A lum luum yic Jehová yaji
45
1-3 Ayic tzꞌoch suerte yic spucchajecꞌ lum luum dꞌa junjun in̈tilal, yovalil chꞌoc tzꞌicꞌchajcanel jabꞌoc luum vic tzꞌajcan a in Jehová in tic, 12 kilómetro yedꞌ nan̈alxo steel luum, oyeꞌ kilómetro sat luum. Masanil jun lum chiꞌ, vic tzꞌajcan luum. A dꞌa snan̈al lum chiꞌ, ataꞌ tzꞌicꞌjicanel junoc macan̈ lum bꞌaj scan templo, 250 metro tzꞌaj lum dꞌa schan̈il pacꞌan̈. A dꞌa spatictac lum chiꞌ scan pax jabꞌoc lum colan tzꞌajcani, 25 metro sat. 4 A jun macan̈ lum chiꞌ yic ebꞌ sacerdote smunlaj dꞌa templo tzꞌaj luum, aton ebꞌ tzꞌoch dꞌa vichan̈ in yacꞌan servil. Ataꞌ syal sbꞌoanqꞌue spat ebꞌ dꞌa spatictac in templo chiꞌ. 5 An̈ejaꞌ tzꞌicꞌchajcanel junxo macan̈ lum luum, 12 kilómetro yedꞌ nan̈alxo steel, oyeꞌ kilómetro sat. A jun lum chiꞌ, yic ebꞌ levita tzꞌajcan luum, aton ebꞌ smunlaj dꞌa templo yic vachꞌ ay bꞌaj sbꞌoqꞌue spat ebꞌ bꞌaj scajnaji. 6 Axo dꞌa scostil lum vic yaji, yovalil scan junxo macan̈ luum. A jun lum chiꞌ yic chon̈abꞌ tzꞌajcan luum. 12 kilómetro yedꞌ nan̈alxo tzꞌaj steel luum, nan̈al yoxil kilómetro tzꞌaj sat luum, yic chon̈abꞌ Israel tzꞌajcan luum.A lum sluum vin̈ yajal
7 An̈ejtonaꞌ, ay chabꞌ macan̈ lum luum, yic vin̈ yajal tzꞌajcan luum. Ay jun macan̈ lum scan dꞌa stojolal bꞌaj sjavi cꞌu, axo junxo macan̈ luum, a dꞌa stojolal bꞌaj tzꞌem cꞌu scan luum, syalelcꞌochi aton dꞌa stzꞌey lum vic yaji yedꞌ dꞌa stzꞌey lum yic ebꞌ chon̈abꞌ. Lajan tzꞌaj steel luum yedꞌ lum yic junjun in̈tilal. 8 A jun macan̈ luum chiꞌ yic vin̈ yajal Israel tzꞌajcan luum. Yuj chiꞌ, a lum yic ebꞌ in chon̈abꞌ, man̈xo ol yiqꞌuecꞌ lum ebꞌ vin̈ yajal ebꞌ chiꞌ, palta ol can lum dꞌa junjun macan̈ in̈tilal.
A tas yovalil scꞌanabꞌajej ebꞌ vin̈ yajal
9 A in Jehová Yajal in svalaꞌ: Ex yajal Israel, man̈xo eyixtej ebꞌ in chon̈abꞌ, vachꞌn̈ejocabꞌ tzeyutej e bꞌa, tojoln̈ej tzeyutej e chꞌolbꞌitan junoc tasi. Actejec e tocꞌanecꞌ lum slum ebꞌ in chon̈abꞌ.
10 A echlabꞌ te tzꞌacan tze cꞌanaꞌ. 11 A eyechlabꞌ tze cꞌan dꞌa sat eyavbꞌen, lajanocabꞌ yool yedꞌ eyechlabꞌ tze cꞌan dꞌa tas aꞌ yaji. A nivan echlabꞌ, aton homer, 220 litro yool, a tzꞌacꞌan yechel masanil echlabꞌ. A jun homer chiꞌ, lajun̈eꞌ bato aꞌ tzꞌem dꞌa yool, lajun̈eꞌ pax efa sat avbꞌen tzꞌem dꞌay.
12 An̈ejaꞌ pax tas tzꞌechtaj yalil: A 20 gera, lajan yalil yedꞌ jun ciclo, axo pax 60 ciclo lajan yalil yedꞌ jun mina.* 13 Aton juntzan̈ ofrenda tic yovalil syacꞌ ebꞌ etisraelal: A ixim e trigo yedꞌ ixim e cebada 60 macan̈ tzeyutej ixim. Jun macan̈ ixim tzeyacꞌaꞌ. 14 Icha pax chiꞌ tzeyutej eyaceite, 100 macan̈ tzeyutej. Jun macan̈ tzeyacꞌpaxi. 15 Axo pax nocꞌ calnel sva bꞌaj yax an̈ an̈cꞌultac dꞌa yol yic Israel, jun nocꞌ tzeyiqꞌuel dꞌa scal 200 oc nocꞌ. A in Jehová in svalaꞌ, masanil juntzan̈ tic ol cꞌanchaj dꞌa ofrendail yedꞌ dꞌa silabꞌ stzꞌai yedꞌ dꞌa silabꞌ yic juncꞌolal yedꞌ silabꞌ yuj yacꞌji tup smul ebꞌ in chon̈abꞌ Israel.
16 Yovalil masanil in chon̈abꞌ Israel tzꞌacꞌan juntzan̈ ofrenda chiꞌ dꞌa vin̈ yajal yaj dꞌa scal ebꞌ. 17 A vin̈ yajal chiꞌ tzꞌacꞌan nocꞌ nocꞌ stzꞌa silabꞌil yedꞌ ixim trigo ofrendail yedꞌ vino tzꞌacꞌji ayic tzꞌalji qꞌuen uj, dꞌa cꞌual icꞌoj ip yedꞌ dꞌa juntzan̈ nivac qꞌuin̈ vic yaji. Yovalil syacꞌ pax silabꞌ vin̈ yic stup mul, ixim trigo ofrendail, silabꞌ stzꞌai, silabꞌ yic juncꞌolal yic vachꞌ tzꞌacꞌji tup schucalil ebꞌ yin̈tilal Israel.
A qꞌuin̈ yic snachajcot tas ajnac yelta ebꞌ israel dꞌa Egipto
18 A in Dios Yajal in svalaꞌ: A dꞌa bꞌabꞌel cꞌu yic bꞌabꞌel uj, yovalil tzeyacꞌ junoc nocꞌ quelem vacax malaj spaltail yic sacbꞌican in templo. 19 A vin̈ sat sacerdote tzꞌicꞌanqꞌue jabꞌoc schiqꞌuil nocꞌ vacax chiꞌ, aton nocꞌ ix acꞌji silabꞌil yuj yacꞌji tup mul, sucanoch schiqꞌuil nocꞌ vin̈ dꞌa smarcoal spuertail in templo, dꞌa spatictac schiquintac schan̈il yedꞌ dꞌa yoxmacan̈il yich altar chaan̈ ayqꞌuei yedꞌ dꞌa smarcoal spuertail chabꞌil amacꞌ. 20 An̈ejaꞌ icha chiꞌ tzꞌaj pax dꞌa yuquil cꞌual, yuj yaln̈ej mach tzꞌoch smul to man̈ scꞌanoc scꞌool, mato man̈ yojtacoc tato van yoch smul. Icha chiꞌ tzꞌaj sacbꞌicanel in templo chiꞌ. 21 Ayic 14 yoch bꞌabꞌel uj, tze chaanel yich qꞌuin̈ yic tze naancot tas ajnac eyelta dꞌa Egipto. Uqueꞌ cꞌual tze va ixim pan malaj yich. 22 A dꞌa jun cꞌual chiꞌ, a vin̈ yajal, yovalil syacꞌ junoc nocꞌ quelem vacax vin̈ silabꞌil yuj smul, yuj pax yic masanil ebꞌ chon̈abꞌ. 23 A dꞌa junjun cꞌu dꞌa uqueꞌ cꞌual qꞌuin̈ chiꞌ, yovalil syacꞌ ucvan̈ nocꞌ quelemtac vacax vin̈ yajal chiꞌ yedꞌ ucvan̈oc nocꞌ chꞌac calnel, aton nocꞌ malaj jabꞌoc spaltail. Sn̈usjitzꞌa nocꞌ silabꞌil dꞌayin. Tzꞌacꞌjipax junoc nocꞌ mam chiva dꞌa junjun cꞌu silabꞌil yuj yacꞌchaj tup mul. 24 A yedꞌ junjun nocꞌ vacax chiꞌ yedꞌ junjun nocꞌ calnel chiꞌ, tzꞌacꞌjipax 40 libraoc ixim trigo yedꞌ nan̈al schan̈il litrooc aceite.
Qꞌuin̈ yic chinama
25 An̈ejpaxaꞌ dꞌa uqueꞌ cꞌual qꞌuin̈ yic chinama, aton jun qꞌuin̈ schael yich dꞌa 15 yoch yuquil uj, a vin̈ yajal chiꞌ yovalil syacꞌn̈ej silabꞌ vin̈. Lajan sbꞌisul nocꞌ silabꞌ chiꞌ syacꞌ vin̈ dꞌa junjun cꞌu, icha nocꞌ syacꞌ vin̈ dꞌa qꞌuin̈ yic tze naancot tas ajnac eyelta dꞌa Egipto, aton nocꞌ tzꞌacꞌji yuj stupchaj mul, nocꞌ tzꞌacꞌji silabꞌil yedꞌ ixim trigo yedꞌ aceite ofrendail.