8 Ix in ecꞌxi junelxo dꞌa slacꞌanil ix chiꞌ, ix vilani to smojxo yoch yetbꞌeyum ix. Yuj chiꞌ ix vacꞌbꞌat jun cꞌapac dꞌa yibꞌan̈ ix. Icha val chiꞌ ix aj in pichan ix, yujto bꞌerann̈ejel ix. A in Jehová in svalaꞌ to ix vacꞌ in trato yedꞌ ix yic tzꞌochcan ix dꞌa yol in cꞌabꞌ. 9 Ix in bꞌiquel schiqꞌuil ix, ix in sacbꞌitej ix, ix vacꞌanoch perfume dꞌa ix. 10 Ix vacꞌanoch jun pichul te vachꞌ yilji stzꞌibꞌul dꞌa ix. Ix vacꞌanoch xan̈abꞌ tzꞌuum te vachꞌ dꞌa ix yedꞌ pax jun tzecꞌul nabꞌa lino yedꞌ pax jun spichul ix te vachꞌ yaj sjalchaji. 11 Te vachꞌ ix aj vacꞌanoch yelvanubꞌ dꞌa ix. Ix vacꞌoch qꞌuen brazalete dꞌa sjaj scꞌabꞌ ix yedꞌ pax jun ton̈ dꞌa sjaj ix. 12 Ix vacꞌanpaxoch jun qꞌuen icha colcꞌabꞌ dꞌa sn̈iꞌ ix yedꞌ yuchiquin ix yedꞌ pax jun corona te vachꞌ yilji dꞌa sjolom ix. 13 Pichichi ix ajcan ix yedꞌ qꞌuen oro yedꞌ pax qꞌuen plata. A spichul ix chiꞌ, aton cꞌapac lino te vachꞌ, aton juntzan̈ cꞌapac te vachꞌ yaj sjalchaji yedꞌ cꞌapac te vachꞌ yilji stzꞌibꞌul. Ix vacꞌan ixim pan te vachꞌ dꞌa ix yic sva ix yedꞌ yal chabꞌ yedꞌ pax yaceiteal sat teꞌ olivo. Te vachꞌxon̈ej ix aj yilji ix, yuj chiꞌ ix och ix reinail. 14 Te bꞌinajnac ix aj ix dꞌa caltac nación yuj svachꞌil yilji chiꞌ. A in Jehová in svalaꞌ to tzꞌacaqui ix aj in bꞌoanel ix yedꞌ yelvanubꞌ.

15 Yujto te bꞌinajnac ix aj ix, ix yacꞌanoch spensar ix dꞌa svachꞌil yilji chiꞌ, axo dꞌa ajmulal ix bꞌatcan ix, ix yacꞌan sbꞌa ix dꞌa yaln̈ej mach tzꞌecꞌ taꞌ. 16 A yedꞌ spichul ix ix sbꞌoqꞌue smantiado bꞌaj tzꞌoch ejmelal dꞌa comon dios dꞌa tzalquixtac, ataꞌ ix em ix ajmulal. A juntzan̈ tas ix scꞌulej ix chiꞌ, man̈ smojoc ix scꞌulej ix. 17 Ix yicꞌanel masanil qꞌuen qꞌuen ix te vachꞌ yilji, qꞌuen oro yedꞌ qꞌuen plata vacꞌnac dꞌa ix. A yedꞌ qꞌueen ix sbꞌoqꞌue yechel vinac ix yic tzꞌoch ix ajmulal yedꞌoc. 18 A spichul ix te vachꞌ yilji chiꞌ yedꞌ aceite yedꞌ incienso ix vacꞌ dꞌa ix, ix yacꞌ ix dꞌa juntzan̈ comon dios chiꞌ. 19 A ixim pan bꞌobꞌil dꞌa ixim harina te vachꞌ, aceite yedꞌ nocꞌ yal chabꞌ ix vacꞌ svaeloc ix, ix yacꞌ ix silabꞌil te vachꞌ sjabꞌ dꞌa juntzan̈ yechel, aton juntzan̈ te vachꞌ sjabꞌ. Aton val juntzan̈ chiꞌ scꞌulej ix dꞌa vichan̈ a in Jehová in tic.

20 An̈ejtonaꞌ a ebꞌ vuninal yedꞌ ebꞌ visil ix vil sat yedꞌ ix, ix sn̈ustzꞌa ix silabꞌil dꞌa juntzan̈ comon dios chiꞌ, icha vael ix aj ebꞌ unin chiꞌ dꞌa juntzan̈ yechel chiꞌ. Man̈ ton̈ejoc ix em ix dꞌa ajmulal chiꞌ, 21 palta ix yicꞌbꞌat ebꞌ vuninal ix, ix n̈usantzꞌa ebꞌ ix silabꞌil dꞌa juntzan̈ yechel chiꞌ. 22 Dꞌa scal juntzan̈ smul ix te yajbꞌentac scꞌulej chiꞌ, majxo snacot ix tas ix aj scotoch dꞌa uninal, majxo snacot ix tato bꞌeranel ix ayic aytoecꞌ ix dꞌa scal schiqꞌuil. A jun ix ix chiꞌ, aton Jerusalén schꞌoxoꞌ.

23 A in val Jehová Yajal in svalaꞌ: Obꞌiltac chon̈abꞌ Jerusalén chiꞌ yuj juntzan̈ chucal scꞌulej. 24 Yaln̈ej bꞌaj tzalquixtac, ataꞌ ix sbꞌoqꞌue bꞌaj tzꞌem ajmulal. 25 A bꞌaj slajvicancꞌoch junjun calle ix sbꞌoqꞌue juntzan̈ bꞌaj tzꞌem ajmulal chiꞌ. A svachꞌil yilji, yajbꞌentac ix ajcani. Ix yacꞌbꞌat sbꞌa dꞌa yalxon̈ej mach tzꞌecꞌ taꞌ. 26 Ix yacꞌanbꞌat sbꞌa dꞌa jun chon̈abꞌ ay dꞌa slacꞌanil, aton Egipto te pecꞌ dꞌa ajmulal. Yuj chiꞌ ix stzuntzejcot yoval in cꞌool yuj sqꞌuechaan̈ dꞌa ajmulal chiꞌ.

27 Yuj chiꞌ ay in och ajcꞌolal dꞌay, ix vacꞌanoch yaelal dꞌa yibꞌan̈. Ix vicꞌanemta svael, ix vacꞌanpaxoch dꞌa yol scꞌabꞌ ebꞌ ajcꞌool, aton ebꞌ filisteo. A ebꞌ chiꞌ ix sat scꞌol ebꞌ yilan sbꞌeybꞌal Jerusalén te qꞌuixveltac scꞌulej chiꞌ. 28 Palta ix yacꞌpaxbꞌat sbꞌa dꞌa Asiria. Palta max cꞌoch scꞌool. 29 Ix yacꞌanpaxbꞌat sbꞌa dꞌa Babilonia, aton schon̈abꞌ ebꞌ chon̈vajum, palta man̈ yujoc chiꞌ ix cꞌoch scꞌool. 30 A in val Jehová in svalaꞌ: A Jerusalén te pecꞌ dꞌa ajmulal chiꞌ, lajan val ix yutej sbꞌa icha junoc ix ajmul ix maxtzac qꞌuixvi yuj tas syutej sbꞌa. 31 Ix sbꞌoqꞌue juntzan̈ bꞌaj tzꞌem ajmulal dꞌa bꞌajtac slajvicꞌoch calle yedꞌ bꞌajtac smolbꞌej sbꞌa anima, ix yacꞌanbꞌat sbꞌa dꞌa ajmulal chiꞌ. Palta nabꞌan̈ej syacꞌbꞌat sbꞌa, man̈ lajanoc syutej sbꞌa icha ebꞌ ix ajmul ix scꞌan stojol.

32 Icha juntzan̈ ix te chuc syutej sbꞌa dꞌa yetbꞌeyum, syacꞌbꞌat sbꞌa dꞌa junocxo chꞌoc vinaquil, icha chiꞌ ix yutej sbꞌa Jerusalén chiꞌ. 33 A ebꞌ ix ajmul ix stupchaj ebꞌ ix, axo pax Jerusalén chiꞌ, aꞌ ix acꞌan silabꞌ dꞌa ebꞌ bꞌaj syaltej sbꞌa chiꞌ. A ix tupan ebꞌ yic yaln̈ej bꞌaj scot ebꞌ scꞌulan ajmulal chiꞌ yedꞌoc. 34 Yuj chiꞌ chꞌoc yel Jerusalén chiꞌ dꞌa yichan̈ juntzan̈xo ebꞌ ix ajmul ix. Malaj mach sayaneqꞌui yic smulan yedꞌoc, max tupchajpaxi, palta to a stupan ebꞌ scꞌulan ajmulal chiꞌ yedꞌoc, yuj chiꞌ chꞌoc yel dꞌa yichan̈ ebꞌ ix ajmul ix chiꞌ.

35 Yuj chiꞌ, abꞌec val tas sval yuj ix ajmul ix chiꞌ: 36 A in Jehová Yajal in svalaꞌ: Malaj sqꞌuixvelal, ix squichanel bꞌeran sbꞌa yic scꞌulan ajmulal yedꞌ ebꞌ xajanej sbꞌa yedꞌoc, ix em cuman dꞌa juntzan̈ comon dios yajbꞌentac. Ix stobꞌanem schiqꞌuil ebꞌ yuneꞌ yic syacꞌan silabꞌil. 37 Yuj chiꞌ ol in molbꞌej masanil juntzan̈ ebꞌ xajanabꞌil chiꞌ yuuj, aton ebꞌ ix yacꞌ sgana yedꞌoc, juntzan̈ ebꞌ xajan yuuj yedꞌ juntzan̈ ebꞌ ix schaqueli. Ol in molbꞌejoch oyan ebꞌ dꞌa spatic, val dꞌa yichan̈ ebꞌ ol in quichel bꞌeran yic vachꞌ ol yil ebꞌ to bꞌeraneli. 38 Ol vacꞌ syaelal dꞌa smojal, icha tzꞌutaj junoc ix ajmul ix yedꞌ pax junoc ix macꞌumcham anima. Yedꞌ val yoval in cꞌool yedꞌ in chichoncꞌolal ol vacꞌoch dꞌa yol scꞌabꞌ chamel. 39 Ol vacꞌoch Jerusalén chiꞌ dꞌa yol scꞌabꞌ juntzan̈ nación chiꞌ yic ol satel juntzan̈ tzalquixtac ebꞌ bꞌaj ix em ajmulal yedꞌ bꞌaj ix och ejmelal dꞌa juntzan̈ comon dios chiꞌ. Ol yiqꞌuel spichul ebꞌ yedꞌ juntzan̈ yelvanubꞌ ayoch dꞌay, toxon̈ej ol can bꞌeran. 40 Man̈xo bꞌischajbꞌenoc anima ol qꞌue vaan dꞌa spatic Jerusalén chiꞌ, ol sjulqꞌuenancham ebꞌ, ol smilancham ebꞌ yedꞌ qꞌuen espada. 41 Ol yacꞌoch scꞌacꞌal chon̈abꞌ chiꞌ ebꞌ, dꞌa yichan̈ juntzan̈xo nación ol javoc yaelal dꞌa yibꞌan̈. Icha chiꞌ ol aj vacꞌan lajvoc yajmulal chiꞌ, man̈xa bꞌaqꞌuin̈ ol stup ebꞌ bꞌaj ay sgana chiꞌ. 42 Icha chiꞌ ol aj sicbꞌi yoval in cꞌol dꞌa yibꞌan̈, man̈xo ol chichon in cꞌol dꞌay. Man̈xo ol cot yoval in cꞌol dꞌay. 43 Ix bꞌat satcꞌolal yuuj chajtil yaji ayic uninto, yuj chiꞌ ix stzuntzej val cot yoval in cꞌool yuj sbꞌeybꞌal te yajbꞌentac chiꞌ. Yuj chiꞌ a in val Jehová in svalaꞌ to ol vacꞌoch yaelal dꞌa yibꞌan̈ yuj sbꞌeybꞌal chiꞌ.

44 Masanil ebꞌ anima ol alan jun lolonel tic dꞌa spatic Jerusalén chiꞌ. Ol yalan ebꞌ: Icha val ix nunabꞌil, icha pax chiꞌ ix uneabꞌil, xcham ebꞌ. 45 A Jerusalén chiꞌ, lajan icha junoc ix yuneꞌ junoc ix ix schacanel vin̈ yetbꞌeyum yedꞌ ebꞌ yuneꞌ. Icha pax chiꞌ ebꞌ ix snulej, schacpaxel ebꞌ vin̈ yetbꞌeyum ebꞌ ix yedꞌ ebꞌ yuneꞌ ebꞌ ix, yujto a ix snun ebꞌ ix chiꞌ, hitita ton ix, axo smam ebꞌ ix, amorreo vin̈. 46 A dꞌa stojolal norte, ataꞌ ay ix snulej ix bꞌabꞌel ix, aton Samaria yedꞌ yaldeail. Axo dꞌa stojolal sur, ataꞌ ay ix snulej ix tzacꞌan, aton Sodoma yedꞌ yaldeail. 47 Man̈ocn̈ej sbꞌeybꞌal juntzan̈ chon̈abꞌ chiꞌ ix sbꞌeybꞌalej Jerusalén chiꞌ, man̈ocn̈ej pax juntzan̈ tas yajbꞌentac ix scꞌulej juntzan̈ chon̈abꞌ chiꞌ ix scꞌulej, palta ecꞌbꞌal tas te yajbꞌentac ix scꞌulej, yujto man̈ cꞌocbꞌiloc juntzan̈ chiꞌ ix yabꞌi. 48 A in Jehová Yajal in svalaꞌ: A Sodoma yedꞌ yaldeail, man̈ scꞌulejnacoc tas te chuc icha val tas scꞌulej Jerusalén chiꞌ yedꞌ yaldeail. 49 Aton val juntzan̈ smul Sodoma chiꞌ yedꞌ masanil yaldeail: Yicꞌnac val chaan̈ sbꞌa, man̈xo jantacoc tas yabꞌlejnac, vachꞌn̈ej yaji, palta maj colvajlaj dꞌa ebꞌ mebꞌaꞌ, maj colvajpax dꞌa ebꞌ ay stzapan majan. 50 A snaani to an̈ej te nivan yelcꞌochi, ochnacpax ijan sbꞌeybꞌalan juntzan̈ tas tzin yajaꞌ, yuj chiꞌ in satnaqueli, icha val tzꞌaj eyilanoch ticnaic. 51 Axo pax Samaria yedꞌ yaldeail, ix scꞌulej chucal, palta max tzacꞌvan dꞌa tas te chuc scꞌulej Jerusalén chiꞌ. Man̈ jantacoc tas yelxo val te yajbꞌentac scꞌulej Jerusalén chiꞌ. A juntzan̈xo chon̈abꞌ dꞌa slacꞌanil, vachꞌtacto val tas scꞌulej. 52 A ticnaic, a Jerusalén chiꞌ yovalil ol yacꞌ techaj qꞌuixvelal, yujto a schucalil yelxo te chuc dꞌa yichan̈ yic Sodoma yedꞌ dꞌa yichan̈ yic Samaria. A chabꞌ chon̈abꞌ chiꞌ, ayic sco lajbꞌan schucal yedꞌ yic Jerusalén, vachꞌtacto val.

53 A Sodoma yedꞌ yaldeail vachꞌ ol ajxoc vuuj. A Samaria yedꞌ yaldeail vachꞌ ol aj paxoc. Icha pax chiꞌ Jerusalén vachꞌ ol ajxoc vuuj. 54 Palta a Jerusalén chiꞌ yovalil ol yacꞌ techaj emnaquilal yedꞌ qꞌuixvelal yuj tas te chuc ix scꞌulej. A Sodoma yedꞌ Samaria ol snivanej sbꞌa scꞌool ayic ol yilani to ix vacꞌ syaelal Jerusalén chiꞌ. 55 Ayic ol vacꞌan ajxoc Sodoma yedꞌ yaldeail, Samaria yedꞌ yaldeail icha yaj dꞌa yalan̈taxo, ol vacꞌpax ajxoc Jerusalén yedꞌ yaldeail icha dꞌa yalan̈taxo. 56-57 Ayic ix yicꞌanchaan̈ sbꞌa Jerusalén, aton yic manto ilchajelta schucalil, ix bꞌuchvaj dꞌa Sodoma. Palta a ticnaic, a Edom, Filistea yedꞌ masanil nación, ol bꞌuchvaj dꞌa Jerusalén chiꞌ. Masanil anima dꞌa yolyibꞌan̈qꞌuinal tic ol paticaneloc. 58 A ticnaic, a in Jehová in svalaꞌ to a Jerusalén chiꞌ yovalil ol yabꞌ syail yuj sbꞌeybꞌal te yajbꞌentac.

59 A in Jehová Yajal in svalaꞌ: Ol vacꞌ spac icha val smojalil dꞌa Jerusalén chiꞌ, yujto maj scꞌanabꞌajej scꞌulan icha ix aj yacꞌan strato vedꞌoc. 60 Palta a in tic, ol in nacot in trato vacꞌnac yedꞌoc ayic uninto, ol in bꞌoanxi in trato chiꞌ yedꞌoc, malaj bꞌaqꞌuin̈ ol lajvoc. 61 A Jerusalén chiꞌ, ol snacot schuc bꞌeybꞌal, ol qꞌuixvocpaxi ayic ol vacꞌanoch chavan̈ snulej chiꞌ dꞌa yol smacbꞌen, aton Samaria yedꞌ Sodoma. Ichato nunabꞌil ol ajcan dꞌa chabꞌ chon̈abꞌ chiꞌ. Vachꞌchom malaj yalan yic chabꞌ chon̈abꞌ chiꞌ dꞌa in trato in bꞌonac yedꞌ Jerusalén chiꞌ, 62 palta yuj in trato ol in bꞌoxi yedꞌ Jerusalén chiꞌ icha chiꞌ ol ajoc. Icha val chiꞌ ol aj snachajel yuj Jerusalén to a inton Jehová sDiosal in. 63 Ol vacꞌ nivancꞌolal masanil tas ix scꞌulej Jerusalén chiꞌ, palta yovalil ol snacot juntzan̈ sbꞌeybꞌal chiꞌ, ol qꞌuixvoc yuuj, yuj chiꞌ man̈xa bꞌaqꞌuin̈ ol yicꞌchaan̈ sbꞌa, a in Jehová in svalaꞌ, xchi Jehová, xa chi dꞌa ebꞌ, xchi dꞌayin.