A scꞌabꞌ jun te teꞌ yedꞌ jun nocꞌ chꞌacbꞌa
17
Ix yalanxi Jehová dꞌayin icha tic: 2 Ach anima, al jun abꞌix tic dꞌa ebꞌ etisraelal dꞌa chꞌoxnabꞌilal. 3 Icha tic tzꞌaj alani:Icha tic yalan Jehová Cajalil: Ay val jun nocꞌ nivan chꞌacbꞌa ix cꞌoch dꞌa Líbano, a scꞌaxil nocꞌ te nivac, te najatto scꞌoch jen̈an, tzꞌibꞌibꞌi yilji xiil nocꞌ. A dꞌa scꞌabꞌ jun teꞌ cꞌuteꞌ ix cꞌoch nocꞌ.
4 Ix yicꞌanel schon teꞌ nocꞌ, ix bꞌat nocꞌ. Axo dꞌa jun chon̈abꞌ dꞌa smacbꞌen ebꞌ chon̈vajum ix cꞌoch nocꞌ yedꞌ teꞌ.
5 Ix lajvi chiꞌ ix yicꞌanqꞌue jun yin̈atil teꞌ nocꞌ, axo bꞌaj ay slumal ix yavejem teꞌ nocꞌ, bꞌaj sbꞌo munlajel dꞌa stitac a aꞌ icha tzꞌaj yavchaj teꞌ bꞌacmam.
6 Axo yic ix volan teꞌ, te nivaquil ix aj teꞌ, te tzijtum ix aj xiil teꞌ, pejann̈ej ix aj steel teꞌ. Ix sdꞌin̈bꞌejbꞌat sbꞌa scꞌabꞌtac teꞌ bꞌaj ayecꞌ nocꞌ nivan chꞌacbꞌa chiꞌ, ix bꞌeyn̈ejbꞌat schꞌan̈al yibꞌ teꞌ dꞌa yol luum. Man̈ jantacoc svol teꞌ yedꞌ scꞌabꞌtac ix qꞌuibꞌi.
7 Palta ay junxo nocꞌ nivan chꞌacbꞌa, te nivac scꞌaxiil, man̈xo jantacoc xiil. Ix bꞌat jun te teꞌ chiꞌ, ix bꞌeyn̈ejbꞌat schꞌan̈al yibꞌ teꞌ yedꞌ scꞌabꞌtac dꞌa stojolal junxo nocꞌ nivan chꞌacbꞌa chiꞌ, yic vachꞌ nivan a aꞌ syacꞌ nocꞌ dꞌa teꞌ.
8 Palta toton te vachꞌ lum bꞌaj avabꞌilem teꞌ chiꞌ. Te ayn̈ej a aꞌ chiꞌ, yuj chiꞌ syal sbꞌeyn̈ejbꞌat scꞌabꞌtac teꞌ, syacꞌanpax sat teꞌ dꞌa stiempoal, yic te vachꞌ tzꞌaj yilji teꞌ, xchi Jehová, xa chi.
9 Al dꞌa ebꞌ etchon̈abꞌ icha tic: Icha val tic yalan Jehová: A jun teꞌ chiꞌ, man̈ ol te qꞌuibꞌlaj teꞌ. A nocꞌ nivan chꞌacbꞌa dꞌa sbꞌabꞌelal, a nocꞌ ol tocꞌanqꞌueta schꞌan̈al yibꞌ teꞌ, icha val chiꞌ ol aj scꞌael bꞌulnaj sat teꞌ yedꞌ xiil. Ol tacjoc pax juntzan̈ svol teꞌ toto ix qꞌueuli. Man̈ yovaliloc yedꞌ nivac ip, ma yedꞌ tzijtumoc anima ol tocꞌanqꞌueta teꞌ dꞌa yol luum yic stacji.
10 Vachꞌchom ol qꞌuexchaj bꞌaj tzꞌavchaj teꞌ, palta man̈xo ol qꞌueulaj svol teꞌ. Ayic ol ecꞌ icꞌ scot dꞌa stojolal bꞌaj sjavi cꞌu dꞌa teꞌ, ol tacjoc teꞌ. Ol tacjoc teꞌ bꞌaj avabꞌil chiꞌ, xchi Jehová, xa chi, xchi dꞌayin.
11 Ix yalanxi Jehová dꞌayin icha tic: 12 Cꞌanbꞌej dꞌa juntzan̈ anima te pit tic, tato snachajel jun abꞌix tic yuj ebꞌ. Tzalan dꞌa ebꞌ icha tic: A nocꞌ bꞌabꞌel nivan chꞌacbꞌa chiꞌ, aton vin̈ sreyal Babilonia schꞌoxoꞌ. A vin̈ ix cꞌoch dꞌa Jerusalén, ix bꞌat yicꞌancot ebꞌ yajal yedꞌ vin̈ sreyal Judá vin̈ preso dꞌa Babilonia tic. 13 Ix lajvi chiꞌ, axo jun vin̈ yin̈tilal ebꞌ rey ix yacꞌoch vin̈ reyal dꞌa Judá. A vin̈ sreyal Babilonia chiꞌ ix acꞌan pural vin̈ yacꞌan stiꞌ to cꞌanabꞌajum ol yutej sbꞌa vin̈ dꞌa vin̈. Ix yicꞌancot ebꞌ nivac vinac yaj dꞌa Jerusalén chiꞌ vin̈ preso 14 yic man̈xalaj tzꞌaj yelcꞌoch smacbꞌen Judá chiꞌ, yic maxtzac yal yicꞌanqꞌue vaan sbꞌa, vachꞌn̈ej yajeqꞌui yacbꞌan scꞌanabꞌajej jun stiꞌ ix yacꞌ chiꞌ. 15 Palta a vin̈ rey chiꞌ te pit ix yutej sbꞌa vin̈ dꞌa vin̈ sreyal Babilonia tic. Ix yacꞌbꞌat schecabꞌ vin̈ dꞌa vin̈ sreyal Egipto* yic scꞌanancot nocꞌ chej vin̈ yedꞌ jantacoc soldado. ¿Tzam e naꞌ to ol yal scolanel sbꞌa vin̈ yedꞌ jun spensar chiꞌ? ¿Tom ol yal scolanel sbꞌa junoc mach max cꞌanabꞌajan junoc strato? 16 A in Jehová Yajal in svacꞌ in tiꞌ: A dꞌa Babilonia tic ol cham vin̈ sreyal Judá chiꞌ, yujto malaj yelcꞌoch bꞌaj ix yacꞌ stiꞌ vin̈, maj scꞌanabꞌajej strato vin̈ ix sbꞌo yedꞌ vin̈ rey ix acꞌan yopisio. 17 A vin̈ sreyal Egipto chiꞌ, vachꞌchom te tzijtum soldado vin̈ te tecꞌan, palta man̈ ol yal-laj scolvaj vin̈ dꞌa oval ayic ol sbꞌoanqꞌue stecꞌnubꞌ ebꞌ soldado aj Babilonia yedꞌ muro dꞌa spatictac chon̈abꞌ Jerusalén yic smilancham anima. 18 Maj scꞌanabꞌajej bꞌaj ix yacꞌ stiꞌ vin̈ sreyal Judá chiꞌ, maj elcꞌoch tas syal strato vin̈ ix sbꞌo chiꞌ, yuj chiꞌ man̈ ol yal-laj scolan sbꞌa vin̈.
19 A in Jehová Yajal in svacꞌ in tiꞌ: Maj scꞌanabꞌajej vin̈ rey bꞌaj ix yacꞌ stiꞌ dꞌa vichan̈, aton jun trato ix yacꞌ vin̈ bꞌaj ix in yacꞌ bꞌinajoc, yuj chiꞌ ol vacꞌoch yaelal dꞌa yibꞌan̈ vin̈. 20 Ichato ol vacꞌbꞌat junoc chꞌan̈ yaal dꞌa yibꞌan̈ vin̈, ol can vin̈ dꞌa yol chꞌan̈, ol vacꞌ icꞌjoccot vin̈ dꞌa Babilonia tic. Ol vacꞌoch yaelal dꞌa yibꞌan̈ vin̈, yujto te pit ix yutej sbꞌa vin̈ dꞌayin. 21 A ebꞌ soldado vin̈ te jelan, ol cham ebꞌ dꞌa oval, axo ebꞌ olto canoc, ol saclemcanbꞌat ebꞌ. Icha chiꞌ ol aj snachajel eyuuj to a in ton Jehová in ix val jun tic.
22-23 A in Jehová Yajal in svalaꞌ: A in ol viqꞌuel schon teꞌ cꞌuteꞌ chiꞌ. A junoc yuninal schon teꞌ ol viqꞌueli, ol vavanem dꞌa junoc jolom vitz te chaan̈ yajqꞌue dꞌa Israel. Ol qꞌuibꞌqꞌue scꞌabꞌtac teꞌ, nivan cꞌuteꞌ ol aj teꞌ, te vachꞌ pax ol aj teꞌ. A dꞌa yich teꞌ chiꞌ, ol cajnaj masanil macan̈il nocꞌ nocꞌ, axo dꞌa scꞌabꞌtac teꞌ ol sbꞌo soꞌ masanil macan̈il nocꞌ much. 24 Icha chiꞌ ol aj yojtacanel masanil te teꞌ to a in ton Jehová in syal in chꞌacanel teꞌ nivac teꞌ syicꞌchaan̈ sbꞌa, syal vacꞌan qꞌuibꞌ teꞌ cotac steel. A in svacꞌ tacjoc te teꞌ te yaax, svacꞌan pax yaxbꞌoc teꞌ taquin̈. A in Jehová in svalaꞌ, ol vacꞌpaxelcꞌochoc, xchi Jehová, xa chi dꞌa ebꞌ, xchi dꞌayin.*