Ezequiel 29

A tas albꞌilcanel dꞌa yibꞌan̈ Egipto

Ayic slajchavil cꞌual, dꞌa slajun̈il uj yic slajun̈il abꞌil quicꞌjicot dꞌa Babilonia tic, ix lolon Jehová dꞌayin, ix yalan icha tic: 2 A ticnaic ach anima, ixic qꞌuelan dꞌa stojolal Egipto, tzalanel in lolonel dꞌa yibꞌan̈ yedꞌ dꞌa yibꞌan̈ vin̈ sreyal. 3 Icha tic tzꞌaj alani:

A Dios Yajal tzꞌalan icha tic: Ach sreyal Egipto, lajan ach icha junoc nocꞌ nocꞌ te nivan cutzanecꞌ dꞌa yol a aꞌ. Ix alaꞌ to ic aꞌ Nilo, a in ix in bꞌo aꞌ, xa chi. Palta a ticnaic ajcꞌol vajoch dꞌayach.

4 Ol vacꞌoch junoc gancho dꞌa yol a tiꞌ, axo nocꞌ chay ayecꞌ dꞌa a aꞌ bꞌaj ayach ecꞌ chiꞌ, ol och lotzjabꞌ nocꞌ dꞌa a tzꞌumal. A dꞌa yol a aꞌ bꞌaj ayach ecꞌ chiꞌ, ataꞌ ol ach vicꞌqꞌueta yedꞌ nocꞌ chay lotzlumbꞌa yajoch dꞌa a tzꞌumal chiꞌ.

5 Ol ach in yumcanbꞌat dꞌa taquin̈ luum yedꞌ nocꞌ chay ix qꞌueta edꞌoc dꞌa yol a aꞌ chiꞌ. Ol ach telvoc bꞌaj taquin̈ lum chiꞌ. Man̈xa mach ol ach sicꞌanqꞌue vaan, man̈xa pax mach ol ach mucanoc. Ol ach vacꞌ schibꞌat nocꞌ caltacteꞌal nocꞌ yedꞌ nocꞌ ostoc tzꞌecꞌ dꞌa satchaan̈.

6 Icha val chiꞌ ol aj yojtacanel masanil ebꞌ cajan dꞌa Egipto to a in ton Jehová in svutej icha chiꞌ. A chon̈abꞌ Israel ix scꞌan a colval, palta lajan ach dꞌay icha junoc teꞌ aj tzꞌoch cꞌocochoc.

7 Ichato ix ach syam icha teꞌ cꞌococh, palta ach pojbꞌati, ach bꞌat vecnaj dꞌa yol scꞌabꞌ, yuj chiꞌ ix lajvi scꞌabꞌ chiꞌ, ix telvi paxi. Icha chiꞌ ix utej a bꞌa dꞌa Israel chiꞌ.

8 Yuj chiꞌ a in Dios Yajal in svalaꞌ to ol ach miljoccham dꞌa qꞌuen espada. Axo ebꞌ anima cajan dꞌa Egipto chiꞌ, ol miljocpaxcham ebꞌ yedꞌ masanil nocꞌ nocꞌ. 9 Juneln̈ej ol can tzꞌinan Egipto chiꞌ. Icha val chiꞌ ol aj yojtacanel ebꞌ to a in Jehová in svutej icha chiꞌ. A ach tic ach rey ix alaꞌ: A aꞌ Nilo vic aꞌ, a in ix in bꞌo aꞌ, xa chi. 10 Yuj chiꞌ a in svalaꞌ to ajcꞌol in dꞌayach yedꞌ dꞌa a aꞌ bꞌaj ayach ecꞌ chiꞌ. Ol vacꞌcan tzꞌinan Egipto chiꞌ, ayxo smay ol ajcanoc, icha taquin̈ luum ol ajcanoc, ol schael dꞌa Migdol, ol ecꞌ dꞌa Asuán, masanto dꞌa smojonal Etiopía. 11 Man̈xa anima, man̈xa pax nocꞌ nocꞌ olto ecꞌ taꞌ. 40 abꞌil man̈xa mach ol cajnaj taꞌ. 12 Ol vacꞌcan tzꞌinan Egipto chiꞌ, icha ix vutejcan juntzan̈xo nación. 40 abꞌil ol laj can tzꞌinan juntzan̈ chon̈abꞌ dꞌa yol smacbꞌen. Yelxo te ecꞌbꞌal ol aj sjuchajbꞌat dꞌa yichan̈ juntzan̈xo chon̈abꞌ jubꞌilxobꞌati. Ol in saclemanbꞌat ebꞌ cajan taꞌ dꞌa scal juntzan̈xo nación.

13 A in Dios Yajal in svalaꞌ: Ayic toxo ix ecꞌbꞌat 40 abꞌil chiꞌ, ol in molbꞌanxicot ebꞌ aj Egipto dꞌa juntzan̈ nación bꞌaj sacleminac yajcanbꞌat ebꞌ chiꞌ. 14 A ebꞌ aj Egipto sacleminac yajcanbꞌat chiꞌ, ol cꞌochxoc ebꞌ dꞌa Patros, aton ay dꞌa sur yic Egipto, bꞌaj aljinac ebꞌ smam yicham ebꞌ. Ataꞌ ol cajnajxoc ebꞌ, palta man̈xalaj ol aj yelcꞌoch ebꞌ. 15 A jun nación chiꞌ, yelxo val emnaquil ol aj dꞌa yichan̈ masanil nación. Man̈xalaj bꞌaqꞌuin̈ ol yicꞌxichaan̈ sbꞌa dꞌa yibꞌan̈ juntzan̈xo nación. Yunexon̈ej ol ajcan vuuj, man̈xa bꞌaqꞌuin̈ ol acꞌchaj ganar juntzan̈xo nación yuuj. 16 Man̈xa bꞌaqꞌuin̈ ol yacꞌoch Egipto chiꞌ ebꞌ aj Israel yipoc scꞌool. A yuj tas ol javoc dꞌa yibꞌan̈ Egipto chiꞌ, ol nachajel yuj ebꞌ aj Israel to te chuc ix scꞌulej ebꞌ ayic ix scꞌanan scolval Egipto chiꞌ ebꞌ. Icha chiꞌ ol aj snachajel yuj ebꞌ to a in ton Jehová Yajal in, xchi Jehová, xa chi.

17 A dꞌa bꞌabꞌel cꞌu, dꞌa bꞌabꞌel uj, ayic 27 abꞌilxo quicꞌjicot dꞌa Babilonia tic, ix yalan Jehová dꞌayin icha tic: 18 Ach anima, a vin̈aj Nabucodonosor sreyal Babilonia tic, te nivan munlajel ix yacꞌoch vin̈ dꞌa yibꞌan̈ ebꞌ soldado yic syacꞌan oval ebꞌ dꞌa chon̈abꞌ Tiro. Ix cꞌajbꞌanel xil sjolom ebꞌ soldado chiꞌ, ix lajvi sjolom sjen̈jabꞌ ebꞌ yuj icatz, palta malaj tas ix yicꞌ vin̈ yedꞌ ebꞌ soldado dꞌa Tiro chiꞌ. 19 Yuj chiꞌ a in Jehová Yajal in svalaꞌ: A in ol vacꞌoch Egipto chiꞌ dꞌa yol scꞌabꞌ vin̈aj Nabucodonosor chiꞌ. Masanil sbꞌeyumal yedꞌ masanil tastac ay dꞌay ol yiqꞌuecꞌ vin̈. A dꞌa tas ol yiqꞌuecꞌ vin̈ chiꞌ, ataꞌ ol tupchaj ebꞌ soldado bꞌaj ix te munlaji. 20 A in Jehová Yajal in svalaꞌ, yuj bꞌaj ix te munlaj vin̈ yedꞌ ebꞌ soldado dꞌa Tiro chiꞌ, ol vacꞌoch Egipto chiꞌ dꞌa yol scꞌabꞌ vin̈, yujto a dꞌayin ix munlaj ebꞌ.

21 A dꞌa jun tiempoal chiꞌ, ol vacꞌ stecꞌanil chon̈abꞌ Israel. Ichato chiꞌ ach Ezequiel, ol yaln̈ej alanel in lolonel. Icha chiꞌ ol aj yojtacanel ebꞌ to a in ton Jehová sDiosal in ebꞌ, xchi Jehová dꞌayin.