A tas albꞌilcan dꞌa yibꞌan̈ chon̈abꞌ Tiro
26
A dꞌa bꞌabꞌel cꞌual yoch uj yic yuxluchil abꞌil quicꞌjicot dꞌa Babilonia tic, ataꞌ ix lolon Jehová dꞌayin, ix yalan icha tic: 2 Ach anima, icha tic ix yal ebꞌ aj Tiro yuj Jerusalén:A Jerusalén ix sateli. A dꞌa yalan̈taxo sbꞌe ebꞌ chon̈vajum yaji. Ataꞌ stupcan ebꞌ yic vachꞌ tzꞌecꞌ ebꞌ yedꞌ schon̈ chiꞌ. A ticnaic vachꞌxo quecꞌ yedꞌ co chon̈ chiꞌ. Te nivan co bꞌeyumal ol quicꞌaꞌ, yacbꞌan a jun chon̈abꞌ chiꞌ toxo ix satjieli, xchi ebꞌ.
3 Yuj chiꞌ a in Dios Yajal in tic svalaꞌ: Toxo ix in och ajcꞌolal dꞌa Tiro chiꞌ, tzijtum nación ol vicꞌqꞌue vaan yic tzꞌoch ajcꞌolal dꞌay, icha val tzꞌaj sqꞌue vaan sat aꞌ mar.
4 Ol smaqꞌuem vecnaj smuroal ebꞌ, ol spojanpaxem storreal ebꞌ. A spococal lum luum mesesi ol yutej ebꞌ, axon̈ej qꞌuen nivac qꞌueen ol canoc.
5 A bꞌaj ecꞌnac jun chon̈abꞌ chiꞌ, ol can dꞌa snan̈al aꞌ mar. Ataꞌ ol yacꞌ tacjoc chꞌan̈ schimpa ebꞌ yamum chay. A in Dios Yajal in svalaꞌ, a Tiro chiꞌ ol icꞌchajbꞌat tastac ay dꞌay yuj juntzan̈xo nación.
6 A ebꞌ cajan dꞌa junjun chon̈abꞌ ay dꞌa stitac aꞌ mar, ol laj miljoccham ebꞌ dꞌa oval. Icha val chiꞌ ol aj snachajel yuj ebꞌ to a in Jehová in svutej ebꞌ icha chiꞌ.
7 A in Jehová Yajal in svalaꞌ: A dꞌa norte ol vicꞌbꞌat vin̈aj Nabucodonosor sreyal Babilonia, aton vin̈ te nivan yopisio. A vin̈ ol acꞌan oval dꞌa Tiro chiꞌ. Ol cꞌoch vin̈ yedꞌ ebꞌ soldado ayqꞌue dꞌa yibꞌan̈ chej yedꞌ pax carruaje yedꞌ jantacxo ebꞌ soldado.
8 A yedꞌ qꞌuen espada ol miljoccham masanil ebꞌ cajan dꞌa juntzan̈ chon̈abꞌ dꞌa stitac aꞌ mar. Ol bꞌochajqꞌue junoc muro dꞌa spatictac Tiro chiꞌ. Ol sbꞌopaxqꞌue sbꞌachnubꞌ ebꞌ yic tzꞌoch ebꞌ yacꞌ oval dꞌay. Yedꞌnacpax smaclabꞌ jul-labꞌ ebꞌ ol och ebꞌ.
9 Ol yacꞌ oval ebꞌ yedꞌ macꞌlabꞌ poj muro, yedꞌ qꞌuen hierro ol smacꞌpoj torre ebꞌ.
10 Man̈xo jantacoc nocꞌ chej yedꞌnac vin̈ rey chiꞌ, ol bꞌudꞌjoquel chon̈abꞌ yuj pococ ol stecꞌqꞌue vaan nocꞌ. Ayic ol och vin̈ sreyal Babilonia dꞌa spuertail chon̈abꞌ chiꞌ, ol te ibꞌxocqꞌue smuroal yuj scꞌan̈ carreta, carruaje, yuj pax scꞌan̈ yem yoc nocꞌ chej chiꞌ, icha tzꞌaj junoc chon̈abꞌ toxo ix acꞌji ganar.
11 Pilan ol stecꞌ yoltac calle nocꞌ chej chiꞌ. Pilan ol miljoccham ebꞌ anima dꞌa qꞌuen espada. Ol jecchajem juntzan̈ qꞌuen nivac oy te vachꞌ yilji.
12 Man̈xa jabꞌoc sbꞌeyumal ebꞌ ol can yuj ebꞌ. Masanil chon̈ ol yicꞌbꞌat ebꞌ. Ol smacꞌanpoj smuroal chon̈abꞌ chiꞌ ebꞌ. A juntzan̈ nivac pat vachꞌ yilji ticnaic ol smacꞌcanpoj ebꞌ, ato dꞌa yol aꞌ mar ol yumchajcanbꞌat qꞌuen qꞌueen, spatzabꞌil yedꞌ masanil spojelal.
13 Icha chiꞌ ol aj vacꞌan satel sbꞌit ebꞌ. Man̈xa bꞌaj ol abꞌchaj scꞌan teꞌ yarpa ebꞌ.
14 A jun chon̈abꞌ chiꞌ, axon̈ej qꞌuen samqꞌueen ol can dꞌay vuuj. Man̈xalaj tas ol qꞌuibꞌ dꞌa yibꞌan̈, ataꞌ ol yacꞌ tacjoc schimpa ebꞌ yamum chay. Man̈xa bꞌaqꞌuin̈ ol bꞌochajxiqꞌue chon̈abꞌ Tiro chiꞌ. A in Jehová in svalaꞌ, ol vacꞌanpaxelcꞌochi, xchi Dios Yajal.
15 A in Dios Yajal in sval yuj Tiro icha tic: Masanil chon̈abꞌ dꞌa stitac aꞌ mar, ol ibꞌxocqꞌue yuj xivelal ayic ol bꞌat yolax Tiro, ayic ol el pax yav ebꞌ ol lajvoc yedꞌ ebꞌ van schami. 16 Masanil ebꞌ sreyal juntzan̈ chon̈abꞌ dꞌa stitac aꞌ mar chiꞌ, ol emta ebꞌ dꞌa yoltac scꞌojnubꞌ, ol yiqꞌuel sxotil ebꞌ yedꞌ spichul ebꞌ ayoch yelvanubꞌ. Ol te och ebꞌ dꞌa nivan xivcꞌolal, ol em cꞌojan ebꞌ dꞌa sat luum. Junjun cꞌu ol ibꞌxoc ebꞌ yuj xivelal yuj tas ol javoc dꞌa yibꞌan̈ Tiro chiꞌ. 17 Ol sbꞌitej jun bꞌit ebꞌ yic cuscꞌolal yuuj icha tic:
A chon̈abꞌ Tiro te nivan yelcꞌochi, masanil ebꞌ anima ay dꞌa stitac a aꞌ, ste xiv ebꞌ dꞌay. Te bꞌinajnac dꞌa scal ebꞌ tzꞌecꞌ dꞌa yibꞌan̈ aꞌ mar, palta a ticnaic toxo ix satjieli.
18 A ticnaic toxo ix acꞌchajoch juntzan̈ chon̈abꞌ ay dꞌa stiꞌ aꞌ mar chiꞌ dꞌa xivcꞌolal, yujto ix acꞌji ganar Tiro chiꞌ. A ebꞌ cajan dꞌa sat lum luum ay dꞌa snan̈al a aꞌ, te ayoch ebꞌ dꞌa xivcꞌolal yujto ix satjieli, xcham ebꞌ dꞌa jun sbꞌit chiꞌ.
19 Yuj chiꞌ sval a in Dios Yajal in tic icha tic: Ol vacꞌ acꞌjoc satel Tiro chiꞌ, icha juntzan̈xo chon̈abꞌ man̈xa junoc anima cajan dꞌay. Ol vacꞌ mucchajcanem dꞌa yich aꞌ mar. 20 Ol vacꞌpaxcanem ebꞌ cajan dꞌay masanto bꞌaj ayecꞌ ebꞌ chamnac, ebꞌ anima ecꞌnac dꞌa pecaꞌ. Ol vacꞌcanem ebꞌ dꞌa snajatil sjulal yich lum luum dꞌa scal ebꞌ anima ecꞌnac dꞌa juntzan̈ chon̈abꞌ satjinaquel dꞌa juneln̈ej. Icha chiꞌ ol aj yajecꞌ ebꞌ dꞌa scal ebꞌ chamnacxo chiꞌ. Man̈xa bꞌaqꞌuin̈ ol cajnajxoc anima dꞌa Tiro chiꞌ, man̈xa bꞌaqꞌuin̈ ol checlaj snivanil yelcꞌoch dꞌa scal nación. 21 A in Jehová Yajal in svalaꞌ to ayxo smay ol ajcan vuuj, vachꞌchom ol saychajecꞌoc, palta man̈xa bꞌaj ol ilchajoc, xchi Dios.