2 Ix vilani to ay vacvan̈ ebꞌ vin̈ vinac ix och dꞌa yol jun nivan puerta ay dꞌa stojolal norte, junjun ebꞌ vin̈ yedꞌnac syamcꞌabꞌ bꞌaj smacꞌcham anima. A dꞌa scal ebꞌ vin̈ chiꞌ, ix vilpax scot jun vin̈ ayoch spichul nabꞌa lino. A dꞌa snan̈al vin̈, ataꞌ ayoch syamcꞌabꞌ yic tzꞌibꞌ. Ix vilan yoch ebꞌ vin̈, ix ochcꞌoch ebꞌ vin̈ dꞌa slacꞌanil altar nabꞌa bronce. 3 Axo stziquiquial Jehová co Diosal a on̈ israel on̈ tic ix qꞌue vaan, ix el dꞌa yibꞌan̈ juntzan̈ yechel querubín, bꞌaj aytaxoneqꞌui, ix can dꞌa spuertail templo chiꞌ. A Jehová chiꞌ ix avtan jun vin̈ ayoch pichul lino chiꞌ yuuj, aton jun vin̈ edꞌjinac yamcꞌabꞌ yic tzꞌibꞌ dꞌa snan̈al. 4 Ix yalan Jehová chiꞌ dꞌa vin̈ icha tic: Ecꞌan̈ dꞌa masanil yol chon̈abꞌ Jerusalén tic, tzacꞌanoch yechel dꞌa snan̈al sat masanil anima tzꞌocꞌ yuj chucal yajbꞌentac scꞌulej ebꞌ anima dꞌa chon̈abꞌ tic, xchi.

5 Ix lajvi chiꞌ ix vabꞌan yalanxi dꞌa ebꞌ vin̈ edꞌjinac syamcꞌabꞌ yic oval chiꞌ: Ixiquec dꞌa spatictac vin̈ chiꞌ, tzex ecꞌ dꞌa cal chon̈abꞌ tic smasanil, mocabꞌ ocꞌ e cꞌol dꞌa ebꞌ anima, tze milcham 6 masanil ebꞌ vin̈ ichamtac vinac, ebꞌ vin̈ quelemtac, ebꞌ ix cobꞌestac, ebꞌ ix ix yedꞌ ebꞌ unin, masanto man̈xalaj junoc ebꞌ scani. Palta man̈ e milcham junoc ebꞌ ayoch yechel dꞌa snan̈al chiꞌ. Tze chael yich dꞌa in templo tic, xchi Jehová. Ix schaanel yich ebꞌ vin̈ smilancham ebꞌ vin̈ ichamtac vinac ayecꞌ dꞌa yamaqꞌuil templo chiꞌ.

7 Ix lajvi chiꞌ, ix yalan Jehová dꞌa ebꞌ vin̈ icha tic: Ixtejequel templo tic, tzeyacꞌan bꞌudꞌjoc yamaqꞌuil yuj snivanil ebꞌ scham chiꞌ, slajvi chiꞌ tzex bꞌati, xchi.

Ix vilan sbꞌat lemnaj ebꞌ vin̈ bꞌian, ix och ijan ebꞌ vin̈ smilancham ebꞌ anima dꞌa masanil yol chon̈abꞌ chiꞌ. 8 Ayic van smilancham ebꞌ anima chiꞌ ebꞌ vin̈, a inxon̈ej in can dꞌa yichan̈ Jehová, ix in em n̈ojan dꞌa sat luum, ix te cus in cꞌool, yuj chiꞌ ix el vav: Mamin Jehová Vajalil, ¿tom ol a satel masanil ebꞌ aytocan dꞌa Israel yuj yoval a cꞌol dꞌa Jerusalén tic? xin chi.

9 Ix tacꞌvi dꞌayin icha tic: A val smul ebꞌ aj Israel yedꞌ ebꞌ aj Judá tic, yelxo val te nivan. Yelxo val bꞌudꞌjinaquel yol juntzan̈ chon̈abꞌ chiꞌ yuj snivanil ebꞌ anima smiljichamoc. Man̈xa jabꞌoc tojolal scꞌulej ebꞌ. A snaan ebꞌ to toxo ix vactejcan jun nación tic, maxtzac vil tas scꞌulej ebꞌ snaani. 10 A ticnaic maxtzac ocꞌ in cꞌol dꞌa ebꞌ, ol vacꞌxon̈ejoch syaelal ebꞌ yuj masanil tas tzꞌel scꞌulani, xchi Jehová.

11 Ix lajvi chiꞌ, ix jax jun vin̈ vinac ayoch lino spichuloc chiꞌ, yedꞌnac pax yamcꞌabꞌ yic tzꞌibꞌ dꞌa snan̈al, ix yalan vin̈ icha tic: Mamin Vajalil, toxo ix in cꞌanabꞌajej tas ix a chec in cꞌulej, xchi vin̈.