Chꞌoxnabꞌil yaj vin̈aj Ezequiel
12
Ix yalanxi Jehová dꞌayin icha tic: 2 Ach anima, a juntzan̈ anima bꞌaj cajan ach ecꞌ dꞌa scal tic, te pit ebꞌ. Nabꞌan̈ej ay yol sat ebꞌ, palta max yil-laj ebꞌ. Nabꞌan̈ej ay schiquin ebꞌ, palta max yabꞌ ebꞌ tas svalaꞌ, yujto a jun chon̈abꞌ tic juneln̈ej te pit. 3 Yuj chiꞌ molbꞌej a cꞌael, ichato van icꞌjibꞌat dꞌa chꞌoc chon̈abꞌil. Dꞌa cꞌualil, yichan̈ val ebꞌ tzach elta dꞌa yol a pat, chꞌocxo bꞌaj tzach bꞌatcani, tecan ol nachajel yuj ebꞌ icha chi, vachꞌchom te pit ebꞌ. 4 Dꞌa cꞌualil, val dꞌa yichan̈ ebꞌ smasanil, tzicꞌanelta a cꞌael chiꞌ, ichato tzach icꞌjibꞌati. An̈ejaꞌ dꞌa yemcꞌualil, tzach elta pax dꞌa yichan̈ ebꞌ, ichato tzach icꞌjibꞌat dꞌa chꞌoc chon̈abꞌil. 5 Ol junoc olan dꞌa sat a pat, tzach el taꞌ yedꞌ masanil a cꞌael dꞌa yichan̈ ebꞌ smasanil. 6 Ayic vanxo sqꞌuicꞌbꞌi, tza jolomjen̈jabꞌan masanil a cꞌael chiꞌ, val dꞌa yichan̈ ebꞌ smasanil tzach eli. Tza musej a sat yic vachꞌ max yal ilan bꞌaj tzach bꞌati. In gana to a ach tzach och chꞌoxnabꞌilal dꞌa ebꞌ etisraelal tic, xchi dꞌayin.7 Ix vacꞌan lista masanil in cꞌael icha val ix aj yalan Jehová chiꞌ dꞌayin. Dꞌa cꞌualil ix in elta yedꞌ in cꞌael chiꞌ, icha val ebꞌ van yicꞌjibꞌat dꞌa chꞌoc chon̈abꞌil. Axo dꞌa yemcꞌualil ix in bꞌoan jun olan dꞌa sat in pat, axo yic van sqꞌuicꞌbꞌi, ix in jolomjen̈jabꞌan masanil in cꞌael chiꞌ. Yichan̈ val ebꞌ ix in elta.
8 Axo dꞌa qꞌuin̈ibꞌalil dꞌa junxo cꞌu, ix yalanxi Jehová dꞌayin icha tic: 9 Ach anima, a ebꞌ etisraelal tic yelxo te pit ebꞌ, ¿toc val maj scꞌanbꞌej ebꞌ dꞌayach yuj tas van a cꞌulan chiꞌ? 10 Al dꞌa ebꞌ icha tic: A Jehová Cajal tzꞌalan icha tic: A jun tzin chec cꞌulaj tic, chꞌoxnabꞌil yaji, icha val tic ol aj vin̈ sreyal Jerusalén yedꞌ masanil anima cajan taꞌ, xchi Jehová, xa chi dꞌa ebꞌ. 11 Tzalan paxi to chꞌoxnabꞌil aj dꞌa ebꞌ. Yujto yovalil icha chiꞌ ol aj ebꞌ aj Jerusalén chiꞌ, icha val van utan a bꞌa chiꞌ, yujto ol icꞌjocbꞌat ebꞌ dꞌa chꞌoc chon̈abꞌil. 12 A vin̈ sreyal ebꞌ, yovalil ol sjolomjen̈jabꞌejbꞌat scꞌael vin̈ ayic van sqꞌuicꞌbꞌi, ol el vin̈ dꞌa jun olan bꞌobꞌil yuj ebꞌ dꞌa smuroal Jerusalén chiꞌ. Ol smusan sat vin̈, yic vachꞌ man̈ ol yil vin̈ bꞌaj sbꞌati. 13 A in ol vacꞌbꞌat jun icha chꞌan̈ yaal dꞌa yibꞌan̈ vin̈ rey chiꞌ, ol can vin̈ dꞌa yol chꞌan̈, ol icꞌjoccot vin̈ dꞌa Babilonia, dꞌa slum ebꞌ caldeo tic, palta man̈ ol yil-laj jun chon̈abꞌ tic vin̈. A dꞌa tic ol cham vin̈. 14 Ol saclemcanbꞌat ebꞌ soldado stan̈van vin̈ yedꞌ pax juntzan̈xo ebꞌ soldado. A in ol vacꞌ pechjoc ebꞌ yedꞌ qꞌuen espada. 15 Ayic toxo ix in saclemejbꞌat ebꞌ dꞌa juntzan̈xo nación chiꞌ, ol nachajel yuj ebꞌ to a in ton Jehová sDiosal in ebꞌ. 16 Palta a in ol vacꞌ colchajcanel jayvan̈ocxo ebꞌ dꞌa scal oval, dꞌa scal vejel yedꞌ dꞌa scal ilya, yic vachꞌ a dꞌa juntzan̈xo nación bꞌaj ol bꞌatcan ebꞌ chiꞌ, ol yal ebꞌ yuj jantac tas yajbꞌentac scꞌulejnac. Ol yojtaquejpaxel ebꞌ to a in ton Jehová sDiosal in ebꞌ, xchi Jehová.
Ol can val tzꞌinan Jerusalén
17 Ix yalanxi Jehová dꞌayin icha tic: 18 Ach anima, luclonan̈qꞌue yuj xivelal yedꞌ ilcꞌolal ayic tzach vaꞌi yedꞌ ayic tzucꞌan aꞌ. 19 Al dꞌa masanil ebꞌ etchon̈abꞌ chiꞌ icha tic: Icha val tic yalan Jehová Cajalil dꞌa ebꞌ cajan dꞌa Jerusalén yedꞌ dꞌa masanil ebꞌ cajan dꞌa smacbꞌen Israel chiꞌ: Dꞌa scal ilcꞌolal ol va ebꞌ, dꞌa scal somcꞌolal ol yuqꞌuej aꞌ ebꞌ, yujto a jun nación chiꞌ ol lajvoquemoc. Ol can val tzꞌinan yuj masanil ixtoj anima scꞌulej ebꞌ cajan dꞌay. 20 Masanil chon̈abꞌ bꞌajtac cajan anima ol laj emcan lan̈najoc, ol can pax tzꞌinan lum smacbꞌen ebꞌ chiꞌ. Icha chiꞌ ol aj snachajel eyuuj to a in ton Jehová e Diosal in, xchi dꞌayin.
21 Ix yalanxi Jehová dꞌayin icha tic: 22 Ach anima, ¿tas syalelcꞌoch jun slolonel ebꞌ israel syal icha tic? Ton̈ej bꞌelbꞌon yecꞌ tiempo, max elcꞌochlaj tas syal ebꞌ schecabꞌ Dios, xchi ebꞌ. 23 Yuj chiꞌ al dꞌa ebꞌ: Icha tic yalan Jehová Cajalil: A yuj tas ol in cꞌulej, man̈xo ol eyal-laj jun lolonel chiꞌ, yujto toxo ol cꞌoch stiempoal yelcꞌoch juntzan̈ tas in chꞌoxnac yil ebꞌ in checabꞌ, xchi Jehová, xa chi dꞌa ebꞌ. 24 Yujto man̈xa mach ol stzꞌac yalaꞌ to ay tas te vachꞌ ix yil dꞌa svayich, ma snaanchaan̈ junoc esal lolonel dꞌa e cal. 25 Yujto a in Jehová in ol in lolonoc. Yaln̈ej tas ol val chiꞌ elan̈chamel ol elcꞌochoc. A ex anima ex te pit ex tic, ol eyil val to a in ol in lolonoc, ol vacꞌanelcꞌoch tas sval chiꞌ, xchi dꞌayin.
26 Ix yalanxi Jehová dꞌayin icha tic: 27 Ach anima, a ebꞌ etisraelal chiꞌ, syal ebꞌ to a juntzan̈ ix in chꞌox ilaꞌ yedꞌ juntzan̈ lolonel ix alaꞌ to olto ebꞌ yelcꞌochi, 28 yuj chiꞌ al dꞌa ebꞌ to a in Jehová in svalaꞌ to a tas svalaꞌ man̈ ol ecꞌ tiempo yelcꞌochi, yovalil ol elcꞌoch dꞌa elan̈chamel, xchi Jehová dꞌayin.