Bꞌit yic chamel yuj chon̈abꞌ Tiro
27
Ix yalanxi Jehová dꞌayin icha tic: 2 Ach anima, bꞌitej jun bꞌit yic chamel yuj chon̈abꞌ Tiro, 3 aton jun chon̈abꞌ ay dꞌa stiꞌ aꞌ mar, jun schon̈vaj yedꞌ juntzan̈xo chon̈abꞌ ay dꞌa stitac aꞌ chiꞌ. Tzal icha tic: A Dios Yajal tzꞌalan icha tic:A ebꞌ aj chon̈abꞌ Tiro syicꞌchaan̈ sbꞌa ebꞌ. A snaan ebꞌ to an̈ej schon̈abꞌ ebꞌ vachꞌ yilji.
4 A smojonal bꞌaj tzꞌecꞌ ebꞌ ato dꞌa stitac aꞌ mar scꞌochi. Te vachꞌ ix yutej ebꞌ sbꞌoan teꞌ sbarco.
5 Vachꞌ ix aj sbꞌoꞌoch schemteal teꞌ, aton teꞌ chemteꞌ nabꞌa cꞌubꞌtaj tzꞌicꞌjicot dꞌa jolom vitz Senir. Ix bꞌochaj yoyal dꞌa teꞌ cꞌuteꞌ scot dꞌa Líbano.
6 A teꞌ macꞌlabꞌ bꞌey barco chiꞌ, bꞌobꞌil teꞌ dꞌa teꞌ ji scot dꞌa Basán. Axo yibꞌan̈ teꞌ bꞌobꞌil dꞌa teꞌ tzicap scot dꞌa stitac a aꞌ dꞌa Chipre. Ayoch qꞌuen marfil yelvanubꞌoc teꞌ barco chiꞌ.
7 A cꞌapac cꞌapac ayqꞌue dꞌa chaan̈ yic tzꞌicꞌjibꞌey teꞌ yuj icꞌ, nabꞌa lino bꞌobꞌil dꞌa Egipto, aypaxoch yelvanubꞌ cꞌapac, an̈ejaꞌ cꞌapac chiꞌ ayoch sbanderailoc teꞌ. A cꞌapac cꞌapac ayqꞌue yen̈uloc ebꞌ anima, a an̈ chꞌal qꞌuicꞌmutzꞌinac yedꞌ an̈ yax chꞌal ayoch dꞌa cꞌapac, aton an̈ scot dꞌa chon̈abꞌ Elisa, dꞌa stiꞌ aꞌ mar.
8 A ebꞌ smacꞌan bꞌey teꞌ barco chiꞌ, a dꞌa Sidón yedꞌ dꞌa Arvad cajan ebꞌ. Axo ebꞌ schꞌuman teꞌ barco chiꞌ aj Tiro ebꞌ, aton ebꞌ te n̈ican spensar.
9 Ajun ebꞌ vin̈ ichamtac vinac aj Gebal sbꞌoan bꞌaj tzꞌixtax teꞌ barco chiꞌ, yujto te jelan ebꞌ vin̈. Masanil ebꞌ tzꞌecꞌ dꞌa yol teꞌ barco chiꞌ, scꞌoch ebꞌ manval ma chon̈val dꞌa chon̈abꞌ Tiro chiꞌ.
10 A ebꞌ vin̈ aj Persia, ebꞌ vin̈ aj Lidia yedꞌ ebꞌ vin̈ aj Libia, a ebꞌ vin̈ ayoch soldadooc, a ebꞌ vin̈ tzꞌacꞌan oval. A smaclabꞌ jul-labꞌ ebꞌ vin̈ yedꞌ sqꞌuen xumpil, slocbꞌejqꞌue ebꞌ vin̈ dꞌa sattac smuroal chon̈abꞌ, ichato yelvanubꞌ yaji, te vachꞌ yilji yuuj.
11 A ebꞌ vin̈ aj Arvad, junn̈ej yajecꞌ ebꞌ vin̈ yedꞌ ebꞌ vin̈ soldado aj Tiro, oyanoch ebꞌ vin̈ dꞌa spatic smuroal chon̈abꞌ chiꞌ. Axo dꞌa torre, ay ebꞌ vin̈ aj Gamad. Slocbꞌejqꞌue smaclabꞌ jul-labꞌ ebꞌ vin̈ dꞌa sattac muro chiꞌ yic te vachꞌ tzꞌaj yilji chon̈abꞌ chiꞌ. 12 A ebꞌ aj Tarsis syacꞌ qꞌuen plata ebꞌ, qꞌuen hierro, qꞌuen estaño yedꞌ qꞌuen plomo sqꞌuexuloc tastac sman taꞌ. 13 Yedꞌ pax ebꞌ aj Grecia, ebꞌ aj Tubal yedꞌ ebꞌ aj Mesec smanvaj ebꞌ taꞌ. A tas syacꞌ ebꞌ stojoloc tas sman chiꞌ, aton ebꞌ checabꞌ yedꞌ juntzan̈ yamcꞌabꞌ nabꞌa bronce. 14 Yedꞌ pax ebꞌ aj Bet-togarma, a tas sman ebꞌ dꞌa Tiro chiꞌ, a nocꞌ chej scꞌanchaj dꞌa munlajel, nocꞌ scꞌanchaj dꞌa oval yedꞌ nocꞌ mula yic icatz, a nocꞌ syacꞌcan ebꞌ stojoloc tas sman chiꞌ. 15 A ebꞌ aj Dedán yedꞌ dꞌa juntzan̈xo chon̈abꞌ dꞌa stitac aꞌ mar, a tas sman ebꞌ, stup ebꞌ yedꞌ marfil yedꞌ teꞌ ébano. 16 A ebꞌ aj Edom, tzijtum tas sman ebꞌ taꞌ, stup ebꞌ yedꞌ qꞌuen granate, cꞌapac cꞌapac chacchac yilji, cꞌapac cꞌapac ayoch yelvanubꞌ, cꞌapac lino, qꞌuen coral yedꞌ qꞌuen rubí. 17 A ebꞌ aj Judá yedꞌ ebꞌ aj Israel smanvaj ebꞌ taꞌ. A yedꞌ ixim trigo tzꞌel dꞌa Minit yedꞌ teꞌ higo spet eluli, nocꞌ yalchabꞌ, aceite yedꞌ pax bálsamo syacꞌ ebꞌ stojoloc. 18 A ebꞌ aj Damasco, te nivan tas sman ebꞌ taꞌ. A tas man ebꞌ chiꞌ, stup ebꞌ yedꞌ vino sbꞌo dꞌa Helbón yedꞌ nocꞌ sacsac lana. 19 A ebꞌ aj Dan yedꞌ ebꞌ aj Grecia, a tas sman ebꞌ, stup ebꞌ yedꞌ qꞌuen hierro bꞌobꞌilxo scot dꞌa yol smacbꞌen Uzal, jun macan̈ teꞌ valeꞌ sumumi sjabꞌ yedꞌ pax teꞌ canela. 20 Ato dꞌa Dedán scot juntzan̈ cꞌapac cꞌapac caro stojol tzꞌoch dꞌa yibꞌan̈ silla nocꞌ chej. 21 A ebꞌ aj Arabia yedꞌ masanil ebꞌ yajal yaj dꞌa Cedar, a tas sman ebꞌ stup ebꞌ yedꞌ nocꞌ yunetac calnel, nocꞌ chꞌac calnel yedꞌ pax nocꞌ chiva. 22 A ebꞌ chon̈vajum aj Sabá yedꞌ ebꞌ aj Raama, a tas sman ebꞌ, stup ebꞌ yedꞌ perfume te vachꞌ, qꞌuen qꞌueen te vachꞌ yilji yedꞌ qꞌuen oro. 23 A ebꞌ aj Harán, ebꞌ aj Cane, ebꞌ aj Edén, ebꞌ aj Sabá, ebꞌ aj Asiria yedꞌ masanil ebꞌ aj Media, aton ebꞌ chiꞌ smanvaj taꞌ. 24 A tas sman ebꞌ chiꞌ, stup ebꞌ yedꞌ pichul vachꞌ yilji, cꞌapac qꞌuicꞌmutzꞌinac yedꞌ cꞌapac tzꞌibꞌabꞌiloch yelvanubꞌ yedꞌ alfombra tzijtum stzꞌibꞌul yedꞌ chꞌan̈ lasu te vachꞌ yaj schꞌumchaji. 25 A tas sman ebꞌ yedꞌ tas schon̈ ebꞌ chiꞌ, a teꞌ nivac barco scuchanecꞌ dꞌa sat aꞌ mar.
A Tiro chiꞌ lajan icha junoc teꞌ barco te al yicatz tzꞌecꞌ dꞌa yibꞌan̈ aꞌ mar.
26 A ebꞌ smacꞌan bꞌey teꞌ barco chiꞌ, najatto syicꞌbꞌat teꞌ ebꞌ dꞌa yibꞌan̈ aꞌ, axo pax icꞌ scot dꞌa stojolal bꞌaj sjavi cꞌu, aꞌ smacꞌan poj teꞌ dꞌa yibꞌan̈ aꞌ.
27 Ayic tzꞌixtaxbꞌat teꞌ, sbꞌatcan jantac bꞌeyumal, chon̈ yedꞌ masanil tas yedꞌnac teꞌ dꞌa yich aꞌ mar chiꞌ. Sbꞌatpaxcan ebꞌ tzꞌicꞌan bꞌey teꞌ, ebꞌ tzꞌacꞌanoch snipul teꞌ, ebꞌ chon̈vajum, ebꞌ soldado yedꞌ juntzan̈ ebꞌ ayecꞌ dꞌa yol teꞌ dꞌa yich aꞌ chiꞌ.
28 A ebꞌ ayecꞌ dꞌa stitac aꞌ chiꞌ, syabꞌ ebꞌ yel yav ebꞌ smunlaj dꞌa teꞌ barco van sbꞌatcan dꞌa yich aꞌ chiꞌ.
29 A ebꞌ smacꞌan bꞌey juntzan̈xo teꞌ barco, tzꞌemta ebꞌ dꞌa yol sbarco chiꞌ. A ebꞌ tzꞌicꞌan bꞌey teꞌ chiꞌ, tzꞌoch vaan ebꞌ dꞌa stiꞌ aꞌ mar.
30 Ol syamanoch ebꞌ anima sqꞌue sjaj yocꞌ yuj cuselal yuj Tiro chiꞌ. Ol yacꞌanqꞌue pococ ebꞌ dꞌa sjolom, ol ecꞌ bꞌalbꞌon ebꞌ dꞌa scal qꞌuen ticꞌaqꞌuil taan̈.
31 Ol stzucanel xil sjolom ebꞌ, ol yacꞌanoch pichul ebꞌ ya svaꞌi, ol ocꞌ ebꞌ yuj cuscꞌolal.
32 Ol bꞌitaj bꞌit yic chamel dꞌa yibꞌan̈ Tiro chiꞌ. Ol alchaj yuj cuscꞌolal icha tic: Tasto val chon̈abꞌil ix yal slajbꞌan sbꞌa yedꞌ Tiro, palta a ticnaic toxo satjiel dꞌa snan̈al aꞌ mar.
33 A val yic ix bꞌat chon̈ dꞌa yibꞌan̈ aꞌ mar, ix yicꞌbꞌat tastac ay yopisio yuj juntzan̈xo nación. Ix te och ebꞌ sreyal yolyibꞌan̈qꞌuinal tic bꞌeyumal yuuj.
34 A ticnaic toxo ol satjoqueloc, ol bꞌatcan dꞌa yol aꞌ mar. Ato dꞌa yich aꞌ ol bꞌatcanoc. Masanil tastac ay dꞌay, ebꞌ smunlaj dꞌay, ol bꞌatcan ebꞌ smasanil dꞌa yich aꞌ.
35 Masanil anima dꞌa juntzan̈ nación dꞌa stitac aꞌ mar, toxon̈ej ol sat scꞌol ebꞌ yuuj. Ebꞌ sreyal ebꞌ, toxon̈ej ol xiv ebꞌ, ol checlaj xivelal chiꞌ dꞌa sat ebꞌ.
36 A ebꞌ chon̈vajum dꞌa junjun nación, ayic ol yilanoch ebꞌ, ol bꞌuchvaj ebꞌ dꞌay. Masanil anima ol xiv yilan tas ol aj satjieli, man̈xa bꞌaqꞌuin̈ ol bꞌochajxoc, xa chi, xchi Jehová.