Ix acꞌji ganar vin̈aj Gog
39
Ach anima, al dꞌa vin̈aj Gog to a in Jehová in sval icha tic: Ach Gog, yajal aj dꞌa Mesec yedꞌ dꞌa Tubal, sval dꞌayach to ayinxooch ajcꞌolal dꞌayach. 2 A in ol vacꞌ a cꞌulej, ol ach vicꞌcot dꞌa najat dꞌa stojolal norte, yic ol ach javoc dꞌa lum tzalquixtac yic Israel. 3 Ataꞌ chocꞌ ol vutej jun a jul-labꞌ edꞌnac dꞌa a qꞌuexan̈ cꞌabꞌ yedꞌ yol a jul-labꞌ edꞌnac dꞌa a vachꞌ cꞌabꞌ. 4 A achxo jun yedꞌ ebꞌ a soldado ol ach vacꞌoch dꞌa yol scꞌabꞌ chamel yedꞌ ebꞌ yic juntzan̈xo nación ajun edꞌoc, ol ex cham dꞌa lum tzalquixtac dꞌa yol yic Israel. Axo nocꞌ ostoc yedꞌ nocꞌ chium nocꞌ ol ex vacꞌ chianbꞌat taꞌ. 5 Ol ex can teljabꞌ dꞌa sat lum luum chiꞌ. A in Jehová Yajal in svacꞌ in tiꞌ svutan icha chiꞌ. 6 Ol vacꞌcot cꞌacꞌ dꞌa yibꞌan̈ nación scuchan Magog yedꞌ dꞌa yibꞌan̈ masanil ebꞌ anima juncꞌolal cajan dꞌa stitac aꞌ mar. Icha chiꞌ ol aj yojtacanel ebꞌ to a in ton Jehová in svutej icha chiꞌ. 7 Icha chiꞌ ol vutej in chꞌoxan snivanil velcꞌoch dꞌa in chon̈abꞌ Israel, yic man̈xa bꞌaqꞌuin̈ ol in sbꞌuch ebꞌ. Icha chiꞌ ol aj yojtacanel juntzan̈xo nación to a in ton Jehová in, sDiosal in Israel. 8 A jun cꞌual chiꞌ, vanxo sjavi, a in val Jehová in svalaꞌ to yovalil ol ujoc, xchi Jehová, xa chi.9 Axo masanil ebꞌ anima cajan dꞌa junjun chon̈abꞌ dꞌa smacbꞌen Israel, ol elta ebꞌ smol masanil yamcꞌabꞌ yic oval ol can chiꞌ, aton jul-labꞌ, maclabꞌ jul-labꞌ, cotac lanza, nivac lanza yedꞌ juntzan̈xo yamcꞌabꞌ. Uqueꞌ abꞌil ol yacꞌ ebꞌ scꞌatzitzan masanil juntzan̈ chiꞌ. 10 A in Jehová Yajal in svalaꞌ, man̈xo yovaliloc ol bꞌat ebꞌ israel chiꞌ saycot scꞌatzitz dꞌa najat, man̈xo ol bꞌat ebꞌ yicꞌ scꞌatzitz dꞌa caltac teꞌ, yujto masanil juntzan̈ yamcꞌabꞌ yic oval chiꞌ, a ol scꞌan ebꞌ scꞌatzitzoc. Icha chiꞌ ol aj yicꞌanxicanecꞌ ebꞌ tastac ul yicꞌnacbꞌat ebꞌ ajcꞌol chiꞌ dꞌa ebꞌ.
A tas ol aj smucchaj vin̈aj Gog
11 A dꞌa jun cꞌu chiꞌ a in ol vacꞌ jun yedꞌtal bꞌaj ol mucchaj vin̈aj Gog yedꞌ ebꞌ soldado vin̈ dꞌa yol smacbꞌen Israel chiꞌ, aton jun pan̈an bꞌaj tzꞌecꞌ ebꞌ anima scot dꞌa stojolal aꞌ mar Muerto. Man̈xo ol yal-laj sbꞌey anima dꞌa jun bꞌe chiꞌ yuj ebꞌ mucbꞌil chiꞌ taꞌ. Ol say sbꞌi jun lugar chiꞌ ebꞌ: Lum pan̈an bꞌaj mucbꞌil vin̈aj Gog yedꞌ ebꞌ soldado, xcham ebꞌ. 12 Uqueꞌ ujal ol yacꞌ ebꞌ israel mucoj chamnac chiꞌ, icha chiꞌ bꞌian, vachꞌ ol ajxican sluum ebꞌ chiꞌ dꞌa yol in sat. 13 Masanil ebꞌ israel ol colvaj ebꞌ smucan ebꞌ anima ol cham chiꞌ. A in Jehová Yajal in svalaꞌ, ayic ol in chꞌoxan in poder, ol te bꞌinajcan chon̈abꞌ Israel. 14 Ayic ol ecꞌ uqueꞌ ujal chiꞌ, ay jun n̈ilan̈ ebꞌ vin̈ vinac ol tupchajoc. Ol laj ecꞌ ebꞌ yilaꞌ bꞌajtac aycan jabꞌjabꞌoc snivanil ebꞌ chamnac dꞌa yol smacbꞌen ebꞌ chiꞌ smasanil, yic smucan masanil nivanil ebꞌ pucancanbꞌati. Icha chiꞌ bꞌian, vachꞌ ol ajxican slum ebꞌ chiꞌ dꞌa yol in sat. 15 Ayic ol ilchaj sbꞌaquil chamnac yuj ebꞌ tzecꞌ sayan chiꞌ, ol yacꞌcanqꞌue junoc yechel ebꞌ, axo yic sjavi ebꞌ smucan chamnac chiꞌ, a ebꞌ ol icꞌanbꞌat bꞌaj smucchaji, aton lum scuch span̈anil bꞌaj mucbꞌil vin̈aj Gog yedꞌ ebꞌ soldado. 16 Icha chiꞌ bꞌian, vachꞌ ol ajxican slum ebꞌ chiꞌ dꞌa yol in sat, xchi Jehová. (An̈ejtonaꞌ dꞌa slacꞌanil lum chiꞌ, ay pax jun chon̈abꞌ ol scuch Lum bꞌaj smucji ebꞌ soldado.)
17 Ix yalanxi Jehová Yajal dꞌayin icha tic: Ach anima, al dꞌa masanil nocꞌ ostoc yedꞌ dꞌa masanil nocꞌ chium nocꞌ: Cotocabꞌ nocꞌ dꞌa juntzan̈xo nación, smolbꞌejocabꞌ sbꞌa nocꞌ dꞌa tzalquixtac dꞌa yol yic Israel, ichato ol in bꞌo junoc nivan vael dꞌa nocꞌ. Ol schi chibꞌej nocꞌ, ol yucꞌanpax chicꞌ nocꞌ. 18 A schibꞌejal ebꞌ soldado ol schi nocꞌ. Ol yucꞌan schiqꞌuil ebꞌ yajal dꞌa yolyibꞌan̈qꞌuinal tic nocꞌ. Ol chijoc ebꞌ icha tzꞌaj nocꞌ chꞌac calnel, nocꞌ yunetac calnel, nocꞌ chiva yedꞌ nocꞌ bꞌaqꞌuech vacax scot dꞌa Basán. 19 A jun vael ol in bꞌo chiꞌ, ol schi xepuꞌ nocꞌ masanto ol penaayax nocꞌ yuuj. Ol yucꞌ val chicꞌ nocꞌ masanto ol qꞌue dꞌa sjolom nocꞌ icha ebꞌ ucꞌum an̈. 20 A in Jehová in svalaꞌ to a jun nivan vael ol in bꞌo chiꞌ, aton schibꞌejal nocꞌ chej yedꞌ yic ebꞌ soldado ayqꞌue dꞌa yibꞌan̈ nocꞌ yedꞌ yic ebꞌ soldado tecꞌan dꞌa oval yedꞌ yic masanil macan̈il ebꞌ soldado, masanto ol bꞌudꞌjoc scꞌol nocꞌ yuuj.
Ol smolbꞌejxi sbꞌa ebꞌ israel
21 Icha tic ol aj in chꞌoxan in poder dꞌa yichan̈ juntzan̈xo chꞌoc nacional. Masanil nación ol ojtacaneloc tas tzꞌaj in chꞌolbꞌitani yedꞌ vacꞌanoch yaelal dꞌa yibꞌan̈ ebꞌ. 22 A dꞌa jun cꞌual chiꞌ yedꞌ ol bꞌeyn̈ejbꞌatoc, a ebꞌ israel ol yojtaquejel ebꞌ to a in ton Jehová in sDiosal in ebꞌ. 23 Masanil juntzan̈xo nación ol ojtacaneloc to a ebꞌ israel yuj spital ebꞌ ix icꞌjibꞌat ebꞌ dꞌa juntzan̈xo chꞌoc nacional. Yujto te pit yutejnac sbꞌa ebꞌ dꞌayin, yuj chiꞌ majxo in cot qꞌuelan dꞌa ebꞌ. Ix vactancan ebꞌ dꞌa yol scꞌabꞌ ebꞌ ajcꞌool, icha chiꞌ ix aj yacꞌji ganar ebꞌ, ix miljicham ebꞌ dꞌa oval. 24 Ix vutej ebꞌ icha dꞌa smojal yuj chucal scꞌulej yedꞌ spitalil, yuj chiꞌ majxo in bꞌat qꞌuelan dꞌa ebꞌ.
25 Yuj chiꞌ a in Dios Yajal in svalaꞌ: A ticnaic ol ocꞌ val in cꞌol dꞌa chon̈abꞌ Israel chiꞌ, aton ebꞌ yin̈tilalcan Jacob. Ol vicꞌanxichaan̈ ebꞌ, yic tzin bꞌinaj dꞌa vachꞌil, yic tzꞌicꞌjichaan̈ in bꞌi to malaj junocxo mach syal slajbꞌan sbꞌa vedꞌoc. 26 Ayic ol cajnajxoc ebꞌ dꞌa schon̈abꞌ, man̈xalaj tas ol sna ebꞌ, man̈xalaj mach ol xibꞌtan ebꞌ. Icha chiꞌ ol sat sqꞌuixvelal ebꞌ dꞌa scꞌool yuj spitalil yedꞌ chucal scꞌulej ebꞌ dꞌayin. 27 Ayic ol vicꞌanelta ebꞌ dꞌa yoltac schon̈abꞌ ebꞌ yajcꞌool, ol in molbꞌanxi ebꞌ, icha val chiꞌ ol aj snachajel yuj juntzan̈ nación to chꞌoc vel dꞌa yichan̈ comon sdiosal ebꞌ. 28 A in ix in chec icꞌjocbꞌat ebꞌ dꞌa juntzan̈xo chꞌoc nacional, an̈ejaꞌ in ol in molbꞌejxicot ebꞌ dꞌa schon̈abꞌ. Man̈xa junoc ebꞌ ol can taꞌ. Icha chiꞌ ol aj yojtacanel ebꞌ to a in ton Jehová sDiosal in ebꞌ. 29 A in Jehová in svalaꞌ to man̈xo ol vactejcan ebꞌ junelxo, yujto ol vacꞌcot Vespíritu dꞌa yibꞌan̈ chon̈abꞌ Israel chiꞌ, xchi Jehová.