A yaelal dꞌa yibꞌan̈ Egipto
Icha val tic yalan Jehová Yajal: Elocabꞌ eyav yuj jun cꞌual chiꞌ. 3 A scꞌual yoval scꞌol Jehová lacꞌanxo ay. A dꞌa jun cꞌual chiꞌ ol qꞌuicꞌbꞌoc qꞌuinal. Ataꞌ ol acꞌjoc syaelal juntzan̈ nación.
4 Ol javoc oval dꞌa Egipto. Axo Etiopía ol ibꞌxocqꞌue yuj xivelal. A dꞌa jun cꞌual chiꞌ, tzijtum ebꞌ aj Egipto chiꞌ ol miljocchamoc, ol icꞌjocbꞌat sbꞌeyumal ebꞌ. Ol macꞌjoquem vecnaj Egipto chiꞌ masanto dꞌa yipumal yich.
5 A ebꞌ aj Etiopía, ebꞌ aj Fut, ebꞌ aj Lud, ebꞌ aj Arabia yedꞌ ebꞌ aj Libia, junn̈ej ol aj smiljicham ebꞌ yedꞌ ebꞌ aj Egipto dꞌa jun oval chiꞌ. Ol champax ebꞌ ay dꞌa juntzan̈xo chon̈abꞌ ay strato yedꞌ Egipto chiꞌ.
6 A in Jehová in svalaꞌ: A juntzan̈ nación scolvaj yedꞌ Egipto chiꞌ, ol cham yedꞌoc dꞌa scal oval chiꞌ, ol schael yich dꞌa Migdol masanto dꞌa Asuán. Man̈xo ol yicꞌchaan̈ sbꞌa Egipto chiꞌ, palta to emnaquil ol ajcanoc.
7 A Egipto chiꞌ, ol vacꞌcan tzꞌinan icha ix ajcan juntzan̈xo nación. A juntzan̈ chon̈abꞌ ay dꞌa yol smacbꞌen, ol can tzꞌinan icha juntzan̈xo chon̈abꞌ. 8 Ayic ol vacꞌanoch scꞌacꞌal Egipto chiꞌ, ol satpaxel juntzan̈ nación scolvaj yedꞌoc. Icha chiꞌ ol aj yojtacajeli to a in ton Jehová in svutej icha chiꞌ.
9 Ayic ol cꞌoch yaelal dꞌa yibꞌan̈ Egipto chiꞌ, ol in checbꞌat checabꞌ dꞌa yibꞌan̈ aꞌ mar yic tzꞌalchaj yabꞌ ebꞌ anima malaj jabꞌoc tas sna dꞌa Etiopía, yic ol te xivchaan̈ ebꞌ. A jun cꞌual chiꞌ, vanxo sjavi.
10 A in Dios Yajal in svalaꞌ: A in ol in chec scꞌulej vin̈aj Nabucodonosor sreyal Babilonia, yic satel masanil sbꞌeyumal chon̈abꞌ Egipto chiꞌ vin̈. 11 A vin̈ rey chiꞌ, ol bꞌat vin̈ yedꞌ ebꞌ soldado, man̈xo ol ocꞌlaj scꞌol ebꞌ dꞌa Egipto chiꞌ. Ol satel jun nación chiꞌ vin̈ smasanil. A yedꞌ qꞌuen espada ol och ebꞌ soldado dꞌa Egipto chiꞌ. Ol majel jun chon̈abꞌ chiꞌ yuj snivanil ebꞌ chamnac. 12 Ol vacꞌanpax tup aꞌ Nilo. A dꞌa yol scꞌabꞌ ebꞌ anima te chuc, ataꞌ ol vacꞌoch jun nación chiꞌ. A in Jehová in svalaꞌ: Ol satcanel jun nación chiꞌ yuj ebꞌ chꞌoc chon̈abꞌil. Masanil tas ay dꞌay ol in cha satjoqueloc.
13 A in Dios Yajal in svalaꞌ: Ol vacꞌ satel juntzan̈ yechel comon dios, ol in satanpaxel masanil juntzan̈ comon dios ay dꞌa chon̈abꞌ Menfis. Man̈xa mach olto acꞌan yajalil dꞌa Egipto chiꞌ. Axon̈ej xivelal ol vacꞌoch dꞌa masanil anima dꞌa nación chiꞌ.
14 Ol in satel chon̈abꞌ Patros, ol vacꞌanoch scꞌacꞌal chon̈abꞌ Zoán, ol vacꞌanoch yaelal dꞌa yibꞌan̈ chon̈abꞌ Tebas.
15 Ol vacꞌvalbꞌat yoval in cꞌol dꞌa yibꞌan̈ chon̈abꞌ Sin, aton yipumal Egipto. Ol vacꞌpax satel jantac sbꞌeyumal Tebas chiꞌ. 16 Ol vacꞌoch scꞌacꞌal Egipto, axo ebꞌ aj Sin chiꞌ toxon̈ej ol ecꞌ quetcon ebꞌ yabꞌan syail. Ol cotac olchaj smuroal chon̈abꞌ Tebas chiꞌ. Axo chon̈abꞌ Menfis ol ochn̈ejcan yaelal dꞌa yibꞌan̈. 17 A ebꞌ quelemtac aj chon̈abꞌ Avén yedꞌ ebꞌ aj Pibeset, ol cham ebꞌ dꞌa scal oval. Axo jantacto ebꞌ cajan taꞌ, ol icꞌchajbꞌat ebꞌ dꞌa chꞌoc nacional. 18 Ayic ol vacꞌan satel snivanil yelcꞌoch Egipto chiꞌ, aton yipalil yedꞌ yicꞌojchan̈bꞌail, ol qꞌuicꞌbꞌoc yoc cꞌu dꞌa yibꞌan̈ chon̈abꞌ Tafnes, ol qꞌuicꞌbꞌoc qꞌuinal yuj asun dꞌa Egipto chiꞌ. Axo masanil ebꞌ cajan taꞌ, ol icꞌjoccanbꞌat ebꞌ dꞌa chꞌoc nacional yuj ebꞌ ajcꞌool. 19 A in val ol vacꞌoch yaelal dꞌa yibꞌan̈ Egipto chiꞌ. Icha val chiꞌ ol aj yojtacanel ebꞌ to a in ton Jehová in svutej icha chiꞌ, xchi Jehová.
20 Ayic yuquil cꞌual yoch bꞌabꞌel uj, ayic yuxluchilxo abꞌil quicꞌjicot dꞌa Babilonia tic, ix yalanxi Jehová dꞌayin icha tic: 21 Ach anima, ichato ix in macꞌqꞌuichaj scꞌabꞌ vin̈ sreyal Egipto. Malaj mach tzꞌan̈tani, malaj pax junoc mach stzecꞌani yic sbꞌoxi yic syal syamanxi qꞌuen yespada vin̈. 22 Yuj chiꞌ sval a in Jehová Yajal in tic: Ayinoch ajcꞌolal dꞌa vin̈ sreyal Egipto chiꞌ. Ol in macꞌqꞌuichaj junxo scꞌabꞌ vin̈ vachꞌto, yujto a junxo qꞌuichajnacxo, yuj chiꞌ ol yactejel qꞌuen yespada vin̈. 23 Ol in saclemejbꞌat ebꞌ aj Egipto chiꞌ dꞌa scal juntzan̈xo nación. Sacleminac ol ajcanbꞌat ebꞌ. 24 Ol vacꞌ val yip scꞌabꞌ vin̈ sreyal Babilonia chiꞌ. Ol vacꞌoch qꞌuen vespada dꞌa yol scꞌabꞌ vin̈. Palta ol in macꞌ qꞌuichaj scꞌabꞌ vin̈ sreyal Egipto chiꞌ schabꞌil. Ol el yav vin̈ scꞌacvi dꞌa yichan̈ vin̈ yajcꞌol chiꞌ, icha scꞌacvi junoc mach vanxo schami. 25 Ol vacꞌ yip scꞌabꞌ vin̈ sreyal Babilonia chiꞌ, ol vacꞌanoch qꞌuen vespada dꞌa yol scꞌabꞌ vin̈, a vin̈ ol och ajcꞌolal dꞌa Egipto chiꞌ, axo vin̈ sreyal Egipto chiꞌ ol viqꞌuel yip scꞌabꞌ vin̈, icha chiꞌ ol aj yojtacanel ebꞌ aj Egipto chiꞌ to a in Jehová in svutej icha chiꞌ. 26 Ol in saclemejbꞌat masanil ebꞌ aj Egipto dꞌa scaltac chon̈abꞌ yedꞌ dꞌa scaltac nación. Icha chiꞌ ol aj snachajel yuj ebꞌ to a in ton Jehová in svutej icha chiꞌ, xchi Jehová.