa stojolal norte. Ataꞌ cꞌojanem juntzan̈ ebꞌ ix ix, van yocꞌ ebꞌ ix yuj sdiosal scuch Tamuz.* 15 Ix lajvi chiꞌ, ix yalan dꞌayin icha tic: ¿Ix am il juntzan̈ tic? Palta ayto val juntzan̈xo te yajbꞌentac ol ilaꞌ, xchi dꞌayin.
16 Ix lajvi chiꞌ ix in yicꞌanbꞌat dꞌa jun yuneꞌ amacꞌ ayoch dꞌa spatictac templo chiꞌ, aton dꞌa scal altar yedꞌ stiꞌ templo chiꞌ. Ataꞌ ayecꞌ 25 ebꞌ vin̈ vinac, a yich spatic ebꞌ vin̈ aycanbꞌat dꞌa stojolal stemplo Jehová chiꞌ, qꞌuelanbꞌat ebꞌ vin̈ dꞌa stojolal bꞌaj sjavi cꞌu, n̈ojanem ebꞌ vin̈ dꞌa sat luum, ayoch ebꞌ vin̈ ejmelal dꞌa cꞌu chiꞌ. 17 Ix yalanxi dꞌayin icha tic: Ach anima ¿toxom ix ilaꞌ? Man̈ocn̈ej dꞌa tic ay juntzan̈ tas yajbꞌentac scꞌulej ebꞌ tic, palta toxo ix bꞌudꞌjiel yol nación tic yuj sqꞌuechaan̈ ebꞌ yixtan anima. ¿Toc junel chaeln̈ej stzuntzejcot yoval in cꞌol ebꞌ? Svabꞌ val sjabꞌ chucal scꞌulej ebꞌ chiꞌ. 18 Palta a in tic, ol vacꞌ spac dꞌa ebꞌ yedꞌ yoval in cꞌool. Man̈xo ol ocꞌ in cꞌol dꞌa ebꞌ. Vachꞌchom ol avaj ebꞌ dꞌayin, palta man̈xo ol in tacꞌvej ebꞌ, xchi Jehová dꞌayin.