Lajan vin̈ sreyal Egipto icha junoc nocꞌ nivaquil nocꞌ
32
A dꞌa bꞌabꞌel cꞌu, dꞌa slajchavil uj, ayic slajchavil abꞌil quicꞌjicot dꞌa Babilonia tic, ix yalanxi Jehová dꞌayin icha tic: 2 Ach anima, bꞌitej jun bꞌit yic chamel yuj vin̈ sreyal Egipto, tzalan icha tic:Ach rey, tza lajbꞌej a bꞌa yedꞌ junoc nocꞌ choj dꞌa scaltac nación, palta lajan ach icha junoc nocꞌ nivan nocꞌ ay dꞌa yol aꞌ mar. Tzach ecꞌ chucꞌuljoc dꞌa yol aꞌ, yuj chiꞌ statbꞌi aꞌ uuj.
3 Yuj chiꞌ a Jehová Yajal tzꞌalan icha tic: Ol in molbꞌej juntzan̈ nación, ol och ebꞌ ajcꞌolal dꞌayach, ichato ol ach in yam yedꞌ in chimpa. A dꞌa yol in chimpa chiꞌ ol ach canoc, axo ebꞌ chiꞌ ol ach icꞌanqꞌueta dꞌa stiꞌ aꞌ. 4 Ol ach in n̈erel dꞌa stiꞌ aꞌ, ol ach vacꞌanbꞌat pacꞌjabꞌ bꞌaj te chequel. Ol javoc nocꞌ ostoc yedꞌ nocꞌ caltacteꞌal nocꞌ dꞌayach, a nocꞌ ol ach chianbꞌatoc. 5 Ol vacꞌ bꞌudꞌjoquel jolomtac vitz yedꞌ chꞌolquixtac yuj a nivanil ol cꞌabꞌat chiꞌ. 6 Ol vacꞌ ucꞌ sat lum lum tic yuj a chiqꞌuil, masanto ol cꞌoch dꞌa yichtac lum vitz. A yedꞌ a chiqꞌuil chiꞌ ol bꞌudꞌjoc el a aꞌ. 7 Ayic ol ach vacꞌan sateloc, ol vacꞌ qꞌuicꞌbꞌoc satchaan̈, ol tup yoc qꞌuen cꞌanal, ol qꞌuicꞌbꞌoc yoc cꞌu. Ol tuppaxel yoc qꞌuen uj. 8 A in Dios Yajal in svalaꞌ, uuj ol vacꞌ tup masanil saquilqꞌuinal scopoljubꞌ yoc ay dꞌa satchaan̈. Ol vacꞌ qꞌuicꞌbꞌoc qꞌuinal dꞌa yibꞌan̈ masanil a chon̈abꞌ.
9 Ayic ol ach satel chiꞌ, ol cꞌoch yabꞌixal dꞌa juntzan̈xo nación to man̈ ojtacoc. Ol vacꞌ ibꞌxocqꞌue chon̈abꞌ yuj xivelal ayic ol yabꞌan yabꞌixal a yaelal chiꞌ ebꞌ. 10 Uj val ol vacꞌbꞌat yaelal dꞌa yibꞌan̈ tzijtumoc nación. Ol vacꞌ val xivqꞌue ebꞌ sreyal nación chiꞌ ayic ol vacꞌanecꞌ copnaj yoc vespada dꞌa yichan̈ ebꞌ. A val yic ol ach satel chiꞌ, ol te xiv ebꞌ yujto sna ebꞌ to ol champax ebꞌ.
11 A in Jehová Yajal in sval icha tic: A vin̈ sreyal Babilonia ol javoc dꞌayach yedꞌ qꞌuen yespada yic ol ul yacꞌ oval. 12 A ebꞌ a soldado man̈ jantacoc sbꞌisul chiꞌ, ol xicjoccham ebꞌ yuj yespada juntzan̈xo ebꞌ soldado malaj yoqꞌuelcꞌolal. Ol satjoquel masanil ebꞌ a soldado yuj ebꞌ yedꞌ pax masanil icꞌojchan̈bꞌail ol satjoquel yuj ebꞌ. 13 Ol in satel masanil nocꞌ a molbꞌetzal nocꞌ sva dꞌa stitac a aꞌ. Man̈xa bꞌaqꞌuin̈ ol tatbꞌoc aꞌ stecꞌan ebꞌ anima, ma nocꞌ nocꞌ chiꞌ. 14 A in val Jehová Yajal in svalaꞌ to icha chiꞌ ol aj syaxbꞌixi aꞌ, melelixon̈ej ol aj sbꞌey aꞌ. 15 Ayic ol vacꞌancan tzꞌinan Egipto chiꞌ, ol cham ebꞌ anima yedꞌ nocꞌ nocꞌ, cuseltacxon̈ej ol ajcanoc. Icha chiꞌ ol aj yojtacanel ebꞌ to a in ton Jehová in svutej icha chiꞌ.
16 A in Jehová Yajal in svalaꞌ to a jun bꞌit yic chamel tic ol sbꞌitej ebꞌ ix ix dꞌa junjun nación ayic ol ocꞌ ebꞌ ix yuj Egipto chiꞌ, yuj pax jantac sbꞌisul anima ol chamoc, xchi Jehová.
Ayoch Egipto dꞌa yol scꞌabꞌ chamel
17 Ayic 15 cꞌual yoch slajun̈il uj, dꞌa slajchavil abꞌil quicꞌjicot dꞌa Babilonia tic, ix yalanxi Jehová dꞌayin icha tic: 18 Ach anima, bꞌitej jun bꞌit yic chamel, yujto man̈ jantacoc ebꞌ soldado yic Egipto ol chamoc, tzalan icha tic:
A ebꞌ jelan, ol cham ebꞌ, ol emcan ebꞌ dꞌa yalan̈ lum luum tic. Ol emcꞌoch ebꞌ bꞌaj ayecꞌ juntzan̈xo ebꞌ ayxoecꞌ taꞌ.
19 Ach yajal, te vachꞌton ilji a naani, palta ol ach emcꞌoch telan dꞌa scal ebꞌ man̈ schon̈abꞌoc Dios, xa chi.
20 Ol cham ebꞌ aj Egipto chiꞌ, icha ajnac ebꞌ chamnac dꞌa oval. Ijanxooch qꞌuen espada dꞌa masanil ebꞌ anima chiꞌ. 21 A ebꞌ yajalil ebꞌ soldado nivac yelcꞌochi, ayxoecꞌ ebꞌ bꞌaj ayecꞌ ebꞌ chamnac, ol yalan ebꞌ yuj ebꞌ aj Egipto yedꞌ ebꞌ ayoch yedꞌ ebꞌ: E... a ebꞌ ix cham dꞌa scal oval, toxo ix emul ebꞌ dꞌa tic. Toxo ix ecꞌ jichan ebꞌ quedꞌoc a on̈ man̈ on̈ schon̈abꞌoc Dios tic, xcham ebꞌ.
22 Ataꞌ ayecꞌ vin̈ ecꞌnac sreyaloc Asiria yedꞌ masanil ebꞌ soldado, oyanoch ebꞌ dꞌa spatic vin̈ bꞌaj ayecꞌ ebꞌ chamnac chiꞌ, aton dꞌa oval chamnac ebꞌ smasanil. 23 Ato dꞌa sjulal yich jun xabꞌ olan chiꞌ ayecꞌ vin̈, oyanoch ebꞌ soldado dꞌa spatic vin̈. A ebꞌ soldado chiꞌ, yacꞌnacoch xivcꞌolal ebꞌ dꞌa scal ebꞌ anima dꞌa yolyibꞌan̈qꞌuinal tic, palta dꞌa scal oval chiꞌ chamnac ebꞌ smasanil. 24-25 Ataꞌ aypaxecꞌ vin̈ ecꞌnac sreyaloc Elam, ayecꞌ vin̈ dꞌa scal ebꞌ chamnac dꞌa scal oval. Axo dꞌa spatic yichan̈ vin̈ oyanoch ebꞌ soldado, ebꞌ man̈ schon̈abꞌoc Dios. Masanil ebꞌ chiꞌ, a dꞌa scal oval chamnac ebꞌ. Ayic pitzanto ebꞌ, te xivnac ebꞌ anima dꞌa yolyibꞌan̈qꞌuinal tic yuj ebꞌ, palta qꞌuixvelal ajnac scham ebꞌ dꞌa scal oval, ayxoecꞌ ebꞌ dꞌa scal ebꞌ chamnac ticnaic.
26 Ataꞌ ayecꞌ vin̈ ecꞌnac sreyaloc Mesec yedꞌ vin̈ ecꞌnac sreyaloc Tubal. A dꞌa spatictac ebꞌ vin̈, oyanoch masanil ebꞌ soldado ebꞌ vin̈. Vachꞌchom xivnac ebꞌ anima cajan dꞌa yolyibꞌan̈qꞌuinal tic dꞌa ebꞌ ayic pitzanto ebꞌ, palta chamnac ebꞌ man̈ schon̈abꞌoc Dios chiꞌ dꞌa scal oval. 27 Man̈ lajanoc ajnac smucji ebꞌ icha ajnac smucji ebꞌ soldado te jelan ecꞌnac dꞌa pecaꞌ. A ebꞌ chiꞌ mucbꞌil ebꞌ yedꞌ syamcꞌabꞌ yic oval. Aycanoch yespada ebꞌ dꞌa yalan̈ sjolom. Yuj schucal ebꞌ ayoch yaelal dꞌa yibꞌan̈ ebꞌ, yujto a juntzan̈ ebꞌ chiꞌ xibꞌtejnac ebꞌ anima ebꞌ dꞌa yolyibꞌan̈qꞌuinal tic.
28 Ach sreyal Egipto, ol ach satjoqueloc. Ol ach cꞌoch dꞌa scal ebꞌ man̈ schon̈abꞌoc Dios, ebꞌ milbꞌilcham dꞌa oval.
29 Ataꞌ ayecꞌ vin̈ ecꞌnac sreyaloc Edom yedꞌ pax ebꞌ yajal. Vachꞌchom te nivan ajnac yelcꞌoch ebꞌ, palta ataꞌ ayecꞌ ebꞌ dꞌa scal ebꞌ chamnac dꞌa oval. Ataꞌ ayecꞌ ebꞌ dꞌa scal ebꞌ man̈ schon̈abꞌoc Dios bꞌaj scꞌochcan ebꞌ chamnac.
30 Ataꞌ ayecꞌ masanil ebꞌ acꞌjinac yajalil dꞌa norte yedꞌ pax ebꞌ aj Sidón. Vachꞌchom te nivan ajnac yelcꞌoch ebꞌ, yacꞌnac val och xivcꞌolal ebꞌ dꞌa scal ebꞌ yetanimail, palta qꞌuixvelal ajnac scham ebꞌ. Emnacxocꞌoch ebꞌ dꞌa scal ebꞌ chamnac, aton ebꞌ chamnac dꞌa oval, ebꞌ man̈ schon̈abꞌoc Dios emnacxo bꞌaj scꞌochcan ebꞌ chamnac, xa chi.
31 A in Jehová Yajal in svalaꞌ to ayic ol yilan juntzan̈xo ebꞌ rey vin̈ sreyal Egipto yedꞌ masanil ebꞌ soldado, ol snivanan sbꞌa scꞌol vin̈ yuj schamel ebꞌ yetchon̈abꞌ, yujto ix cham vin̈ yedꞌ masanil ebꞌ soldado dꞌa oval. 32 A in ix vacꞌ yacꞌoch xivcꞌolal vin̈ sreyal Egipto chiꞌ dꞌa scal ebꞌ anima dꞌa yolyibꞌan̈qꞌuinal tic, palta a in Jehová Yajal in svalaꞌ to ol cꞌochcan vin̈ yedꞌ ebꞌ soldado vin̈ tzijtum sbꞌisul dꞌa scal ebꞌ man̈ in chon̈abꞌoc, aton ebꞌ chamnac dꞌa oval, xchi Jehová.