A tas yovalil sbꞌo vin̈ yajal ayic ay qꞌuin̈
46
A in Jehová Yajal in svalaꞌ: A jun spuertail schabꞌil amacꞌ dꞌa stojolal bꞌaj sjavi cꞌu, a dꞌa vaqueꞌ cꞌual munlajel, yovalil macann̈ej, an̈ej dꞌa scꞌual icꞌoj ip sjacvi yedꞌ dꞌa scꞌual yic tzꞌalji qꞌuen uj. 2 A vin̈ yajal chiꞌ tzꞌoch vin̈ dꞌa jun puerta dꞌa bꞌabꞌel amacꞌ, tzꞌoch vin̈ dꞌa jun corredor dꞌa stojolal bꞌaj sjavi cꞌu. Tzꞌoch lin̈an vin̈ dꞌa smarcoal jun puerta chiꞌ, yacbꞌan van sn̈usantzꞌa nocꞌ silabꞌ ebꞌ sacerdote yedꞌ nocꞌ silabꞌ yic juncꞌolal syacꞌ vin̈. Slajvi chiꞌ tzꞌoch vin̈ ejmelal dꞌayin bꞌaj ayecꞌ chiꞌ, ichato chiꞌ tzꞌel vin̈ dꞌa corredor chiꞌ, palta scann̈ej jacan jun puerta chiꞌ, masanto vanxo sqꞌuicꞌbꞌi smacchaji. 3 Axo dꞌa scꞌual icꞌoj ip yedꞌ dꞌa yic tzꞌalji qꞌuen uj, yovalil tzul och ebꞌ chon̈abꞌ ejmelal dꞌayin, dꞌa yichan̈ jun puerta chiꞌ. 4 A nocꞌ silabꞌ yovalil syacꞌ vin̈ yajal chiꞌ dꞌayin yic sn̈usjitzꞌa dꞌa scꞌual icꞌoj ip, vacvan̈ nocꞌ quelemtac calnel yedꞌ jun nocꞌ chꞌac calnel, malajocabꞌ jabꞌoc spaltail nocꞌ yucvan̈il. 5 Yovalil syacꞌ 40 libraoc ixim harina vin̈ yedꞌ nocꞌ chꞌac calnel chiꞌ. Axo yedꞌ nocꞌ quelemtac calnel chiꞌ, ato aꞌ jantac tzꞌel dꞌa scꞌol vin̈ yacꞌani. A yedꞌ 40 libraoc ixim harina, syacꞌ pax nan̈al schan̈il litro aceite vin̈. 6 Axo dꞌa scꞌual ayic tzꞌalji qꞌuen uj, yovalil syacꞌ junoc nocꞌ quelem vacax vin̈, vacvan̈oc nocꞌ quelemtac calnel yedꞌ junoc nocꞌ chꞌac calnel. Masanil juntzan̈ nocꞌ chiꞌ, malajocabꞌ spaltail nocꞌ. 7 A yedꞌ nocꞌ quelem vacax chiꞌ syacꞌ 40 libraoc ixim harina vin̈. Icha pax chiꞌ tzꞌaj yacꞌan jun nocꞌ chꞌac calnel chiꞌ vin̈. Axo pax yedꞌ nocꞌ quelemtac calnel chiꞌ, yaln̈ej jantac tzꞌel dꞌa scꞌol vin̈ yacꞌani. Axo yedꞌ junjun 40 libraoc ixim harina chiꞌ, syacꞌ nan̈al schan̈il litro aceite vin̈.8 Ayic tzꞌoch vin̈ yajal dꞌa spuertail schabꞌil amacꞌ chiꞌ, tzꞌoch vin̈ dꞌa corredor chiꞌ, an̈ejaꞌ taꞌ tzꞌelxi vin̈. 9 Ayic tzul och ebꞌ chon̈abꞌ ejmelal dꞌayin dꞌa junjun qꞌuin̈, yovalil a tic scꞌulej ebꞌ: A mach tzꞌoch dꞌa bꞌabꞌel amacꞌ dꞌa spuertail, dꞌa stojolal norte, a dꞌa puerta dꞌa stojolal sur tzꞌelxi. Axo mach tzꞌoch dꞌa puerta dꞌa stojolal sur chiꞌ, a dꞌa puerta dꞌa stojolal norte chiꞌ tzꞌelxi. Malaj junoc mach smeltzajxiel dꞌa puerta bꞌaj ix ochi, palta to tzꞌel dꞌa junxo puerta qꞌuelancot bꞌaj ix och chiꞌ. 10 A vin̈ yajal chiꞌ, yovalil tzꞌoch vin̈ yedꞌ ebꞌ chon̈abꞌ, tzꞌel pax vin̈ yedꞌ ebꞌ. 11 A dꞌa nivac qꞌuin̈ yedꞌ scꞌual molanil, syacꞌ 40 libraoc ixim harina vin̈ yajal chiꞌ yedꞌ junjun nocꞌ quelemtac vacax. Icha pax chiꞌ ixim syacꞌ vin̈ yedꞌ junjun nocꞌ chꞌac calnel. Axo pax yedꞌ junjun nocꞌ quelemtac calnel, yaln̈ej jantac tzꞌel dꞌa scol vin̈ yacꞌani. A yedꞌ junjun 40 libraoc ixim harina chiꞌ, syacꞌ pax nan̈aloc schan̈il litro aceite vin̈.
12 Ayic tzꞌel dꞌa scꞌol vin̈ yajal chiꞌ yacꞌan junoc nocꞌ silabꞌ dꞌayin, junoc nocꞌ sn̈usjitzꞌaoc, ma junoc nocꞌ yic juncꞌolal, yovalil sjacchaj puerta dꞌa stojolal bꞌaj sjavi cꞌu, syacꞌan silabꞌ vin̈ chiꞌ, icha syacꞌ vin̈ dꞌa scꞌual icꞌoj ip. Slajvi chiꞌ tzꞌelxita vin̈ dꞌa puerta chiꞌ, ichato chiꞌ smacchajxicani.
A ofrenda tzꞌacꞌji dꞌa junjun cꞌu
13-15 Junjun qꞌuin̈ibꞌalil dꞌa junjun cꞌu syacꞌ silabꞌ vin̈ yajal chiꞌ dꞌayin. Yovalil syacꞌ junoc nocꞌ quelem calnel vin̈, yic sn̈usjitzꞌa nocꞌ silabꞌil dꞌayin, jun abꞌil sqꞌuinal nocꞌ, malaj jabꞌoc spaltail nocꞌ. A yedꞌ jun nocꞌ quelem calnel chiꞌ, syacꞌ pax 14 libraoc ixim harina vin̈ yedꞌ junoc litro aceite secchajem dꞌa yibꞌan̈ ixim. A jun tic, yovalil scꞌanabꞌajej vin̈ dꞌa masanil tiempo.
A tas yovalil scꞌulej vin̈ yajal yedꞌ sluum
16 A in Jehová Yajal in svalaꞌ: Tato a vin̈ yajal chiꞌ siej jabꞌoc lum smacbꞌen dꞌa junoc yuninal, a jun lum chiꞌ tzꞌochcan smacbꞌenoc yuninal chiꞌ. 17 Palta tato a vin̈ yajal chiꞌ siej jabꞌoc lum dꞌa junoc schecabꞌ yic smacbꞌenej, masanto sjavi abꞌil yic tzꞌel tas dꞌa libre, ichato chiꞌ syicꞌanxi lum vin̈ yajal chiꞌ. Axo scan lum smacbꞌenoc ebꞌ yuninal vin̈. 18 A vin̈ yajal chiꞌ, malaj yalan yic vin̈ stocꞌanecꞌ smacbꞌen junocxo anima. A lum sluum vin̈, a lum syacꞌ vin̈ smacbꞌenoc ebꞌ yuninal. Icha chiꞌ, malaj ebꞌ malaj smacbꞌen scan dꞌa scal in chon̈abꞌ, xchi Jehová.
A juntzan̈ cusinu dꞌa templo
19 Ix lajvi chiꞌ, ix in yicꞌanbꞌat jun vin̈ vinac chiꞌ dꞌa yoloch stiꞌ jun puerta, dꞌa chabꞌ pat yic ebꞌ sacerdote scan dꞌa stojolal norte. Ix schꞌoxan vin̈ dꞌayin dꞌa stojolal bꞌaj tzꞌem cꞌu dꞌa spatic chabꞌ pat chiꞌ. 20 Ix yalan vin̈ dꞌayin icha tic: Aton dꞌa tic yovalil ol stzꞌan̈ nocꞌ silabꞌ ebꞌ sacerdote tzꞌacꞌji silabꞌil yuj yacꞌji tup mul, ma yuj stojoloc mul. A dꞌa tic ol bꞌochaj pax ixim harina tzꞌacꞌji ofrendail. Icha chiꞌ, max icꞌchajel juntzan̈ tastac chiꞌ dꞌa bꞌabꞌel amacꞌ, yic vachꞌ max ochcan stziquiquial juntzan̈ tas yic Dios yaj dꞌa ebꞌ anima, xchi vin̈ dꞌayin. 21 Ix lajvi chiꞌ, ix in yicꞌanelta vin̈ dꞌa jun bꞌabꞌel amacꞌ, ix in yicꞌanecꞌ vin̈ dꞌa schan̈il pacꞌan̈. 22 Ix vilan dꞌa junjun schiquintac amacꞌ chiꞌ, ay juntzan̈xo yunetac amacꞌ. Lajan yechel schan̈il. 20 metro steel, 15 metro sat. 23 A dꞌa spatictac juntzan̈ yunetac amacꞌ chiꞌ, ayqꞌue jun muro nabꞌa qꞌueen, axo dꞌa yichtac jun muro chiꞌ, ayqꞌue bꞌaj tzꞌoch cꞌacꞌ. 24 Ix lajvi chiꞌ, ix yalan vin̈ dꞌayin icha tic: Aton dꞌa juntzan̈ cusinu tic stzꞌan̈ nocꞌ silabꞌ ebꞌ smunlaj dꞌa templo tic, aton silabꞌ syacꞌ ebꞌ chon̈abꞌ, xchi vin̈ dꞌayin.