Syaelal ebꞌ syaloch sbꞌa schecabꞌoc Jehová
13
Ix yalanxi Jehová dꞌayin icha tic: 2 Ach anima, al juntzan̈ in lolonel tic dꞌa juntzan̈ ebꞌ syaloch sbꞌa in checabꞌoc dꞌa ebꞌ etisraelal, aton ebꞌ scomon lolon dꞌa yol yicoꞌ. Al dꞌa ebꞌ to smaclej yabꞌ in lolonel ebꞌ, a in Jehová e Yajal in tic sval icha tic: 3-4 Ex israel, obꞌiltac val juntzan̈ ebꞌ syaloch sbꞌa in checabꞌoc chiꞌ, malaj spensar ebꞌ, an̈ej spensar ebꞌ dꞌa yol yic syalaꞌ, tocval ay tas schꞌoxji yil ebꞌ. Lajan val ebꞌ icha nocꞌ vaax cajan bꞌaj emnac lan̈naj junoc chon̈abꞌ. 5 Icha val muro max nipchaj spojelal ayic sjavi scꞌual oval, icha chiꞌ yaj ebꞌ yin̈tilal Israel, man̈ jabꞌoc sbꞌo sbꞌeybꞌal ebꞌ yuj ebꞌ syaloch sbꞌa in checabꞌoc chiꞌ yic max vacꞌ syaelal ebꞌ ayic ol in javoc in chꞌolbꞌitan ebꞌ a in Jehová in tic. 6 A tas tzꞌacꞌji yil ebꞌ yalani, man̈ yeloclaj. A lolonel ayocto syalancanel ebꞌ, es juntzan̈ chiꞌ. Syal ebꞌ to a in lolonel syalel ebꞌ, palta man̈oc in tzin chec yal ebꞌ. Vachꞌchom es juntzan̈ syal ebꞌ chiꞌ, palta syacꞌoch ebꞌ yipoc scꞌool to ol elcꞌoch yalan ebꞌ. 7 Yuj chiꞌ sval dꞌa ebꞌ icha tic: A ex tic tzeyaloch e bꞌa in checabꞌoc. Tocval man̈ esoc tas tzeyalaꞌ ayic tzeyalani to ay tas ix chꞌoxji eyilaꞌ, tze naanel lolonel, ayic tzeyalani: Icha tic yalan Jehová xe chi, palta malaj tas sval dꞌayex. 8 Yuj chiꞌ a in Jehová in svalaꞌ: Yujto a ex tic tzeyalaꞌ to ay tas tzin chꞌox eyilaꞌ, palta man̈ yeloclaj, yuj chiꞌ ay in och ajcꞌolal dꞌayex. 9 Ol vicꞌ val chaan̈ in cꞌabꞌ vacꞌanoch syaelal juntzan̈ ebꞌ syaloch sbꞌa in checabꞌoc chiꞌ, yujto an̈ej tas man̈ yeloc syal ebꞌ. Malaj yalan yic ebꞌ scꞌoch bꞌaj smolbꞌej sbꞌa ebꞌ yetisraelal, max tzꞌibꞌchajcan sbꞌi ebꞌ dꞌa slistail ebꞌ yetchon̈abꞌ chiꞌ, man̈xo ol meltzajpax ebꞌ dꞌa sluum. Icha chiꞌ ol aj snachajel eyuuj to a in ton Jehová e Yajal in.10 A juntzan̈ ebꞌ syaloch sbꞌa in checabꞌoc chiꞌ, ton̈ej syacꞌ ebꞌ in chon̈abꞌ ebꞌ musansatil, syalan ebꞌ icha tic: A ticnaic man̈xo e naꞌ to ay tas ol ja dꞌa quibꞌan̈, xchi ebꞌ, palta man̈ yeloclaj syal ebꞌ. Lajan ebꞌ icha junoc mach stzicanoch qꞌuen taan̈ dꞌa junoc yichtac pat chuclaj yaj sbꞌoi. 11 Al dꞌa ebꞌ stzicanoch qꞌuen taan̈ chiꞌ to ol telvoc jun yich pat chiꞌ ayic ol vacꞌancot nivac yaxn̈abꞌ ay yicꞌal, ay pax sacbꞌatil, 12 ol em lan̈naj jun yich pat chiꞌ. Ichato chiꞌ bꞌian ol scꞌanbꞌan ebꞌ anima: ¿Tas yopisio juntzan̈ qꞌuen taan̈ ix eyacꞌoch chiꞌ? xcham ebꞌ. A jun yich pat chiꞌ, a Jerusalén yedꞌ schucal, a schꞌoxoꞌ. 13 Yuj chiꞌ a in Jehová Yajal in svalaꞌ: A val yuj yoval in cꞌool ichato ol vacꞌbꞌat nivac yaxn̈abꞌ ay yicꞌal, ay pax sacbꞌatil. Yedꞌ val yoval in cꞌool ol vacꞌanem lan̈naj jun yichtac pat chiꞌ. 14 Ol vaqꞌuem lan̈naj chon̈abꞌ Jerusalén chiꞌ, ol em lan̈naj dꞌa sat luum, masanto ol checlaj yich aycanemi. Ayic ol em lan̈naj jun chon̈abꞌ chiꞌ, a dꞌa scal spojelal chiꞌ ol ex chamoc. Icha chiꞌ ol aj snachajel eyuuj to a in ton Jehová e Diosal in. 15 Ol vacꞌvalbꞌat yoval in cꞌol dꞌa jun yichtac pat chiꞌ yedꞌ dꞌa ebꞌ ix acꞌanoch qꞌuen taan̈ dꞌay, ol yalan ebꞌ anima icha tic: Man̈xa jabꞌoc jun yichtac pat chiꞌ ix cani, man̈xa pax ebꞌ ix acꞌanoch staan̈il ix cani, xcham ebꞌ. 16 A ebꞌ stzꞌac yaloch sbꞌa in checabꞌoc chiꞌ, aton ebꞌ tzꞌalan dꞌa ebꞌ yetisraelal tas tzꞌacꞌji yil ebꞌ yalani. Syalan ebꞌ to malaj tas ol javoc dꞌa yibꞌan̈ Jerusalén, aton ebꞌ tic yedꞌ tas syal ebꞌ chiꞌ schꞌox ebꞌ ix acꞌanoch qꞌuen taan̈ dꞌa yichtac pat. Palta a in val Jehová Yajal in svalaꞌ to man̈ ichoc syal ebꞌ chiꞌ svalaꞌ, xchi Jehová.
Syaelal ebꞌ ix ix syaloch sbꞌa schecabꞌoc Dios
17 Ix yalanxi Jehová icha tic: Ach anima, al dꞌa juntzan̈ ebꞌ ix etisraelal syaloch sbꞌa in checabꞌoc, palta an̈ej dꞌa yol yic ebꞌ scomon loloni. 18 Icha tic tzꞌaj alan dꞌa ebꞌ ix: Icha tic yalan Jehová Cajalil: Obꞌiltac ex tze pixoch juntzan̈ cꞌapac dꞌa scꞌabꞌ ebꞌ anima, tze pixanpaxoch cꞌapac dꞌa sjolom ebꞌ, ato syal jantacxo yabꞌilal ebꞌ. Tze nibꞌej tzꞌoch tzacꞌan ebꞌ eyuuj. Yic vachꞌ yecꞌ tiempo eyuuj, tzeyalani to syal e macꞌanecꞌ schamel ebꞌ, ma syal pax eyacꞌancham ebꞌ. 19 A ex tic, an̈ej yuj jun jopoc ixim cebada, ma yuj jabꞌoc ti pan tzin e paticanel dꞌa yichan̈ ebꞌ in chon̈abꞌ. Tzeyacꞌcham ebꞌ anima man̈ smojoc schami, axo ebꞌ anima man̈xo smojoc pitzan, a ebꞌ chiꞌ max eyacꞌchamoc. Icha chiꞌ tzꞌaj eyixtan ebꞌ in chon̈abꞌ scha yabꞌ eyes chiꞌ. 20 Yuj chiꞌ a in val Jehová Yajal in svalaꞌ: Ayinoch ajcꞌolal dꞌayex yuj juntzan̈ cꞌapac tze pixoch dꞌa ebꞌ anima chiꞌ yic tzeyacꞌan ebꞌ musansatil icha tzꞌaj smacchaj nocꞌ much. Ol in n̈iqꞌuel juntzan̈ cꞌapac chiꞌ dꞌa scꞌabꞌ ebꞌ anima chiꞌ. Icha chiꞌ ol aj yelcan ebꞌ dꞌa yol e cꞌabꞌ. 21 Ol in colel in chon̈abꞌ dꞌa yol e cꞌabꞌ bꞌaj tzeyacꞌ musansatil ebꞌ yedꞌ juntzan̈ cꞌapac tzeyacꞌoch dꞌa sat ebꞌ chiꞌ. Man̈xa bꞌaqꞌuin̈ ol montaj ebꞌ eyuj junelxo. Icha chiꞌ ol aj snachajel eyuuj to a in ton Jehová e Diosal in. 22 A yuj eyes chiꞌ tzeyacꞌ chabꞌaxqꞌue scꞌol ebꞌ vachꞌ spensar, aton ebꞌ malaj in gana svacꞌ cus scꞌool, ix e cuchbꞌan ebꞌ te chuc scꞌulej, yuj chiꞌ max sna sbꞌa ebꞌ dꞌa schucal chiꞌ yic scolchaj ebꞌ. 23 Yuj chiꞌ man̈xalaj bꞌaj ol eyalaꞌ to ay tas tzꞌacꞌji eyilaꞌ, ma olto e tzꞌac e nael tas ol ujoc. A in ol in colel in chon̈abꞌ dꞌa yol e cꞌabꞌ. Icha chiꞌ ol aj snachajel eyuuj to a in ton Jehová e Diosal in, xchi Jehová, xa chi dꞌa ebꞌ ix, xchi dꞌayin.