Axo ix vilani, ix scꞌanabꞌajan vin̈ tas ix yal Jehová chiꞌ. 3 A ebꞌ querubín chiꞌ ayecꞌ ebꞌ dꞌa jun spacꞌul templo chiꞌ dꞌa stojolal sur. Ix em jun yasunal stziquiquial Jehová, ix bꞌudꞌjiel yamaqꞌuil templo chiꞌ yuuj. 4 Toxo ix qꞌue van stziquiquial Jehová dꞌa yibꞌan̈ juntzan̈ yechel querubín bꞌaj aytaxoneqꞌui, ix can dꞌa spuertail templo chiꞌ. Ix bꞌudꞌjiel templo yuj jun asun chiꞌ, axo yamaqꞌuil templo chiꞌ, toxon̈ej scopopi yilji yuj stziquiquial Jehová chiꞌ. 5 Tzato abꞌchajn̈ej scꞌan̈ scꞌaxil ebꞌ querubín chiꞌ dꞌa jun nivan amacꞌ dꞌa stiel templo chiꞌ. Lajan val icha sjaj Dios Syal yuj Smasanil ayic sloloni. 6 Ayic ix yalan Jehová dꞌa jun vin̈ vinac ayoch lino spichuloc chiꞌ to syiqꞌuelta cꞌacꞌ dꞌa scal juntzan̈ xocanxocan dꞌa snan̈al ebꞌ querubín chiꞌ, ix och vin̈ bꞌian, ix och lin̈an vin̈ dꞌa stzꞌey junoc juntzan̈ xocanxocan chiꞌ. 7-8 A dꞌa yalan̈ scꞌaxil ebꞌ querubín chiꞌ, ataꞌ ayelta scꞌabꞌ ebꞌ icha cꞌabꞌ anima. A junoc ebꞌ querubín chiꞌ ix yacꞌbꞌat scꞌabꞌ dꞌa scal cꞌacꞌ ayelta dꞌa snan̈al ebꞌ chiꞌ, ix yicꞌanelta jabꞌoc cꞌacꞌ chiꞌ, ix yacꞌanoch dꞌa yol scꞌabꞌ vin̈ ayoch lino spichuloc chiꞌ. Ix schaanecꞌ vin̈, ix yicꞌanelta vin̈. 9 Ix vilan pax chan̈eꞌ xocanxocan toxon̈ej scopopi yilji icha qꞌuen topacio, junn̈ej yaj yedꞌ ebꞌ querubín chiꞌ. 10 A juntzan̈ chiꞌ lajann̈ej, a dꞌa junjun ay junocxo xocanxocan scꞌaxpaj ecꞌ dꞌa snan̈al yool. 11 Ayic sbꞌat ebꞌ querubín chiꞌ, a bꞌaj qꞌuelanbꞌat ebꞌ sbꞌati, sbꞌatn̈ej ebꞌ, max sutmaj snivanil ebꞌ bꞌaj sbꞌat chiꞌ, palta to syal sbꞌatn̈ej ebꞌ dꞌa schan̈il pacꞌan̈ bꞌaj qꞌuelanbꞌati. 12 Masanil snivanil ebꞌ, yich spatic ebꞌ, scꞌabꞌ ebꞌ yedꞌ scꞌaxil ebꞌ, ayn̈ej yol sat, icha juntzan̈ xocanxocan chiꞌ. 13 Ix vabꞌan yalchaj sbꞌi juntzan̈ xocanxocan chiꞌ: Xocanxocan surancani. 14 A ebꞌ querubín chiꞌ, chan̈eꞌ sat junjun ebꞌ. A sbꞌabꞌel sat ebꞌ lajan yilji icha sat junoc querubín, axo schabꞌil, lajan yilji icha sat anima, axo yoxil, lajan yilji icha sat nocꞌ choj, axo schan̈il, lajan yilji icha sat nocꞌ nivac chꞌacbꞌa. 15 A ebꞌ querubín chiꞌ, an̈ejtonaꞌ ebꞌ ix vil dꞌa stiꞌ aꞌ nivan Quebar. Ix qꞌue vaan ebꞌ. 16 Ayic sbꞌat ebꞌ, sbꞌatpax juntzan̈ xocanxocan chiꞌ yedꞌ ebꞌ. Ayic syicꞌanqꞌue scꞌaxil ebꞌ ayic sqꞌue jen̈naj ebꞌ dꞌa sat luum, sqꞌuepax vaan juntzan̈ xocanxocan chiꞌ yedꞌ ebꞌ. 17 Ayic tzꞌoch vaan ebꞌ, tzꞌochpax vaan juntzan̈ xocanxocan chiꞌ. Ayic sqꞌue vaan ebꞌ, sqꞌuepax vaan juntzan̈ chiꞌ yedꞌ ebꞌ, yujto a dꞌa juntzan̈ xocanxocan chiꞌ ayoch spixan ebꞌ.

18 Ix lajvi chiꞌ ix qꞌue vaan stziquiquial Jehová dꞌa spuertail templo chiꞌ, axo dꞌa yibꞌan̈ ebꞌ querubín chiꞌ ix cꞌochcani. 19 Qꞌuelan in val ochi ix yicꞌanqꞌue scꞌaxil ebꞌ, ix qꞌue vaan ebꞌ dꞌa sat lum tic yedꞌ juntzan̈ xocanxocan chiꞌ, axo dꞌa spuertail yamaqꞌuil stemplo Jehová dꞌa stojolal bꞌaj sjavi cꞌu ix vanaj ebꞌ. A stziquiquial Jehová co Diosal a on̈ israel on̈ tic ayecꞌ dꞌa yibꞌan̈ ebꞌ. 20 Aton juntzan̈ ebꞌ querubín tic vilnac dꞌa yalan strono Jehová co Diosal a on̈ israel on̈ tic, ayic ayinecꞌ dꞌa stiꞌ aꞌ nivan Quebar. Icha chiꞌ ix aj snachajel vuuj to querubín ebꞌ. 21 A junjun ebꞌ chiꞌ, chan̈eꞌ sat ebꞌ, chan̈eꞌ pax scꞌaxil junjun ebꞌ. Axo dꞌa yalan̈ scꞌaxil ebꞌ chiꞌ, ayelta scꞌabꞌ ebꞌ icha yilji cꞌabꞌ anima. 22 A sat ebꞌ, lajann̈ej yilji icha yilji ebꞌ vilnac dꞌa stiꞌ aꞌ nivan Quebar chiꞌ. Ayic sbꞌeybꞌat ebꞌ, tojoln̈ej sbꞌat ebꞌ bꞌaj qꞌuelanbꞌat dꞌa yichan̈.