A schucalil chon̈abꞌ Jerusalén
22
Ix yalanxi Jehová dꞌayin icha tic: 2 Ach anima, al jantac yaelal ol och dꞌa yibꞌan̈ jun chon̈abꞌ smilancham anima. A yuj jantac tas yajbꞌentac ix scꞌulej, 3 al dꞌay icha tic: A Jehová Yajal tzꞌalan icha tic: Ex aj Jerusalén, ex tze milcham ebꞌ cajan dꞌa e cal, tze bꞌoanqꞌue juntzan̈ yechel sjuanbꞌat e pensar, yuj chiꞌ a ex tzeyicꞌcot yaelal dꞌa eyibꞌan̈. 4 Yuj jantac anima ix e milchamoc, ol javoc dꞌa eyibꞌan̈ ticnaic. Yuj juntzan̈ yechel ix e bꞌoqꞌuei ix ixtaxel e pensar, yuj chiꞌ toxo ix javi slajvubꞌ cꞌual dꞌa eyibꞌan̈. Yuj chiꞌ a in svacꞌ scꞌulej masanil nación tzex bꞌajani, tzex sbꞌuchanpaxi. 5 Tzꞌel val eyav eyacꞌan chucal dꞌa ebꞌ eyetanimail, yuj chiꞌ masanil nación ol bꞌuchvaj dꞌayex, ebꞌ ay dꞌa e lacꞌanil yedꞌ ebꞌ ay dꞌa najat. 6 A jantac ebꞌ yajal cajan dꞌa e cal chiꞌ, smilcham anima ebꞌ, yujto ay yopisio ebꞌ. 7 Man̈xa yelcꞌoch e mam e nun dꞌa e sat. Tzeyixtej ebꞌ chꞌoc chon̈abꞌil. Tze tocꞌanecꞌ tastac ay dꞌa ebꞌ man̈xa smam yedꞌ pax dꞌa ebꞌ ix ix chamnacxo vin̈ yetbꞌeyum. 8 Man̈xa yelcꞌoch in cajnubꞌ dꞌa e sat yedꞌ scꞌual icꞌoj ip vic yaji. 9 A dꞌa e cal ay mach snaanqꞌue lolonel dꞌa spatic yetanimail yic smiljichamoc. Tzex bꞌatpax dꞌa qꞌuin̈ tzꞌoch dꞌa jolomtac vitz yic tzex och ejmelal dꞌa comon dios. Te qꞌuixvelal tas tze cꞌulej taꞌ. 10 Ayex tzex mulan yedꞌ ix yetbꞌeyum e mam, ayex tzex mulan yedꞌ ebꞌ ix ix ayic ayoch ebꞌ ix dꞌa sbꞌislabꞌ uj. 11 Ayex tzex mulan yedꞌ ix yetbꞌeyum ebꞌ eyetanimail, ayex pax tzex mulan yedꞌ ebꞌ ix eyalibꞌ, ayex pax tzex mulan yedꞌ ebꞌ ix eyanabꞌ yisil e mam. 12 A in Jehová in svalaꞌ, ay ebꞌ eyajalil schaan tumin yic syacꞌanoch chamel ebꞌ dꞌa yibꞌan̈ ebꞌ malaj smul. Tzeyixtej ebꞌ eyetanimail, yujto a qꞌuen e tumin tzeyacꞌ smajnej ebꞌ, nivan yuneꞌ qꞌuen tze cꞌaneli. Comonn̈ej tzeyacꞌoch dꞌa yibꞌan̈ ebꞌ eyetanimail yic tzex och bꞌeyumal, a inxo tic tzin bꞌatcan satcꞌolal eyuuj.13 Te aycot voval yuj bꞌaj tzeyixtej ebꞌ anima chiꞌ, yuj pax bꞌaj tze milcham ebꞌ. 14 ¿Tzam e nalaj to ol yal e tecꞌbꞌan e bꞌa dꞌa vichan̈ ayic ol vacꞌan eyaelal? A tas toxo ix val a in Jehová in tic, yovalil ol vaqꞌuelcꞌochi. 15 Ol ex in saclemejbꞌat dꞌa scaltac nación yedꞌ dꞌa scaltac masanil chon̈abꞌ, icha val chiꞌ ol aj vicꞌanel e chucal chiꞌ. 16 Qꞌuixvelal ol eyutejcan e bꞌa dꞌa yichan̈ masanil nación. Icha chiꞌ ol aj snachajel eyuuj to a in Jehová e Diosal in, xchi Jehová, xa chi, xchi dꞌayin.
17 Ix yalanxi Jehová dꞌayin icha tic: 18 Ach anima, a ebꞌ etisraelal man̈xalaj tzꞌoch ebꞌ vuuj. Lajan val ebꞌ icha smical qꞌuen plata tzꞌeli ayic sn̈usji qꞌueen dꞌa horno, syalelcꞌochi aton qꞌuen cobre, qꞌuen estaño, qꞌuen hierro yedꞌ qꞌuen plomo. 19 Yuj chiꞌ a in Jehová Yajal in sval icha tic: A ex tic, lajan ex icha smical qꞌuen plata chiꞌ, malaj yopisio, yuj chiꞌ ol ex in molbꞌej dꞌa yol chon̈abꞌ Jerusalén chiꞌ. 20-22 Icha tzꞌaj qꞌuen plata, qꞌuen cobre, qꞌuen hierro, qꞌuen plomo yedꞌ qꞌuen estaño, junxon̈ej tzꞌaj yacꞌchajbꞌat qꞌuen dꞌa yol junoc horno, tzꞌulaxbꞌat qꞌuen dꞌa scal cꞌacꞌ chiꞌ, icha val chiꞌ ol ex vutej yedꞌ yoval in cꞌool. Ol ex in molbꞌej, ol vacꞌanoch yaelal dꞌa eyibꞌan̈ dꞌa yol chon̈abꞌ chiꞌ. Icha val chiꞌ ol aj snachajel eyuuj to a in ton Jehová in ix vacꞌcot yoval in cꞌol dꞌa eyibꞌan̈, xchi Jehová.
23 Ix yalanxi Jehová dꞌayin icha tic: 24 Ach anima, al dꞌa ebꞌ etisraelal icha tic: A e chon̈abꞌ, man̈ vachꞌoc yaj dꞌa vichan̈, yuj val yoval in cꞌool malaj jabꞌoc n̈abꞌ syacꞌaꞌ. 25 A ebꞌ syaloch sbꞌa in checabꞌoc ayecꞌ dꞌa e cal, junlajan tzꞌaj smilvicham anima ebꞌ. Lajan val ebꞌ icha nocꞌ choj tzꞌel yav, scotac tzilchitanbꞌat schibꞌej. Syelcꞌanbꞌat sbꞌeyumal yedꞌ tastac vachꞌ ay dꞌa ebꞌ anima chiꞌ ebꞌ. Tzijtum ebꞌ ix ix scham yetbꞌeyum dꞌa e cal yuj ebꞌ. 26 A ebꞌ sacerdote, a in cꞌaybꞌubꞌal yedꞌ juntzan̈ tas vic yaji ix yixtejbꞌat ebꞌ. A tas vachꞌ yedꞌ tas man̈ vachꞌoc dꞌa yichan̈ ley, malaj sqꞌuexan̈il dꞌa sat ebꞌ. Max cꞌaybꞌaj ebꞌ anima yuj ebꞌ yic syojtaquejel ebꞌ tas vachꞌ yedꞌ tas man̈ vachꞌoc. An̈ejtonaꞌ max scꞌanabꞌajej in cꞌual icꞌoj ip ebꞌ. Yuj chiꞌ chequel to malaj velcꞌoch dꞌa sat ebꞌ. 27 A ebꞌ yajal yaj dꞌa e chon̈abꞌ chiꞌ, smilcham anima ebꞌ, yujto snibꞌej val ebꞌ tzꞌoch bꞌeyumal, lajan val ebꞌ icha nocꞌ oques scotac tzilchitejbꞌat schibꞌej. 28 A ebꞌ syaloch sbꞌa in checabꞌoc, a tas man̈ vachꞌoc scꞌubꞌejel ebꞌ, icha tzꞌaj yoch qꞌuen taan̈ dꞌa junoc cꞌa pat. Syalan ebꞌ to ay tas svacꞌ yil ebꞌ, syalanel esal lolonel ebꞌ. Syal ebꞌ to a in svacꞌ juntzan̈ lolonel chiꞌ yal ebꞌ, palta val yel malaj tas tzin chec yalel ebꞌ. 29 A ebꞌ anima sqꞌue val chaan̈ ebꞌ yixtan yetanimail yedꞌ elcꞌal. A val ebꞌ mebꞌaꞌ malaj tas ay dꞌay, a ebꞌ syixtej ebꞌ. Yelxo val man̈ tojoloc tas scꞌulej ebꞌ dꞌa ebꞌ chꞌoc chon̈abꞌil cajan dꞌa scal ebꞌ. 30 A in tic, ix in sayecꞌ dꞌa scal e chon̈abꞌ chiꞌ, talaj ay junoc mach vachꞌtacto val spensar, stevi dꞌayin yuj schon̈abꞌ yic vachꞌ max in sateli, palta malaj junoc mach ix ilchaj vuuj. 31 Yuj chiꞌ a in Jehová in svacꞌbꞌat yaelal dꞌa yibꞌan̈ ebꞌ, ol in satel ebꞌ yedꞌ in cꞌacꞌalcꞌolal. Icha chiꞌ ol aj sjavi dꞌa yibꞌan̈ ebꞌ yuj chucal scꞌulej, xchi Jehová, xa chi dꞌa ebꞌ, xchi dꞌayin.