2 A dꞌa smacbꞌen Israel chiꞌ, a dꞌa sjolom jun lum vitz te chaan̈, ataꞌ ix in yicꞌqꞌue Jehová ix vilaꞌ. Ataꞌ ix vilbꞌat jun pat dꞌa stojolal sur, lajan yilji icha junoc nivan chon̈abꞌ. 3 Ix in yicꞌanbꞌat Jehová dꞌa jun chon̈abꞌ chiꞌ. Ataꞌ ix vil jun vin̈ vinac lajan yilji icha qꞌuen bronce. Lin̈anecꞌ vin̈ dꞌa stiꞌ jun puerta, yedꞌnac jun chꞌan̈ chꞌan̈ nabꞌa lino vin̈ yedꞌ jun teꞌ aj syacꞌlabꞌej yechtani. 4 Ix yalan jun vin̈ vinac chiꞌ dꞌayin icha tic: Ach anima, scham val abꞌani yedꞌ ilan tas ol in chꞌox dꞌayach, yujto a Dios ix ach icꞌancot dꞌa tic yic vachꞌ tzojtaquejeli. Ol lajvoc chiꞌ ol alan masanil tas tzil tic dꞌa ebꞌ etchon̈abꞌ Israel, xchi vin̈ dꞌayin.

5 A dꞌa spatictac templo chiꞌ ay jun muro oyanochi. A jun teꞌ aj yedꞌnac jun vin̈ vinac chiꞌ, oxeꞌ metro steel teꞌ. Ix yechtan jun muro chiꞌ vin̈. A jun chiꞌ oxeꞌ metro spimal, oxeꞌ pax metro schaan̈il yajqꞌuei. 6 Ix lajvi chiꞌ, ix bꞌat vin̈ dꞌa jun puerta dꞌa stojolal bꞌaj sjavi cꞌu, ix qꞌue vin̈ bꞌaj bꞌachquiltac sqꞌuei, ix yechtan jolom puerta vin̈. A jun chiꞌ oxeꞌ metro yajoch dꞌa yoloch puerta chiꞌ. 7 A dꞌa yoloch spuertail chiꞌ, ataꞌ ay jun calle tzꞌochi, axo dꞌa stitac jun calle chiꞌ, ay juntzan̈ cuarto bꞌaj ay ebꞌ stan̈van puerta chiꞌ. A junjun cuarto chiꞌ, oxeꞌ metro sat, oxeꞌ metro pax schaan̈il. Axo spimal yajcan dꞌa scal junjun cuarto chiꞌ, nan̈al yoxil metro spimal. Axo dꞌa scal bꞌaj slajviochcꞌoch juntzan̈ cuarto chiꞌ yedꞌ jun scorredoral, oxeꞌ metro, a jun yuneꞌ amacꞌ chiꞌ qꞌuelanbꞌat dꞌa templo. 8-9 Ix yechtan jun yuneꞌ amacꞌ chiꞌ vin̈, bꞌaj tzon̈ och dꞌa yol templo, chan̈eꞌ metro sat. Ay chabꞌ nivac oy, jun metro spimal. 10 A dꞌa stitac jun calle bꞌaj tzon̈ och dꞌa stojolal bꞌaj sjavi cꞌu, ay oxeꞌ cuarto lajann̈ej yool, lajann̈ej spimal ayoch dꞌa snan̈al junjun.

11 Ix lajvi chiꞌ, ix yechtan jun scalleal juntzan̈ cuarto chiꞌ vin̈, a sat calle chiꞌ yic tzꞌoch dꞌa sattac juntzan̈ cuarto chiꞌ oyeꞌ metro sat, axo sat calle chiꞌ dꞌa sattac juntzan̈ spimal aycan dꞌa snan̈al juntzan̈ cuarto chiꞌ, nan̈al yuquil metro sat. 12 A dꞌa stiꞌ juntzan̈ cuarto dꞌa scalleal chiꞌ, ay junjun yunetac muro ayochi, nan̈al metro spimal, axo schaan̈il yajqꞌuei, nan̈al metro paxi. Junjun juntzan̈ cuarto chiꞌ, ay oxeꞌ metro sat yedꞌ oxeꞌ metro schaan̈il. 13 Ix lajvi chiꞌ, ix yechtan masanil sat schon juntzan̈ cuarto chiꞌ vin̈, scotn̈ej dꞌa jun cuarto dꞌa jun cꞌaxep masanto dꞌa junxo cuarto qꞌuelcꞌumbꞌa yaj yedꞌoc, ay 12 metro yedꞌ nan̈alxo dꞌa masanil. 14 Ix lajvi chiꞌ ix yechtan jun scorredoral qꞌuelanbꞌat dꞌa templo chiꞌ vin̈, 10 metro yajecꞌ cꞌatan. 15 A jantac yajoch jun calle chiꞌ, schael yich dꞌa puerta masanto bꞌaj slajviochcꞌochi, 25 metro steel. 16 Masanil juntzan̈ cuarto chiꞌ ay sventenail dꞌa spatictac, qꞌuelanbꞌat dꞌa jun nivan amacꞌ. Ay pax sventenail dꞌa snan̈al juntzan̈ cuarto chiꞌ. Axo dꞌa sattac spacꞌul calle chiꞌ, ayoch yechel teꞌ palma dꞌay.

17 Ix lajvi chiꞌ, ix in yicꞌanbꞌat vin̈ vil jun bꞌabꞌel nivan amacꞌ dꞌa yolochi. A dꞌa oxeꞌ pacꞌan̈ dꞌa stitac jun nivan amacꞌ chiꞌ ay 30 cuarto, a dꞌa stitac yedꞌ dꞌa spatictac juntzan̈ cuarto chiꞌ, a qꞌuen qꞌueen latzꞌbꞌilemi. 18 A qꞌuen qꞌueen latzꞌbꞌilem chiꞌ, tzꞌecꞌ qꞌueen dꞌa sattac 30 cuarto chiꞌ, scꞌoch qꞌuen dꞌa spatictac juntzan̈ cuarto bꞌaj ay puerta, ayn̈ejoch dꞌa spatictac jun nivan amacꞌ chiꞌ. A jun nivan amacꞌ chiꞌ, ayem dꞌa spatictac junxo schabꞌil amacꞌ. 19 Ix yechtej scal jun bꞌabꞌel puerta vin̈, masanto dꞌa junxo spuertail schabꞌil amacꞌ, ay 50 metro sat, icha pax chiꞌ dꞌa stojolal norte yedꞌ dꞌa stojolal bꞌaj sjavi cꞌu.

20 Ix yechtan pax scꞌatul yedꞌ sat jun puerta vin̈ yic jun bꞌabꞌel amacꞌ dꞌa stojolal norte. 21 Ay oxeꞌ cuarto dꞌa junjun pacꞌan̈ scalleal jun puerta chiꞌ. Macbꞌil snan̈al, ay jun yuneꞌ yamaqꞌuil, lajann̈ej yechel yedꞌ spuertail dꞌa stojolal bꞌaj sjavi cꞌu, syalelcꞌochi 25 metro scꞌatul, 12 metro yedꞌ nan̈alxo sat. 22 A jun scorredoral chiꞌ yedꞌ sventenail yedꞌ yechel teꞌ palma, lajann̈ej yedꞌ juntzan̈ ay dꞌa stojolal bꞌaj sjavi cꞌu. Uqueꞌ sbꞌachquiltaquil sqꞌuecꞌoch bꞌaj ay puerta chiꞌ, axo scalleal chiꞌ scan dꞌa yool. 23 A dꞌa stojolal jun bꞌabꞌel puerta chiꞌ, ataꞌ ay pax spuertail jun schabꞌil amacꞌ, lajann̈ej icha jun ay dꞌa stojolal bꞌaj sjavi cꞌu. Ix yechtan pax snan̈al chabꞌ puerta chiꞌ vin̈, 50 metro scal.

24 Ix lajvi chiꞌ, ix in yicꞌanxibꞌat vin̈ dꞌa jun puerta dꞌa stojolal sur. Ix yechtan juntzan̈ cuarto vin̈, juntzan̈ spimal snan̈al juntzan̈ cuarto chiꞌ yedꞌ jun scorredoral, lajann̈ej yechel yedꞌ juntzan̈xo. 25 A jun puerta chiꞌ yedꞌ scalleal, ay sventenail icha juntzan̈xo. A yechel dꞌa smasanil, ay 25 metro yajochi, 12 metro yedꞌ nan̈alxo slevanil. 26 Uqueꞌ bꞌachquiltac sqꞌuecꞌoch dꞌa jun puerta chiꞌ, ay pax jun scorredoral dꞌa yool. Aypaxoch yechel teꞌ palma dꞌa sattac dꞌa junjun pacꞌan̈. 27 A jun schabꞌil amacꞌ, ay pax jun spuertail dꞌa stojolal sur. Ix yechtan scal chabꞌ puerta dꞌa stojolal sur chiꞌ vin̈, 50 metro scal.

28 Ix lajvi chiꞌ, ix in yicꞌanbꞌat vin̈ dꞌa spuertail jun schabꞌil amacꞌ dꞌa stojolal sur. Ix yechtan jun puerta chiꞌ vin̈, lajann̈ej yechel yedꞌ juntzan̈xo puerta. 29-30 A scuartoal yedꞌ scorredoral yedꞌ sattac, lajann̈ej yechel yedꞌ juntzan̈xo puerta. A jun puerta chiꞌ yedꞌ scorredoral, ay sventenail dꞌa spatictac. Ay 25 metro yajoch scalleal, 12 metro yedꞌ nan̈alxo slevanil. 31 A jun corredor chiꞌ, qꞌuelcꞌumbꞌa yaj yedꞌ jun bꞌabꞌel amacꞌ, an̈ejaꞌ ayoch yechel teꞌ palma dꞌa sattac scalleal chiꞌ. A dꞌa jun puerta chiꞌ ay vajxaqueꞌ bꞌachquiltac sqꞌuecꞌoch dꞌay.

32 Ix lajvi chiꞌ, ix in yicꞌanxibꞌat vin̈ dꞌa schabꞌil amacꞌ, dꞌa jun puerta dꞌa stojolal bꞌaj sjavi cꞌu, ix yechtan jun puerta chiꞌ vin̈, lajann̈ej yechel icha juntzan̈xo. 33 Ay spuertail, scorredoral yedꞌ sventenail dꞌa spatictac. 25 metro yajoch scalleal, 12 metro yedꞌ nan̈alxo slevanil. 34 A jun corredor qꞌuelcꞌumbꞌa yedꞌ jun bꞌabꞌel amacꞌ, ayoch yechel teꞌ palma dꞌa sattac junjun pacꞌan̈ scalleal. A dꞌa jun puerta chiꞌ ay vajxaqueꞌ bꞌachquiltac sqꞌuecꞌoch dꞌay.

35 Ix lajvi chiꞌ ix in yicꞌanbꞌat vin̈ dꞌa jun puerta dꞌa stojolal norte. Ix yechtan jun puerta chiꞌ vin̈, a jun chiꞌ lajann̈ej yedꞌ juntzan̈xo. 36 Ay pax scuartoal yedꞌ spimal snan̈al juntzan̈ cuarto chiꞌ, scorredoral yedꞌ sventenail dꞌa spatictac. 25 metro yajoch scalleal, 12 metro yedꞌ nan̈alxo slevanil. 37 A scorredoral qꞌuelcꞌumbꞌa yaj yedꞌ jun bꞌabꞌel amacꞌ. Ayoch yechel teꞌ palma dꞌa sattac dꞌa junjun spacꞌul. A dꞌa jun puerta chiꞌ ay vajxaqueꞌ bꞌachquiltac sqꞌuecꞌoch dꞌay.

38 Ay jun cuarto junn̈ej yaj yedꞌ jun corredor chiꞌ dꞌa junjun puerta. Ataꞌ sbꞌicchaj nocꞌ nocꞌ tzꞌacꞌji silabꞌil. 39 A dꞌa corredor dꞌa stiꞌ puerta chiꞌ, ay chan̈eꞌ mexa qꞌueen latzꞌbꞌilqꞌuei, chabꞌchabꞌ dꞌa junjun pacꞌan̈. A dꞌa yibꞌan̈ juntzan̈ mexa chiꞌ, ataꞌ smiljicham nocꞌ nocꞌ sn̈usjitzꞌa masanil silabꞌil, nocꞌ silabꞌ yic tzꞌacꞌji tup mul yedꞌ nocꞌ silabꞌ tzꞌacꞌji stojoloc mul. 40 A dꞌa spatiquel corredor dꞌa puerta dꞌa stojolal norte chiꞌ, ay chabꞌ qꞌuen qꞌueen icha mexa dꞌa junjun pacꞌan̈, 41 syalelcꞌochi, ay chan̈eꞌ juntzan̈ qꞌueen chiꞌ dꞌa yool yedꞌ chan̈eꞌ dꞌa spatiquel jun corredor chiꞌ. Ay vajxaqueꞌ mexa chiꞌ dꞌa smasanil, aton dꞌa yibꞌan̈ juntzan̈ chiꞌ smiljicham nocꞌ silabꞌ. 42 A chan̈eꞌ mexa bꞌaj smiljicham nocꞌ nocꞌ sn̈usjitzꞌa masanil silabꞌil, a qꞌuen qꞌueen tzeybꞌil ayoch dꞌay. 75 centímetro sat schan̈il pacꞌan̈, 50 centímetro schaan̈il steel junjun. A dꞌa yibꞌan̈ juntzan̈ chiꞌ, ataꞌ tzꞌacꞌjiqꞌue yamcꞌabꞌ scꞌanchaji ayic smiljicham nocꞌ silabꞌ chiꞌ. 43 A dꞌa yol jun corredor chiꞌ, ay juntzan̈ qꞌuen gancho locjabꞌqꞌue dꞌa junjun pacꞌan̈, 25 centímetro steel junjun qꞌueen. Masanil nocꞌ chibꞌej tzꞌacꞌji silabꞌil, tzꞌacꞌjiqꞌue nocꞌ dꞌa yibꞌan̈ juntzan̈ qꞌueen mexa chiꞌ.

44 Ix lajvi chiꞌ, ix in yicꞌanoch vin̈ dꞌa schabꞌil amacꞌ. Ataꞌ ay chabꞌ cuarto qꞌuelanelta dꞌa stojolal bꞌabꞌel amacꞌ. Ay jun dꞌa slacꞌanil puerta dꞌa norte, qꞌuelanbꞌat dꞌa stojolal sur. Axo pax junxo, a dꞌa slacꞌanil puerta dꞌa stojolal sur ay, qꞌuelanbꞌat dꞌa stojolal norte.

45 Ix yalan vin̈ dꞌayin icha tic: A jun cuarto qꞌuelanbꞌat dꞌa stojolal sur chiꞌ, a ebꞌ vin̈ sacerdote smunlaj dꞌa templo ay yicoꞌ. 46 Axo jun cuarto qꞌuelanbꞌat dꞌa stojolal norte, yic ebꞌ vin̈ sacerdote smunlaj dꞌa altar bꞌaj sn̈usji nocꞌ silabꞌ. Masanil ebꞌ vin̈ sacerdote yin̈tilal vin̈aj Sadoc, an̈ej ebꞌ vin̈ dꞌa scal ebꞌ yin̈tilal vin̈aj Leví syal yacꞌan servil dꞌa yichan̈ Jehová, xchi jun vin̈ chiꞌ dꞌayin.

47 Ix lajvi chiꞌ, ix yechtan jun schabꞌil amacꞌ vin̈. Lajann̈ej yechel schan̈il pacꞌan̈, 50 metro yaji. Axo altar bꞌaj sn̈usji silabꞌ, a dꞌa yichan̈ templo ayeqꞌui. 48 Ix in yicꞌbꞌat jun vin̈ vinac chiꞌ dꞌa scorredoral templo, ix yechtan spatictac jun corredor chiꞌ vin̈, nan̈al yoxil metro spimal. Axo spuertail, uqueꞌ metro sat. A sattac ay dꞌa stiꞌ puerta chiꞌ, nan̈al schabꞌil metro ayelta dꞌa junjun pacꞌan̈. 49 A jun corredor chiꞌ, lajun̈eꞌ metro slevanil, vaqueꞌ metro yool. Bꞌachquiltac sqꞌuei. Ay chabꞌ qꞌuen nivac oy dꞌa stiꞌ spuertail, junjun dꞌa junjun pacꞌan̈.