2 Ataꞌ ix yal Jehová dꞌayin icha tic: A jun puerta tic, ol cann̈ej macan, malaj bꞌaqꞌuin̈ ol jacchajoc. Malaj mach ol yal yoch dꞌay, yujto a dꞌa jun tic ix in och a in sDiosal in Israel tic. 3 An̈ej vin̈ yajalil chon̈abꞌ syal scꞌoch vael taꞌ yic schiꞌan nocꞌ silabꞌ vin̈ dꞌa vichan̈. A dꞌa corredor tzꞌoch vin̈, tzꞌochcꞌoch vin̈ dꞌa jun bꞌabꞌel amacꞌ, an̈ejaꞌ ataꞌ stzꞌelxita vin̈, xchi Jehová chiꞌ dꞌayin.

4 Ix lajvi chiꞌ ix in yicꞌanbꞌat jun vin̈ vinac chiꞌ dꞌa jun puerta dꞌa stojolal norte dꞌa yichan̈ templo. Ix vilani ix bꞌudꞌjiel yol templo chiꞌ yuj stziquiquial Jehová. Ayic ix vilan jun chiꞌ ix in em lachnaj dꞌa sat luum. 5 Ix yalanxi Jehová dꞌayin icha tic: Ach anima, scham val ilani, schampax abꞌan sleyal jun templo tic. Scham val ilani mach ebꞌ syal yoch dꞌa yol templo tic, mach pax ebꞌ max yal yochi.

6 Al dꞌa ebꞌ etisraelal chiꞌ to a in Jehová in sval icha tic: Ex in chon̈abꞌ Israel, te pit ex, actejec e bꞌeybꞌalan tas yajbꞌentac. 7 A ex tic ix eyixtejbꞌat in templo. Comonxon̈ej ix e chaoch ebꞌ chꞌoc chon̈abꞌil dꞌa yool, aton juntzan̈ anima malaj yechel in trato dꞌa spensar yedꞌ dꞌa snivanil. Ix eyixtejbꞌat eyacꞌan silabꞌ dꞌayin, aton xepual nocꞌ silabꞌ yedꞌ schiqꞌuil nocꞌ, palta max e cꞌanabꞌajej in trato, axo tas yajbꞌentac tze cꞌulej. 8 Maj e cꞌanabꞌajej in checnabꞌil yuj tas vic yaji, palta to ix eyactejcan eyopisio chiꞌ dꞌa yol scꞌabꞌ ebꞌ chꞌoc chon̈abꞌil, xchi Jehová, xa chi.

9 Yuj chiꞌ a in Jehová in sval icha tic: Man̈xa bꞌaqꞌuin̈ ol och junoc anima chꞌoc chon̈abꞌil dꞌa in templo, aton ebꞌ cajan dꞌa e cal, ebꞌ man̈ ayococh yechel in trato dꞌa spensar yedꞌ dꞌa snivanil. 10 A ebꞌ levita ix in actancani ayic in yactancan masanil ebꞌ yetisraelal ebꞌ, yic tzꞌoch ebꞌ ejmelal dꞌa juntzan̈ comon dios, ol scha spac ebꞌ yuj schucal chiꞌ. 11 Syal smunlaj ebꞌ yic stan̈vej spuertail in templo yedꞌ dꞌa junocxo munlajel dꞌa in templo chiꞌ. Syal smilancham nocꞌ silabꞌ ebꞌ, aton nocꞌ sn̈usjitzꞌa silabꞌil dꞌayin yedꞌ juntzan̈xo nocꞌ silabꞌ syacꞌ ebꞌ chon̈abꞌ. Yovalil bꞌecan scꞌol ebꞌ yacꞌan servil ebꞌ yetchon̈abꞌ chiꞌ. 12 A dꞌa yalan̈taxo yacꞌnac servil ebꞌ yetisraelal ebꞌ yic tzꞌoch ebꞌ ejmelal dꞌa juntzan̈ comon dios. Icha chiꞌ ix aj scuchbꞌan ebꞌ yetisraelal ebꞌ chiꞌ dꞌa chucal. Yuj chiꞌ a in Jehová Yajal in svacꞌ in tiꞌ to ol scha spac ebꞌ yuj smul chiꞌ. 13 Max yal-laj yoch ebꞌ dꞌa vichan̈ in yacꞌan servil dꞌa sacerdoteal, max yalpaxlaj syaman juntzan̈ tas nivac yelcꞌoch ebꞌ, aton juntzan̈ vic yaji. Yovalil ol javoc qꞌuixvelal dꞌa yibꞌan̈ ebꞌ yuj schucalil scꞌulejnac chiꞌ. 14 A ticnaic, ol vacꞌoch ebꞌ stan̈vumaloc in templo, masanil comon munlajel ol vacꞌ sbꞌo ebꞌ taꞌ.

15 Palta a ebꞌ sacerdote levita, yin̈tilal vin̈aj Sadoc, a ebꞌ chiꞌ ix in yacꞌn̈ej servil ebꞌ, vachꞌchom a ebꞌ yetisraelal ebꞌ ix in yactejcan ebꞌ. Yuj chiꞌ a in Jehová Yajal in svalaꞌ to an̈ej ebꞌ chiꞌ syal scꞌoch dꞌa vichan̈ yic tzin yacꞌan servil. Syal yoch ebꞌ dꞌa vichan̈ yic syacꞌ xepual nocꞌ nocꞌ yedꞌ schiqꞌuil nocꞌ silabꞌil dꞌayin. 16 An̈ej ebꞌ syal yoch dꞌa yol in templo yic tzin yacꞌan servil ebꞌ dꞌa tastac ay dꞌa yol templo chiꞌ. An̈ej ebꞌ syal yilan in munlajel taꞌ. 17 Ayic tzꞌoch ebꞌ dꞌa spuertail schabꞌil amacꞌ, yovalil a pichul lino syacꞌoch ebꞌ. Ayic ayoch ebꞌ dꞌa yopisio taꞌ, ma dꞌa yol templo, max yal-laj a pichul lana syacꞌoch ebꞌ. 18 Yovalil ayqꞌue scꞌox ebꞌ nabꞌa lino. Yovalil lino pax yol svex ebꞌ ayochi. Mocabꞌ stzecꞌ snan̈al ebꞌ dꞌa junoc tas tzꞌicꞌan yel yalil. 19 Ayic manto elta ebꞌ dꞌa bꞌabꞌel amacꞌ, bꞌaj ayecꞌ ebꞌ yetchon̈abꞌ ebꞌ, yovalil syicꞌcanel spichul ebꞌ scꞌan dꞌa yopisio dꞌa yol templo chiꞌ, scan dꞌa yol juntzan̈ cuarto dꞌa yool chiꞌ. Axo junxo spichul ebꞌ syacꞌochi yic vachꞌ max ochcan smay jun pichul chiꞌ dꞌa ebꞌ ayecꞌ chiꞌ.

20 Max sjoxel-laj dꞌabꞌan sjolom ebꞌ. Scha qꞌuibꞌ xil sjolom ebꞌ chiꞌ, an̈ej sn̈itac sjoxel ebꞌ. 21 Malaj junoc ebꞌ sacerdote chiꞌ tzꞌucꞌan vino ayic tzꞌoch dꞌa schabꞌil amacꞌ. 22 Max yal yicꞌan ebꞌ ix ix chamnacxo yetbꞌeyum ebꞌ, ma ebꞌ ix actabꞌilcan yuj yetbꞌeyum, palta an̈ej junoc ix yetisraelal ebꞌ cobꞌesto syicꞌaꞌ, ma junoc ix yetbꞌeyum junoc yetsacerdoteal ebꞌ chamnacxo.

23 A ebꞌ sacerdote chiꞌ, yovalil scꞌaybꞌej ebꞌ in chon̈abꞌ ebꞌ yic syojtaquejel ebꞌ tas sicꞌbꞌilel vuuj yedꞌ tas man̈ sicꞌbꞌiloquel vuuj, tas vachꞌ yedꞌ tas man̈ vachꞌoc, icha yalan ley. 24 An̈ejaꞌ, tato ay bꞌaj tzꞌoch oval, a ebꞌ sbꞌoani icha yalan ley. Yovalil scꞌanabꞌajej sleyal juntzan̈ in qꞌuin̈ ebꞌ, scꞌanabꞌajej pax jun scꞌual icꞌoj ip ebꞌ, aton jun cꞌu vic yaji.

25 Malaj bꞌaqꞌuin̈ syam junoc snivanil chamnac ebꞌ yic max yixtejbꞌat sbꞌa ebꞌ, icha yalan ley. An̈ej tato a smam snun ebꞌ, ma junoc yuninal ebꞌ, ma yisil ebꞌ, ma junoc yucꞌtac ebꞌ, ma junoc yanabꞌ ebꞌ cobꞌesto schami, syal syaman ebꞌ. 26 Slajvi chiꞌ yovalil sacbꞌitej sbꞌa ebꞌ icha yalan ley, uqueꞌ cꞌual maxtzac ochlaj ebꞌ munlajel dꞌa yol in templo chiꞌ. 27 Ayic tzꞌochxi ebꞌ dꞌa yol in templo chiꞌ yic smunlajxi ebꞌ, a in Jehová in svalaꞌ, yovalil syacꞌ junoc nocꞌ silabꞌ ebꞌ yuj stupil smul.

28 Malaj junoc smacbꞌen ebꞌ sacerdote syicꞌ dꞌa e chon̈abꞌ, ichato a in ayin och smacbꞌenoc ebꞌ. 29 A svael ebꞌ sacerdote chiꞌ, aton tas tzꞌacꞌji dꞌayin yuj ebꞌ eyetchon̈abꞌ yedꞌ nocꞌ silabꞌ tzꞌacꞌji dꞌayin yuj yacꞌji tup mul yedꞌ nocꞌ tzꞌacꞌji stojoloc mul yedꞌ masanil silabꞌ syacꞌ ebꞌ yetisraelal ebꞌ dꞌayin. A juntzan̈ chiꞌ, yicn̈ej ebꞌ sacerdote chiꞌ yaji. 30 A ebꞌ sacerdote chiꞌ, a bꞌabꞌel sat avbꞌen te vachꞌ, yovalil scha ebꞌ yedꞌ masanil tas tzꞌacꞌji dꞌayin. Ayic sbꞌoan ixim pan ebꞌ in chon̈abꞌ, a ixim bꞌabꞌel sbꞌoi, a ixim syacꞌ ebꞌ dꞌa ebꞌ sacerdote chiꞌ yic vachꞌ svacꞌ in vachꞌcꞌolal dꞌa yibꞌan̈ ebꞌ. 31 A ebꞌ sacerdote chiꞌ, max yal-laj schiꞌan junoc nocꞌ much ebꞌ, ma junocxo nocꞌ nocꞌ scomon chami, mato milbꞌilcham yuj nocꞌ chium nocꞌ.