A juntzan̈ taquin̈ bꞌac
37
Ix yacꞌanem spoder Jehová dꞌa vibꞌan̈, axo Yespíritu ix acꞌan vilaꞌ, ichato ayinecꞌ dꞌa jun pan̈an bꞌaj bꞌudꞌan yuj juntzan̈ bꞌac. 2 Ix in yicꞌanecꞌ Jehová dꞌa scaltac juntzan̈ bꞌac chiꞌ, ix vilani majnaquel sat lum pan̈an chiꞌ yuj juntzan̈ sbꞌaquil anima chiꞌ. Te tzijtum juntzan̈ bꞌac chiꞌ, te taquin̈xo. 3 Ix yalan Jehová dꞌayin icha tic: Ach anima, ¿tzam yal spitzvixi juntzan̈ taquin̈ bꞌac tic tza naꞌ? xchi. Ix in tacꞌvi dꞌay icha tic: Mamin Dios Vajalil, a achn̈ej ojtac, xin chi.4 Ix yalanxi Jehová dꞌayin icha tic: Al dꞌa juntzan̈ taquin̈ bꞌac tic to scha yabꞌ in lolonel ebꞌ. 5 Al dꞌa ebꞌ to a in Jehová Yajal in sval icha tic: Ol vacꞌxioch eyicꞌ yic tzex pitzvixi. 6 Ol vacꞌ eyamlajxi e bꞌa, ol vacꞌanxioch e bꞌacꞌchil, ol ochxipax e tzꞌumal, ol vacꞌanxi eyicꞌ eyicꞌ, ol ex pitzvocxoc. Icha chiꞌ ol aj eyojtacaneli to a in ton Jehová in, xchi Jehová, xa chi dꞌa ebꞌ. 7 Ix valan dꞌa ebꞌ icha ix aj yalan Jehová chiꞌ dꞌayin. Yacbꞌan van valan chiꞌ dꞌa ebꞌ, ix vabꞌan scꞌan̈ jun tas, ticni tobꞌan quixcabꞌ ix eqꞌui, icha chiꞌ ix aj yoch ijan syamanxi sbꞌa juntzan̈ bꞌac chiꞌ. 8 Axo ix vilani, van syamanxi sbꞌa juntzan̈ bꞌac chiꞌ, ayxo och schꞌan̈al, sbꞌacꞌchil yedꞌ stzꞌumal. An̈ej to manto yicꞌlaj yicꞌ ebꞌ.
9 Ix vabꞌan yalan Jehová dꞌayin icha tic: Ach anima, al dꞌa icꞌ icha tic: A Jehová tzꞌalan icha tic: Ach icꞌ, cotan̈ dꞌa masanil yolyibꞌan̈qꞌuinal, tzach ochcan dꞌa juntzan̈ nivanil chamnacxo tic, yic spitzvixi ebꞌ, xchi Jehová, xa chi. 10 Ix valan icha ix yutej yalan Jehová chiꞌ dꞌayin, ix och yicꞌ juntzan̈ nivanil chiꞌ, ix pitzvixi ebꞌ, ix qꞌue lin̈an ebꞌ. Man̈xo bꞌischajbꞌenoc ebꞌ icha junoc nivan n̈ilan̈ ebꞌ soldado.
11 Ix yalanxi Jehová dꞌayin icha tic: Ach anima, a ex chon̈abꞌ Israel ex tic, lajan ex icha juntzan̈ bꞌac tic. Tzeyal icha tic: Taquin̈xo co bꞌaquil, man̈xa tas ayoch yipoc co cꞌool, toxo ix on̈ sateli, xe chi. 12 Yuj chiꞌ al yabꞌ ebꞌ etchon̈abꞌ tic to a in Jehová in sval icha tic: Ex in chon̈abꞌ, ol in jac bꞌaj mucan ex, ol ex vicꞌanelta taꞌ, ol ex vacꞌan meltzaj dꞌa e chon̈abꞌ. 13 Ayic ol in jacan bꞌaj mucan ex chiꞌ, ol ex vicꞌanelta, ol eyojtacaneli to a in ton Jehová in e Diosal in. 14 A in val svalaꞌ to ol vacꞌoch Vespíritu dꞌayex, axo e pitzvi chiꞌ, axo ex vacꞌanxican cajnaj dꞌa e luum chiꞌ. Icha chiꞌ ol aj eyojtacaneli to a in ton Jehová in valnac juntzan̈ tic, ix vacꞌanpaxelcꞌochi, xchi Jehová, xa chi dꞌa ebꞌ, xchi dꞌayin.
Ol yil-lajxi sbꞌa Israel yedꞌ Judá
15 Ix yalanxi Jehová dꞌayin icha tic: 16 Ach anima, say chabꞌoc te teꞌ, tza tzꞌibꞌanoch dꞌa junoc teꞌ icha tic: A teꞌ schꞌoxan Judá yedꞌ ebꞌ yetisraelal ajun yedꞌoc. Slajvi chiꞌ tza tzꞌibꞌanpaxoch dꞌa junxo teꞌ icha tic: A teꞌ schꞌoxan Efraín yin̈tilal José yedꞌ masanil ebꞌ yetisraelal ajun yedꞌoc. Icha chiꞌ tzꞌaj a tzꞌibꞌani. 17 Slajvi chiꞌ tzacꞌan yil-laj sbꞌa sn̈iꞌ teꞌ dꞌa yol a cꞌabꞌ, ichato junn̈ej teꞌal teꞌ. 18 Tato ol scꞌanbꞌej ebꞌ etchon̈abꞌ dꞌayach icha tic: Al dꞌayon̈ tas syalelcꞌoch jun tza chꞌox tic, ta xchi ebꞌ, 19 tzalan dꞌa ebꞌ icha tic: Icha val tic yalan Jehová Yajal: Ol vicꞌqꞌue teꞌ schꞌoxan yin̈tilal José, teꞌ ayoch dꞌa yol scꞌabꞌ Efraín yedꞌ juntzan̈xo yin̈tilal Israel ayoch yedꞌoc, ol vacꞌan yil-laj sbꞌa teꞌ yedꞌ teꞌ schꞌoxan Judá, junn̈ej ol vutej chabꞌ te teꞌ chiꞌ dꞌa yol in cꞌabꞌ, xchi Jehová, xa chi dꞌa ebꞌ. 20 Dꞌa val yichan̈ ebꞌ tzicꞌanqꞌue te teꞌ chiꞌ schabꞌil, aton teꞌ bꞌaj ix a tzꞌibꞌejoch chiꞌ, 21 tzalan icha tic: A Jehová Yajal tzꞌalan icha tic: Ol ex viqꞌuelta dꞌa scaltac juntzan̈ nación bꞌaj cꞌochnac ex cani. Yaln̈ej bꞌaj ayex eqꞌui ol ex vacꞌanxi meltzaj dꞌa sat e luum. 22 Junxon̈ej chon̈abꞌil ol ex vutej dꞌa lum tzalquixtac dꞌa yol yic Israel chiꞌ, junxon̈ej e reyal ol vacꞌochi. Man̈xa bꞌaqꞌuin̈ ol ex pojchajbꞌatoc. Man̈xo chabꞌoc nación ol ex ajoc. 23 Man̈xo ol eyixtejbꞌat e bꞌa yedꞌ juntzan̈ e comon dios yajbꞌentac chiꞌ, ma yedꞌ juntzan̈ocxo macan̈il chucal tze cꞌulej. Yujto ol viqꞌuel e pitalil, ol vicꞌanel e mul ayoch dꞌa eyibꞌan̈. Ol ex ochxoc in chon̈abꞌoc, a inxo ol in ochxoc e Diosaloc. 24 Aton vin̈ in checabꞌ yin̈tilal vin̈aj David ol och e reyaloc yedꞌ e tan̈vumaloc e masanil. Ol e cꞌanabꞌajan in cꞌaybꞌubꞌal yedꞌ in checnabꞌil. 25 Ol ex cajnajxoc dꞌa jun luum vacꞌnac dꞌa vin̈ in checabꞌ aj Jacob, aton lum bꞌaj ecꞌnac ebꞌ e mam eyicham. Ataꞌ ol cajnaj ebꞌ eyuninal yedꞌ masanil ebꞌ eyin̈tilal dꞌa masanil tiempo. Axo vin̈ in checabꞌ yin̈tilal vin̈aj David ol ochn̈ej e reyaloc. 26 Ol vacꞌ in trato yic juncꞌolal eyedꞌoc, yic vachꞌ ol ex aj dꞌa tzalajcꞌolal. Dꞌa juneln̈ej ol in bꞌocan jun in trato chiꞌ eyedꞌoc, yic tzalajcꞌolaln̈ej ol ex ajoc. Ol vacꞌan qꞌuibꞌ e bꞌisul, dꞌa masanil tiempo ol can in templo dꞌa e cal. 27 Ol in cajnaj dꞌa e cal, ol in ochxoc e Diosaloc, a exxo ol ex ochxoc in chon̈abꞌoc. 28 Ol aj in templo chiꞌ dꞌa e cal dꞌa juneln̈ej, axo masanil juntzan̈xo nación ol nachajel yuj ebꞌ to sicꞌbꞌil ex el vuuj yic tzex ochcan vicoc, xchi Jehová, xa chi dꞌa ebꞌ.