A yespada Jehová
21
Ix lajvi chiꞌ, ix yalanxi Jehová dꞌayin icha tic: 2 Ach anima, bꞌatan̈ qꞌuelan dꞌa stojolal Jerusalén, tzalanbꞌat juntzan̈ lolonel tic dꞌa yibꞌan̈ juntzan̈ stemplo ebꞌ comon dios. Alcanel in lolonel tic dꞌa chon̈abꞌ Israel. 3 Tzalani: A Jehová tzꞌalan icha tic: A in ol in och ajcꞌolal dꞌayex. Ol vicꞌqꞌueta vespada ol in milancham ebꞌ vachꞌ sbꞌeybꞌal yedꞌ ebꞌ chuc sbꞌeybꞌal. 4 Ol vicꞌqꞌueta vespada, junlajan ol aj in milancham masanil anima. Ol cham ebꞌ vachꞌ yedꞌ ebꞌ chuc, ol schael yich scham ebꞌ dꞌa sur masanto ol cꞌoch dꞌa norte. 5 Masanil yolyibꞌan̈qꞌuinal tic ol ojtacaneloc to a in ix vicꞌqꞌueta vespada, man̈ ol vacꞌxiem dꞌa yol yatut, xchi Jehová.6 Ach anima, sicꞌsicꞌanan̈ val oqꞌui, yabꞌocabꞌ val syail a pixan, tzach ocꞌ dꞌa yichan̈ ebꞌ etchon̈abꞌ. 7 Tato scꞌanbꞌej ebꞌ dꞌayach tas yuj tzach oqꞌui, tzalan dꞌa ebꞌ icha tic: A yuj yabꞌixal jun tas toxo ol ujoc tzin oqꞌui. Masanil anima dꞌa yolyibꞌan̈qꞌuinal tic, man̈xo animaoc ol ajcan ebꞌ, toxon̈ej ol emcan n̈ojan ebꞌ. Man̈xalaj mach olto yal stecꞌbꞌan sbꞌa. Masanil ebꞌ ol luclonqꞌue yoc yuj xivelal, xa chi dꞌa ebꞌ. A in Jehová in svalaꞌ to van sjavi stiempoal, yovalil ol elcꞌochoc, xchi Jehová.
8 Ix yalanxi Jehová dꞌayin icha tic: 9 Ach anima, lolonan̈ dꞌa in bꞌi, tzalani to a in Jehová in sval icha tic:
Ilecnabꞌ val qꞌuen espada van sjavi. A qꞌuen espada te jayxo yaj ye qꞌueen. Toxon̈ej copopi yilji qꞌueen.
10 Jayxo yaj qꞌueen yic xicjicham anima. N̈icbꞌilel qꞌueen yic tzꞌel copnaj scꞌacꞌal qꞌueen. Man̈xalaj tzalajcꞌolal yujto a vin̈ e reyal max xivlaj vin̈ dꞌa yaelal yedꞌ dꞌa scachnabꞌil.
11 Copopi ix aj qꞌuen espada chiꞌ sn̈icjieli yic scꞌanchaji. Toxo ix acꞌjioch ye qꞌueen yic tzꞌacꞌjioch qꞌuen dꞌa yol scꞌabꞌ jun mach ol xicancham anima yedꞌ qꞌueen, xa chi.
12 Ach anima, elocabꞌ av, yujto ol xicjoccham ebꞌ aj Israel yedꞌ masanil ebꞌ yajal dꞌa scal ebꞌ. A ebꞌ yajal chiꞌ, junn̈ej ol aj scham ebꞌ yedꞌ ebꞌ comon anima. Yuj chiꞌ tan̈ubꞌtan̈ej sn̈iꞌ a cꞌol yuj cuselal.
13 Val yel ol ujoc jun yaelal chiꞌ. ¿Tas ol ex ajcan a ex tic ayic man̈xalaj ol aj yelcꞌoch vin̈ e reyal dꞌa qꞌuen espada chiꞌ? A in Jehová in svalaꞌ to man̈xalaj ol aj yelcꞌoch vin̈ e reyal chiꞌ.
14 Ach anima, tzꞌit a cꞌabꞌ tzalan dꞌa ebꞌ etchon̈abꞌ chiꞌ icha tic: Dꞌabꞌjocabꞌn̈ejoch qꞌuen espada dꞌa anima. Xicjocabꞌcham anima dꞌa qꞌuen. Masanil anima scham yuj xivelal, yujto yaln̈ej bꞌaj smilji anima yuj qꞌueen.
15 Yuj qꞌuen espada chiꞌ ste sat scꞌol ebꞌ anima yuj xivelal. A dꞌa masanil chon̈abꞌ ayxoecꞌ qꞌuen vuuj yic xicjicham anima. Toxon̈ej copopi yilji qꞌueen, te jay yajqꞌue ye qꞌueen yic xicjicham anima.
16 Xiqueccham anima dꞌa qꞌuen espada dꞌa e vachꞌ yedꞌ dꞌa e qꞌuexan̈. Yaln̈ej bꞌaj chamocabꞌ anima yuj sjayil ye qꞌueen.
17 A in Jehová in svalaꞌ to ol in tzꞌit pax in cꞌabꞌ, masanto ol sicbꞌoc yoval in cꞌol dꞌa in chon̈abꞌ tic, xchi Jehová dꞌayin.
18 Ix yalanxi Jehová dꞌayin icha tic: 19 Ach anima, bꞌo yechel chabꞌoc bꞌe bꞌaj ol bꞌat vin̈ sreyal Babilonia yedꞌ qꞌuen espada. A chabꞌ bꞌe chiꞌ junn̈ej chon̈abꞌ bꞌaj ol eloc, axo bꞌaj spoj sbꞌa, ol a bꞌooch chabꞌoc yechel ol chꞌoxanoc tas chon̈abꞌil bꞌaj ol cꞌoch junjun. 20 Tzacꞌoch yechel junoc bꞌe bꞌaj ol bꞌat vin̈ rey chiꞌ yedꞌ qꞌuen espada dꞌa chon̈abꞌ Rabá, dꞌa yol yic Amón. Tza bꞌoan yechel junocxo bꞌe chiꞌ scꞌoch dꞌa Jerusalén, aton jun chon̈abꞌ vachꞌ yajoch smuroal dꞌa yol yic Judá. 21 A vin̈ sreyal Babilonia chiꞌ, ol och vaan vin̈ bꞌaj spoj sbꞌa chabꞌ bꞌe chiꞌ, ol scꞌanbꞌan vin̈ mach junoc bꞌe chiꞌ syicꞌaꞌ. Ol scalej sjul-labꞌ vin̈, ol scꞌanbꞌej pax vin̈ dꞌa sdiosal, ol sayan yil seyubꞌ junoc nocꞌ nocꞌ vin̈.* 22 A dꞌa svachꞌ cꞌabꞌ vin̈, ataꞌ ol elul sjul-labꞌ schꞌoxan dꞌa stojolal Jerusalén, syalelcꞌochi to tzꞌoch oval dꞌa Jerusalén chiꞌ. Ol miljoccham anima taꞌ. Ol el av yic oval. Ol bꞌochaj macꞌlabꞌ poj puerta. Ol bꞌochajqꞌue tecꞌnubꞌ dꞌa spatictac chon̈abꞌ chiꞌ, ol oymaj ebꞌ soldado dꞌa spatictac smasanil. 23 Palta axo ebꞌ anima dꞌa Jerusalén chiꞌ, ol sna ebꞌ to a jun lolonel tzꞌalchaj tic to man̈ ol ujoc yuj juntzan̈ trato toxo ix yacꞌ ebꞌ. Palta a vin̈aj Nabucodonosor chiꞌ ol acꞌan snacot jantac schucal ebꞌ, yuj chiꞌ ol icꞌjoccot ebꞌ dꞌa Babilonia tic yuj vin̈.
24 Yuj chiꞌ a in Jehová Yajal in svalaꞌ: A val e chucal yedꞌ e pital, te chequel yaji. Masanil e mul yedꞌ jantac chucal tze cꞌulej, te jacan yaji, yuj chiꞌ ol ex yamchajoc. 25 A ach val tic ach sreyal Israel, te chuc ach, yajbꞌil ach eli, lacꞌanxo sjavi stiempoal a chaan slajvubꞌ yaelal. 26 A in Jehová Yajal in svalaꞌ: Ol icꞌchajel scꞌox vin̈ sat sacerdote, ol icꞌchajpaxel scorona vin̈ rey. Masanil ol qꞌuexchajoc. A ebꞌ emnaquil, ol icꞌjocchaan̈ ebꞌ, axo ebꞌ nivac yelcꞌochi, emnaquil ol ajcan ebꞌ. 27 Ol satel smasanil. A in ol in satel yopisio ebꞌ sreyal Israel. Man̈xo ol yicꞌ yip ichataxon yaji, masanto ol javoc jun mach ay yalan yic dꞌay, a dꞌa jun chiꞌ ol vacꞌ opisio chiꞌ.
Yaelal dꞌa yibꞌan̈ ebꞌ amonita
28 Ach anima, al dꞌa in bꞌi icha tic: Icha tic yalan Jehová Yajal dꞌa ebꞌ amonita, aton ebꞌ sbꞌuchvaj dꞌa in chon̈abꞌ: Ilec val qꞌuen espada van sjavi, vachꞌxo yaj qꞌueen yic smiljicham anima, toxon̈ej copopi yilji qꞌueen, toxon̈ej tzꞌel copnaj scꞌacꞌal qꞌueen icha lebꞌlon yic satel anima. 29 A tas syil ebꞌ naumel lolonel yedꞌ juntzan̈ lolonel tzꞌalchaj dꞌa e patic, man̈ yeloc. Ol och qꞌuen espada dꞌa sjaj ebꞌ chuc. Toxo ix javi scꞌual yacꞌji slajvubꞌ syaelal ebꞌ.
30 ¿Am e naani to ol vacꞌxiem qꞌuen espada chiꞌ dꞌa yol yatut? Maay, palta to ol ex in chꞌolbꞌitej bꞌaj aljinac ex, aton bꞌaj cajan ex. 31 Icha val junoc cꞌacꞌ tzꞌeli, icha val chiꞌ ol aj vacꞌanbꞌat yoval in cꞌol dꞌa eyibꞌan̈. Ol ex vacꞌoch dꞌa yol scꞌabꞌ ebꞌ anima chuc spensar, aton ebꞌ te jelan smilvaji. 32 Ol ex sateloc, ol ex tzꞌabꞌatoc, ol tobꞌcanbꞌat e chiqꞌuil dꞌa masanil yol e chon̈abꞌ. A in Jehová in svalaꞌ to man̈xa mach ol ex naancotoc, xchi Jehová.