Jun qꞌuen chen ayqꞌue dꞌa yibꞌan̈ cꞌacꞌ
24
A dꞌa slajun̈il cꞌual yic slajun̈il uj, ayic sbꞌalun̈ilxo abꞌil quicꞌjicot dꞌa Babilonia tic, ataꞌ ix lolon Jehová dꞌayin, ix yalan icha tic: 2 Ach anima, tzꞌibꞌejcani tas cꞌual yedꞌ jantac yoch uj ticnaic, yujto a dꞌa jun cꞌual tic ix och vin̈ sreyal Babilonia yacꞌ oval dꞌa Jerusalén. 3 Alcanel jun abꞌix tic dꞌa chꞌoxnabꞌilal dꞌa jun chon̈abꞌ te pit chiꞌ. Tzalan icha tic: A Jehová Yajal tzꞌalan icha tic:Acꞌjocabꞌqꞌue junoc qꞌuen chen dꞌa yibꞌan̈ cꞌacꞌ, acꞌjocabꞌpaxem a aꞌ dꞌa yool.
4 Acꞌjocabꞌem nocꞌ chibꞌej dꞌa yool, aton nocꞌ nibꞌabꞌil, cꞌolquixtac tzꞌaj nocꞌ. Aocabꞌ nocꞌ xubꞌ yedꞌ nocꞌ sbꞌacꞌchil yich spatic tzꞌemi yedꞌ pax nocꞌ sbꞌaquil te vachꞌ.
5 Icꞌjocabꞌbꞌat junoc nocꞌ calnel te vachꞌ, nivanocabꞌ cꞌatzitz tzꞌacꞌchajoch dꞌa yalan̈ jun chen chiꞌ yic vachꞌ xej sicꞌlabꞌil, masanto stajibꞌat nocꞌ bꞌac chiꞌ.
6 Yujto a in Jehová Yajal in sval icha tic: Obꞌiltac jun chon̈abꞌ milumcham anima. Lajan icha junoc chen cꞌustacxo. A scꞌustaquil chiꞌ maxtzac el-laj. Dꞌa junjunal tzꞌaj icꞌanqꞌueta nocꞌ chibꞌej chiꞌ, man̈ a sicꞌlejlaj nocꞌ.*
7 Bꞌudꞌjinacxoel jun chon̈abꞌ chiꞌ yuj schiqꞌuil ebꞌ anima smiljicham dꞌay. Man̈oc dꞌa sat lum tzꞌem chicꞌ chiꞌ yic smucchaj yuj lum pococ, palta to dꞌa yibꞌan̈ qꞌuen qꞌueen malaj tas ay dꞌa yibꞌan̈, ataꞌ stobꞌemi.
8 Ol cann̈ej schiqꞌuil ebꞌ anima chiꞌ dꞌa yibꞌan̈ qꞌuen qꞌueen chiꞌ vuuj yic chequeln̈ej yaji, yuj chiꞌ ol cot yoval in cꞌool, ol vacꞌan spac icha dꞌa smojal.
9 A in Jehová Yajal in sval icha tic: Obꞌiltac val jun chon̈abꞌ te milumcham anima chiꞌ. Ichato ol vacꞌoch jun nivan cꞌacꞌ dꞌa yalan̈.
10 Cotocabꞌ nivanoc teꞌ cꞌatzitz, ochocabꞌ scꞌacꞌal teꞌ. Icha chiꞌ tzꞌaj staji nocꞌ chibꞌej chiꞌ, masanto ol yal stupxej masanil yaal, yic stzꞌabꞌat nocꞌ bꞌac ayem dꞌa yol chen chiꞌ.
11 Canocabꞌ jun qꞌuen chen malaj tas ayem dꞌa yool dꞌa yibꞌan̈ cꞌacꞌ chiꞌ, masanto schacbꞌiel stzꞌai. Icha chiꞌ ol aj sacbꞌi yel smictaquil, masanto tzꞌel scꞌustaquil chiꞌ.
12 Nabꞌan̈ej ix in cꞌunbꞌi vicꞌanel scꞌustaquil jun chen chiꞌ, palta maj el-laj, vachꞌchom dꞌa teꞌ cꞌacꞌ, palta max el-laj.
13 A jun scꞌustaquil chiꞌ schꞌoxanel yajmulal chon̈abꞌ Jerusalén. Ix vacꞌ vip in bꞌicanel schucal chiꞌ, palta man̈ jabꞌoc ix eli. A ticnaic, man̈xa tas syal yicꞌaneli, masanto ol lajvoc vacꞌanbꞌat yoval in cꞌol dꞌa yibꞌan̈, ichato chiꞌ ol sacbꞌoccaneloc. 14 A in Jehová in svalaꞌ: Toxo ix javi stiempoal vacꞌanoch syaelal, man̈xo ol in yamoch vaan in bꞌa. Man̈xalaj voqꞌuelcꞌolal, man̈ ol in na in bꞌa. A in svalaꞌ to ol vacꞌ val och syaelal icha val smojalil yuj sbꞌeybꞌal, xchi Jehová dꞌayin.
A schamel ix yetbꞌeyum vin̈aj Ezequiel
15 Ix yalanxi Jehová dꞌayin icha tic: 16 Ach anima, a ix etbꞌeyum te xajanabꞌil uuj, elan̈chamel ol cham ix, a in ol viqꞌuecꞌ sqꞌuinal ix chiꞌ. Palta man̈ ol a chꞌoxel-laj a cuscꞌolal yuj ix, man̈ ol ach ocꞌpaxlaj. 17 Dꞌa elcꞌaltac ol abꞌ syail, palta man̈ ol a chꞌoxel-laj a cuscꞌolal chiꞌ icha scꞌulej juntzan̈xo anima. Ayn̈ejqꞌue smusil a jolom, ayn̈ejoch a xan̈abꞌ ol ach ecꞌoc. Man̈ ol a musej a sat yuj a chꞌoxanel a cuscꞌolal, man̈ ol a va vael svaji ayic ay chamel, xchi dꞌayin.
18 A dꞌa qꞌuin̈ibꞌalil ix in lolon yedꞌ ebꞌ anima, axo dꞌa yemcꞌualil ix cham ix vetbꞌeyum. Axo dꞌa junxo qꞌuin̈ibꞌalil ix in cꞌulan icha ix yal Jehová dꞌayin. 19 Axo masanil ebꞌ anima dꞌa chon̈abꞌ tic ix alan dꞌayin: Al dꞌayon̈ tas syalelcꞌoch juntzan̈ tas tza cꞌulej chiꞌ, xchi ebꞌ dꞌayin.
20 Ix valan dꞌa ebꞌ to a Jehová ix lolon dꞌayin, ix yalan icha tic: 21 Al dꞌa ebꞌ etisraelal to a in Dios Yajal in sval icha tic: Ol vacꞌ ixtaxbꞌat in templo scham e cꞌol eyilani, tze te nibꞌej paxi, ay val och snivaniloc eyelcꞌochi yedꞌ eyipumaloc. A ebꞌ eyuninal yedꞌ ebꞌ eyisil ix can dꞌa Jerusalén, ol miljoccham ebꞌ dꞌa oval, xchi Jehová. 22 Palta ol e cꞌulej pax a ex tic icha tas tzin cꞌulej tic. Man̈ ol e musej e sat yuj e chꞌoxanel eyaelal, man̈ ol e va pax vael svaji ayic ay chamel. 23 Man̈ ol eyiqꞌuel-laj smusil e jolom, man̈ ol eyicꞌpaxel-laj e xan̈abꞌ. Man̈ ol e chꞌoxel-laj e cuscꞌolal, man̈ ol ex ocꞌpaxlaj. Ol te el eyip yuj e chucalil, junjun ex ol ex te cusoc. 24 A in Ezequiel in tic, a in tzin och chꞌoxnabꞌilal dꞌayex. Masanil tas tzin cꞌulej tic, aꞌ ol e cꞌulej pax a ex tic. Ayic ol ujoc masanil juntzan̈ tic, ol nachajel eyuuj to a Dios Yajal toni, xin chi dꞌa ebꞌ.
25 Ix yalanxi Jehová dꞌayin icha tic: A dꞌa jun cꞌual ayic ol vicꞌanel yipumal Israel, aton in templo, yelxo val ste tzalaj ebꞌ yuj svachꞌil yilji, ayoch spensar ebꞌ dꞌay, snibꞌej val ebꞌ, ol vacꞌpax satel yalyuninal ebꞌ. 26 A dꞌa jun cꞌual chiꞌ ay jun mach ol elcan taꞌ, ol ul yal yabꞌixal dꞌayach. 27 A dꞌa jun cꞌu chiꞌ ol yal a lolonxi, yuj chiꞌ ol ach lolon yedꞌ jun mach ol elcan chiꞌ. Icha val chiꞌ ol aj och dꞌa chꞌoxnabꞌilal dꞌa ebꞌ etisraelal, yuj chiꞌ ol nachajel yuj ebꞌ to a in ton Jehová sDiosal in ebꞌ, xchi Jehová dꞌayin.