A tas albꞌilcan dꞌa yibꞌan̈ vin̈aj Gog
38
Ix yalanxi Jehová dꞌayin icha tic: 2 Ach anima, a ticnaic meltzajan̈bꞌat qꞌuelan dꞌa stojolal chon̈abꞌ Magog. Tzalan juntzan̈ in lolonel tic dꞌa yibꞌan̈ vin̈aj Gog, sat yajal yaj dꞌa Mesec yedꞌ dꞌa Tubal. 3 Al dꞌa vin̈ to a in Dios Yajal in sval icha tic: Ach Gog sat yajal aj dꞌa Mesec yedꞌ dꞌa Tubal, a in val svalaꞌ to ayinxooch ajcꞌolal dꞌayach. 4 Ichato ol vacꞌoch junoc qꞌuen gancho dꞌa yalan̈ a tiꞌ, ol ach vicꞌan meltzajoc. Ol ach vicꞌancot dꞌa tic yedꞌ masanil ebꞌ a soldado ayqꞌue dꞌa yibꞌan̈ chej, ebꞌ yedꞌnac yespada, ebꞌ edꞌjinac smaclabꞌ jul-labꞌ yedꞌ masanil juntzan̈xo yamcꞌabꞌ yic oval. 5 A dꞌa scal ebꞌ chiꞌ ayoch ebꞌ soldado aj Persia, ebꞌ aj Etiopía yedꞌ ebꞌ aj Libia. Masanil ebꞌ chiꞌ yedꞌnac smaclabꞌ jul-labꞌ ebꞌ yedꞌ pax sqꞌuen xumpil ebꞌ. 6 Ay pax masanil ebꞌ soldado aj Gomer yedꞌ ebꞌ aj Bet-togarma, aton ebꞌ ay dꞌa norte yedꞌ pax juntzan̈xo chon̈abꞌ man̈xo bꞌischajbꞌenoc ayoch edꞌoc. 7 Acꞌ lista a bꞌa yedꞌ a yamcꞌabꞌ yic oval yedꞌ masanil ebꞌ soldado tzacꞌ mandar. 8 Ayic nivanxo tiempo toxo ix eqꞌui, ol a naanchaan̈ to ol acꞌ oval yedꞌ chon̈abꞌ Israel, aton jun chon̈abꞌ najtil cannac tzꞌinan yuj oval. Palta a dꞌa jun tiempoal chiꞌ meltzajnacxo ebꞌ anima sacleminac yajcanbꞌat dꞌa juntzan̈xo nación, cajanxo ebꞌ dꞌa sluum chiꞌ dꞌa juncꞌolal. 9 Icha val junoc qꞌuicꞌ asun ol aj a cꞌoch dꞌa jun chon̈abꞌ chiꞌ yedꞌ juntzan̈xo nación ayoch edꞌoc. Ol ach cꞌoch yedꞌ masanil ebꞌ a soldado man̈xo bꞌischajbꞌenoc, icha val junoc nivan yaxn̈abꞌ.10 A in Jehová in sval icha tic: Te chuclaj tas ol a naꞌ a cꞌulej dꞌa jun tiempoal chiꞌ. 11 Ol alan icha tic: Ol bꞌat vacꞌ oval yedꞌ juntzan̈ anima, malaj smuroal schon̈abꞌ ebꞌ ayochi, malaj spuertail, malaj pax yijchul ayochi, tzalajcꞌolal yaj ebꞌ, malaj bꞌaj vachꞌ scolan sbꞌa ebꞌ. 12 Ol vicꞌanecꞌ tastac ay dꞌa ebꞌ, ol in och dꞌa juntzan̈ chon̈abꞌ toto ix bꞌochajxiqꞌuei, aton ebꞌ anima toto meltzajnac dꞌa juntzan̈ nación. A ebꞌ chiꞌ tzijtum nocꞌ smolbꞌetzal nocꞌ ebꞌ yedꞌ juntzan̈xo tas ay dꞌa ebꞌ. Aton ebꞌ cajan dꞌa snan̈al yolyibꞌan̈qꞌuinal tic, xa chama. 13 A ebꞌ aj Sabá, ebꞌ aj Dedán yedꞌ ebꞌ chon̈vajum scot dꞌa Tarsis, ol scꞌanbꞌej ebꞌ dꞌayach icha tic: ¿Tom tzach javi elcꞌal? ¿Tom ix a molbꞌej ebꞌ a soldado tic tzach javi yedꞌ ebꞌ yic tzul icꞌanecꞌ qꞌuen plata, qꞌuen oro, nocꞌ molbꞌetzal nocꞌ? xcham ebꞌ, xchi Jehová, xa chi dꞌa vin̈.
14 Yuj chiꞌ ach anima, al dꞌa vin̈aj Gog chiꞌ to a in Jehová Yajal in sval icha tic: Ayic te tzalajcꞌolalxo yaj in chon̈abꞌ Israel, ol a naanqꞌue acꞌan oval chiꞌ yedꞌ ebꞌ. 15 Ol ach cotn̈ej dꞌa a luum te najat dꞌa norte, te nivan juntzan̈xo chon̈abꞌ ol cot edꞌoc, ayqꞌue ebꞌ dꞌa yibꞌan̈ chej. Man̈xo bꞌischajbꞌenoc ebꞌ soldado ol cot edꞌoc. 16 Ol acꞌan oval yedꞌ in chon̈abꞌ Israel chiꞌ, ol ach och oyan dꞌa spatictac, icha tzꞌajem asun dꞌa yibꞌan̈ lum luum. Ach Gog, a dꞌa jun tiempoal chiꞌ ol ach vicꞌcot dꞌa sat lum in luum chiꞌ yic ol yil juntzan̈xo nación tas ol vutej ach in sataneli, icha chiꞌ ol aj yojtacanel ebꞌ to a inn̈ej nivan velcꞌochi.
17 A in Jehová Yajal in sval icha tic: A ach ton tic valnac uuj dꞌa ebꞌ in checabꞌ dꞌa pecaꞌ, ayic yalannaccanel in lolonel ebꞌ dꞌa scal ebꞌ in chon̈abꞌ Israel. Najtil yacꞌnac ebꞌ yalancan uuj to a in ol ach vicꞌcot acꞌ oval yedꞌ ebꞌ in chon̈abꞌ.
A yaelal dꞌa yibꞌan̈ vin̈aj Gog
18 A in Dios Yajal in sval icha tic: Ayic ol javoc vin̈aj Gog yacꞌ oval dꞌa Israel chiꞌ, ol cot val yoval in cꞌol dꞌa yibꞌan̈ vin̈. 19 Yuj val yoval in cꞌol chiꞌ, ay val nivan quixcabꞌ te ov ol ecꞌ dꞌa Israel chiꞌ. 20 Masanil nocꞌ chay dꞌa yol aꞌ mar, nocꞌ much tzꞌecꞌ jen̈en̈oc, nocꞌ caltacteꞌal nocꞌ yedꞌ pax nocꞌ sn̈ervi dꞌa sat luum, ol ibꞌxocqꞌue nocꞌ smasanil yuj xivelal dꞌa vichan̈. Icha chiꞌ ol aj masanil anima dꞌa yolyibꞌan̈qꞌuinal tic. Ol laj el lum vitz cꞌacapil, ol elta vequeljoc qꞌuen tenam, ol em lan̈naj smuroaltac chon̈abꞌ. 21 A in Jehová Yajal in sval icha tic: A dꞌa lum tzalquixtac dꞌa yol smacbꞌen in chon̈abꞌ, ol vacꞌbꞌat chamel dꞌa yibꞌan̈ ebꞌ soldado vin̈aj Gog. Munil a ebꞌ soldado chiꞌ ol smil-lajcham sbꞌa junjun yedꞌ qꞌuen yespada. 22 Ol vacꞌbꞌat yaelal, ilya yedꞌ chamel dꞌa yibꞌan̈ vin̈. Ol vacꞌbꞌat oval yaxn̈abꞌ, nivac sacbꞌat yedꞌ azufre ayoch scꞌacꞌal dꞌa yibꞌan̈ vin̈ yedꞌ soldado yedꞌ masanil nación ajun yedꞌ vin̈. 23 Icha chiꞌ ol aj in chꞌoxanel snivanil velcꞌoch dꞌa yichan̈ juntzan̈xo nación, icha chiꞌ ol aj yojtacanel ebꞌ to a in ton Jehová in, a inn̈ej Dios in, xchi Jehová.