Lolonel albꞌilcan dꞌa yibꞌan̈ vin̈ sreyal Tiro
A Jehová Yajal tzꞌalan icha tic: Ach rey tzicꞌchaan̈ a bꞌa tzalani: A in tic dios in, ay vopisio dꞌa yibꞌan̈ aꞌ mar icha junoc dios, xa chi. Palta a ach tic anima ach, man̈ ach diosoc, vachꞌchom tza naꞌ to jelan ach icha junoc dios.
3 ¿Tocval ecꞌbꞌal a jelanil dꞌa yichan̈ vin̈aj Daniel? ¿Tocval malaj junoc tas cꞌubꞌeltac dꞌayach?
4 Yuj a jelanil yedꞌ aj pensaril, ix ach te och bꞌeyumal. Ix acꞌ bꞌudꞌjoc a caxa yedꞌ qꞌuen oro yedꞌ qꞌuen plata.
5 Yuj a jelanil dꞌa chon̈, ix qꞌuechaan̈ a bꞌeyumal. Yuj a bꞌeyumal chiꞌ te acꞌumtac ach aji.
6 Yuj chiꞌ a in Jehová Yajal in svalaꞌ: Yujto tza naꞌ to lajan a pensar yedꞌ junoc dios,
7 yuj chiꞌ ol vicꞌcot ebꞌ chꞌoc nacional dꞌayach, ebꞌ anima malaj jabꞌoc yoqꞌuelcꞌolal, ol yicꞌqꞌueta yespada ebꞌ dꞌayach. Ol satjoquel snivanil elcꞌochi yedꞌ masanil tastac te vachꞌ yilji ix icꞌ yedꞌ a jelanil chiꞌ.
8 Ato dꞌa yoltac xabꞌ olan ol ach bꞌatcanoc. Obꞌiltac ol aj a cham dꞌa sjulal yich aꞌ mar.
9 ¿Tocval ol to al dꞌa yichan̈ ebꞌ ol ach milancham chiꞌ to dios ach? A dꞌa yol scꞌabꞌ ebꞌ ol ach milancham chiꞌ, lajan ach icha junoc comon anima.
10 A in Jehová in sval juntzan̈ lolonel tic to dꞌa yol scꞌabꞌ ebꞌ chꞌoc nacional ol ach chamoc, icha tzꞌaj scham ebꞌ chuc, xchi Jehová, xa chi dꞌa vin̈ sreyal Tiro chiꞌ, xchi dꞌayin.
Bꞌit yuj schamel vin̈ sreyal Tiro
11 Ix yalanxi Jehová dꞌayin icha tic: 12 Ach anima, bꞌitej junoc bꞌit yic chamel yuj vin̈ sreyal Tiro, tzalan icha tic:
Icha val tic yalan Jehová Yajal: A achn̈ej te vachꞌ ix aj a bꞌoi, te jelan a pensar, te vachꞌ pax ilji.
13 A dꞌa Edén, dꞌa jun avbꞌen yic Dios, ataꞌ ach eqꞌui. Elvanubꞌ yaj qꞌuen qꞌueen man̈xo jantacoc svachꞌil yilji: Aton qꞌuen rubí, qꞌuen crisólito, qꞌuen jade, qꞌuen topacio, qꞌuen cornalina, qꞌuen jaspe, qꞌuen zafiro, qꞌuen granate yedꞌ qꞌuen esmeralda. A qꞌuen syamnubꞌal qꞌuen chiꞌ nabꞌa oro, bꞌobꞌil yic tzꞌoch yopisio uj dꞌa jun cꞌual ayic ix ach bꞌoi.
14 Ach querube, a in ix vacꞌ opisio och a tan̈vej jun tzalan to vic yaji, a in ach vacꞌqꞌue taꞌ. Dꞌa scaltac qꞌuen qꞌueen copopi yilji ix ach bꞌeyeqꞌui.
15 Te vachꞌ a bꞌeybꞌal yictax dꞌa jun cꞌual ix ach bꞌoi, masanto ix checlaj chucal dꞌayach.
16 Yujto ix te qꞌuibꞌxopax a chon̈, yuj chiꞌ ix acꞌ val chucal dꞌa ebꞌ anima, ix och a mul. Yuj chiꞌ ix ach in yumel dꞌa vichan̈, ix ach in pechanel dꞌa in tzalan. Ach querube tan̈vum ach, ix ach in pechel dꞌa scal qꞌuen qꞌueen copopi yilji.
17 A yuj svachꞌil ilji ix icꞌchaan̈ a bꞌa. A yuj svachꞌil ilji chiꞌ ix ixtaxel a jelanil. A in ix ach in yumem dꞌa sat luum, ix ach vacꞌanoch dꞌa chꞌoxnabꞌilal dꞌa yichan̈ ebꞌ rey.
18 Tzijtum a mul ix acꞌochi, ix ixtej mach schon̈vaji yedꞌ mach smanvaj dꞌayach. Ix ixtejbꞌat juntzan̈ templo, yuj chiꞌ ix vaqꞌuelta jun cꞌacꞌ dꞌayach, ix ach tzꞌabꞌati. Taan̈xon̈ej ix ach vutejcan dꞌa sat luum dꞌa yichan̈ mach tzach ilani.
19 Masanil nación ojtannac ach, ol te sat scꞌol ach yilani. Masanil anima ol xivoc ayic ol ach yilani. Man̈xa bꞌaqꞌuin̈ ol ach ajxoc ecꞌoc, xchi Jehová, xa chi dꞌa vin̈ sreyal Tiro chiꞌ, xchi dꞌayin.
A tas albꞌilcan dꞌa yibꞌan̈ chon̈abꞌ Sidón
20 Ix yalanxi Jehová dꞌayin icha tic: 21 Ach anima, ixic qꞌuelan dꞌa stojolal chon̈abꞌ Sidón, tzalanel in lolonel dꞌa spatic. 22 Tzalan icha tic:
A Dios Yajal tzꞌalan icha tic: A in svalaꞌ to ay in och ajcꞌolal dꞌa chon̈abꞌ Sidón. Ol laj in icꞌjocchaan̈ dꞌa scaltac nación yuj tas ol in cꞌulej dꞌay. Ayic ol vacꞌanoch syaelal chiꞌ, ol checlaj snivanil velcꞌoch dꞌa scal ebꞌ, ol ojtacajeloc to a inn̈ej Jehová Dios in.
23 Ol vacꞌcot ilya dꞌa yibꞌan̈, ol bꞌey chicꞌ dꞌa yoltac scalleal. Masanil ebꞌ cajan dꞌay ol chamoc. Yalxon̈ej bꞌaj ol cot qꞌuen espada ol xicancham ebꞌ. Icha val chiꞌ ol aj yojtacanel ebꞌ aj Sidón chiꞌ to a in ton Jehová in svutej icha chiꞌ.
24 A juntzan̈ nación dꞌa slacꞌanil Israel, icha yaj teꞌ qꞌuiix yaji. Syabꞌ syail Israel chiꞌ yuj bꞌaj schacjiel yuj juntzan̈ nación chiꞌ, palta a ticnaic man̈xa bꞌaqꞌuin̈ ol yabꞌ syail Israel chiꞌ, icha chiꞌ ol aj yojtacajeli to a inn̈ej Dios Yajal in, xchi Jehová, xa chi.
25 A in Dios Yajal in svalaꞌ: Ayic ol in molbꞌanxicot ebꞌ yin̈tilalcan Israel dꞌa scaltac nación bꞌaj sacleminac yajcanbꞌati, ol in chꞌoxel snivanil velcꞌoch dꞌa ebꞌ dꞌa yichan̈ juntzan̈ nación chiꞌ. A ebꞌ yin̈tilalcan Israel chiꞌ, ol cajnajxoc ebꞌ dꞌa lum smacbꞌen, aton lum vacꞌnaccan dꞌa vin̈ in checabꞌ aj Jacob. 26 Man̈xalaj tas ol icꞌan ebꞌ taꞌ, juncꞌolalxon̈ej ol aj scajnaj ebꞌ. Ol sbꞌoqꞌue spat ebꞌ, ol yavan yuva ebꞌ. A in ol vacꞌoch yaelal dꞌa yibꞌan̈ juntzan̈ nación ix ixtan ebꞌ. Icha chiꞌ ol aj yojtacanel ebꞌ to a in ton Jehová sDiosal in ebꞌ, xchi Jehová.