6 Ix yalanxi Jehová dꞌayin icha tic: A in Dios Yajal in sval dꞌayex israel ex tic, ex cajan ex dꞌa lum tzalquixtac, dꞌa lum jolomtac vitz, dꞌa lum chꞌolquixtac yedꞌ dꞌa lum pacꞌquiltac: Ay val cot yoval in cꞌol dꞌa yibꞌan̈ juntzan̈xo nación chiꞌ eyuuj, yujto tzex yixtej val ebꞌ, tzex sbꞌuchan ebꞌ. 7 Yuj chiꞌ svacꞌ in tiꞌ to a juntzan̈ nación chiꞌ, a in ol vacꞌ qꞌuixvelal ebꞌ. 8 A dꞌa lum tzalquixtac dꞌa yol e macbꞌen, jantac teꞌ avbꞌen teꞌ ol yacꞌ sat, yic ol e lo sat teꞌ, yujto toxo ol ex meltzajoc. 9 A in val ol ex in tan̈vej, ol ex cꞌochxoc, ol eyavanxi eyavbꞌen dꞌa sat lum e luum chiꞌ. 10 Elan̈chamel ol vacꞌxi qꞌuibꞌ e bꞌisul dꞌa lum e luum chi. Ol laj qꞌuibꞌ e bꞌisul dꞌa junjun e chon̈abꞌ. Ol laj e bꞌoxiqꞌue e chon̈abꞌ macꞌbꞌilem lan̈najoc. 11 Ol vacꞌ qꞌuibꞌ sbꞌisul nocꞌ e molbꞌetzal nocꞌ, ol qꞌuibꞌ pax e bꞌisul. Jantac anima ol cajnajxoc dꞌa junjun e chon̈abꞌ, ecꞌbꞌal svachꞌil ol ex ajxoc icha eyaj pecataxo. Icha chiꞌ ol aj eyojtacaneli to a in ton Jehová in svutej icha chiꞌ. 12 Ol ex vicꞌbꞌat dꞌa lum tzalquixtac chiꞌ, ol eyicꞌanxican lum eyictaxon yaji. Man̈xo ol miljoccham ebꞌ eyuninal dꞌa juntzan̈ luum chiꞌ.

13-14 A ebꞌ anima dꞌa juntzan̈xo nación syal ebꞌ to a lum tzalquixtac dꞌa yol yic Israel tzꞌacꞌancham ebꞌ anima yedꞌ yuninal. Palta a in Jehová Yajal in svalaꞌ to man̈xa bꞌaqꞌuin̈ ol satel ebꞌ in chon̈abꞌ yuj lum luum chiꞌ, man̈xo ol chamlaj yuninal ebꞌ yuj luum. 15 Man̈xa bꞌaqꞌuin̈ ol ex in cha bꞌuchjoc yuj juntzan̈xo nación dꞌa lum e luum chiꞌ, man̈xa anima ol cham yuj luum, xchi Jehová, xa chi dꞌa ebꞌ.

16 Ix yalanxi Jehová dꞌayin icha tic: 17 Ach anima, ayic cajanecꞌ ebꞌ e mam eyicham dꞌa sluum dꞌa pecataxo, yixtejnacbꞌat lum sluum ebꞌ chiꞌ yuj chucal scꞌulej. A sbꞌeybꞌal ebꞌ chiꞌ yajbꞌentac dꞌa vichan̈. 18 Yuj chiꞌ vacꞌnac val cot yoval in cꞌol dꞌa yibꞌan̈ ebꞌ, yujto jantac anima smilnaccham ebꞌ dꞌa sat sluum chiꞌ, ochnac pax ebꞌ ejmelal dꞌa juntzan̈ comon dios. 19 Yuj val schucal sbꞌeybꞌal ebꞌ chiꞌ, vacꞌoch syaelal ebꞌ, in saclemejcanbꞌat ebꞌ dꞌa juntzan̈xo nación. 20 Axo yic scꞌoch ebꞌ dꞌa juntzan̈xo nación chiꞌ, te chuc yal ebꞌ anima chiꞌ dꞌayin yuj ebꞌ, yalan ebꞌ anima chiꞌ icha tic: Tato yel schon̈abꞌ Jehová yaj juntzan̈ anima tic, ¿tas yuj tzꞌicꞌjiel ebꞌ dꞌa schon̈abꞌ chiꞌ? xchi ebꞌ. 21 Yuj chiꞌ vabꞌ val syail yuj juntzan̈ bꞌuchval lolonel, yuj smul ebꞌ e mam eyicham chiꞌ, chuclaj tas syal ebꞌ anima chiꞌ dꞌayin dꞌa juntzan̈ nación bꞌaj cꞌochnac ebꞌ chiꞌ. 22 Yuj chiꞌ, al dꞌa ebꞌ etisraelal chiꞌ to a in Jehová Yajal in sval icha tic: A tas ol in cꞌulej, man̈ eyujoc ol in cꞌulej, palta yuj vacꞌan bꞌinaj in bꞌi, yujto te chuc yalan ebꞌ anima chiꞌ dꞌayin eyuuj, aton ebꞌ bꞌajtac cꞌochnac ex can chiꞌ. 23 Yuj chiꞌ ol in chꞌox val snivanil velcꞌoch dꞌa yichan̈ juntzan̈ nación ix in bꞌuchan eyuuj chiꞌ. A in val Jehová Yajal in svalaꞌ to a dꞌayex ol in chꞌoxel snivanil velcꞌochi, dꞌa yichan̈ ebꞌ anima chiꞌ. Ichato chiꞌ ol nachajel yuj ebꞌ to a in ton Jehová in svutej icha chiꞌ. 24 A in ol ex viqꞌuelta dꞌa scal juntzan̈ nación bꞌaj sacleminac eyajcanbꞌat chiꞌ, ol ex in molbꞌanxi, ol ex vicꞌanxibꞌat dꞌa e luum chiꞌ. 25 Ol ex in sacbꞌitanxi yuj juntzan̈ chucal ix e cꞌulej, icha junoc tas sbꞌicjiel yedꞌ a aꞌ yaax. Ol vicꞌanel e mul yuj bꞌaj ex och ejmelal dꞌa juntzan̈ comon dios. 26 Ol vacꞌoch jun acꞌ pensar dꞌayex sqꞌuexuloc jun e chuc pensaril chiꞌ. Ol vicꞌanel jun pensar pit ayoch dꞌayex, axo cꞌanabꞌajumal ol vacꞌoch dꞌayex. 27 Ol vacꞌoch Vespíritu dꞌayex yic tze bꞌeybꞌalan in cꞌaybꞌubꞌal yedꞌ in checnabꞌil. 28 Ol ex cajnajxoc dꞌa lum vacꞌnac dꞌa ebꞌ e mam eyicham, ol ex ochxoc in chon̈abꞌoc, a inxo ol in ochxoc e Diosaloc. 29 A in ol ex in tan̈vej, yic vachꞌ man̈xo ol eyixtejbꞌat e bꞌa yuj juntzan̈ chucal tze cꞌulej chiꞌ, ol vacꞌanxi yacꞌ sat ixim e trigo, yic vachꞌ man̈xa bꞌaqꞌuin̈ ol eyacꞌ vejel. 30 Ol vacꞌ val yacꞌ sat te eyavbꞌen teꞌ yedꞌ masanil tastac tzeyavej dꞌa sat luum, yic vachꞌ man̈xo ol ex bꞌuchjoc yuj juntzan̈xo nación yuj eyacꞌan vejel. 31 Ayic ol e naancot e chuc bꞌeybꞌal yedꞌ tas yajbꞌentac e cꞌulejnac, ol ex qꞌuixvoc yuuj. 32 A in Jehová Yajal in svalaꞌ: Ojtaquejequel ex israel ex tic to man̈ yujoc e vachꞌil svacꞌan in vachꞌcꞌolal dꞌayex, yujto smoj eyecan qꞌuixvoc e bꞌa yuj e chuc bꞌeybꞌal chiꞌ.

33 A in Jehová Yajal in sval icha tic: A val yic ol vicꞌanel e chucal, ol ex vacꞌanxi cajnaj dꞌa e chon̈abꞌ, ol e bꞌoanxiqꞌuei. 34 A lum luum cannac tzꞌinan chiꞌ, ol avchajxi avbꞌen dꞌa luum, axo yic ol ecꞌ ebꞌ anima taꞌ, ol yilan ebꞌ to ayxo tas avabꞌil dꞌa luum. 35 Ol yalan ebꞌ icha tic: A jun lum luum tic cannac tzꞌinan luum, axo ticnaic ayxo tas avabꞌil dꞌa luum, lajanxo yilji lum icha lum Edén. Macꞌbꞌilem lan̈naj juntzan̈ chon̈abꞌ tic, axo ticnaic ix laj bꞌochajxiqꞌuei, ayxo pax anima cajan dꞌay, xcham ebꞌ. 36 A juntzan̈ chon̈abꞌ aycan dꞌa e lacꞌanil, ol yojtaquejel ebꞌ to a in Jehová in tic tzin bꞌoxiqꞌue tas macꞌbꞌilem lan̈najoc, ichato svavejxiem tas tocꞌbꞌilqꞌueta. A in Jehová in svalaꞌ, yovalil ol elcꞌoch tas svalcan tic.

37 A in Jehová Yajal in sval icha tic: Ex yin̈tilal Israel, a tastac ol e cꞌan dꞌayin, ol vacꞌ dꞌayex. Ol vacꞌan qꞌuibꞌ e bꞌisul icha tzꞌaj sqꞌuibꞌ sbꞌisul nocꞌ calnel. 38 A juntzan̈ chon̈abꞌ emnac lan̈naj chiꞌ, ol bꞌudꞌjocxiel yuj ebꞌ anima, lajanxon̈ej ol aj yecꞌ ebꞌ anima chiꞌ icha yecꞌ n̈ililoc nocꞌ calnel tzꞌicꞌchajcot silabꞌil dꞌa Jerusalén dꞌa qꞌuin̈al. Icha chiꞌ ol aj eyojtacaneli to a in ton Jehová e Diosal in, xchi Jehová, xa chi dꞌa ebꞌ, xchi dꞌayin.