5 Qꞌuinaloc ay junoc vin̈ vinac tojol spensar, vachꞌn̈ej tas scꞌulej vin̈. 6 Max och vin̈ yedꞌ ebꞌ tzꞌacꞌanoch qꞌuin̈ dꞌa jolomtac vitz yic tzꞌoch ebꞌ ejmelal dꞌa juntzan̈ comon dios. Max yacꞌoch juntzan̈ scomon diosal ebꞌ yetisraelal vin̈ chiꞌ yipoc scꞌool. Max mulan vin̈ yedꞌ ix yetbꞌeyum junoc yetanimail, max yil-laj sbꞌa vin̈ yedꞌ ix yetbꞌeyum ayic ayoch ix dꞌa sbꞌislabꞌ uj. 7 Max yixtej junoc yetanimail vin̈, palta to syacꞌ meltzaj tas aycan dꞌa vin̈ yuj junoc anima ay sbꞌoc dꞌay. Max elcꞌanvi vin̈. Syacꞌ svael ebꞌ ay svejel vin̈, syacꞌan spichul ebꞌ malaj yicoꞌ. 8 Max yacꞌ qꞌuen tumin vin̈ dꞌa majanil yic scꞌananel nivan yuneꞌ qꞌuen vin̈. Max yixtej junoc yetanimail vin̈, palta vachꞌ tzꞌaj sbꞌoan yaj junoc lolonel vin̈ dꞌa yibꞌan̈ chavan̈oc ay oval dꞌa scal. 9 Sbꞌeybꞌalan in checnabꞌil vin̈ yedꞌ in cꞌaybꞌubꞌal. A junoc vin̈ vinac icha chiꞌ, val yel tojol ton sbꞌeybꞌal vin̈, ol najatbꞌoc sqꞌuinal vin̈, a in val Jehová in svalaꞌ.

10 Qꞌuinaloc ay junoc yuninal jun vin̈ vinac chiꞌ te elcꞌum, mato macꞌumcham anima tzꞌaji. Sbꞌeybꞌalej juntzan̈ tastac 11 maj sbꞌeybꞌalej smam, palta to syacꞌoch qꞌuin̈ dꞌa jolomtac vitz, tzꞌoch ejmelal dꞌa yechel comon dios, smulan pax yedꞌ ix yetbꞌeyum junoc yetanimail, 12 syixtan ebꞌ anima ilbꞌajcꞌol yuj smebꞌail, tzꞌelcꞌanvi, max yacꞌ meltzaj tas aycan dꞌay yuj ebꞌ ay sbꞌoc dꞌay, an̈ej juntzan̈ comon dios chiꞌ syacꞌoch yipoc scꞌool, scꞌulan tas te yajbꞌentac dꞌa vichan̈. 13 A stumin syacꞌ majanil te nivan yuneꞌ scꞌanaꞌ. A junoc anima icha chiꞌ sbꞌeybꞌal, ol tzapanbꞌoc sqꞌuinal. Yujto ix scꞌulej juntzan̈ tastac tzin yaj chiꞌ, man̈ ol ecꞌbꞌatlaj schami. A schamel chiꞌ, a dꞌa yibꞌan̈ scani.

14 Qꞌuinaloc ay junoc yuninal jun vinac chuc sbꞌeybꞌal chiꞌ, syilaꞌ tastac juntzan̈ chuc scꞌulej smam chiꞌ, palta man̈oc juntzan̈ chiꞌ scꞌulej. 15 Max yacꞌoch qꞌuin̈ dꞌa jolomtac vitz yic tzꞌoch ejmelal dꞌa yechel comon dios. Max yacꞌoch son dꞌa juntzan̈ scomon diosal ebꞌ yetisraelal. Max mulan yedꞌ ix yetbꞌeyum junoc yetanimail. 16 Max yixtej junoc yetanimail, max elcꞌanvi, max canlaj tas aycan dꞌay yuj ebꞌ ay sbꞌoc dꞌay. Syacꞌ svael ebꞌ malaj svael, syacꞌan spichul ebꞌ malaj yicoꞌ. 17 Malaj junoc mach syixtej yujto a stumin syacꞌ majanil man̈ nivanoc yuneꞌ scꞌanaꞌ. Sbꞌeybꞌalan in checnabꞌil yedꞌ in cꞌaybꞌubꞌal. A jun anima icha chiꞌ, man̈ ol cham yuj smul smam chiꞌ, palta to ol najatbꞌoc sqꞌuinal.

18 Axo smam chiꞌ ol cham yuj smul chiꞌ, yujto ixtum anima, elcꞌum, te chuc tas ix scꞌulej dꞌa yol schon̈abꞌ. 19 Tato ayex ol e cꞌanbꞌej icha tic: ¿Tas yuj max cotcan dꞌa yibꞌan̈ ebꞌ uninabꞌil yuj smul smam? tato xe chi. Tato a yuninal chiꞌ an̈ej tas vachꞌ yedꞌ tojolal scꞌulej, scꞌanabꞌajan in cꞌaybꞌubꞌal, ol najatbꞌoc sqꞌuinal. 20 A mach tzꞌoch smul, a ol chamoc. Man̈oc ebꞌ uninabꞌil ol tupanel smul smam, man̈oc pax ebꞌ mamabꞌil chiꞌ ol tupanel smul ebꞌ yuninal chiꞌ. A mach vachꞌ sbꞌeybꞌal, vachꞌ spac ol schaꞌa, axo pax mach chuc sbꞌeybꞌal, a chucal ol scha spacoc schucal chiꞌ.

21 Tato ay junoc anima chuc sbꞌeybꞌal tzꞌactancan schucal chiꞌ, sbꞌeybꞌalan masanil in checnabꞌil, sbꞌeybꞌalanpax tojolal, val yel a jun anima chiꞌ man̈ ol pet chamoc. 22 A in tic, man̈xo ol in nacot juntzan̈ chucal ix scꞌulej chiꞌ, ol najatbꞌoc sqꞌuinal yujto a tojolal scꞌulej. 23 A in Jehová in svalaꞌ: Malaj in gana scham ebꞌ chuc sbꞌeybꞌal, palta in gana to sqꞌuex sbꞌeybꞌal ebꞌ yic snajatbꞌi sqꞌuinal ebꞌ.

24 Tato a junoc anima vachꞌ sbꞌeybꞌal, palta syactejcan scꞌulan vachꞌil chiꞌ, axo juntzan̈ tas yajbꞌentac scꞌulej ebꞌ chuc, a chiꞌ scꞌulej, ¿tom ol vacꞌ najatbꞌoc sqꞌuinal jun anima chiꞌ tze naꞌa? Man̈xo ol in nacot tastac vachꞌ ix scꞌulej chiꞌ. Ol cham yuj chucal scꞌulej chiꞌ. 25 A ex tic tzeyalaꞌ to man̈ tojoloc tas tzin cꞌulej, yuj chiꞌ abꞌec ex aj Israel: ¿Yel am val to man̈ tojoloc tas tzin cꞌulej chiꞌ? ¿Tom man̈oc ex tze cꞌulej tas man̈ tojoloc chiꞌ jun? 26 Tato a junoc anima vachꞌ sbꞌeybꞌal, syactejcan scꞌulan vachꞌil chiꞌ, axo chucal scꞌulej, ol cham yuj chucal scꞌulej chiꞌ. 27 Palta tato a junoc anima chuc sbꞌeybꞌal, syactejcan schucal chiꞌ, axo vachꞌil yedꞌ tojolal scꞌulej, ol colchaj dꞌa yol scꞌabꞌ chamel. 28 Yujto ix nachajel yuuj ix yactancan schucal scꞌulej chiꞌ, val yel man̈ ol chamlaj, ol najatbꞌoc sqꞌuinal.

29 A exxo aj Israel ex tic, an̈ejtonaꞌ tzeyalaꞌ to man̈ tojoloc tas tzin cꞌulej. ¿Tom man̈oc ex man̈ tojoloc tas tze cꞌulej chiꞌ jun? 30 A in Jehová Yajal in svalaꞌ: Ol ex in chꞌolbꞌitej junjun ex icha tas tze cꞌulej. Yuj chiꞌ naec e bꞌa, actejeccan e chuc bꞌeybꞌal chiꞌ dꞌa juneln̈ej. Tato maay, yuj e chuc bꞌeybꞌalil chiꞌ ol ex sateloc. 31 Ex israel, ¿tom tze nibꞌej cham e bꞌa yuj chiꞌ max e qꞌuex e pensar yedꞌ e bꞌeybꞌal? Palta actejeccan masanil chucal tze cꞌulej chiꞌ yic man̈ ol ex chamoc. 32 A in Jehová in svalaꞌ, malaj in gana to ay mach schami. Actejeccan chucal chiꞌ yic ol najatbꞌoc e qꞌuinal, xchi Jehová.