Jun a aꞌ sqꞌueul dꞌa yol templo
47
Ix lajvi chiꞌ, ix in yicꞌanoch vin̈ dꞌa spuertail templo dꞌa stojolal bꞌaj sjavi cꞌu. Axo ix vilani, ay jun a aꞌ sqꞌueul dꞌa yalan̈ stiꞌ puerta chiꞌ. A jun a aꞌ chiꞌ sbꞌatcan aꞌ dꞌa stojolal bꞌaj sjavi cꞌu, dꞌa co vachꞌ ayic tzon̈ elta dꞌa templo chiꞌ, tzꞌecꞌ aꞌ dꞌa stojolal sur dꞌa jun altar. 2 Ix lajvi chiꞌ, ix in yicꞌanelta vin̈ dꞌa spatic bꞌabꞌel amacꞌ chiꞌ, dꞌa jun puerta dꞌa stojolal norte. Ix bꞌat voyan in bꞌa dꞌa spatic amacꞌ chiꞌ yuj vin̈, masanto dꞌa jun puerta dꞌa stojolal bꞌaj sjavi cꞌu. Ix vilani, ay jun aꞌ yuneꞌ aꞌ sqꞌueul dꞌa stojolal sur dꞌa jun puerta chiꞌ. 3 A jun vin̈ chiꞌ, ix bꞌat vin̈ dꞌa stojolal bꞌaj sjavi cꞌu, yedꞌnac jun chꞌan̈ chꞌan̈ vin̈ yic echlabꞌ. Ix yechtan 500 metro vin̈, ix in yicꞌanecꞌ vin̈ dꞌa yol a aꞌ chiꞌ, a dꞌa sjaj voc ix qꞌueul aꞌ. 4 Ix lajvi chiꞌ, ix yechtanxi 500 metroxo vin̈, ix in yicꞌanxi ecꞌ vin̈ dꞌa yol aꞌ. Axo dꞌa sjolom in penec ix qꞌueul aꞌ. Ix yechtanxi 500 metroxo vin̈, ix in yicꞌanxi ecꞌ vin̈ dꞌa yol aꞌ. Axo dꞌa in nan̈al ix qꞌuecꞌoch aꞌ. 5 Ix yechtanxi 500 metroxo vin̈. A aꞌ chiꞌ te nivan ix aj aꞌ, man̈xalaj mach syal scꞌaxpaj dꞌa yol aꞌ. Te jul ix aj yich aꞌ, syal queqꞌui, palta toxon̈ej sco macꞌaꞌ. 6 Ix yalan vin̈ dꞌayin: Ach anima, scham val a naan tas ix il tic, xchi vin̈.Ix lajvi chiꞌ ix in yicꞌanxicot vin̈ dꞌa stitac a aꞌ chiꞌ. 7 Axo ix vilani, man̈xo jantacoc te teꞌ ay dꞌa stitac aꞌ chiꞌ. 8 Ix lajvi chiꞌ, ix yalanxi vin̈ dꞌayin: A jun aꞌ tic, sbꞌat aꞌ dꞌa stojolal bꞌaj sjavi cꞌu, sbꞌatn̈ej aꞌ dꞌa schꞌolanil aꞌ Jordán, sbꞌatcan aꞌ dꞌa yol aꞌ mar Muerto. Ayic ol cꞌoch aꞌ dꞌa yol aꞌ chiꞌ, ol chibꞌocqꞌue aꞌ mar chiꞌ yuj aꞌ. 9 Yalxon̈ej bꞌaj ol cꞌoch jun aꞌ tic, vachꞌ ol cajnaj masanil macan̈il nocꞌ nocꞌ dꞌa yol aꞌ, man̈xo jantacoc nocꞌ chay ol qꞌuibꞌoc. Yujto a jun aꞌ tic, ol chibꞌocqꞌue a aꞌ cꞌachiꞌ yuj aꞌ, ol te qꞌuibꞌ tastac ay sqꞌuinal dꞌa yol aꞌ. 10 Tzijtum ebꞌ yamum chay ol aj dꞌa stiꞌ aꞌ. A dꞌa En-gadi masanto dꞌa En-eglaim ol yacꞌ tacjoc schimpa ebꞌ yamum chay chiꞌ. Man̈xo jantacoc macan̈il nocꞌ chay ol qꞌuibꞌ dꞌa aꞌ, icha smacan̈il schayil aꞌ mar Mediterráneo. 11 Axo pax stitac aꞌ socꞌomtac, ma bꞌaj ay aꞌ cotac n̈ajabꞌ, man̈ ol chibꞌoclaj aꞌ, ataꞌ ay a aꞌ cꞌachiꞌ, ataꞌ ol yicꞌqꞌueta yatzꞌam anima. 12 A dꞌa stitac a aꞌ chiꞌ, ol qꞌuibꞌqꞌue masanil macan̈il te teꞌ sloji sat. A te teꞌ chiꞌ, malaj bꞌaqꞌuin̈ scꞌajbꞌanem xiil teꞌ. Man̈ ol yactejpax yacꞌan sat teꞌ. Junjun uj syacꞌn̈ej sat teꞌ, yujto a aꞌ tzꞌelta dꞌa templo ayoch yaloc teꞌ. A sat teꞌ chiꞌ, ol lochajoc, axo xil teꞌ ol och remeyoal, xchi vin̈ dꞌayin.
A stzꞌacan̈il jun nación chiꞌ
13 Ix yalan Jehová Yajal dꞌayin icha tic: Aton stzꞌacan̈il lum luum ol schaꞌ lajchaveꞌ macan̈ ebꞌ yin̈tilal Israel smacbꞌenoc. (A ebꞌ yin̈tilal vin̈aj José cha macan̈ smacbꞌen ebꞌ ol yicꞌaꞌ. 14 A in ix vacꞌ in tiꞌ vacꞌan jun lum tic dꞌa ebꞌ e mam yicham. Lajann̈ej tzꞌaj e pucanecꞌ lum dꞌa e cal e lajchaveꞌ in̈tilal. Aton jun lum tic ol vacꞌ e macbꞌenoc.)
15 Aton stzꞌacan̈il lum tic dꞌa jun pacꞌan̈ dꞌa stojolal norte: Schael dꞌa aꞌ mar Mediterráneo, scꞌoch dꞌa chon̈abꞌ Hetlón yedꞌ dꞌa chon̈abꞌ Zedad, 16 Hamat, Berota yedꞌ Sibraim, aton ay dꞌa scal stzꞌacan̈il Damasco yedꞌ Hamat masanto scꞌoch dꞌa Hazar-haticón, aton stzꞌacan̈ sbꞌa yedꞌ Haurán. 17 Yuj chiꞌ, a stzꞌacan̈il luum schael dꞌa aꞌ mar Mediterráneo masanto scꞌoch dꞌa Hazar-enán. Axo dꞌa norte scan lum yic chon̈abꞌ Damasco yedꞌ lum yic Hamat.
18 Axo stzꞌacan̈il lum dꞌa stojolal bꞌaj sjavi cꞌu, aton tic: Tzꞌecꞌ dꞌa stitac lum yic chon̈abꞌ Haurán yedꞌ yic Damasco. Sbꞌatn̈ej dꞌa stitac aꞌ Jordán, aton aꞌ chiꞌ tzꞌacan̈ yaj dꞌa scal chon̈abꞌ Galaad yedꞌ Israel, masanto scꞌoch dꞌa chon̈abꞌ Tamar dꞌa stojolal sur dꞌa yic aꞌ mar Muerto.
19 Axo pax stzꞌacan̈il lum dꞌa stojolal sur, aton tic: Schael dꞌa chon̈abꞌ Tamar, tzꞌecꞌ dꞌa sjajtac aꞌ Meriba-cades yedꞌ dꞌa aꞌ elumaꞌ yic Egipto, masanto scꞌoch dꞌa aꞌ Mediterráneo.
20 Axo pax dꞌa stojolal bꞌaj tzꞌem cꞌu, a aꞌ mar Mediterráneo ayoch stzꞌacan̈iloc luum. Schael dꞌa stzꞌacan̈il yic Egipto tzꞌecꞌn̈ej dꞌa stiꞌ aꞌ mar chiꞌ masanto scꞌoch bꞌaj tzon̈ och dꞌa chon̈abꞌ Hamat.
21 Aton jun lum tic yovalil spucchajecꞌ dꞌa e cal junjun macan̈ ex yin̈tilal Israel ex tic. 22 A lum ol eyicꞌ yedꞌ ebꞌ chꞌoc chon̈abꞌil ayecꞌ dꞌa e cal, aton ebꞌ ayxo yuninal. Ayic ol e pucanecꞌ luum dꞌa e cal, lajan lum yic ebꞌ chꞌoc chon̈abꞌil chiꞌ ol yicꞌ eyedꞌoc. 23 A in Jehová Yajal in svalaꞌ to a ebꞌ chꞌoc chon̈abꞌil chiꞌ, ol schaꞌ smacbꞌen ebꞌ yaln̈ej bꞌaj cajan dꞌa scal junjun in̈tilal chiꞌ.