Ay yoval scꞌol Jehová dꞌa ebꞌ tzꞌoch ejmelal dꞌa comon dios
14
Ay ebꞌ yichamtac vinaquil chon̈abꞌ Israel ix javi dꞌayin yic tzin cꞌanbꞌej dꞌa Jehová yuj ebꞌ. 2 Yuj chiꞌ ix yalan Jehová dꞌayin icha tic: 3 Ach anima, a juntzan̈ anima tic toxo ix yacꞌoch spensar ebꞌ dꞌa comon dios, syacꞌanoch sbꞌa ebꞌ dꞌa yol scꞌabꞌ chucal yuj juntzan̈ chiꞌ. ¿Tom olto in tacꞌvoc dꞌa ebꞌ ayic ol scꞌanbꞌan junoc tas ebꞌ dꞌayin? 4 Al dꞌa ebꞌ to a in Jehová Yajal in sval icha tic: Yaln̈ej mach ex israelal ex tic tzeyacꞌoch e pensar dꞌa comon dios, tzeyacꞌanoch e bꞌa dꞌa yol scꞌabꞌ chucal yuj juntzan̈ chiꞌ, slajvi chiꞌ tzex javi e cꞌanbꞌej junoc tas dꞌa ebꞌ in checabꞌ, a in ol vacꞌ spac dꞌayex icha val smojal, yujto tzijtum e diosal chiꞌ, xchi Jehová, xa chi dꞌa ebꞌ.5 Icha chiꞌ ol aj vicꞌan meltzaj spensar ebꞌ israel dꞌayin, aton ebꞌ ix yiqꞌuel sbꞌa dꞌayin, axo dꞌa comon dios ix och ebꞌ ejmelal. 6 Yuj chiꞌ al dꞌa ebꞌ etisraelal chiꞌ icha tic: Icha tic yalan Jehová Yajal: Meltzajan̈eccot dꞌayin, actejeccan juntzan̈ comon dios yedꞌ juntzan̈ e bꞌeybꞌal yajbꞌentac tze cꞌulej chiꞌ, xa chi dꞌa ebꞌ. 7 Tato ay junoc ebꞌ ma junoc chꞌoc chon̈abꞌil ayecꞌ dꞌa scal ebꞌ tzin paticaneli, axo dꞌa comon dios tzꞌoch ejmelal, syacꞌanoch sbꞌa dꞌa yol scꞌabꞌ chucal yuj juntzan̈ chiꞌ, slajvi chiꞌ sjavi dꞌa junoc in checabꞌ yic scꞌanbꞌan dꞌayin yuuj, a in val ol vacꞌ spac dꞌay. 8 Ol in och ajcꞌolal dꞌay, ol in satel dꞌa scal in chon̈abꞌ yic tzꞌoch chꞌoxnabꞌil, yic sbꞌinaj yuj ebꞌ anima. Icha chiꞌ ol aj snachajel eyuuj to a in ton Jehová e Diosal in. 9 Palta tato ay junoc in checabꞌ smontaj yuj junoc anima, syalan junoc tas dꞌa yol yicoꞌ, a in Jehová in ol in vachꞌ aqꞌuej montajoc. Ol in och ajcꞌolal dꞌa jun in checabꞌ chiꞌ, ol in satel dꞌa scal ebꞌ in chon̈abꞌ Israel. 10 Yovalil ol javoc yaelal dꞌa yibꞌan̈ jun anima ix montan jun in checabꞌ chiꞌ yedꞌ pax dꞌa yibꞌan̈ jun in checabꞌ ix pacan dꞌa yol yic chiꞌ. 11 Yuj chiꞌ a ebꞌ in chon̈abꞌ Israel man̈xo ol in spatiquejel ebꞌ, man̈xo ol bꞌat ebꞌ dꞌa spatic chucal. A in val Jehová Yajal in svalaꞌ to in chon̈abꞌ ebꞌ, a inxo sDiosal in ebꞌ, xchi Jehová.
A vin̈aj Noé, vin̈aj Daniel yedꞌ vin̈aj Job
12 Ix yalanxi Jehová dꞌayin icha tic: 13 Ach anima, qꞌuinaloc ay junoc chon̈abꞌ tzꞌecꞌ dꞌa yibꞌan̈ yoch smul dꞌayin, svacꞌanoch syaelal, svicꞌanecꞌ svael, yuj chiꞌ scham ebꞌ anima yedꞌ nocꞌ nocꞌ yuj vejel. 14 Qꞌuinaloc a dꞌa scal ebꞌ chiꞌ cajan vin̈aj Noé, vin̈aj Daniel yedꞌ vin̈aj Job, a in val Jehová Yajal in svalaꞌ to an̈ej am oxvan̈ ebꞌ vin̈ chiꞌ scolchaji, yujto tojol sbꞌeybꞌal ebꞌ vin̈, malaj junocxo mach scolchaj yedꞌ ebꞌ vin̈.
15 Qꞌuinaloc svacꞌbꞌat nocꞌ chium nocꞌ dꞌa jun chon̈abꞌ chiꞌ yic smiljicham masanil yuninal ebꞌ cajan taꞌ yuj nocꞌ, scan tzꞌinan. Man̈xa mach sbꞌeyecꞌ taꞌ yuj xivcꞌolal dꞌa nocꞌ. 16 Qꞌuinaloc a dꞌa jun chon̈abꞌ chiꞌ cajan ebꞌ vin̈ oxvan̈ chiꞌ, an̈ej am ebꞌ vin̈ scolchaji. Malaj junoc mach syal scolanel ebꞌ vin̈, vachꞌchom yuninal ebꞌ vin̈ mato yisil ebꞌ vin̈, max yal-laj scolchaj ebꞌ. A in val Jehová in svalaꞌ to scan tzꞌinan jun chon̈abꞌ chiꞌ.
17 Qꞌuinaloc svacꞌbꞌat oval dꞌa yibꞌan̈ jun chon̈abꞌ chiꞌ yic scham ebꞌ anima yedꞌ nocꞌ nocꞌ, 18 qꞌuinaloc ataꞌ cajan ebꞌ vin̈ oxvan̈ chiꞌ, an̈ej am ebꞌ vin̈ scolchajeli. A in val Jehová Yajal in svalaꞌ to maxtzac am yal scolchaj ebꞌ yuninal ebꞌ vin̈ yedꞌ yisil ebꞌ vin̈ yuuj.
19 Qꞌuinaloc svacꞌbꞌat ilya dꞌa yibꞌan̈ jun chon̈abꞌ chiꞌ yedꞌ val yoval in cꞌool svacꞌanbꞌat chamel dꞌa yibꞌan̈ ebꞌ anima yedꞌ dꞌa yibꞌan̈ nocꞌ nocꞌ. 20 Qꞌuinaloc ataꞌ cajan vin̈aj Noé, vin̈aj Daniel yedꞌ vin̈aj Job chiꞌ, an̈ej am ebꞌ vin̈ scolchaji. A in val Jehová Yajal in svalaꞌ, vachꞌchom tojol sbꞌeybꞌal ebꞌ vin̈, palta max yal-laj scolan ebꞌ yuninal ebꞌ vin̈, ma yisil ebꞌ vin̈.
21 A in val Jehová Yajal in svalaꞌ: Te ayxo smay ol ujoc, ayic ol vacꞌanbꞌat chan̈eꞌ yaelal dꞌa yibꞌan̈ Jerusalén chiꞌ: Aton oval, vejel, nocꞌ chium nocꞌ yedꞌ ilya, scham anima yedꞌ nocꞌ nocꞌ yuj juntzan̈ chiꞌ. 22 Palta ay jayvan̈ ebꞌ ol colchajcanel yedꞌ yuninal yedꞌ yisil. A ebꞌ chiꞌ ol icꞌjoccot ebꞌ dꞌa tic, ol eyilanoch sbꞌeybꞌal ebꞌ yedꞌ jantac chucal scꞌulej ebꞌ. Icha chiꞌ ol aj eyactan e cus yuj yaelal svacꞌbꞌat dꞌa yibꞌan̈ Jerusalén chiꞌ. 23 A in val Jehová Yajal in svalaꞌ to icha chiꞌ ol aj snachajel eyuuj to malaj tas man̈ smojoc svacꞌbꞌat dꞌa yibꞌan̈ Jerusalén chiꞌ, xchi Jehová.