A vin̈ sreyal Egipto lajan vin̈ icha teꞌ cꞌuteꞌ
31
Ayic bꞌabꞌel cꞌu yic yoxil uj, ayic yuxluchil abꞌil quicꞌjicot dꞌa Babilonia tic, ataꞌ ix yal Jehová dꞌayin icha tic: 2 Ach anima, al dꞌa vin̈ sreyal Egipto yedꞌ dꞌa masanil ebꞌ anima ay dꞌa yol smacbꞌen Egipto chiꞌ icha tic:¿Mach val yedꞌ syal co lajbꞌan snivanil elcꞌochi?
3 Ol ach in lajbꞌej yedꞌ vin̈ sreyal Asiria: A vin̈ chiꞌ lajan ix aj vin̈ yedꞌ junoc teꞌ tzicap, ma icha junoc teꞌ cꞌuteꞌ ay dꞌa Líbano, a scꞌabꞌtac teꞌ, te vachꞌ yen̈ul dꞌa caltac teꞌ, chaan̈ steel teꞌ, tzato ecꞌbꞌat teꞌ dꞌa yibꞌan̈ juntzan̈xo te teꞌ te chaan̈ steel.
4 Te vachꞌ sqꞌuibꞌ teꞌ yuj n̈abꞌ yedꞌ yuj yal sat lum luum chiꞌ. Tzꞌel yoc a aꞌ dꞌa yich teꞌ. Icha chiꞌ tzꞌaj yoch yal juntzan̈xo te teꞌ ay taꞌ.
5 Yujto man̈ jantacoc a aꞌ, yuj chiꞌ te chaan̈ ix aj steel teꞌ dꞌa yichan̈ masanil te teꞌ ay dꞌa caltac teꞌ. Te nivan ix ajel mayan scꞌabꞌtac teꞌ.
6 Masanil macan̈il nocꞌ much ix sbꞌo soꞌ dꞌa scꞌabꞌtac teꞌ. Masanil nocꞌ nocꞌ ay dꞌa caltac teꞌ, a dꞌa yich teꞌ ix cajnaj nocꞌ, ataꞌ pax ix aj yuneꞌ nocꞌ. A dꞌa yalan̈ yen̈ul scꞌabꞌtac teꞌ chiꞌ, ix yal yajecꞌ tzijtumoc nación.
7 An̈ejaꞌ jun teꞌ chiꞌ man̈ jantacoc svachꞌil ix aj yilji teꞌ, te najat ix ajel scꞌabꞌ teꞌ, yujto ay jun nivan aꞌ tzꞌecꞌ dꞌa scal schꞌan̈al yibꞌ teꞌ.
8 Malaj junoc teꞌ cꞌuteꞌ dꞌa scal te yavbꞌen teꞌ Dios ix yal slajbꞌan sbꞌa yedꞌ teꞌ. Malaj junoc teꞌ taj lajan ix aj scꞌabꞌtac yedꞌ teꞌ. Malaj pax junoc teꞌ castaño lajan ix aj xil yedꞌ teꞌ. Malaj junoc te teꞌ dꞌa Edén yavbꞌen Dios ix yal slajbꞌan sbꞌa yedꞌ svachꞌil yilji teꞌ.
9 A Dios ix utan icha chiꞌ, yuj chiꞌ tzijtum ix aj scꞌabꞌtac teꞌ, te vachꞌ ix aj yilji teꞌ dꞌa yichan̈ juntzan̈xo te teꞌ dꞌa yavbꞌen Dios chiꞌ.
10 Yuj chiꞌ a in Jehová Yajal in sval icha tic: A jun te teꞌ chiꞌ, te chaan̈ ix aj steel teꞌ. Ix ecꞌbꞌat steel teꞌ chiꞌ dꞌa juntzan̈xo te teꞌ te chaan̈ steel, aton vin̈ sreyal Asiria schꞌoxcot te teꞌ tic, ix yicꞌ val chaan̈ sbꞌa vin̈. 11 Yuj chiꞌ a in ix vacꞌ satjoquel vin̈. Ix vacꞌoch vin̈ dꞌa yol scꞌabꞌ jun vin̈ yajal chꞌoc chon̈abꞌil, ix acꞌji syaelal vin̈ icha val jantac schucal. 12 A juntzan̈ ebꞌ chꞌoc chon̈abꞌil chiꞌ malaj yoqꞌuelcꞌolal ebꞌ, a ebꞌ ix chꞌacanel teꞌ, toxon̈ej ix can telan teꞌ. A scꞌabꞌtac teꞌ ix can̈chajbꞌati, yujto ix telvi teꞌ dꞌa scaltac te teꞌ dꞌa jolomtac vitz yedꞌ dꞌa chꞌolquixtac dꞌa yol nación chiꞌ. Masanil anima cajan dꞌa yen̈ul teꞌ ix bꞌat ebꞌ elelal, ix actajcan teꞌ.
13 Masanil macan̈il nocꞌ much, ix javi nocꞌ dꞌa scꞌabꞌtac teꞌ toxo ix telvi chiꞌ yedꞌ masanil nocꞌ caltacteꞌal nocꞌ, ix aj nocꞌ taꞌ. 14 Icha chiꞌ ix aji yic man̈xa junoc te teꞌ te chaan̈ ol aj steel. Vachꞌchom te ay a aꞌ tzꞌecꞌ dꞌa yich teꞌ, palta man̈xa junoc teꞌ ol ecꞌbꞌat dꞌa juntzan̈xo te teꞌ te chaan̈ steel, yujto masanil teꞌ ol chꞌacchajeloc. A jun tic syalelcꞌochi to masanil ebꞌ nivac yajal dꞌa yolyibꞌan̈qꞌuinal tic, ol cham ebꞌ icha tzꞌaj scham comon anima. Ichan̈ej chiꞌ ol aj sbꞌatcan ebꞌ dꞌa yedꞌtal ebꞌ chamnac.
15 A in Dios Yajal in svalaꞌ: Ayic ix em jun te teꞌ chiꞌ dꞌa yedꞌtal ebꞌ chamnac, ix vacꞌ tup a aꞌ ay dꞌa yol luum, ix in yamanoch vaan a aꞌ tzꞌel yoc. Yuj chiꞌ a jolom vitz Líbano, ix cusqꞌuei, axo masanil te teꞌ ix tacji teꞌ. 16 Ix vaqꞌuem teꞌ dꞌa yedꞌtal ebꞌ chamnac, ix cꞌochcan teꞌ yedꞌ juntzan̈ chamnacxo ayxo ecꞌ taꞌ. Ayic ix cꞌan̈ yem teꞌ chiꞌ, ix ibꞌxiqꞌue juntzan̈ nación. Yuj chiꞌ toxon̈ej ix te tzalaj te teꞌ ayn̈ejoch yal dꞌa yalan̈taxo, axo ticnaic ayxoecꞌ teꞌ bꞌaj sbꞌatcan ebꞌ chamnac, aton teꞌ ay dꞌa Edén yedꞌ pax teꞌ te vachꞌ ay dꞌa Líbano. 17 A mach ix ecꞌ cajan dꞌa yalan̈ yen̈ul teꞌ, aton juntzan̈ nación ayoch yedꞌoc, ajun pax ebꞌ ix cꞌoch yedꞌoc bꞌaj ayecꞌ ebꞌ chamnac yuj oval.
18 A ach tic ach sreyal Egipto, ¿mach junoc ebꞌ rey ecꞌnacxo tza nibꞌej tza lajbꞌej a bꞌa yedꞌoc? A ach tic te vachꞌ ilji, te nivan elcꞌochi, palta ol ach cꞌoch bꞌaj ay ebꞌ nivac yajal chamnacxo chiꞌ. Junn̈ej bꞌaj ol ach can yedꞌ ebꞌ ayecꞌ chiꞌ taꞌ. A syalelcꞌochi, aton ebꞌ anima chamnac yuj oval, ebꞌ malaj yelcꞌoch Dios dꞌay. Ach sreyal Egipto, aton jun tic ol javoc dꞌa ibꞌan̈ yedꞌ ebꞌ a soldado, xchi Jehová Yajal, xa chi, xchi dꞌayin.