Ochnac stziquiquial Jehová dꞌa templo
43
Ix lajvi chiꞌ ix in yicꞌanxibꞌat vin̈ dꞌa jun puerta dꞌa stojolal bꞌaj tzꞌem cꞌu. 2 Ix vilan stziquiquial Jehová co Diosal a on̈ israel on̈ tic, dꞌa stojolal bꞌaj tzꞌem cꞌu chiꞌ. Te chaan̈ scꞌan̈i, icha scꞌan̈ yem aꞌ nivac pajav. Copopi ix aj yilji sat luum yuuj. 3 A tas ix vil chiꞌ, lajan val icha jun ix vilaꞌ ayic ix javi Jehová ul yacꞌan satel Jerusalén, lajan pax icha jun ix vil dꞌa stiꞌ aꞌ nivan Quebar. Ix in em lachnaj dꞌa sat lum yuuj. 4 A stziquiquial Jehová chiꞌ, ix och dꞌa yol templo dꞌa jun puerta dꞌa stojolal bꞌaj sjavi cꞌu.5 Yuj chiꞌ ix vabꞌi to a Yespíritu Dios ix in icꞌanqꞌue vaan, ix in yicꞌanoch dꞌa jun schabꞌil amacꞌ, ix vilani, bꞌudꞌjinaquel yol templo chiꞌ yuj stziquiquial Jehová chiꞌ. 6 Ix lajvi chiꞌ, ix vabꞌani, ato dꞌa yol templo chiꞌ ay jun mach ix lolonelta dꞌayin. Axo jun vin̈ vinac chiꞌ lin̈anoch vin̈ dꞌa in tzꞌey. 7 Ix yalan icha tic: Ach anima, aton jun lugar tic bꞌaj ay in despacho, bꞌaj ol vacꞌ reyal. A tic ol in cajnaj dꞌa juneln̈ej dꞌa e cal a ex israel ex tic. A ex tic yedꞌ ebꞌ e reyal, man̈xo ol in e patiquejel-laj yuj eyoch ejmelal dꞌa comon dios yedꞌ e mucan ebꞌ e reyal dꞌa slacꞌanil in templo tic, icha e cꞌulejnac dꞌa pecataxo. 8 A pecatax chiꞌ sbꞌonacqꞌue spalacio ebꞌ dꞌa stzꞌey in templo. Junn̈ej muro aycan dꞌa scal spuertail in templo yedꞌ spuertail spalacio ebꞌ chiꞌ. Ix in alji chucal yuj schucal sbꞌeybꞌal ebꞌ yajbꞌentac dꞌa yol in sat. Yuj chiꞌ ix cot voval dꞌa ebꞌ, ix in satanel ebꞌ. 9 Axo ticnaic yactejocabꞌ ebꞌ yoch ejmelal dꞌa scomon diosal, syactanpax ebꞌ smucan ebꞌ sreyal dꞌa in tzꞌey, yic ol in cajnaj dꞌa scal ebꞌ dꞌa juneln̈ej. 10 A ticnaic ach anima, al dꞌa ebꞌ etisraelal chajtil yaj templo ix ilaꞌ, yic vachꞌ scham yilan ebꞌ, yic sqꞌuixvi ebꞌ yuj schucal. 11 Tato ol qꞌuixvoc ebꞌ yuj tas scꞌulej chiꞌ, tzalan dꞌa ebꞌ chajtil yaj in templo yedꞌ tastac ay dꞌa yool, chajtil yaj spuertail. Syalelcꞌochi, chajtil yaj templo chiꞌ smasanil, tas yaj pax juntzan̈ schecnabꞌilal yovalil scꞌanabꞌajaji. Tzꞌibꞌej yechel masanil juntzan̈ chiꞌ, yic vachꞌ ol nachajel yuj ebꞌ sicꞌlabꞌil yic ol sbꞌo ebꞌ icha yaj chiꞌ. Tza tzꞌibꞌanpax masanil juntzan̈ checnabꞌil yic scꞌanabꞌajej ebꞌ. 12 Aton val juntzan̈ tic checnabꞌil yuj in templo: Masanil lum tzalan dꞌa spatictac templo chiꞌ, juneln̈ej to vic yaj luum, xchi Jehová dꞌayin.
Jun altar
13 A juntzan̈ echlabꞌ ix cꞌanchaj dꞌa templo, aꞌ ix cꞌanchaj pax dꞌa yechel jun altar dꞌa yamaqꞌuil templo chiꞌ. Aton yechel jun altar chiꞌ: A cimientoal yich, nan̈al metro ayem dꞌa yol lum, nan̈al pax metro yajel dꞌa spatic yichan̈. Axo dꞌa stiꞌ jun ayel chiꞌ ay jabꞌxo tzalanqꞌue dꞌa stitac, 25 centímetro yajqꞌuei. 14 A jantac yajqꞌue jun bꞌabꞌel bꞌachan̈ scot dꞌa yich, jun metro yajqꞌuei, nan̈al metro yajel dꞌa spatic bꞌaj sbꞌat junxo bꞌachan̈. Axo jun schabꞌil bꞌachan̈ chiꞌ, chabꞌ metro yajqꞌuei, nan̈al metro yajel dꞌa spatic bꞌaj sbꞌat junxo bꞌachan̈. Axo jun yoxil bꞌachan̈ chiꞌ an̈ejaꞌ chabꞌ metro yajqꞌuei, 15 aton taꞌ sn̈usjitzꞌa silabꞌ. A jun chiꞌ, chabꞌ metro yajqꞌue schaan̈il. Ay schiquintac dꞌa junjun yesquinail, chaan̈ yajqꞌue dꞌa yibꞌan̈ bꞌaj stzꞌa silabꞌ chiꞌ. 16 A jun chiꞌ vaqueꞌ metro junjun pacꞌan̈. 17 Axo schabꞌil bꞌachan̈, uqueꞌ metro junjun pacꞌan̈. Axo dꞌa stitac, ay jabꞌxo tzalanqꞌuei, 25 centímetro yajqꞌuei. Axo scꞌoochal sqꞌuecꞌoch dꞌa altar chiꞌ, a dꞌa stojolal bꞌaj sjavi cꞌu scani.
18 Ix lajvi chiꞌ, ix yalan jun vin̈ vinac chiꞌ dꞌayin: Ach anima, a Jehová Yajal tzꞌalan icha tic: Ayic bꞌobꞌilxo jun altar chiꞌ, yovalil scꞌanabꞌajaj juntzan̈ checnabꞌil tic: Sn̈usjitzꞌa junoc nocꞌ nocꞌ silabꞌil dꞌa yibꞌan̈, stzicchajoch schiqꞌuil nocꞌ dꞌay. 19 A in Jehová in svalaꞌ to a dꞌa ebꞌ sacerdote levita yin̈tilal Sadoc, aton ebꞌ tzꞌoch dꞌa vichan̈ in yacꞌan servil, syacꞌan junoc nocꞌ quelem vacax ebꞌ silabꞌil yuj yacꞌji tup mul. 20 Slajvi chiꞌ, syicꞌanqꞌue jabꞌoc schiqꞌuil nocꞌ ebꞌ, stzicanoch ebꞌ dꞌa schiquintac altar chiꞌ schan̈il yedꞌ dꞌa schiquintac yic schabꞌil bꞌachan̈ yich yedꞌ dꞌa spatictac yich altar chiꞌ smasanil. Icha chiꞌ tzꞌaj sacbꞌican jun altar chiꞌ yic tzꞌochcan vicoc. 21 Slajvi chiꞌ syicꞌanel nocꞌ vacax chiꞌ ebꞌ, nocꞌ tzꞌacꞌji silabꞌil chiꞌ, sn̈usantzꞌa nocꞌ ebꞌ dꞌa spatiquel templo dꞌa jun lugar chequel yaji. 22 Axo dꞌa junxo cꞌu, sn̈usantzꞌa junoc nocꞌ chiva ebꞌ, junoc nocꞌ malaj jabꞌoc spaltail yuj yacꞌji tup mul. Icha chiꞌ tzꞌaj sacbꞌitan jun altar chiꞌ ebꞌ sacerdote chiꞌ, icha syutej ebꞌ yedꞌ nocꞌ vacax. 23 Ayic slajvi juntzan̈ chiꞌ, syicꞌancot junoc nocꞌ quelem vacax ebꞌ yedꞌ junoc nocꞌ chꞌac calnel, malajocabꞌ jabꞌoc spaltail nocꞌ schavan̈il. 24 Icha chiꞌ tzꞌaj yicꞌancot nocꞌ ebꞌ dꞌayin. Syacꞌanoch yatzꞌamil nocꞌ ebꞌ, sn̈usantzꞌa nocꞌ ebꞌ yuj in yicꞌanchaan̈. 25 Uqueꞌ cꞌual sn̈ustzꞌa nocꞌ silabꞌ chiꞌ ebꞌ, syacꞌanpax junoc nocꞌ chiva ebꞌ silabꞌil, junoc nocꞌ quelem vacax yedꞌ junoc nocꞌ chꞌac calnel yuj yacꞌji tup mul. Malajocabꞌ jabꞌoc spaltail nocꞌ yoxvan̈il. 26 Ichan̈ej chiꞌ scꞌulej ebꞌ dꞌa uqueꞌ cꞌual chiꞌ, yuj sacbꞌitan jun altar chiꞌ ebꞌ yic tzꞌochcan vicoc. 27 Axo slajvi yuquil cꞌual chiꞌ, axo dꞌa svajxaquil cꞌual yedꞌ sbꞌeyn̈ejbꞌati, syacꞌn̈ej nocꞌ silabꞌ chiꞌ ebꞌ, nocꞌ stzꞌa smasanil yedꞌ silabꞌ yic juncꞌolal. Ichato chiꞌ a in Jehová in svalaꞌ to tzex in cha dꞌa tzalajcꞌolal, xchi Jehová, xchi vin̈ dꞌayin.