A tas albꞌilcan dꞌa yibꞌan̈ ebꞌ stan̈vumal chon̈abꞌ Israel
34
Ix yalanxi Jehová dꞌayin icha tic: 2 Ach anima, al dꞌa ebꞌ stan̈vumal chon̈abꞌ Israel to a in Dios Yajal in sval dꞌa ebꞌ icha tic: Ay, ex stan̈vumal Israel, obꞌiltac ex, a exn̈ej tze tan̈vej e bꞌa. Man̈oc ebꞌ in chon̈abꞌ tze tan̈vej icha smojal. 3 A ex tic lajan ex icha ebꞌ tan̈vum calnel chuc. An̈ej yal yim nocꞌ snibꞌej ebꞌ syuqꞌuej, sbꞌoan spichul ebꞌ yedꞌ xil nocꞌ, smilancham nocꞌ te bꞌaqꞌuech ebꞌ schia, palta max stan̈vej nocꞌ ebꞌ dꞌa smojalil. 4 Max syaꞌilej nocꞌ malaj yip ebꞌ, max yil-laj nocꞌ ay syabꞌil ebꞌ, max yan̈tej nocꞌ lajvinac ebꞌ yedꞌ nocꞌ qꞌuiich. Max smolbꞌej nocꞌ saclembꞌat ebꞌ, max say nocꞌ satbꞌat ebꞌ. Max yal scꞌol ebꞌ stan̈vej nocꞌ, an̈ej to smacꞌ nocꞌ ebꞌ. 5 A nocꞌ calnel chiꞌ ton̈ej satecꞌ nocꞌ yujto malaj stan̈vumal nocꞌ, yuj chiꞌ axo nocꞌ chium nocꞌ schianbꞌat nocꞌ. 6 Ton̈ej spuccanbꞌat nocꞌ elelal dꞌa jolomtac vitz yedꞌ dꞌa tzalquixtac. Saclemcanbꞌat nocꞌ dꞌa sat lum luum tic. Man̈xalaj mach tzꞌoch ilcꞌolal bꞌat sayanecꞌ nocꞌ, ma scꞌanbꞌan nocꞌ. Icha chiꞌ tzeyutej ebꞌ in chon̈abꞌ tic.7 Yuj chiꞌ ex stan̈vumal in chon̈abꞌ, scham val eyabꞌan tas svalaꞌ. 8 A in Dios Yajal in sval icha tic: A in chon̈abꞌ tic, eyuuj lajan ix aj ebꞌ icha nocꞌ calnel malaj stan̈vumal tzꞌelcꞌajbꞌati, schijibꞌat nocꞌ yuj nocꞌ chium nocꞌ, a exxo tze tzꞌac eyil in chon̈abꞌ tic, max e tan̈vej ebꞌ, a exn̈ej tze tan̈vej e bꞌa. 9 Yuj chiꞌ, ex stan̈vumal in chon̈abꞌ, abꞌec val juntzan̈ in lolonel tic. 10 A in Jehová Yajal in svalaꞌ: Aycot voval, ol vacꞌ yovalil in chon̈abꞌ tic dꞌayex. Ol ex viqꞌuel dꞌa eyopisio chiꞌ, yic man̈xo ol e tzꞌac eyil in chon̈abꞌ tic, yujto a exn̈ej tze tan̈vej e bꞌa. Ol viqꞌuel ebꞌ in chon̈abꞌ tic dꞌa yol e cꞌabꞌ yic man̈xo ol ex va dꞌa spatic ebꞌ.
Jun tan̈vum calnel vachꞌ
11 A in Dios Yajal in svalaꞌ to a in val ol in molbꞌejxi ebꞌ in chon̈abꞌ tic, ol in tan̈van ebꞌ. 12 Icha ebꞌ tan̈vum calnel tzꞌoch val ilcꞌolal yuj nocꞌ scalnel ayic saclembꞌat nocꞌ, icha chiꞌ ol aj voch ilcꞌolal yuj in chon̈abꞌ tic. Ol in molbꞌejxicot ebꞌ bꞌaj sacleminac yajcanbꞌat chiꞌ, ol vicꞌanelta ebꞌ dꞌa cal qꞌuicꞌalqꞌuinal bꞌaj aycanbꞌat chiꞌ. 13 A in ol vicꞌxicot ebꞌ dꞌa scal juntzan̈ nación bꞌaj sacleminac yajcanbꞌati, ol vicꞌanxibꞌat ebꞌ dꞌa sat sluum. Ol cꞌochxoc cajan ebꞌ dꞌa lum tzalquixtac yedꞌ dꞌa lum chꞌolquixtac bꞌaj ay sjajtac a aꞌ dꞌa yol smacbꞌen Israel chiꞌ, aton lum bꞌaj syal scajnaj anima. 14 Ol vicꞌbꞌat ebꞌ dꞌa lum te yax sat, aton lum tzalquixtac dꞌa yol yic Israel chiꞌ. Ataꞌ ol vacꞌ yicꞌ yip ebꞌ, ol vacꞌan tas te vachꞌ sva ebꞌ taꞌ. 15 A in Jehová Yajal in svalaꞌ to ol in tan̈vej in chon̈abꞌ, ol vacꞌan yicꞌ yip ebꞌ taꞌ. 16 Ol in sayecꞌ ebꞌ satnaccanbꞌati, ol vacꞌan meltzaj ebꞌ sacleminac yajcanbꞌati, ol van̈tan ebꞌ lajvinac yedꞌ ebꞌ qꞌuichajnac, ol vacꞌan stecꞌanil ebꞌ malaj stecꞌanil. Palta ol in satel ebꞌ yajal yaj dꞌa scal ebꞌ, aton ebꞌ tzꞌixtan ebꞌ. Te vachꞌ ol vutej in tan̈van in chon̈abꞌ chiꞌ.
17 A in Jehová Yajal in sval dꞌayex in chon̈abꞌ ex tic: Ol ex in chꞌolbꞌitej junjun ex, ex to lajan ex icha nocꞌ calnel yedꞌ ex lajan ex icha nocꞌ chiva. 18 Ayex lajan ex icha nocꞌ calnel tecꞌan, an̈ej an̈ an̈cꞌultac vachꞌ scꞌuxuꞌ, axo an̈ maxtzac scꞌuxlaj nocꞌ toxon̈ej stecꞌnubꞌej an̈ nocꞌ. A a aꞌ te yaax snibꞌej nocꞌ syuqꞌuej, palta axo yoc nocꞌ stecꞌanqꞌue statil aꞌ. 19 ¿Tocval vachꞌ tato a nocꞌ calnel malaj yip scꞌuxan an̈ an̈cꞌultac stecꞌnubꞌaj chiꞌ, axo a aꞌ stecꞌchajqꞌue statil chiꞌ syucꞌ nocꞌ? 20 Yuj chiꞌ a in Jehová Yajal in sval dꞌayex: A in ol in chꞌolbꞌitej ebꞌ syicꞌchaan̈ sbꞌa yedꞌ ebꞌ emnaquil syutej sbꞌa. 21 A ex tecꞌan ex tic, lajan ex icha nocꞌ calnel bꞌaqꞌuech stenqꞌue telnaj nocꞌ malaj yip, spechanbꞌeyecꞌ nocꞌ malaj yip chiꞌ nocꞌ. 22 Yuj chiꞌ a in ol in col ebꞌ emnaquil yaj dꞌa scal ebꞌ in chon̈abꞌ, yic vachꞌ man̈xo ol eyixtej ebꞌ. 23 A in ol vacꞌoch junoc stan̈vumal ebꞌ in chon̈abꞌ chiꞌ, aton in checabꞌ yin̈tilal vin̈aj David. A ol ex tan̈van icha junoc tan̈vum calnel vachꞌ syutej stan̈van nocꞌ scalnel. 24 A in Jehová in svalaꞌ to a in e Diosal in, axo vin̈ in checabꞌ yin̈tilal vin̈aj David chiꞌ ol vacꞌoch eyajaliloc. 25 Ol vacꞌ in trato eyedꞌoc, yic vachꞌ juncꞌolal ol ex ajoc. Ol in satel masanil tas ay smay dꞌa e cal yic vachꞌ man̈xa tas ol e naꞌa.
26 Ol vacꞌcot in vachꞌcꞌolal dꞌa eyibꞌan̈ dꞌa spatictac jun tzalan bꞌaj tzꞌoch ejmelal dꞌayin, ol vacꞌancot n̈abꞌ dꞌa stiempoal. 27 Ol yacꞌxoc sat teꞌ avbꞌen teꞌ, a lum luum tic ol yacꞌxi tas tzꞌavchaj dꞌa sat luum, juncꞌolal ol ex ajxoc dꞌa e luum. Ol ex in colel dꞌa yol scꞌabꞌ ebꞌ bꞌaj ayex och checabꞌoc. Icha chiꞌ ol aj snachajel eyuuj to a in ton Jehová e Diosal in. 28 Man̈xo ol elcꞌajbꞌat tastac ay dꞌayex yuj juntzan̈xo nación, man̈xo ol ex chijocbꞌat yuj nocꞌ chium nocꞌ, man̈xa mach bꞌaj ol ex xivoc. 29 A in ol vacꞌxi qꞌuibꞌ tas tzꞌel dꞌa sat e luum chiꞌ, yic man̈xa bꞌaqꞌuin̈ ol eyacꞌ vejel. Man̈xo ol ex bꞌuchjoc yuj juntzan̈xo nación. 30 Icha chiꞌ ol aj eyojtacaneli to a in ton Jehová e Diosal in, ayinecꞌ eyedꞌoc, in chon̈abꞌ eyaj a ex yin̈tilal Israel ex tic. 31 A in svalaꞌ to in chon̈abꞌ eyaji, icha in calnel eyaji, tan̈vabꞌil ex vuuj, a in Jehová Yajal in e Diosal in, xchi Jehová, xa chi dꞌa ebꞌ, xchi dꞌayin.