8 A dꞌa stzꞌey lum smacbꞌen Judá, ataꞌ ay jun lum sicꞌbꞌileli: 12 kilómetro yedꞌ nan̈alxo sat luum. Axo steel luum, lajan yedꞌ steel lum smacbꞌen junjun in̈tilal, scot dꞌa stojolal bꞌaj sjavi cꞌu masanto dꞌa stojolal bꞌaj tzꞌem cꞌu. A dꞌa snan̈al lum chiꞌ, ataꞌ ay in templo.

9-10 A dꞌa jun lum luum vic yaj chiꞌ, ay jun macan̈ luum, 12 kilómetro yedꞌ nan̈alxo steel luum, oyeꞌ kilómetro pax sat luum. A dꞌa snan̈al lum chiꞌ, ataꞌ ay in templo. 11 A jun lum chiꞌ, yic lum ebꞌ sacerdote ayoch in yacꞌan servil, aton ebꞌ yin̈tilal vin̈aj Sadoc, ebꞌ maj tzacꞌlaj dꞌa spatic ebꞌ yetisraelal ayic in yactancan ebꞌ, icha ix yutej sbꞌa ebꞌ yetlevitail ebꞌ. 12-13 A dꞌa stiꞌ lum yic ebꞌ sacerdote chiꞌ, ataꞌ ay lum yic ebꞌ levita. A lum chiꞌ, 12 kilómetro yedꞌ nan̈alxo steel luum, oyeꞌ kilómetro pax sat luum. A lum vic yaj chiꞌ, 12 kilómetro yedꞌ nan̈alxo steel luum, 10 kilómetro sat luum. 14 A jun macan̈ lum chiꞌ an̈ej lum te vachꞌ dꞌa yol nación chiꞌ. Malaj junoc macan̈ lum chiꞌ syal schon̈chajeli. Max yal-laj sqꞌuexchaj luum, max yalpaxlaj yacꞌchaj lum dꞌa junocxo anima, yujto vic yaj luum.

15-18 Ay junxo macan̈ luum dꞌa scostil lum vic yaj chiꞌ, 12 kilómetro yedꞌ nan̈alxo steel luum, nan̈al yoxil kilómetro sat luum, comon yaj luum. A dꞌa snan̈al yol lum chiꞌ, ataꞌ ay nivan chon̈abꞌ. Axo jantacto lum colan scani, syal scajnaj anima, syal pax sva nocꞌ nocꞌ taꞌ. A jun chon̈abꞌ chiꞌ, 2 mil 250 metro schan̈il pacꞌan̈. A dꞌa spatictac chon̈abꞌ chiꞌ, ay jabꞌxo lum luum oyaneqꞌui, 125 metro sat luum. A nocꞌ nocꞌ sva dꞌa jabꞌxo lum luum chiꞌ. A dꞌa jun pacꞌan dꞌa stojolal bꞌaj sjavi cꞌu dꞌa jun chon̈abꞌ chiꞌ, ay jun macan̈ lum luum, oyeꞌ kilómetro steel luum. An̈ejaꞌ dꞌa stojolal bꞌaj tzꞌem cꞌu, ay pax junxo macan̈ luum, oyeꞌ kilómetro pax steel luum. A dꞌa juntzan̈ lum chiꞌ smunlaj anima ay dꞌa chon̈abꞌ chiꞌ, axo sat yavbꞌen ebꞌ smoloꞌ, a syabꞌlej ebꞌ. 19 Yaln̈ej mach anima dꞌa yic junjun macan̈ yin̈tilal Israel smunlaj dꞌa yol chon̈abꞌ chiꞌ, syal smunlaj ebꞌ dꞌa chabꞌ macan̈ lum chiꞌ. 20 Masanil lum vic yaji yedꞌ lum yic jun nivan chon̈abꞌ ay dꞌa snan̈al jun lum sicꞌbꞌilcanel chiꞌ, 12 kilómetro yedꞌ nan̈alxo lum dꞌa schan̈il pacꞌan̈.

21-22 A vin̈ yajal chon̈abꞌ chiꞌ, a vin̈ tzꞌican lum aycan dꞌa snan̈al lum smacbꞌen Judá yedꞌ lum smacbꞌen Benjamín, syalelcꞌochi, aton lum ay dꞌa stzꞌeytac lum vic yaji yedꞌ dꞌa stzꞌey lum yic chon̈abꞌ. Ay jun macan̈ luum dꞌa stojolal bꞌaj sjavi cꞌu, 12 kilómetro yedꞌ nan̈alxo sat luum, sbꞌatn̈ej lum dꞌa tzꞌacan̈ dꞌa stojolal bꞌaj sjavi cꞌu chiꞌ. Axo pax dꞌa stojolal bꞌaj tzꞌem cꞌu ay junxo macan̈ luum, masanto dꞌa aꞌ mar Mediterráneo scꞌoch luum. A dꞌa scal chabꞌ macan̈ lum chiꞌ, ataꞌ ay lum vic yaji, aton lum bꞌaj ay in templo yedꞌ lum yic ebꞌ sacerdote yedꞌ pax lum yic ebꞌ levita. Ataꞌ ay pax lum bꞌaj ay nivan chon̈abꞌ.

23-27 A lum smacbꞌen juntzan̈xo macan̈ yin̈tilal Israel, sbꞌatn̈ej dꞌa sur. Junjun in̈tilal ol scha junjun macan̈ sluum, schael dꞌa tzꞌacan̈ dꞌa stojolal bꞌaj sjavi cꞌu masanto scꞌoch dꞌa tzꞌacan̈ dꞌa stojolal bꞌaj tzꞌem cꞌu. Icha tic ol aj schaan smacbꞌen ebꞌ chiꞌ dꞌa stzolal: Benjamín, Simeón, Isacar, Zabulón yedꞌ Gad.

28 A dꞌa stojolal sur ay lum smacbꞌen Gad, a stzꞌacan̈il luum, schael dꞌa Tamar, tzꞌecꞌ dꞌa sjaj a aꞌ yic Meriba-cades, dꞌa aꞌ elumaꞌ yic Egipto, masanto scꞌoch dꞌa aꞌ mar Mediterráneo.

29 Aton jun lum chiꞌ ol scha juntzan̈ yin̈tilal Israel smacbꞌenoc. Icha chiꞌ ol aj e pucanecꞌ luum.

30-34 A jun chon̈abꞌ dꞌa snan̈al luum chiꞌ, ayoch muro dꞌa spatictac. A muro chiꞌ, 2 mil 250 metro yaj junjun pacꞌan̈, lajan yaj schan̈il pacꞌan̈. A dꞌa junjun pacꞌan̈ ay oxeꞌ puerta. A dꞌa junjun puerta chiꞌ ayoch sbꞌi junjun yin̈tilal Israel, icha tic yaj stzolal: A dꞌa oxeꞌ puerta dꞌa stojolal norte, ayoch sbꞌi yic Rubén, yic Judá yedꞌ yic Leví. A dꞌa oxeꞌ puerta dꞌa stojolal bꞌaj sjavi cꞌu, ayoch sbꞌi yic José, yic Benjamín yedꞌ yic Dan. A dꞌa oxeꞌ puerta dꞌa stojolal sur, ayoch sbꞌi yic Simeón, yic Isacar yedꞌ yic Zabulón. Axo pax dꞌa oxeꞌ puerta dꞌa stojolal bꞌaj tzꞌem cꞌu, ayoch sbꞌi yic Gad, yic Aser yedꞌ yic Neftalí. 35 A jun muro chiꞌ 9 kilómetro yajoch dꞌa spatictac nivan chon̈abꞌ chiꞌ. A sbꞌi jun chon̈abꞌ chiꞌ ayic ol bꞌeyn̈ejbꞌatoc: A Jehová ayecꞌ dꞌa tic, ol sbꞌiej, xchi Jehová, xin chi.