5 Yujto ayexn̈ejoch ajcꞌolal dꞌa chon̈abꞌ Israel, e milnaccham ebꞌ ayic ayoch syaelal ebꞌ yuj smul. 6 Yuj chiꞌ a in Dios Yajal in svacꞌ in tiꞌ to ol ex vacꞌcanoch dꞌa yol scꞌabꞌ chamel, axo chamel chiꞌ ol ex pechan bꞌeyecꞌoc, ol ex cham yuuj. 7 Ol vacꞌcan tzꞌinan lum tzalquixtac Seir chiꞌ, man̈xo ol in cha ecꞌ anima taꞌ. 8 Ol vacꞌcan bꞌudꞌjoc el lum tzalquixtac, lum chꞌolquixtac yedꞌ yoltac a aꞌ yuj snivanil ebꞌ chamnac, aton ebꞌ ol cham dꞌa oval. 9 Juneln̈ej ol vacꞌcan tzꞌinan lum e luum chiꞌ, man̈xalaj mach olto cajnajcan dꞌa e chon̈abꞌ chiꞌ. Icha chiꞌ ol aj eyojtacaneli to a in ton Jehová in svutej icha chiꞌ.

10 A ex tic eyojtac to a in Jehová in ayinecꞌ yedꞌ ebꞌ israel tic, palta tzeyalan icha tic: A smacbꞌen Israel yedꞌ Judá, quic ol ajcanoc, xe comon chiej. 11 Palta a in Dios Yajal in svacꞌ in tiꞌ to icha val yoval e cꞌool yedꞌ e chichoncꞌolal ayoch dꞌa Israel tic, icha pax chiꞌ ol ex vutej. Icha chiꞌ ol aj snachajel yuj ebꞌ israel to a in svacꞌoch eyaelal yuj tas ix eyutej ebꞌ. 12 Icha chiꞌ ol aj eyojtacaneli to a in Jehová in ix vabꞌ val e bꞌuchval lolonel ayic ix eyalan icha tic: A lum tzalquixtac dꞌa yol smacbꞌen Israel, ix can val tzꞌinan luum. Co maquec quiquej luum, xe chi. 13 Ix eyicꞌ val chaan̈ e bꞌa dꞌayin, ix in e bꞌuchani, palta ix vabꞌn̈ej tas ix eyal chiꞌ.

14 A in Dios Yajal in sval juntzan̈ tic: Masanil yolyibꞌan̈qꞌuinal tic ol tzalajqꞌueoc ayic ol ex in satanel chiꞌ. 15 Yujto a ex tic, ix ex te tzalaji ayic ix lajviel chon̈abꞌ Israel, yuj chiꞌ ol in pactzitej dꞌayex icha ix eyutej e bꞌa chiꞌ. Ol vacꞌcan tzꞌinan lum tzalquixtac Seir chiꞌ, aton e macbꞌen ex yin̈tilalcan Edom. Icha chiꞌ ol aj eyojtacaneli to a in ton Jehová in svutej icha chiꞌ, xchi Jehová, xa chi dꞌa ebꞌ, xchi dꞌayin.