Bꞌit yic cuscꞌolal yuj ebꞌ sreyal Israel
19
Ach anima, bꞌitej jun bꞌit yic cuscꞌolal yuj ebꞌ sreyal Israel, tzalan icha tic:2 Ay jun nocꞌ nun choj te bꞌinajnac, cajan nocꞌ dꞌa scal juntzan̈ nocꞌ mam choj. A dꞌa scal nocꞌ chiꞌ ix sqꞌuibꞌtzitej yuneꞌ nocꞌ.
3 Ay jun yuneꞌ nocꞌ ix yil qꞌuibꞌoc. Ix scꞌaybꞌanqꞌue syaman schibꞌej, axo ebꞌ anima ix chijibꞌat yuuj.
4 Ix yabꞌ specal juntzan̈ nación tas scꞌulej nocꞌ yuneꞌ chiꞌ. Ix yamji nocꞌ yuj ebꞌ dꞌa jun yaal, ix yacꞌanoch jun gancho ebꞌ dꞌa nocꞌ, ix sn̈eranbꞌat nocꞌ ebꞌ dꞌa Egipto.
5 Ayic ix yilan jun nocꞌ nun choj chiꞌ to maj elcꞌoch tas ayoch yipoc scꞌol nocꞌ, ix yilan qꞌuibꞌ junxo yuneꞌ nocꞌ.
6 Axo ix quelemax nocꞌ yuneꞌ chiꞌ, junn̈ej ix ecꞌ nocꞌ yedꞌ nocꞌ mam choj chiꞌ. Ix scꞌaybꞌan sbꞌa nocꞌ syaman schibꞌej, axo ebꞌ anima ix chijibꞌat yuj nocꞌ.
7 Man̈xo jantacoc anima smil nocꞌ dꞌa yoltac cuartel. Tzijtum nivac chon̈abꞌ syixtejbꞌat nocꞌ. Tzꞌibꞌxiqꞌue yolyibꞌan̈qꞌuinal tic ayic tzꞌel yav nocꞌ.
8 Yuj chiꞌ ix och juntzan̈ nación ay dꞌa slacꞌanil chiꞌ ajcꞌolal dꞌa nocꞌ. Ix sbꞌoanem yaal ebꞌ dꞌa nocꞌ, ix yamchaj nocꞌ yuj ebꞌ.
9 Yedꞌ qꞌuen gancho ix yacꞌanoch nocꞌ ebꞌ dꞌa yol jaula, ix yicꞌanbꞌat ebꞌ dꞌa vin̈ sreyal Babilonia. Ix macchajcan nocꞌ taꞌ yic man̈xa mach tzꞌabꞌan yel yav nocꞌ dꞌa jolomtac vitz dꞌa yol yic Israel. (A jun nocꞌ nun choj chiꞌ, a ix snun ebꞌ sreyal Judá schꞌoxoꞌ.)
10 A e nun chiꞌ ex rey, lajan pax icha junoc ibꞌ teꞌ uva avabꞌil dꞌa stitac junoc a aꞌ, te nivan ix aji, man̈xo jantacoc sat ix yacꞌaꞌ, tzijtum svol ix qꞌuibꞌi yujto ayn̈ejoch yalil.
11 Ay juntzan̈ scꞌabꞌ teꞌ, qꞌuenal teꞌ ix aji, a ix och scꞌocochoc ebꞌ rey. Te chaan̈ ix aj steel teꞌ sqꞌuibꞌi, ix ecꞌbꞌat teꞌ dꞌa yibꞌan̈ juntzan̈xo teꞌ nivac teꞌ. Chꞌoc ix aj yel teꞌ dꞌa scal juntzan̈xo te teꞌ yujto te chaan̈ steel teꞌ, te tzijtum pax scꞌabꞌtac teꞌ.
12 Palta ix tocꞌjiqꞌueta teꞌ uva chiꞌ yuj yoval scꞌol Dios. Yuj icꞌ ix cot dꞌa stojolal bꞌaj sjavi cꞌu ix tacjiel teꞌ yedꞌ sat. Ix jecjiel scꞌabꞌtac teꞌ, ix tacji. Ix n̈usjipaxtzꞌa jun scꞌabꞌ teꞌ qꞌuenal teꞌ ix aj chiꞌ.
13 Axo ticnaic, a dꞌa tzꞌinan luum avabꞌil teꞌ nunal uva chiꞌ.
14 A dꞌa jun teꞌ scꞌabꞌ chiꞌ ix elta cꞌacꞌ, yuj jun cꞌacꞌ chiꞌ ix tzꞌabꞌat juntzan̈xo scꞌabꞌ teꞌ, ix tzꞌapaxbꞌat sat teꞌ. Man̈xalaj scꞌabꞌ teꞌ qꞌuenal teꞌ tzato yal yoch scꞌocochoc ebꞌ rey, xchi jun bꞌit chiꞌ, xchi Jehová. (Aton jun bꞌit tic yic cuscꞌolal, yuj chiꞌ ol bꞌitajoc.)