A yabꞌixal Samaria yedꞌ Jerusalén
23
Ix yalanxi Jehová dꞌayin icha tic: 2 Ach anima, ay jun abꞌix ol val abꞌi: A dꞌa junel, ay chavan̈ ebꞌ ix ix snulej sbꞌa, junn̈ej snun ebꞌ ix. 3 Yictax cobꞌes unin ebꞌ ix, ix yacꞌanoch sbꞌa ebꞌ ix ajmulal dꞌa Egipto. Ataꞌ ix bꞌanji yim ebꞌ ix, yuj chiꞌ man̈xo cobꞌestacoc ix ajcan ebꞌ ix. 4 A ix bꞌabꞌel, Ahola sbꞌi ix, aton Samaria schꞌoxcot ix. Axo ix schabꞌil chiꞌ, Aholiba sbꞌi ix, aton Jerusalén schꞌoxcot ix. A in ix vacꞌoch ebꞌ ix vetbꞌeyumoc, ix aj vuninal yedꞌ visil yedꞌ ebꞌ ix.* 5 Te chuc ix yutej sbꞌa ix Ahola chiꞌ, ix mulan ix dꞌa yol in cꞌabꞌ yedꞌ ebꞌ aj Asiria bꞌaj te ay sgana ix, aton ebꞌ soldado 6 ayoch cꞌapac yaax pichul yuuj. Masanil ebꞌ yajal, ebꞌ capitán, ebꞌ quelemtac te vachꞌ yilji, masanil ebꞌ ayqꞌue dꞌa yibꞌan̈ chej ix mulan yedꞌ ix. 7 A yedꞌ ebꞌ te vachꞌ yilji dꞌa scal ebꞌ aj Asiria chiꞌ ix mulan ix Ahola chiꞌ. Ix yacꞌanpaxbꞌat spensar ix dꞌa sdiosal ebꞌ, ix och ix ejmelal dꞌa juntzan̈ chiꞌ. 8 Atax yic ayecꞌ ix dꞌa Egipto chiꞌ ix ochcan ix ajmulal, maxtzac yactejlaj ix. Yixtax scobꞌesal ix tzijtum mach ix mulan yedꞌ ix, ix laj bꞌanji yim ix yuj ebꞌ. Man̈xo cobꞌesoclaj ix ajcan ix, palta to ix ochcan ix ajmul ixal. 9 Yuj chiꞌ ix vacꞌoch ix dꞌa yol scꞌabꞌ ebꞌ bꞌaj ay sgana chiꞌ, aton ebꞌ aj Asiria, ebꞌ ix snibꞌejbꞌat ix. 10 Axo ix aji, ix el bꞌeran ix yuj ebꞌ, ix icꞌjiecꞌ ebꞌ yuneꞌ ix yuj ebꞌ, ix xicjicham ix yuj ebꞌ. Icha chiꞌ ix aj yacꞌanoch yaelal ebꞌ dꞌa yibꞌan̈ ix. A tas ix utaj ix chiꞌ, te nivan ix aj sbꞌinaj dꞌa scal ebꞌ ix ix.11 Axo pax ix Aholiba, snulej ix chiꞌ, ix yil val juntzan̈ chiꞌ ix, palta ix ecꞌ ix dꞌa yibꞌan̈ yacꞌanoch sbꞌa ajmulal dꞌa yichan̈ ix Ahola chiꞌ. 12 Ix yacꞌanpaxoch sbꞌa ix dꞌa yol scꞌabꞌ ebꞌ aj Asiria chiꞌ, aton dꞌa masanil ebꞌ yajal, ebꞌ soldado te vachꞌ yilji spichul ayochi, ebꞌ quelemtac te vachꞌ yilji ayqꞌue dꞌa yibꞌan̈ chej. 13 Ix vilani to ix yixtejpaxbꞌat sbꞌa ix yedꞌ ebꞌ chiꞌ, lajan ix yutej sbꞌa ix icha val ix yutej sbꞌa ix snulej chiꞌ. 14 Palta yelxo val ix ecꞌ ix dꞌa yibꞌan̈ scꞌulan ajmulal chiꞌ. Ix yilan juntzan̈ yechel ix tzꞌibꞌabꞌiloch dꞌa sattac pat, aton yechel ebꞌ caldeo chacchac yilji spichul, 15 ayoch stzecꞌul snan̈al ebꞌ, aypaxoch cꞌapac stzecꞌul sjolom ebꞌ tzijtum yelav, icha val to yajalil soldado ebꞌ, aj Caldea ebꞌ. 16 Ayic ix yilanoch juntzan̈ yechel ebꞌ aj Babilonia chiꞌ ix, ix ste nibꞌejoch ix, yuj chiꞌ ix yacꞌbꞌat schecabꞌ ix dꞌa Babilonia chiꞌ. 17 Ix lajvi chiꞌ, ix javi ebꞌ aj Babilonia chiꞌ, ix ul mulan ebꞌ yedꞌ ix. Tzijtum tas ix yutej sbꞌa ebꞌ yedꞌ ix, masanto ix yajjiqꞌue ebꞌ yuj ix. 18 Icha chiꞌ ix aj yacꞌanoch sbꞌa ix ajmulal dꞌa yichan̈ chon̈abꞌ. Ix schꞌoxanel bꞌeran snivanil ix, masanto ix in yajel ix, icha ix in cꞌulej yedꞌ ix snulej ix. 19 Palta yelcꞌolal ix och ix ajmulal chiꞌ. Ix snaancot scobꞌesal ix dꞌa pecaꞌ, ayic smulannac ix dꞌa Egipto, 20 yictax yacꞌannacoch sbꞌa ix dꞌa yol scꞌabꞌ ebꞌ ste nibꞌej val sbꞌa ix yedꞌoc, aton juntzan̈ vinac lajan syutej sbꞌa icha nocꞌ bꞌuru ma nocꞌ chej dꞌa junoc nocꞌ nun chej.
21 A ach val tic ach Aholiba, tza nacot ajmulal a cꞌulejnac ayic cobꞌes achto, ayic sbꞌanannac im ebꞌ aj Egipto, tza nibꞌej tza cꞌulejxi icha chiꞌ. 22 Yuj chiꞌ a in Dios Yajal in sval icha tic: A juntzan̈ ebꞌ ix a nibꞌej chiꞌ, aton ebꞌ yajbꞌilxo uuj ticnaic, a in ol vacꞌoch ebꞌ ajcꞌolal dꞌayach, yalxon̈ej bꞌaj ol cot ebꞌ, 23 aton ebꞌ aj Babilonia yedꞌ ebꞌ aj Caldea, ebꞌ aj Pecod, ebꞌ aj Soa yedꞌ ebꞌ aj Coa yedꞌ masanil ebꞌ aj Asiria. Masanil juntzan̈ quelemtac te vachꞌ yilji, ebꞌ yajal yedꞌ ebꞌ nivac yopisio yedꞌ ebꞌ soldado ayqꞌue dꞌa yibꞌan̈ chej. 24 Ol cot ebꞌ chiꞌ dꞌayach yedꞌ jantac carruaje yedꞌ ebꞌ soldado. Toxon̈ej ol oymaj ebꞌ dꞌa a patic, yedꞌnac syamcꞌabꞌ ebꞌ yic oval yedꞌ sqꞌuen xumpil, yedꞌnac pax smaclabꞌ jul-labꞌ ebꞌ. A in ol vacꞌ yopisio ebꞌ yic syacꞌan a yaelal, icha yalan sley ebꞌ. 25 Yedꞌ val in cꞌacꞌalcꞌolal ol vacꞌbꞌat yoval in cꞌol dꞌa ibꞌan̈. A ebꞌ chiꞌ ol ach ixtan sicꞌlabꞌil. Ol spolel a n̈iꞌ ebꞌ yedꞌ a chiquin. A ebꞌ ol canoc, ol xicjoccham ebꞌ dꞌa qꞌuen espada. Ol icꞌjoquecꞌ ebꞌ uneꞌ, ebꞌ vinac unin yedꞌ ebꞌ ix. Axo dꞌa slajvubꞌal, ol n̈uschajtzꞌa ebꞌ olto canoc. 26 Ol yiqꞌuel a pichul ebꞌ yedꞌ pax masanil qꞌuen qꞌueen ayoch elvanubꞌoc. 27 Icha val chiꞌ ol aj slajvicancꞌoch ajmulal a cꞌulejnac dꞌa Egipto chiꞌ, man̈xa bꞌaqꞌuin̈ ol a nibꞌejxibꞌat juntzan̈ chiꞌ. Man̈xo pax ol a nacot Egipto chiꞌ.
28 Aton val juntzan̈ tic sval a in Jehová Yajal in tic: A in ol ach vacꞌoch dꞌa yol scꞌabꞌ juntzan̈ nación tza chaqueli, aton juntzan̈ yajbꞌil uuj. 29 Ol yacꞌ val chucal ebꞌ dꞌayach. A ebꞌ chiꞌ ol icancan tas ix icꞌ dꞌa a munlajel, toxon̈ej ol ach elcan bꞌeran yuj ebꞌ. Ol checlaj juntzan̈ schucal a nivanil bꞌaj ix a cꞌulej ajmulal chiꞌ. 30 Icha chiꞌ ol aj sjavi dꞌa ibꞌan̈, yujto ix ach tzalaj a cꞌulan ajmulal yedꞌ juntzan̈ nación chiꞌ, a na ix ach och pax ejmelal dꞌa juntzan̈ sdiosal ebꞌ. 31 Yujto icha sbꞌeybꞌal ix a nulej chiꞌ ix a bꞌeybꞌalej, yuj chiꞌ a yaelal ix vacꞌoch dꞌa yibꞌan̈ ix, a ol vacꞌpaxoch dꞌa ibꞌan̈ a ach tic, icha val to lajan tas ayem dꞌa yol junoc nivan vaso svacꞌ eyuqꞌuej.
32 A in Jehová Yajal in svalaꞌ: A tas ix yucꞌ ix a nulej chiꞌ, aꞌ ol ucꞌpaxi. A jun vaso te nivan yool, a ol ucꞌlabꞌej. Masanil nación ol ach bꞌuchanoc, ol ach stzetzan pax yuj jun nivan vaso tzucꞌlabꞌej chiꞌ.
33 Ol oybꞌoc a sat yuj tas ay dꞌa yol vaso chiꞌ, ol ach cuspaxqꞌue yuuj. Ol ach xiv val qꞌuei yujto chuc tas ol yicꞌcot dꞌa ibꞌan̈. Aton jun vaso chiꞌ ix yucꞌlabꞌej ix a nulej ix Samaria.
34 A in Jehová Yajal in svalaꞌ: Ol ucꞌlabꞌej jun vaso chiꞌ, man̈xa tas ol can dꞌa yool. Ol lajvoc chiꞌ ol a macꞌanpojoc, axo yedꞌ spojelal chiꞌ ol a jotzꞌ lajvoc im.
35 Yujto ix in bꞌatcan satcꞌolal uuj, ix ach el mican dꞌayin, yuj chiꞌ yovalil ol abꞌ val syail yuj ajmulal chiꞌ, xchi Jehová.
36 Ix yalanxi Jehová dꞌayin icha tic: Ach anima, alel jantac yaelal ol javoc dꞌa yibꞌan̈ ix Ahola yedꞌ dꞌa yibꞌan̈ ix Aholiba chiꞌ. Vachꞌ tzutej alanoch dꞌa sat ebꞌ ix jantac tas yajbꞌentac ix scꞌulej ebꞌ ix. 37 A ebꞌ ix chiꞌ, ix mulan ebꞌ ix dꞌa yol in cꞌabꞌ, chicꞌtac scꞌabꞌ ebꞌ ix yuj bꞌaj smilcham yuneꞌ. Ix in yactejcan ebꞌ ix, axo dꞌa comon dios ix och ebꞌ ix ejmelal. Ix sn̈usantzꞌa yuneꞌ ebꞌ ix silabꞌil dꞌa juntzan̈ comon dios chiꞌ, aton juntzan̈ vuninal ix vil sat yedꞌ ebꞌ ix. 38 An̈ejtonaꞌ ix scꞌulej pax juntzan̈ tic ebꞌ ix: A in templo yedꞌ scꞌual icꞌoj ip vic yaji, junn̈ej cꞌual ix aj yixtanbꞌat ebꞌ ix. 39 Aton dꞌa jun cꞌual ayic ix sn̈usantzꞌa vuninal ebꞌ ix silabꞌil yic syicꞌanchaan̈ sdiosal ebꞌ ix chiꞌ. Ix javi pax ebꞌ ix ul yixtejbꞌat in templo, aton val juntzan̈ chiꞌ ix sbꞌeybꞌalej ebꞌ ix dꞌa yol in pat.
40 Ix yacꞌbꞌat schecabꞌ ebꞌ ix yic tzꞌavtaj ebꞌ vin̈ vinac cajan dꞌa najat. Axo ix Aholiba ix sbꞌic sbꞌa ix, ix yacꞌan ucꞌ sat ix, ix yacꞌanpaxoch qꞌuen qꞌueen ix dꞌay yelvanubꞌoc, yic schaji sjavi ebꞌ vin̈ chiꞌ yuj ix. 41 Ix em cꞌojan ix dꞌa jun chꞌat man̈xo jantac svachꞌil yilji, vachꞌxo pax yajem vael dꞌa sat mexa. Ix yacꞌanpaxem incienso ix yedꞌ aceite to vic yaj dꞌa sat mexa chiꞌ. 42 Toxon̈ej sn̈iln̈ilan juntzan̈ comon anima yic syacꞌanoch qꞌuin̈ ebꞌ yedꞌ ix, aton juntzan̈ ucꞌum an̈ scot dꞌa tzꞌinan luum, ix yacꞌanoch yelvanubꞌ ebꞌ dꞌa ix, ix yacꞌoch qꞌuen brazalete ebꞌ dꞌa scꞌabꞌ ix, ix yacꞌanpaxqꞌue corona ebꞌ man̈xo jantac svachꞌil dꞌa sjolom ix. 43 Ix lajvi chiꞌ ix in naan dꞌa yibꞌan̈ ebꞌ ix man̈xalaj svachꞌil yuj yajmulal chiꞌ: Scꞌulejocabꞌ ajmulal chiꞌ ebꞌ vin̈ vinac yedꞌ ebꞌ ix yujto ichan̈ej chiꞌ scꞌulej ebꞌ ix. 44 Ix javi ebꞌ vin̈, ix vay ebꞌ vin̈ yedꞌ ebꞌ ix chucal ix chiꞌ, aton ix Ahola yedꞌ ix Aholiba, icha val tzꞌaj svay ebꞌ vin̈ vinac yedꞌ ebꞌ ix ajmul ix. 45 Palta a ebꞌ vin̈ vinac vachꞌ sbꞌeybꞌal, a ebꞌ vin̈ ol acꞌanoch yaelal dꞌa yibꞌan̈ ebꞌ ix, icha val smojalil yajmulal ebꞌ ix, yuj pax bꞌaj smilcham anima ebꞌ ix.
46 Yuj chiꞌ a in Jehová Yajal in svalaꞌ: Smolocabꞌ sbꞌa masanil nación dꞌa spatic ebꞌ ix chiꞌ yic tzꞌacꞌjioch ebꞌ ix dꞌa nivan xivcꞌolal, yic tzꞌelcꞌajpaxbꞌat tastac ay dꞌa ebꞌ ix. 47 Masanil nación chiꞌ ol julqꞌuenancham ebꞌ ix, ol xicjocpaxcham ebꞌ ix dꞌa qꞌuen espada. Ol macꞌjoccham svinac unin ebꞌ ix yedꞌ yix unin ebꞌ ix, ol n̈usjocpaxtzꞌa spat ebꞌ ix. 48 Icha chiꞌ ol aj vacꞌan satel jun bꞌeybꞌal chiꞌ dꞌa smacbꞌen Israel. Icha chiꞌ ol aj snachajel yuj masanil ebꞌ ix ix to max yal-laj sbꞌeybꞌalan ajmulal ebꞌ ix. 49 A chavan̈ ebꞌ ix chiꞌ, ol vacꞌ syaelal ebꞌ ix yuj yajmulal, yuj pax smul ebꞌ ix bꞌaj tzꞌoch ejmelal dꞌa comon dios. Icha chiꞌ ol aj snachajel yuj ebꞌ ix to a in ton Dios Yajal in, xchi Jehová, xa chi dꞌa ebꞌ.