A svachꞌcꞌolal Dios yedꞌ spital chon̈abꞌ Israel
20
Ayic lajun̈eꞌ cꞌual yoch yoil uj, ayic yuquil abꞌilxo ayon̈ ecꞌ dꞌa Babilonia tic, ay tas ix snibꞌej juntzan̈ yichamtac vinaquil chon̈abꞌ Israel scꞌanbꞌej dꞌa Jehová, yuj chiꞌ ix em cꞌojan ebꞌ dꞌa vichan̈. 2 Ix yalan Jehová dꞌayin icha tic: 3 Ach anima, al dꞌa ebꞌ yichamtac vinaquil chon̈abꞌ Israel tic: Icha tic yalan Jehová Cajal: ¿Tom tzex javi dꞌayin ul e cꞌanbꞌan eyabꞌi? Val yel a in val svacꞌ in tiꞌ to man̈ ol in tacꞌvoc dꞌayex, xchi Jehová, xa chi dꞌa ebꞌ.4 Ach anima al dꞌa ebꞌ tas syaelal ebꞌ ol vacꞌaꞌ. Scham val acꞌan yojtaquejel ebꞌ tas te yajbꞌentac scꞌulejnac ebꞌ smam yicham ebꞌ. 5 Al dꞌa ebꞌ icha tic: A Jehová Cajal tzꞌalan icha tic: Ayic in sicꞌanel ebꞌ e mam eyicham chiꞌ, vacꞌannac in tiꞌ dꞌa ebꞌ, in chꞌoxannac in bꞌa dꞌa ebꞌ dꞌa Egipto. Ataꞌ vacꞌnac in tiꞌ dꞌa ebꞌ, valannac: A in ton Jehová e Diosal in. 6 A dꞌa jun tiempoal chiꞌ vacꞌ in tiꞌ vicꞌanelta ebꞌ dꞌa Egipto chiꞌ, yic svicꞌanbꞌat ebꞌ dꞌa jun luum to a in val ix in sayaꞌ, aton dꞌa jun lum luum te yax sat, yelxo te vachꞌ dꞌa yichan̈ masanil lum luum. 7 Val dꞌa ebꞌ icha tic: Junjun ex tzeyactejcan juntzan̈ e diosal te yajbꞌentac, man̈ eyixtejel e bꞌa yuj sdiosal ebꞌ aj Egipto tic, yujto a in Jehová e Diosal in, xin chi dꞌa ebꞌ.
8 Palta spitej sbꞌa ebꞌ dꞌayin. Maj yal scꞌol ebꞌ scha yabꞌ tas valaꞌ. Maj satel-laj sdiosal ebꞌ yajbꞌentac chiꞌ, maj yactejpaxcan juntzan̈ sdiosal ebꞌ aj Egipto chiꞌ ebꞌ. Yuj chiꞌ in na vacꞌ syaelal ebꞌ yedꞌ masanil yoval in cꞌol dꞌa yol smacbꞌen Egipto chiꞌ. 9 Palta maj in cꞌulejlaj icha in na chiꞌ yic man̈ chucoc syal juntzan̈ nación bꞌaj cajan ecꞌ ebꞌ chiꞌ dꞌa in patic, yuj chiꞌ in chꞌox snivanil velcꞌoch dꞌa ebꞌ dꞌa yichan̈ ebꞌ chꞌoc nacional chiꞌ, ayic vicꞌanelta ebꞌ dꞌa Egipto chiꞌ.
10 Vicꞌanelta ebꞌ dꞌa nación chiꞌ, vicꞌancanbꞌat ebꞌ dꞌa tzꞌinan luum. 11 Ataꞌ vacꞌ in cꞌaybꞌubꞌal yedꞌ in checnabꞌil yojtaquejel ebꞌ, tato sbꞌeybꞌalej ebꞌ vachꞌn̈ej tzꞌecꞌ ebꞌ. 12 Vacꞌan jun scꞌual icꞌoj ip vic yaj dꞌa ebꞌ yic scꞌanabꞌajej ebꞌ, yic tzꞌochcan schꞌoxnabꞌiloc in trato vacꞌcan yedꞌ ebꞌ, yic snaanpaxcot ebꞌ to a in Jehová in tic in sicꞌcanel ebꞌ. 13 Palta spitej sbꞌa ebꞌ dꞌayin dꞌa tzꞌinan luum chiꞌ, maj scꞌanabꞌajej in cꞌaybꞌubꞌal ebꞌ, spatiquejel in checnabꞌil ebꞌ, aton juntzan̈ vacꞌ dꞌa ebꞌ yic vachꞌn̈ej tzꞌecꞌ ebꞌ. Maj scꞌanabꞌajej pax scꞌual icꞌoj ip val dꞌa ebꞌ. Yuj chiꞌ in na in satel ebꞌ yedꞌ yoval in cꞌol dꞌa tzꞌinan lum chiꞌ. 14 Palta yic max in yal juntzan̈ nación ilan vicꞌanelta ebꞌ dꞌa Egipto chiꞌ chucal, yuj chiꞌ maj in satel-laj ebꞌ.
15 An̈ejtonaꞌ dꞌa tzꞌinan lum chiꞌ vacꞌ in tiꞌ to man̈ ol vacꞌoch ebꞌ dꞌa jun lum vacꞌ in tiꞌ vacꞌan dꞌa ebꞌ, aton jun lum te yax sat, te vachꞌ dꞌa yichan̈ masanil lum luum, 16 yujto maj scꞌanabꞌajej in cꞌaybꞌubꞌal ebꞌ, spatiquejel in checnabꞌil ebꞌ, maj scꞌanabꞌajej jun scꞌual icꞌoj ip ebꞌ, aton jun cꞌu vic yaji. An̈ej dꞌa juntzan̈ comon dios yajbꞌentac ayoch spensar ebꞌ, 17 palta ocꞌ in cꞌol dꞌa ebꞌ, yuj chiꞌ maj in satel-laj ebꞌ dꞌa tzꞌinan luum chiꞌ.
18 Ataꞌ val dꞌa ebꞌ yuninal ebꞌ to max scꞌulej ebꞌ icha sbꞌeybꞌal smam ebꞌ chiꞌ, max yixtejpaxel sbꞌa ebꞌ yuj juntzan̈ comon dios yajbꞌentac chiꞌ. 19 Valani to a in Jehová in sDiosal in ebꞌ to scꞌanabꞌajej val in checnabꞌil ebꞌ yedꞌ in cꞌaybꞌubꞌal. 20 Nivanocabꞌ yelcꞌoch scꞌual icꞌoj ip vic yaj dꞌa yol sat ebꞌ. A jun chiꞌ chꞌoxnabꞌil yaj dꞌa jun trato in bꞌo yedꞌ ebꞌ yic syojtaquejel ebꞌ to a in ton Jehová sDiosal in ebꞌ.
21 Palta an̈ejaꞌ spitejpax sbꞌa ebꞌ yuninal ebꞌ chiꞌ dꞌayin. Maj scꞌanabꞌajejlaj in cꞌaybꞌubꞌal ebꞌ, maj sbꞌeybꞌalej pax in checnabꞌil ebꞌ, aton yuj juntzan̈ chiꞌ vachꞌn̈ej tzꞌecꞌ ebꞌ scꞌanabꞌajani. An̈ejtonaꞌ yixtejel scꞌual icꞌoj ip ebꞌ, aton jun cꞌu vic yaji. Yuj chiꞌ in naꞌ in satel ebꞌ yedꞌ yoval in cꞌol dꞌa tzꞌinan lum chiꞌ. 22 Palta yic max in yal juntzan̈ nación ilan vicꞌanelta ebꞌ dꞌa Egipto chiꞌ chucal, yuj chiꞌ maj in satel-laj ebꞌ. 23 Palta yacbꞌan aytoecꞌ ebꞌ dꞌa tzꞌinan lum chiꞌ, vacꞌan in tiꞌ to ol in saclemejbꞌat ebꞌ dꞌa scaltac nación dꞌa masanil yolyibꞌan̈qꞌuinal tic, 24 yujto maj scꞌanabꞌajej in cꞌaybꞌubꞌal ebꞌ, spatiquejpaxel in checnabꞌil ebꞌ, maj scꞌanabꞌajej scꞌual icꞌoj ip ebꞌ, aton jun vic yaji. An̈ej dꞌa juntzan̈ dios yajbꞌentac bꞌaj yacꞌoch spensar ebꞌ, aton sdiosal ebꞌ smam yicham ebꞌ. 25 Yuj chiꞌ vacꞌan juntzan̈ cꞌaybꞌubꞌal yedꞌ checnabꞌil man̈ vachꞌoc dꞌa ebꞌ, juntzan̈ max yal vachꞌ tzꞌecꞌ ebꞌ anima yuuj. 26 Vacꞌan yixtejel sbꞌa ebꞌ yuj silabꞌ to a sbꞌabꞌel yuninal ebꞌ sn̈ustzꞌa silabꞌil. A juntzan̈ chiꞌ vacꞌ scꞌulej ebꞌ yic vachꞌ man̈xo animaoc tzꞌaj ebꞌ yic syojtaquejel ebꞌ to a in ton Jehová in sDiosal in ebꞌ.
27 Yuj chiꞌ ach anima, al dꞌa ebꞌ etisraelal to a in Jehová Yajal in sval icha tic: A ebꞌ e mam eyicham stzuntzejnac val cot yoval in cꞌol ebꞌ, in spaticannaquel ebꞌ ayic sbꞌoannac juntzan̈xo tic ebꞌ: 28 Ayic toxo ix vicꞌoch ebꞌ dꞌa sat lum lum vacꞌnac in tiꞌ vacꞌan dꞌa ebꞌ, yilanoch juntzan̈ tzalquixtac ebꞌ yedꞌ juntzan̈ te teꞌ te cꞌayum xiil, ataꞌ sn̈us silabꞌ ebꞌ, ofrenda ebꞌ, incienso ebꞌ sumumi sjabꞌ, stobꞌanpaxem vino ebꞌ ofrendail dꞌa juntzan̈ comon dios, yuj juntzan̈ chiꞌ stzuntzejcot yoval in cꞌol ebꞌ. 29 In cꞌanbꞌan dꞌa ebꞌ icha tic: ¿Tas yaj juntzan̈ chaan̈ bꞌaj tzex bꞌat chiꞌ? xin chi dꞌa ebꞌ. Yuj chiꞌ Chaan̈ Yajqꞌuei, icha chiꞌ sbꞌiejnaccani, xchi Jehová, xa chi dꞌa ebꞌ.
30 Al dꞌa ebꞌ etisraelal to a in Jehová Yajal in sval icha tic: A ex tic tze jubꞌat e bꞌa icha ajnac sjuanbꞌat sbꞌa ebꞌ e mam eyicham chiꞌ. Tze tecꞌbꞌej val e bꞌa eyoch ejmelal dꞌa juntzan̈ comon dios te yajbꞌentac chiꞌ. 31 Slajvi e juanel e bꞌa yuj bꞌaj tze n̈ustzꞌa ebꞌ eyuninal silabꞌil dꞌa juntzan̈ comon dios chiꞌ, tzex javi pax e cꞌanbꞌej dꞌayin tas snibꞌej e cꞌool. Val yel, a in Jehová Yajal in svacꞌ in tiꞌ to man̈ ol in tacꞌvoc dꞌayex. 32 A ex tic ix e na eyoch ejmelal dꞌa te teꞌ yedꞌ dꞌa qꞌuen qꞌueen, icha syutej sbꞌa juntzan̈xo nación. Palta malaj bꞌaqꞌuin̈ ol in cha e cꞌulej juntzan̈ chiꞌ. 33 Yuj chiꞌ a in Jehová Yajal in svacꞌ in tiꞌ to a in ol vacꞌ yajalil dꞌa eyibꞌan̈ yedꞌ in poder yedꞌ pax yoval in cꞌool. 34 Ol ex vicꞌanelta dꞌa juntzan̈ nación, ol ex in molbꞌan bꞌaj sacleminac eyajcanbꞌat vuuj, ol in chꞌox val in poder yedꞌ yoval in cꞌol dꞌayex, 35-36 ol ex in molbꞌan dꞌa jun tzꞌinan luum dꞌa scal juntzan̈ nación. A in Jehová in svalaꞌ to a in val ol ex in chꞌolbꞌitej, ol vacꞌanoch yaelal dꞌa eyibꞌan̈, icha ajnac vacꞌanoch yaelal dꞌa yibꞌan̈ ebꞌ e mam eyicham dꞌa tzꞌinan lum dꞌa yol yic Egipto. 37 Icha syutej vin̈ tan̈vum calnel sicꞌlan nocꞌ scalnel ayic sbꞌisan nocꞌ vin̈, icha chiꞌ ol ex vutej. Ol ex in siqꞌuelta mach ex ol ex och dꞌa in trato ol in bꞌo eyedꞌoc. 38 A ebꞌ te pit tzꞌoch ajcꞌolal dꞌayin, ol viqꞌuelta ebꞌ bꞌaj sacleminac eyaj ticnaic, ol in satel ebꞌ dꞌa e cal, man̈ ol ochlaj ebꞌ dꞌa smacbꞌen ebꞌ eyetisraelal. Icha val chiꞌ ol aj eyojtacaneli to a in ton Jehová e Diosal in.
39 Ex aj Israel, a in Jehová Yajal in sval icha tic: Yujto te pit tzeyutej e bꞌa dꞌayin, yuj chiꞌ ixiquec, ochan̈ec ejmelal dꞌa juntzan̈ comon dios yajbꞌentac chiꞌ. Palta ol cꞌoch scꞌual axo dꞌayin ol eyal e bꞌa. Man̈xo ol eyixtejel snivanil velcꞌochi, yujto man̈xo ol eyacꞌ juntzan̈ eyofrenda dꞌa juntzan̈ comon dios chiꞌ. 40 A dꞌa jun tzalan vic yaji, aton jun vitz te chaan̈ dꞌa smacbꞌen Israel, ataꞌ ol ex och ejmelal dꞌayin e masanil ex israel. A in Jehová Yajal in svalaꞌ to ataꞌ ol ex in cha yedꞌ smasanil in cꞌool. Ataꞌ ol in cꞌan dꞌayex to ol eyacꞌ eyofrenda dꞌayin yedꞌ pax bꞌabꞌel sat eyavbꞌen yedꞌ masanil tas victaxon yaji. 41 Ayic toxo ix ex viqꞌuelta dꞌa scaltac juntzan̈ nación yedꞌ bꞌajtac sacleminac eyajcanbꞌat chiꞌ ticnaic, dꞌa tzalajcꞌolal ol ex in cha icha incienso sumumi sjabꞌ. Ol in chꞌox val snivanil velcꞌoch dꞌayex dꞌa yichan̈ masanil nación.
42 Ayic ol ex vicꞌanxibꞌat dꞌa lum luum vacꞌnac in tiꞌ vacꞌan dꞌa ebꞌ e mam eyicham, aton lum Israel, ataꞌ ol nachajel eyuuj to a in ton Jehová e Diosal in. 43 Ataꞌ ol e nacot juntzan̈ e bꞌeybꞌal malaj svachꞌil yedꞌ jantac chucal tze cꞌulej ticnaic. Ayic ol e naancot juntzan̈ e chucal chiꞌ ol ex te qꞌuixvoc. 44 Ex israel, ayic ol eyilani to max vacꞌ eyaelal icha val smojal yuj jantac chucal tze cꞌulej chiꞌ, palta to tzꞌocꞌ in cꞌol dꞌayex yuj snivanil velcꞌochi, ataꞌ ol eyojtaquejeli to a in ton Jehová e Diosal in, xchi Jehová, xa chi dꞌa ebꞌ etisraelal chiꞌ.
A syaelal ebꞌ cajan dꞌa stojolal sur
45 Ix yalanxi Jehová dꞌayin icha tic:
46 Ach anima, bꞌatan̈ qꞌuelan dꞌa stojolal sur, tzalanbꞌat juntzan̈ lolonel tic dꞌa lum nivac yax lum ay dꞌa smacbꞌen sur chiꞌ. 47 Tzalan icha tic: A Jehová Yajal tzꞌalan icha tic: A in ol vacꞌoch jun cꞌacꞌ yic ol tzꞌabꞌat masanil lum yax luum, aton te teꞌ yaax xiil yedꞌ teꞌ taquin̈. Masanil tas ay dꞌa sat lum lum chiꞌ ol tzꞌabꞌatoc, schabꞌat dꞌa sur masanto scꞌoch dꞌa norte. Malaj mach ol yal smacꞌan tup jun cꞌacꞌ chiꞌ. 48 Masanil yolyibꞌan̈qꞌuinal tic ol ojtacaneloc to a in ix vacꞌoch jun cꞌacꞌ chiꞌ, yujto a jun cꞌacꞌ chiꞌ, man̈ ol tuplaj, xchi Jehová dꞌayin.
49 Ix lajvi chiꞌ ix in tacꞌvi icha tic: Ay Mamin Jehová, a ebꞌ anima syal ebꞌ to an̈ej dꞌa qꞌuexan̈ lolonelal tzin loloni, xin chi dꞌa Jehová chiꞌ.