Yaelal dꞌa yibꞌan̈ ebꞌ yajalil chon̈abꞌ Israel
11
A Yespíritu Dios chiꞌ ix in icꞌanbꞌat bꞌaj ay spuertail stemplo Jehová chiꞌ dꞌa stojolal bꞌaj sjavi cꞌu. A dꞌa jun puerta chiꞌ, ayecꞌ 25 ebꞌ vin̈ vinac, axo dꞌa scal ebꞌ vin̈ chiꞌ, ayecꞌ vin̈aj Jaazanías yuninal vin̈aj Azur yedꞌ vin̈aj Pelatías yuninal vin̈aj Benaías, aton ebꞌ vin̈ chiꞌ yajal yaj dꞌa scal ebꞌ anima. 2 Ix yalan Jehová dꞌayin icha tic: Ach anima, aton val juntzan̈ vinac tic ayn̈ejecꞌ dꞌa spensar scꞌulan chucal, scuchbꞌan ebꞌ anima ebꞌ dꞌa chucal chiꞌ. 3 Syalan ebꞌ icha tic: Man̈ toxooc ol satel co chon̈abꞌ tic, co bꞌoecqꞌue co pat. A co chon̈abꞌ tic lajan icha junoc qꞌuen chen, a on̈xo tic lajan on̈ icha nocꞌ chibꞌej tzꞌem dꞌa yol chen chiꞌ, xchi ebꞌ. 4 Yuj chiꞌ ach anima alel in lolonel yuj tas ol ja dꞌa yibꞌan̈ ebꞌ, xchi Jehová dꞌayin.5 Ix lajvi chiꞌ ix ja pax Yespíritu Jehová dꞌayin, ix yalan icha tic: Al dꞌa ebꞌ anima chiꞌ to a in sval icha tic: Ex israel, vojtac val sicꞌlabꞌil tas tze naꞌa. 6 Te tzijtumxo anima ix e milcham dꞌa jun chon̈abꞌ tic, bꞌudꞌan yoltac calle yuj chamnac chiꞌ. 7 Yuj chiꞌ a in Jehová in sval dꞌayex: A Jerusalén tic, lajan val icha junoc qꞌuen chen. Axo nocꞌ chibꞌej chiꞌ, aton ebꞌ anima tze milcham dꞌa yoltac calle chiꞌ. Palta a exxo tic, ol ex viqꞌuel dꞌa yol chon̈abꞌ tic. 8 Vojtac to tzex xiv dꞌa oval, yuj chiꞌ a in Jehová in ol vacꞌcot oval chiꞌ dꞌa eyibꞌan̈. 9 Ol vacꞌoch yaelal dꞌa eyibꞌan̈, ol ex viqꞌuel dꞌa yol chon̈abꞌ tic, ol ex vacꞌanoch dꞌa yol scꞌabꞌ ebꞌ chꞌoc chon̈abꞌil. 10 Ol ex miljoccham dꞌa qꞌuen espada. A in ol vacꞌoch eyaelal dꞌa yichan̈bꞌat smojonal Israel tic. Icha chiꞌ ol aj snachajel eyuuj to a in ton Jehová e Diosal in. 11 A jun chon̈abꞌ tic, man̈ lajanoc ol aj icha junoc qꞌuen chen dꞌayex, a exxo pax tic, man̈ lajanoc ol ex aj icha nocꞌ chibꞌej. A dꞌa yichan̈bꞌat smojonal Israel tic, ataꞌ ol vacꞌoch eyaelal. 12 Icha chiꞌ ol aj snachajel eyuuj to a in ton Jehová e Diosal in. Yujto a ex tic man̈ jabꞌoc ix e bꞌeybꞌalej in checnabꞌil, maj e cꞌanabꞌajej in cꞌaybꞌubꞌal, palta a sbꞌeybꞌal juntzan̈ nación ay dꞌa e lacꞌanil tic ix e bꞌeybꞌalej, xchi Jehová, xa chi dꞌa ebꞌ, xchi dꞌayin.
13 Yacbꞌan van valan juntzan̈ tic, ix vilani ix cham vin̈aj Pelatías yuninal vin̈aj Benaías. Ix in em lachnaj dꞌa sat luum, ix vacꞌanel vav, ix valani: Ay Mamin Jehová, ¿tom ol a satel jayvan̈xo anima ixto can dꞌa Israel tic? xin chi.
Jun strato Dios yedꞌ ebꞌ israel
14 Ix yalanxi Jehová dꞌayin icha tic: 15 Ach anima, a ebꞌ etisraelal aycan dꞌa Jerusalén tic, syal ebꞌ eyuuj a ex ayto eyuj e bꞌa icꞌbꞌil ex bꞌat dꞌa Babilonia icha tic: A ebꞌ chiꞌ, te najat ix icꞌjicanel ebꞌ dꞌa tzꞌey Jehová, yuj chiꞌ a lum luum tic, toxo ix acꞌjican lum co macbꞌenoc xchi ebꞌ eyuuj. 16 Yuj chiꞌ al dꞌa ebꞌ cajan dꞌa Jerusalén icha tic: Icha tic yalan Jehová Cajalil: Ix viqꞌuel ebꞌ dꞌa sluum, ix in saclemanbꞌat ebꞌ dꞌa juntzan̈ chꞌoc nacional. Palta yacbꞌan ayecꞌ ebꞌ junoc tiempoal taꞌ, ayinecꞌ yedꞌ ebꞌ, ichato ayecꞌ jun bꞌaj cajan in ecꞌ dꞌa scal ebꞌ. 17 A in ol ex in molbꞌejxi dꞌa juntzan̈ nación bꞌaj sacleminac eyajcanbꞌati, ol ex vicꞌanxi meltzajoc. Ol vacꞌanxi lum e luum e macbꞌenoc.
18 Ol meltzajxoc ebꞌ dꞌa schon̈abꞌ, ol satanel masanil juntzan̈ yechel yajbꞌentac ebꞌ. 19 Ol viqꞌuel jun pensar ayoch dꞌa ebꞌ icha qꞌuen qꞌueen, axo jun acꞌ pensar te vachꞌ ol vacꞌoch dꞌa ebꞌ. 20 Icha chiꞌ ol aj yajecꞌ ebꞌ icha val yalan in cꞌaybꞌubꞌal, ol sbꞌeybꞌalan pax in checnabꞌil ebꞌ, in chon̈abꞌ ol ajxoc ebꞌ, a inxo ol in ochxoc sDiosaloc ebꞌ. 21 Axo pax ebꞌ to olto bꞌeybꞌalan juntzan̈ bꞌeybꞌal yajbꞌentac chiꞌ, a in Jehová in svalaꞌ to ol vacꞌoch yaelal dꞌa yibꞌan̈ ebꞌ yuuj, xchi Jehová dꞌayin.
Ix el stziquiquial Jehová dꞌa Jerusalén
22 Ix lajvi chiꞌ ix vilan sqꞌue vaan ebꞌ querubín, ix bꞌat jen̈en̈oc ebꞌ, ix bꞌatpax juntzan̈ xocanxocan yedꞌ ebꞌ. A stziquiquial Jehová co Diosal a on̈ israel on̈ tic ayem dꞌa yibꞌan̈ ebꞌ. 23 Junn̈ej ix qꞌue vaan yedꞌ ebꞌ, ix el dꞌa chon̈abꞌ Jerusalén chiꞌ. Axo dꞌa sjolom jun lum vitz dꞌa stojolal bꞌaj sjavi cꞌu dꞌa chon̈abꞌ chiꞌ ataꞌ ix vanaji. 24 Ix lajvi chiꞌ, ix vilani a Yespíritu Dios ix in icꞌanxicot dꞌa Babilonia tic, aton bꞌaj ayecꞌ juntzan̈ ebꞌ vetchon̈abꞌ icꞌbꞌilcot dꞌa tic. Aton juntzan̈ tic ix schꞌox Yespíritu Dios vilaꞌ. Ix lajvi chiꞌ, man̈xalaj tas ix vilaꞌ. 25 Masanil juntzan̈ tas ix schꞌox Jehová chiꞌ dꞌayin, ix val dꞌa ebꞌ icꞌbꞌilcot chiꞌ dꞌa Babilonia tic.