A juntzan̈ pat dꞌa patictac templo
42
Ix lajvi chiꞌ, ix in yicꞌanelta vin̈ dꞌa amacꞌ dꞌa spatictac templo dꞌa stojolal norte. Ix in yicꞌanoch vin̈ dꞌa yol chabꞌ pat dꞌa spatiquel amacꞌ chiꞌ yedꞌ dꞌa stojolal norte dꞌa jun nivan cuarto dꞌa spatic templo chiꞌ. 2 A chabꞌ pat dꞌa stojolal norte chiꞌ, 50 metro scꞌatul, 25 metro sat. 3 A jun pat scan dꞌa stiꞌ jun amacꞌ ay dꞌa spatictac templo chiꞌ, 10 metro sat. Axo junxo pat, a dꞌa stojolal bꞌaj latzꞌbꞌilem qꞌuen qꞌueen dꞌa bꞌabꞌel amacꞌ scani. Oxeꞌ piso yaj junjun pat chiꞌ. Junjun piso sqꞌuei, yunen̈ej yool dꞌa yichan̈ jun ay dꞌa yalan̈. 4 A dꞌa scal juntzan̈ pat chiꞌ, ay jun calle, oyeꞌ metro sat, 50 metro steel, tzꞌochn̈ejcꞌoch dꞌa yolochi. A spuertail juntzan̈ cuarto chiꞌ, a dꞌa stojolal norte ayochi. 5 A juntzan̈ cuarto dꞌa yoxil piso, yunen̈ej dꞌa yichan̈ juntzan̈xo dꞌa schabꞌil piso ay dꞌa yalan̈, yujto ay scorredoral, yuj chiꞌ yunexon̈ej yool. 6 Oxeꞌ piso yaj juntzan̈ pat chiꞌ, palta malaj yoyal icha yoyal juntzan̈ cuarto ay dꞌa spatictac jun bꞌabꞌel amacꞌ, yuj chiꞌ a jun piso dꞌa yibꞌan̈, yunen̈ej yol dꞌa yichan̈ jun ay dꞌa snan̈al, axo jun snan̈al chiꞌ yunen̈ej dꞌa yichan̈ jun ay dꞌa yalan̈.7 A jun pat ayoch dꞌa stiꞌ jun bꞌabꞌel amacꞌ chiꞌ, tzꞌecꞌ dꞌa yichan̈ junxo pat, 25 metro scꞌatul, junn̈ej sbꞌat cꞌatan yedꞌ smuroal stitac bꞌabꞌel amacꞌ. 8 Yujto a jun pat ay dꞌa stzꞌey bꞌabꞌel amacꞌ chiꞌ, 25 metron̈ej scꞌatul, axo pax junxo pat ay dꞌa spatic templo chiꞌ, 50 metro scꞌatul. 9 A juntzan̈ cuarto dꞌa bꞌabꞌel piso, ay spuertail yic tzon̈ el dꞌa bꞌabꞌel amacꞌ, dꞌa jun pacꞌan̈ ay dꞌa stojolal bꞌaj sjavi cꞌu, 10 bꞌaj tzꞌelul jun muro dꞌa stiꞌ amacꞌ chiꞌ.
Axo dꞌa stojolal sur, dꞌa stiꞌ jun amacꞌ dꞌa spatictac templo yedꞌ jun nivan cuarto, ataꞌ ay pax chabꞌxo pat. 11 Lajann̈ej yaj yechel yedꞌ sbꞌonabꞌil, icha chabꞌ pat dꞌa stojolal norte. Lajann̈ej yaj bꞌaj tzon̈ ochi yedꞌ bꞌaj tzon̈ eli yedꞌ jun scalleal dꞌa scal chabꞌ pat chiꞌ. 12 A tzon̈ och dꞌa juntzan̈ cuarto dꞌa stojolal sur, ay jun puerta bꞌaj schael yich jun scalleal chiꞌ bꞌaj tzꞌelul jun smuroal yich, aton jun muro chiꞌ smacan dꞌa stojolal bꞌaj sjavi cꞌu.
13 Ix yalan jun vin̈ chiꞌ dꞌayin icha tic: A jun pat dꞌa stojolal norte yedꞌ jun ay dꞌa stojolal sur, aton juntzan̈ ay dꞌa stitac amacꞌ dꞌa spatictac templo, an̈ej ebꞌ vin̈ sacerdote ay yicoꞌ. Ataꞌ schi nocꞌ silabꞌ ebꞌ vin̈ to an̈ej Jehová ay yicoꞌ, yujto a ebꞌ vin̈ tzꞌacꞌan servil Jehová. Ataꞌ syacꞌpaxoch ebꞌ vin̈ juntzan̈ tas to yic Jehová yaji, aton ixim trigo tzꞌacꞌji ofrendail, ixim tzꞌacꞌji yedꞌ nocꞌ silabꞌ tzꞌacꞌji yuj yacꞌji tup mul yedꞌ nocꞌ silabꞌ tzꞌacꞌji yuj stojoloc mul. A juntzan̈ cuarto bꞌaj tzꞌacꞌji juntzan̈ ofrenda chiꞌ yic Jehová yaji. 14 Tato tzꞌoch ebꞌ vin̈ sacerdote dꞌa yol templo chiꞌ, max yal-laj yel ebꞌ vin̈ dꞌa jun bꞌabꞌel amacꞌ ayic manto sqꞌuexel spichul ebꞌ vin̈ syacꞌochi ayic tzꞌoch ebꞌ vin̈ munlajel dꞌa yol templo chiꞌ. Yujto a spichul ebꞌ vin̈ chiꞌ, nivan yelcꞌochi, yuj chiꞌ max yal-laj yel ebꞌ vin̈ dꞌa scal ebꞌ anima yedꞌoc. Yovalil chꞌoc spichul ebꞌ vin̈ syacꞌochi ayic tzꞌel ebꞌ vin̈, xchi vin̈ dꞌayin.
A yechel spatictac templo
15 Ayic ix lajvi yechtan yol templo chiꞌ vin̈, ix in yicꞌanelta vin̈ dꞌa jun puerta ay dꞌa stojolal bꞌaj sjavi cꞌu. Ix lajvi chiꞌ ix och ijan vin̈ yechtan lum spatictaquel templo chiꞌ. 16 A jun teꞌ aj yedꞌnac vin̈, a teꞌ ix yacꞌlabꞌej vin̈ yechtani. A jun pacꞌan̈ dꞌa stojolal bꞌaj sjavi cꞌu, 250 metro yoc. 17 Ix yechtan pax junxo pacꞌan̈ vin̈ dꞌa stojolal norte. A jun chiꞌ an̈ejaꞌ 250 metro yoc. 18 Axo pax jun pacꞌan̈xo dꞌa stojolal sur, an̈ejaꞌ 250 metro yoc. 19 Axo jun slajvubꞌ dꞌa stojolal bꞌaj tzꞌem cꞌu, an̈ejaꞌ 250 metro yoc. 20 Ix yechtejn̈ej vin̈ schan̈il pacꞌan̈. A smuroal ayoch dꞌa spatictac slumal templo chiꞌ, 250 metro junjun pacꞌan̈. A jun muro chiꞌ smacancan jun lugar yic Dios yaj chiꞌ, axo spatiquel muro chiꞌ, comon yaji.