A tas albꞌilcan dꞌa yibꞌan̈ chon̈abꞌ Amón
25
Ix lolonxi Jehová dꞌayin, ix yalan icha tic: 2 Ach anima, meltzajan̈bꞌat qꞌuelan dꞌa stojolal smacbꞌen ebꞌ amonita, tzalanel in lolonel dꞌa yibꞌan̈ ebꞌ. 3 Tzalan dꞌa ebꞌ icha tic: Abꞌec slolonel Dios Yajal, icha val tic yalani: A ex tic, ix ex qꞌue val umnajoc, ix el eyav e tzevaji ayic ix eyilani to van yixtajbꞌat in templo, ayic ix icꞌjibꞌat ebꞌ aj Judá dꞌa chꞌoc chon̈abꞌil, masanto ix can tzꞌinan sluum ebꞌ, aton smacbꞌen Israel. 4 Yuj chiꞌ ol ex vacꞌoch dꞌa yol scꞌabꞌ ebꞌ anima ay bꞌaj sjavi cꞌu yic vachꞌ a ebꞌ ol acꞌan yajalil dꞌa e macbꞌen, ol sbꞌoanqꞌue scampamento ebꞌ dꞌa e cal. Masanil sat eyavbꞌen ol smol ebꞌ, ol yucꞌan pax lech ebꞌ syacꞌ nocꞌ e vacax. 5 A dꞌa chon̈abꞌ Rabá axon̈ej nocꞌ camello ol va dꞌay. Masanil e macbꞌen ex aj Amón, axon̈ej nocꞌ calnel ol va dꞌay. Icha chiꞌ ol aj snachajel eyuuj to a in ton Jehová in tzex vutej icha chiꞌ.6 A in Dios Yajal in svalaꞌ: A ex val tic ex amonita ix e tzꞌit val e cꞌabꞌ, ix ex qꞌue cheneljoc, ix te tzalajpax e cꞌool yic tzex bꞌuchvaj dꞌa ebꞌ israel yuj yaelal ix javi dꞌa yibꞌan̈ ebꞌ. 7 Yuj chiꞌ, ol vicꞌchaan̈ in cꞌabꞌ, ol vacꞌanoch yaelal dꞌa eyibꞌan̈, ol ex vacꞌoch dꞌa yol scꞌabꞌ juntzan̈xo nación yic ol icꞌchajecꞌ masanil tastac ay dꞌayex. Ol ex in satanel dꞌa scaltac chon̈abꞌ, ol ex satel dꞌa juneln̈ej. Icha chiꞌ ol aj eyojtacaneli to a in ton Jehová in tzex vutej icha chiꞌ, xchi Jehová.
A tas albꞌilcan dꞌa yibꞌan̈ chon̈abꞌ Moab
8 A in Dios Yajal in svalaꞌ: A ebꞌ aj Moab yedꞌ ebꞌ aj Seir syal ebꞌ to lajan Judá yedꞌ juntzan̈xo nación. 9 Yuj chiꞌ ol in cha acꞌjoc satel juntzan̈ chon̈abꞌ macan dꞌa smojonal Moab chiꞌ, aton juntzan̈ te vachꞌ yilji: Bet-jesimot, Baal-meón yedꞌ Quiriataim. 10 Ol vacꞌan scꞌulej ebꞌ anima cajan bꞌaj sjavi cꞌu to aꞌ ebꞌ ol icancan smacbꞌen ebꞌ aj Moab yedꞌ yic ebꞌ aj Amón. Man̈xa junoc nación olto naancot Amón chiꞌ. 11 Ol vacꞌoch yaelal dꞌa yibꞌan̈ ebꞌ aj Moab. Icha chiꞌ ol aj snachajel yuj ebꞌ to a in ton Jehová in svutej ebꞌ icha chiꞌ.
A tas albꞌilcan dꞌa yibꞌan̈ chon̈abꞌ Edom
12 A in Dios Yajal in svalaꞌ: A ebꞌ aj Edom, te chuc tas ix scꞌulej ebꞌ, ix ecꞌ yibꞌan̈ spacan sbꞌa ebꞌ dꞌa ebꞌ aj Judá, yuj chiꞌ te nivan smul ebꞌ ix och dꞌa vichan̈. 13 Yuj chiꞌ svalaꞌ to ol vicꞌchaan̈ in cꞌabꞌ, ol vacꞌanoch yaelal dꞌa yibꞌan̈ ebꞌ aj Edom chiꞌ. Ol vacꞌ satel masanil anima yedꞌ nocꞌ nocꞌ. Ol vacꞌ val juvocanbꞌatoc, ol schael dꞌa Temán masanto dꞌa Dedán. Masanil anima ol cham dꞌa oval. 14 A in Dios Yajal in svalaꞌ to a in chon̈abꞌ Israel ol vacꞌlabꞌej ayic ol in pacan in bꞌa dꞌa Edom chiꞌ. Ol acꞌjococh syaelal ebꞌ aj Edom chiꞌ yuj ebꞌ icha val yaj yoval in cꞌool. Icha chiꞌ ol aj yabꞌan ebꞌ tas ol vutej in pacan in bꞌa.
A tas albꞌilcan dꞌa yibꞌan̈ ebꞌ filisteo
15 A in Dios Yajal in svalaꞌ: A ebꞌ filisteo te chuc tas ix scꞌulej ebꞌ yuj bꞌaj ix spac sbꞌa dꞌa ebꞌ aj Judá. Maj ocꞌlaj jabꞌoc scꞌol ebꞌ dꞌa ebꞌ, yedꞌ val jantac schucal scꞌol ebꞌ ix satel ebꞌ aj Judá chiꞌ, yuj bꞌaj yajcꞌol sbꞌa ebꞌ atax dꞌa pecaꞌ. 16 Yuj chiꞌ a in svalaꞌ to ol vicꞌchaan̈ in cꞌabꞌ, ol vacꞌanoch yaelal dꞌa yibꞌan̈ ebꞌ filisteo chiꞌ. Ol in satel ebꞌ quereteo dꞌa juneln̈ej yedꞌ ebꞌ aytocan dꞌa stitac aꞌ mar. 17 Te ayxo smay ol vutej vacꞌan spac dꞌa ebꞌ. Ol vacꞌoch yaelal dꞌa yibꞌan̈ ebꞌ yedꞌ val yoval in cꞌool. Ayic ol in cꞌulan icha chiꞌ, ol yojtaquejel ebꞌ to a in ton Jehová in svutej ebꞌ icha chiꞌ, xchi Jehová.