5 Ix lajvi chiꞌ, ix yechtan spimal spatictac jun templo chiꞌ vin̈, oxeꞌ metro spimal. A dꞌa spatictac templo chiꞌ, ay juntzan̈ cuarto, chabꞌ metro yaj yich junjun, junn̈ej yaj yedꞌ templo chiꞌ. 6 A juntzan̈ cuarto chiꞌ, ayqꞌue jun dꞌa yibꞌan̈ junxo, oxeꞌ piso yaji, axo dꞌa junjun piso, ay 30 cuarto. Axo dꞌa sattac templo chiꞌ lotzanoch junjun piso. A dꞌa yibꞌan̈ juntzan̈ chiꞌ, ataꞌ tzꞌoch spatzabꞌil junjun cuarto, yuj chiꞌ max ochlaj dꞌa yool. 7 A juntzan̈ cuarto ay dꞌa schabꞌil piso ayoch dꞌa spatictac templo chiꞌ, levan yol dꞌa yichan̈ juntzan̈ ay dꞌa bꞌabꞌel piso. Axo juntzan̈xo dꞌa yoxil piso, nivan yol dꞌa yichan̈ juntzan̈ dꞌa schabꞌil piso chiꞌ. Ay jun cꞌooch bꞌe sqꞌue dꞌa bꞌabꞌel piso, sqꞌue dꞌa schabꞌil, masanto sqꞌuecꞌoch dꞌa yoxil piso. 8-11 Ix vilani to a templo bꞌobꞌilqꞌue dꞌa yibꞌan̈ jun yich, oxeꞌ metro schaan̈il yajqꞌue jun yich chiꞌ. An̈ejaꞌ jun chiꞌ ayoch yichoc juntzan̈ cuarto ay dꞌa spatictac templo chiꞌ. Axo jun yich chiꞌ nan̈al yoxil metro bꞌechanel dꞌa spatiquel juntzan̈ cuarto chiꞌ. Ay junxo amacꞌ ayoch dꞌa spatictac yich templo chiꞌ yedꞌ dꞌa scal juntzan̈ scuarto ebꞌ sacerdote, 10 metro sat. Ay spuertail juntzan̈ cuarto dꞌa spatictac templo chiꞌ, tzꞌelul dꞌa amacꞌ ay dꞌa spatictac chiꞌ. Ay jun puerta dꞌa stojolal norte, ay pax junxo dꞌa stojolal sur.

12 A dꞌa stojolal bꞌaj tzꞌem cꞌu dꞌa stojolal jun amacꞌ dꞌa spatictac templo chiꞌ, ay jun nivan cuarto 35 metro sat, 45 metro scꞌatul yool. A yichtac, nan̈al yoxil metro spimal.

13 Ix lajvi chiꞌ, ix yechtan scꞌatul templo chiꞌ vin̈. A scꞌatul chiꞌ 50 metro. Axo jun amacꞌ dꞌa spatic templo chiꞌ masanto dꞌa jun cuarto dꞌa stojolal bꞌaj tzꞌem cꞌu yedꞌ pax spimal yichtac, 50 metro dꞌa smasanil. 14 A dꞌa sat jun templo chiꞌ yedꞌ yamaqꞌuil stiꞌ ay dꞌa stojolal bꞌaj sjavi cꞌu, 50 metro pax jun chiꞌ smasanil. 15 Ix lajvi chiꞌ, ix yechtan scꞌatul jun nivan cuarto vin̈, jun ay dꞌa spatic templo qꞌuelancot dꞌa amacꞌ yedꞌ yichtac, 50 metro smasanil.

A chabꞌ cuarto dꞌa yol templo yedꞌ scorredoral qꞌuelanbꞌat dꞌa amacꞌ, 16 ayoch teꞌ chemteꞌ dꞌa spatictac. Ay sventenail yoxil, cotac sventenail chiꞌ. Sbꞌatn̈ej teꞌ chemteꞌ dꞌa tiꞌ puerta masanto dꞌa yool, ayn̈ejoch teꞌ dꞌa sat yichtac smasanil. Sbꞌatn̈ej teꞌ dꞌa spisoal, sqꞌuecꞌoch teꞌ dꞌa sventenail chiꞌ. A juntzan̈ sventenail chiꞌ ay smacul dꞌa spatiqueli, xayayi yajochi. 17 Aypaxoch teꞌ chemteꞌ dꞌa yichtac dꞌa yol bꞌabꞌel cuarto dꞌa yibꞌan̈ puerta tzꞌoch dꞌa yol schabꞌil cuarto. 18 Majnaquel sattac teꞌ chemteꞌ chiꞌ yuj yechel ebꞌ querubín yedꞌ pax yechel teꞌ palma. Jun yechel teꞌ palma chiꞌ, jun yechel querubín chiꞌ, ichan̈ej chiꞌ yajoch smasanil. Chabꞌchabꞌ sat junjun querubín chiꞌ. 19 A jun sat, lajan yilji icha sat anima, qꞌuelanoch dꞌa yechel teꞌ palma chiꞌ. Axo junxo, lajan icha yilji sat nocꞌ choj, qꞌuelanpaxoch dꞌa junxo yechel teꞌ palma chiꞌ. Ichan̈ej chiꞌ yajoch dꞌa yol templo chiꞌ. 20 Sbꞌatn̈ej juntzan̈ yechel dꞌa piso masanto dꞌa jolom puerta. 21 A yoyal spuertail jun bꞌabꞌel cuarto chiꞌ, lajan yaj teꞌ schabꞌil, chan̈ tzalan̈ yaj teꞌ.

A dꞌa yichan̈ jun cuarto yicn̈ej Jehová yaji, ay jun tas lajan val yilji 22 icha junoc altar nabꞌa teꞌ, jun metro schan̈il pacꞌan̈, nan̈al schabꞌil metro yajqꞌue schaan̈il. A schiquintac, pax yich yedꞌ spatictac, nabꞌa teꞌ. Ix yalan jun vin̈ chiꞌ dꞌayin: Aton jun mexa tic ayoch dꞌa yichan̈ Jehová, xchi vin̈.

23 A spuertail bꞌabꞌel cuarto yedꞌ spuertail jun cuarto yicn̈ej Dios yaji, chabꞌ jen̈an yaji. 24 Axo junjun jen̈an chiꞌ, chabꞌchabꞌ macan̈ yaji, ayoch svisagreal dꞌa snan̈al. 25 A dꞌa sattac spuertail jun bꞌabꞌel cuarto chiꞌ, ayoch yechel querubín yedꞌ yechel teꞌ palma. Lajan yilji yedꞌ juntzan̈ ayoch dꞌa sattac yichtac chiꞌ. A dꞌa yichan̈elta spuertail scorredoral ayqꞌue spatil nabꞌa teꞌ. 26 A dꞌa junjun pacꞌan̈ scorredoral chiꞌ, ay sventenail cotac sat. Aypaxoch yechel teꞌ palma dꞌa sattac yichtac chiꞌ. A sventenail juntzan̈ cotac cuarto oyanoch dꞌa spatic templo chiꞌ, ayoch smacul dꞌa spatic, xayayi yajochi.